Read mumuye 2 Koranti 6 Bible Online

2 Koranti 6 - mumuye bible

2 Koranti 6

¹Ka shonang kɔ ruu pálɛ̀ ka nyaa zɔɔ nɛɛ Laa ɓee, ruu gàa nɔɔ ɓɔɔ Laa pàlɛ̀ nɔɔ tɔ̃ɔ tɔ ɓɛɛ, wu nwàng naa pàlɛ̀ nɔɔ ka dalɛ waati kpang.

²Laa kɔɔyi tɔɔ, “N tãa yee manɛ ka diki ɓɔɔ n nɛ̀ɛ́ palɛ nɔɔ tɔ̃ɔ kagn ɓɛɛ. N ti yì nɔɔ naa ka bii ka diki ɓɔɔ laa ɓɔɔ n ta yuu manɛ kagn a ɓɛɛ.” Nɔɔ ɓaa shoo ta, kãntang keɓe, ɓi kaa laa ɓɔɔ Laa yi nɔɔ naa ka bii ɓɛɛ kɔ. Wee ɓi kaa diki ɓɔɔ Laa ta yuu manɛ kagn kɔ.

³Ruu kasɛ kpang nɛɛ ruu shing zang wu palɛ vuu shi kpang, kpang, ka ruu nɔngkɔ, ruu kasɛ kpang ruu nɔɔ zang ɓɔɔ gbalang kpang.

⁴Ka vuu ɓɔɔ ruu pálɛ́ ɓɛɛ nandon, ruu tusu yuu ɓuru katɔ kɔ jong, nɛɛ ruu ɓuru zang shonang Laa ka danggn ɓɔɔ ruu mã́ ka jĩng dannang, nɛɛ naa ɓɔɔ zang kpãa ruu, a ɓɔɔ vuu ɓɔɔ kpãa ruu ɓɛɛ.

⁵Zang nyɔ ruu tɔ nɛɛ gbãa, zang mã ruu ka sãa, a zang ti kãarɛ ruu. Zang mã ruu nyaa ka shonang sasak, ruu ti roo hingro ka jĩng kpang, a nyɔkɔ ti nyɔ ruu.

⁶Ka nwannang tɔ̃ɔ ɓuru, nɛɛ danggn mãnang, nɛɛ tɔ̃ɔ ɓɔɔ ruu palɛ, ruu tusu yuu ɓuru nɛɛ ruu ɓuru zang shonang Laa. Nɛɛ bii Suru Laa, a ɓɔɔ kasɛnang ɓɔɔ ruu kasɛ zang nɛɛ mani niizang ɓɛɛ.

⁷Ɓɔɔ nɛɛ yee niizang ɓɔɔ ruu rang ɓɛɛ, a ɓɔɔ kaa nɛɛ naa vuu palɛnang Laa. Nwannang zang tɔ̃ɔ ka tĩng Laa kɔ nwang kaa naa vuu waa ɓuru, ɓɔɔ ruu ta sĩiri nɛɛ mani, a ruu ti gãng bii nɛɛ mani ɓɛɛ.

⁸Lee ɓɔɔ zang a ruu bannang, lee ɓɔɔ zang ti pálɛ́ ruu vuu yusɛ̃ɛ, zang dãa ruu ɓɔɔ katɔ. Lee ɓɔɔ zang ti dɔ̀ɔ ruu, zang risi ruu naa zang sèé, a ruu ti ráng ɓuru ruu ɓɔɔ niizang ɓɛɛ.

⁹Mɔɔ kɔɔ nɛɛ zang zi ruu nung kpang, a ɓeekpang zang zi ruu nung ɓuru tɔ gbayi gbayi, zang rìsí ruu naa vɔrɔ, a ruu ɓuru ti ningkãari. Zang dang ruu jĩng, a zang nyɔ ruu vɔrɔ kaa takpang.

¹⁰Zang làsɛ́ ruu yeti katɔ, a ruu tãa kaa tĩnang diki diki, mɔɔ kɔɔ nɛɛ vuu ka naa ɓuru kpang, a ɓi rukɔ shing zang ri wàlɛ́ vuu naa. Mɔɔ kɔɔ nɛɛ vuu ka naa ɓuru kpang, a ɓeekpang vuu piti ɓi ka naa ɓuru.

¹¹Zang Koranti, ruu rang nɔɔ yee ɓɔɔ niizang, ruu waasɛ nɔɔ vuu ɓɔɔ ka yeti ɓuru kpang.

¹²Ɓi rukɔ waasɛ naa ɓɔɔ ruu kasɛ nɔɔ ɓɛɛ kpang, ɓi nɔkɔ zãa yuu manɛ nɛɛ nɔɔ kàsɛ̀ ruu kpang.

¹³Kãntang keɓe, n rang nɔɔ yee kaa naa nɔɔ wujɛ mɛɛ. Nɔɔ kàsɛ̀ ruu naa ɓɔɔ ruu kàsɛ̀ nɔɔ ɓɛɛ. Nɔɔ tùsù ruu naa ɓɔɔ nɔɔ kasɛ ruu ɓɛɛ katɔ.

¹⁴Nɔ́ɔ kpálɛ̀ yuu tɔ̀ɔ́ nɛɛ zang ɓɔɔ ri dũng Laa kpang, naa nɔɔ doo gbete nɛɛ ri kpang. Ɓu vi ɓakɛ vuu ɓɔɔ tɔ̃ɔ nɛɛ vuu ɓɔɔ shi kpang viya? Vuu ɓɔɔ ti ɓakɛ nɔng yakɛnang ɓi kagn nɛɛ nɔng ɓɔɔ tɔ̀ɔ katɔ ɓɛɛ kpang.

¹⁵Nyaa Yeesɔ Kirisi nɛɛ ɓɔɔ Sheetang daa gbete ɓi jong kpang. Vuu kagn gbete ɓɔɔ ɓakɛ zang ɓɔɔ dũ̀ng Laa kpang, nɛɛ zang ɓɔɔ dũng wu katɔ ɓɛɛ kpang.

¹⁶Zang ɓɔɔ ri dũng Laa, ri palɛ biya nyaa ɓarɛ wu daa gbete nɛɛ zang ɓɔɔ ri bang vaka viya? Ka ruu nɔngkɔ, ruu ɓuru gãa Laa, Laa ɓɔɔ ningkãari ɓɛɛ. Laa kɔɔyi tɔɔ, “N palɛ nɔng nwannang mɛɛ ka nɔng zang mɛɛ, n nwang ka teteng ɓarɛ. N nwang Laa ɓɔɔ ri bang ɓɛɛ, ri nwang ɓarɛ kaa zang mɛɛ.”

¹⁷Ka ruu nɔngkɔ, Laa kɔɔyi tɔɔ, “Nwang ta, nɔ́ɔ yaa teteng ɓarɛ, nɔɔ kusu yuu manɛ dang gbete. Nɔ́ɔ pálɛ̀ vuu ɓɔɔ shi kpang, kpang, tɔ̀ɔ, n ta nɔɔ kati, nɔ́ɔ nwang zang mɛɛ.

¹⁸N nwang Daa manɛ, tɔ̀ɔ, nɔ́ɔ nwang manɛ kaa wujɛ mɛɛ ɓɔɔ soro nɛɛ ɓɔɔ varɛ. Laa ɓɔɔ wukɔ ɓa zang piti bannang katɔ kɔ kɔɔ ruu keɓe.”