Read mumuye 2 Koranti 7 Bible Online

2 Koranti 7 - mumuye bible

2 Koranti 7

¹Rɛɛ masang ɓɔɔ n kasɛ nɔɔ dɔɔli ɓɛɛ, Laa a nyaa keɓe nandon ka ruu ɓuru kɔ. Ka ruu nɔngkɔ, ruu yiti yuu ɓuru tɔ̃ɔ. Ruu yaa vuu piti ɓɔɔ shingnɛ, bii nɛɛ yeti ɓuru nwang shi kpang ka tĩng Laa ɓɛɛ. Ruu a Laa bannang, ruu a wu yuu ɓuru, ruu nwáng kaa zang ɓiɓɛ dɔ̃ɔ gbete.

²Nɔɔ tùsú ruu naa ɓɔɔ nɔɔ kàsɛ̀ ruu ɓɛɛ katɔ. Ruu palɛ zang ɓɔɔ kagn vuu shi kpang, kpang. Ruu shing zang ɓɔɔ lasɛ yuu ɓiɓɛ kpang, a ruu ti mulu zang ɓɔɔ kpang.

³N kɔɔ vuu keɓe nɛɛ, tɔ̀ɔ, n dɔng nɔɔ ruu kpang. Ka ruu ɓɔɔ, naa ɓaasi n kɔ̀ɔ ɓɛɛ, ruu kasɛ nɔɔ dɔɔli, ka ruu nɔngkɔ, naa ruu vɔ doo katɔ, naa ruu doo ningkãari, ruu ɓuru nɛɛ nɔɔ nɔng gbete.

⁴N yaa gn naa ka yuu manɛ kpang. N tuu yuu mɛɛ ka ruu manɛ dɔɔli. Ka jĩng ɓɔɔ ruu dang ɓɛɛ nandon, n yaa gn naa gn kpang. Yeti mɛɛ ɓi tĩnang kɔ shɛ̃ɛning.

⁵Ka knti ɓɔɔ ruu naa shɛ̃ɛ Makidoniya tɔ, ruu ɔ̃sɔ kpang tingkiring. Jĩng dannang ɓi nɛɛ nɔng piti, piti, zang ri haa nyaa nɛɛ ruu, ruu ti kaa vɔrɔ ka yeti ɓuru.

⁶A Laa ɓɔɔ wukɔ mã zang ɓɔɔ ri yaa gn naa tɔ danggn ɓɛɛ, mã ruu danggn nɛɛ anang Titu.

⁷Wu anang ɓiɓɛ kɔ shɛ̃ɛning shingnɛ yeti ɓuru valɛ kpang, ɓɔɔ ti kaa ruu naa ɓɔɔ nɔɔ mã wu danggn, ɓɔɔ wu kɔɔ ruu ɓɛɛ. Kɔɔ ruu naa ɓɔɔ nɔɔ kasɛ m zinang katɔ gbãng gbãng ɓɛɛ, a yeti ti lasɛ nɔɔ tɔ, ka ruu ɓɔɔ, nɔɔ lasɛ m yeti ɓɛɛ. Nɛɛ nɔɔ kasɛ tɔ kati, nɔɔ ta m nyaa kaa tɔ. Kãntang keɓe n tãa kaa tĩnang gbãng gbãng.

⁸Labeenang ɓɔɔ n bèe nɔɔ lasɛ nɔɔ yeti katɔ, a n tɔ̀ɔ, kaa takpang nɛɛ n nɛ̀ɛ́ bee nɔɔ labeenang bìí kpang, kpang. N zi tɔ labeenang bii lasɛ nɔɔ yeti katɔ, diki bée kaa takpang, yeti mɛɛ lasɛ kaa jong tɔkɔlɔng.

⁹A kãntang keɓe, n tãa tĩnang tɔ kati, wu ka ruu ɓɔɔ n lasɛ nɔɔ yeti ɓɛɛ kpang. Ɓi kaa ruu ɓɔɔ yeti ɓɔɔ lasɛ nɔɔ, shing nɔɔ tɔ, nɔɔ kɔ̃sɔ yeti tɔ ɓɛɛ. Yeti ɓɔɔ lasɛ nɔɔ ɓi Laa shingnɛ, ka ruu nɔngkɔ, ruu pàlɛ̀ nɔɔ vuu shi kpang ɓɔɔ kagn nɛɛ vuu kɔ ruu pálɛ́ ɓɛɛ kpang.

¹⁰Ka ruu ɓɔɔ, yeti lasɛnang ɓɔɔ ɓi ka naa ɓɔɔ Laa kasɛ, shing zang, zang gbãayu ka bìí Laa, tɔ̀ɔ, Laa wu ta yuu zang kati. Zang ɓɔɔ lasɛ yeti kagn ka yuu vuu keɓe kpang. A yeti lasɛnang ɓɔɔ ɓi shɔnzang shingnɛ waati, shingnɛ zang vɔ vɔrɔ suru.

¹¹Nɔɔ zi vuu ɓɔɔ yeti lasɛnang keɓe ɓɔɔ Laa kasɛ nɔɔ nɛɛ mani, pàlɛ̀ nɔɔ ɓɛɛ ta. Naa ɓɔɔ nɔɔ làabìi, nɔɔ zɔ̃ng yuu manɛ ɓɛɛ. Yeti manɛ lasɛ tɔ ka yuu vuu ɓɔɔ palɛ ɓɛɛ, a nɔɔ ti kaa vɔrɔ vuu ɓɔɔ naa a ka tĩng ɓɛɛ. Shing nɔɔ, nɔɔ kasɛ m zinang katɔ gbãng gbãng, a nɔɔ kasɛ nɛɛ nɔɔ ta m nyaa, nɔɔ dang zang ɓɔɔ palɛ m vuu shi kpang jĩng. Ka vuu kɔ palɛ ɓee nandon, nɔɔ tusu yuu manɛ nɛɛ ruu manɛ hãa ɓi kagn kpang.

¹²Ka ɓɔɔ n bée labeenang kaɓa, ruu mɛɛ hãa kagn nɛɛ zang ɓɔɔ palɛ vuu shi kpang, kpang. Ruu mɛɛ ti hãa kagn nɛɛ zang ɓɔɔ zang pàlɛ̀ wu vuu shi kpang ɓɛɛ kpang. N bèe m nɛɛ, tɔ̀ɔ, n tusu nɔɔ kaa gbàrɛ́ gbàrɛ́ ka tĩng Laa nɛɛ nɔɔ á yuu manɛ tɔ niizang, nɛɛ nɔɔ pàlɛ́ ruu shonang.

¹³Ka ruu nɔngkɔ, ruu mã danggn kati. Ruu mã danggn katɔ kɔ shɛ̃ɛning kpang, ruu tãa tĩnang tɔkn gbãng gbãng ka ruu tĩnang ɓɔɔ Titu tãa ɓɛɛ. Ka ruu ɓɔɔ, kɔɔ ruu naa ɓɔɔ nɔɔ nandon nɔɔ shing wu, wu yaa rɛ̃rɛnang ɓɔɔ bɛ̀ɛ́ wu rɛ̃rɛ ɓɛɛ.

¹⁴N kɔ̀ɔrɔ̀ wu, ruu bang bang katɔ ka yuu manɛ, a nɔɔ ti shingnɛ yusɛ̃ɛ tuu m kpang. Ruu kɔɔrɔ nɔɔ ruu niizang diki diki, ka ruu nɔngkɔ, ruu bang bang ɓɔɔ ruu kɔɔrɔ Titu ka yuu manɛ, nɔɔ shing tɔ nwang tɔ niizang.

¹⁵Titu kpaa danggn naa ɓɔɔ nɔɔ ta wu, nɔɔ tuu yuu manɛ kpang, a nɔɔ ti seng wu katɔ ɓɛɛ. A ɓɔɔ ti naa ɓɔɔ nɔɔ nandon nɔɔ kasɛ tɔ, nɔɔ dũng vuu ɓɔɔ wu kɔɔ nɔɔ ɓɛɛ. Ka ruu nɔngkɔ, kasɛnang ɓɔɔ wu kasɛ nɔɔ nɛɛ mani dàá kaa nɛɛ tĩng kɔ sasak.

¹⁶N tãa tĩnang tɔ kati kãntang keɓe, ka ruu ɓɔɔ, n shing danggn kaa tɔ dɔ̃ɔ gbete ka bii manɛ ɓɛɛ.