Read mumuye Galati 1 Bible Online

Galati 1 - mumuye bible

Galati 1

¹Labeenang keɓe nɛɛ bii mɛɛ nkɔ Bulu ɓɔɔ zang ɓàa m nyaa nɛɛ n nwang zang shonang Yeesɔ ɓɛɛ. Nyaa keɓe wu shɔnzang ɓaayi kpang, wu ti shɔnzang shingnɛ kpang, ɓi Yeesɔ Kirisi shingnɛ nɛɛ Laa ɓɔɔ wukɔ Daa ɓɔɔ wisi wu paa nɛɛ sàa ɓɛɛ.

²Rɛɛ manzung ɓuru ɓɔɔ ri nɛɛ n ka nihn nandon, ruu jee nɔɔ ɓɔɔ nɔɔ dũng Laa ka tipi Galati nyaa.

³N gaa Daa ɓuru Laa, nɛɛ Kpanti ɓuru Yeesɔ Kirisi, ri palɛ nɔɔ tɔ̃ɔ, ri ti shingnɛ yeti manɛ wu valɛ katɔ.

⁴Yeesɔ a zang yuu ɓiɓɛ, nɛɛ tɔ̀ɔ, wu ta yuu ɓuru ɓɔɔ ruu zang shi kpang ɓɛɛ. Wu ti ta ruu nɛɛ gbalang vuu shi kpang ɓɔɔ shɔnzang rɛ̃rɛ a ti palɛ ɓɛɛ. Vuu keɓe nwang nɔngkɔ, ka ruu ɓɔɔ, Daa ɓuru Laa kasɛ nɔngkɔ ɓɛɛ.

⁵Zang wu a Laa bannang ta gbing gbing. Nɔngkɔ.

⁶N mã naa tɔ ka danggn ka ruu manɛ. Knti bee gn vi, nɔɔ yaa zang ɓɔɔ ɓaa nɔɔ nyaa nɛɛ ruu tɔ̃ɔ ɓɔɔ Yeesɔ Kirisi palɛ nɔɔ, nɔɔ dũng kaa ruu ɓɔɔgn viya?

⁷Niizang, ruu tɔ̃ɔ ɓɔɔgn ɓi kagn kpang. N kɔɔ nɔngkɔ, ka ruu ɓɔɔ, zang ɓɔɔ kagn ri kpantɛ nɔɔ jĩng, ri kãa gbalang ɓɔɔ ri kɔ̃sɔ Ruu Tɔ̃ɔ Kirisi katɔ ɓɛɛ.

⁸A naa nɛɛ doo rukɔ, nɛɛ zang nyaa shonang Laa ɓɔɔ ka lapa, nɛɛ kɔɔ Ruu Tɔ̃ɔ ɓɔɔgn, wu ɓɔɔ ruu kɔɔ nɔɔ tĩng shɔɔnang kpang, zang dɔng wu ruu, zang tasɛ wu ka waa bang.

⁹Ruu kɔɔ ruu keɓe tɔ ka tĩng, ruu ti paasɛ kɔɔnang tɔkn nɛɛ, zang ɓɔɔgn nɛɛ kɔɔ nɔɔ Ruu Tɔ̃ɔ ɓɔɔ naabm nɛɛ ɓɔɔ nɔɔ ta ɓɛɛ, zang wu dɔng wu ruu, zang tasɛ wu ka waa bang.

¹⁰Ruu keɓe nwang naa ɓɔɔ n kãayi nɛɛ nyaating mɛɛ wu puu ka bii shɔnzang ya? Kpang, n kasɛ nyaating mɛɛ wu puu ka bii Laa. N kasɛ nɛɛ tɔ zang piti ri zi m nung ya? Naa n nɛɛ palɛ nɔngkɔ, n nɛɛ tɔ̀ɔ́ zang ɓɔɔ palɛ Kirisi shonang kpang.

¹¹N kaaɓi n kɔɔ nɔɔ rɛɛ manzung mɛɛ, Ruu Tɔ̃ɔ kɔ n kɔɔ nɔɔ ɓee, wu shɔnzang nwangsɛ kpang.

¹²N ti ta nɛɛ bii shɔnzang ɓɔɔ kpang. Wu ti shɔnzang tusu m kpang. Ɓi Yeesɔ Kirisi nɛɛ yuu ɓiɓɛ nwàngsɛ̀ m.

¹³Zang kɔɔ nɔɔ naa ɓɔɔ n nwáng ka tĩng bɛ̀ɛ́ n dũng doo gbalang zang Yahudi nɛɛ yeti gbete ɓɛɛ tɔ. Naa ɓɔɔ n dang zang ɓɔɔ ri dũng gbalang Kirisi jĩng, gn ɓarɛ kɔng m kpang ɓɛɛ tɔ. N pálɛ́ vuu ɓɔɔ n zũnung katɔ nandon, n tɔɔ n ningsi ri dɔ̃ɔ gbete.

¹⁴Nkɔ ka tĩng rɛɛ sangvaa mɛɛ nandon, ka ruu gbalang zang Yahudi dũnnang. N shing jĩng ka vuu ɓɔɔ rɛɛ dabang ɓuru ri tusu ɓɛɛ palɛnang gbãng gbãng.

¹⁵A Laa palɛ m tɔ̃ɔ, zɔ̃ng m bɛ̀ɛ́ zang yi m gn kpang, a ɓaa m nyaa nɛɛ n naa palɛ wu shonang. A ɓɔɔ wu naa kasɛ ka yeti ɓiɓɛ,

¹⁶nɛɛ wu nwangsɛ m Jaa ɓiɓɛ, nɛɛ tɔ̀ɔ n kɔɔ zang ɓɔɔ ri zang Yahudi kpang, Ruu Tɔ̃ɔ ɓɔɔ ka yuu Jaa keɓe. N daa ka bii zang ɓɔɔ nɛɛ wu kɔɔ m vuu ɓɔɔ wu zi ka yuu vuu keɓe kpang.

¹⁷N ti daa ka Urushalima ka bii zang ɓɔɔ ri nwang zang shonang Yeesɔ doo ka tĩng ɓɛɛ kpang. N daa m katɔ kɔ jong ka tipi Arabiya, a n gbãayu ka Damasiku.

¹⁸Sáa naa ɓa tɔ taati, a n daa ka Urushalima, n tɔɔ n daa zi Bituru nung kaa waasɛ̃, a n nwang nɛɛ wu diki kopi tu maani.

¹⁹N zi zang ɓɔɔ ka teteng rɛɛ zang shonang Yeesɔ kpang. N zi Yakub jaa nàá Kpanti ɓuru kɔ shɛ̃ɛning.

²⁰N kɔɔ nɔɔ ruu kɔ nwani ka tĩng Laa, vuu kɔ n bee nɔɔ ɓee, niizang, n suu sèé kpang.

²¹Nɛɛ knti, n naa daarɛ ka nɔng ɓɔɔ ka tipi Siriya nɛɛ tipi Silisiya.

²²Ka diki kaɓa, bɛ̀ɛ́ zang ɓɔɔ ri dũng Kirisi ka tipi Yahudi ri zi m gn nɛɛ jĩng ɓarɛ kpang.

²³Ri tãa ɓarɛ ruu ɓɔɔ zang kɔɔ rikɔ shɛ̃ɛning nɛɛ, “Yɔɔ ɓeleng ɓɔɔ dang ruu ɓɔɔ ruu dũng Kirisi jĩng, kãntang keɓe, kɔɔ zang ruu kaa yuu danggn shinnang ɓɔɔ bɛ̀ɛ́ nɛɛ wu ningsi katɔ ɓɛɛ”

²⁴A ri dɔɔ Laa ka ruu mɛɛ.