Read mumuye Galati 3 Bible Online

Galati 3 - mumuye bible

Galati 3

¹Ɓɔɔ nɔɔ zang tipi Galati nɔɔ shoko niizang. Ɓu wi zuu nɔɔ jĩng nɔngkɔ wiya? Zang kɔɔ ka shoo manɛ naa ɓɔɔ zang ɓaa Yeesɔ Kirisi naa ka laa a vɔrɛ ɓɛɛ.

²Ń hɛ̃ɛ nɔɔ ruu gbete keɓe, Laa a nɔɔ Suru ɓiɓɛ ka ruu ɓɔɔ nɔɔ palɛ vuu ɓɔɔ nyaa dannang kasɛ ɓɛɛ ya, kɔ ka ɓɔɔ nɔɔ tãa Ruu Tɔ̃ɔ, a nɔɔ shing danggn ɓɛɛ?

³Nɔɔ palɛ shoko vi nɔngkɔ viya? Nɔɔ gaayu Laa dũnnang, nɔɔ shing gn ka naa ɓɔɔ Suru Laa a nɔɔ ɓɛɛ. A nɔɔ nɛɛ nɔɔ hangsɛ nyaa kaa nɛɛ kaka yuu manɛ ya?

⁴Nɔɔ dang jĩng keɓe nandon ka dalɛ waati ya? N zi tɔ, wu nɔngkɔ kpang.

⁵Laa a nɔɔ Suru ɓiɓɛ, a ti palɛ vuu ɓɔɔ zang zirɛ zang mã naa ka danggn ka teteng manɛ. Palɛ ka ruu ɓɔɔ nɔɔ pálɛ̀ vuu ɓɔɔ nyaa dannang kasɛ ɓɛɛ ya, kɔ palɛ ka ruu ɓɔɔ, nɔɔ tãa Ruu Tɔ̃ɔ, a nɔɔ shing danggn ɓɛɛ?

⁶Danggn Ibirayi wu ning nɔɔ kpang. Zang bee vuu ka labeenang Laa ka yuu Ibirayi nɛɛ, “Ibirayi shing danggn ka bii Laa, a Laa ta wu nɛɛ wu nwang zang tɔ̃ɔ ka tĩng ɓiɓɛ.”

⁷Nɔɔ zi ka wukɔ nɛɛ zang ɓɔɔ ri shing danggn ka bii Laa rikɔ wujɛ Ibirayi ɓɔɔ niizang ɓɛɛ.

⁸Vuu ɓɔɔ Laa kɔɔyi, zang bee ka labeenang ɓiɓɛ doo ka tĩng nɛɛ, Laa naa risi zang ɓɔɔ ri zang Yahudi kpang ditɔ, ri nwang zang tɔ̃ɔ ka tĩng ɓiɓɛ, ka ruu danggn ɓɔɔ ri shing ɓɛɛ. A zang bee naa ɓɔɔ Laa kɔɔ Ibirayi Ruu Tɔ̃ɔ doo ka tĩng ɓɛɛ tɔɔ, “Laa naa shing zang koo keɓe nandon ri tãa tĩnang nɛɛ bii ɓaaɓɛ kɔ.”

⁹Ibirayi shing danggn, a Laa a wu tĩnang tãanang kati. Ka ruu nɔngkɔ, zang ɓɔɔ ri shing danggn, ri tãa tĩnang doo naa ɓɔɔ wu tãa kɔ.

¹⁰Zang ɓɔɔ ri shing gn ɓarɛ nɛɛ naa ri dũng nyaa dannang, ri nwang zang tɔ̃ɔ katɔ ka tĩng Laa, Laa naa dɔng ri ruu ditɔ. Ka ruu ɓɔɔ, zang bee ka labeenang Laa nɛɛ, “Zang piti ɓɔɔ nɛɛ dũng vuu piti ɓɔɔ zang bee ka yeti labeenang nyaa dannang Laa diki diki kpang, Laa dɔng wu ruu tɔ.”

¹¹Kãntang keɓe, ruu zi tɔ kati nɛɛ, zang ɓɔɔ nwáng zang tɔ̃ɔ kagn ka tĩng Laa nɛɛ bii nyaa dannang kpang. Ka ruu ɓɔɔ, zang bee ka yeti labeenang Laa tɔɔ, “Zang ɓɔɔ nɛɛ raa zang tɔ̃ɔ ka tĩng Laa, ka ruu danggn ɓɔɔ wu shingnɛ, wukɔ nwang ningkãari ɓɛɛ.”

¹²A nyaa dannang di yuu ɓi kaa tɔ̀ɔ́ ka bii danggn ɓɔɔ zang shing ɓɛɛ kpang. Zang bee ɓi katɔ kɔ jong, ka labeenang Laa nɛɛ, “Zang ɓɔɔ nɛɛ palɛ vuu piti ɓɔɔ nyaa dannang kasɛ, ti nwang ningkãari ka doo nyaa dannang kɔ.”

¹³Yeesɔ Kirisi ta yuu ɓuru tɔ, ka nyaa ɓɔɔ Laa nɛɛ kù ruu, ka ruu ɓɔɔ, ruu dũng nyaa dannang kpang ɓɛɛ. Ka ruu ɓɔɔ, Laa kù Kirisi nyaa jong ka nung ɓɔɔ wu nɛɛ kù ruu ɓɛɛ. Ka ruu ɓɔɔ, zang bee ka yeti labeenang Laa tɔɔ, “Zang ɓɔɔ zang nɛɛ haatɛ wu ka lapa, Laa ku wu nyaa tɔ ɓɛɛ.”

¹⁴Yeesɔ Kirisi palɛ vuu keɓe nɛɛ, tɔ̀ɔ wu shingnɛ, tĩnang ɓɔɔ Laa a Ibirayi nyaa ka yuu ɓiɓɛ, wu raa kaa ɓɔ̀ɔ́ zang ɓɔɔ ri zang Yahudi kpang, ri nɛɛ shing gn ka bii ɓiɓɛ ɓɛɛ. Tɔ̀ɔ, rùu ɓɔɔ ruu shing danggn tɔ ka bii Kirisi, Laa wu a ruu Suru ɓiɓɛ ɓɔɔ a ruu nyaa ka ruu ɓiɓɛ kati.

¹⁵Manzung, n kɔɔ nɔɔ ruu keɓe, n gãsɛ nɛɛ vuu ɓɔɔ ruu palɛ diki diki ɓɛɛ. Naa zang ziti ri a zɔɔ nyaa ka yuu vuu ɓɔɔ, zang ɓɔɔ ta nyaa keɓe kpang, zang ɓɔɔ ti gisi vuu tɔkn ka yuu ɓiɓɛ kpang.

¹⁶Ruu keɓe doo nɔngkɔ, Laa a ɓi Ibirayi nɛɛ zɔ̃ng ɓiɓɛ rɛɛ nyaa keɓe. Laa kɔɔ kpang ka yeti labeenang ɓiɓɛ nɛɛ, “Rɛɛ zɔ̃ng ɓaaɓɛ” Kpang. Nɛɛ nwàng kaa naa ráng yee ka yuu zang dɔɔli. Kɔɔyi tɔɔ, “Zɔ̃ng ɓaaɓɛ.” Rang yee ka yuu zang gbete kɔ nwani. Zang gbete keɓe wukɔ Kirisi.

¹⁷Vuu ɓɔɔ n kɔɔ keɓe, Laa a nyaa, a ti kɔɔyi nɛɛ wu palɛ vuu ɓɔɔ wu a nyaa ka yuu ɓiɓɛ katɔ. Nyaa dannang ɓɔɔ naa a ɓi kaa nɛɛ knti, bɛ̀ɛ́ sáa ɓa tɔ laa maani dakn dɛ̃ɛti tu bmati tu kopi, zunung ɓɔɔ wu ningsi nyaa ɓɔɔ Laa a tɔ ɓɛɛ kpang.

¹⁸Nɔɔ kɔɔ ɓu nɛɛ nɔɔ wàlɛ̀ vuu ɓɔɔ Laa a nɔɔ, ka ruu ɓɔɔ, nɔɔ dũng nyaa dannang ɓiɓɛ ya? Naa nɛ̀ɛ́ nɔngkɔ, nɛɛ ɓi tɔ̀ɔ́ ka ruu ɓɔɔ wu a nyaa nɛɛ wu a nɔɔ ɓɛɛ kpang. A ruu zi ɓuru tɔ nɛɛ, Laa a Ibirayi vuu kaɓa, ɓi ka doo nyaa ɓɔɔ wu a wu ɓɛɛ.

¹⁹Zang dang nyaa ɓu ka ruu viya? Nɛɛ zang zi vuu ɓɔɔ zang ɓaa nɛɛ vuu shi kpang palɛnang kati. Zɔ̃ng Ibirayi keɓe, ɓɔɔ Laa a nyaa ka yuu ɓiɓɛ nɛɛ a tɔ, nyaa dannang ti di nyaa ɓi kaa tɔ. Zang nyaa shonang Laa ɓɔɔ ka lapa ɓɛɛ rikɔ atɛ nyaa dannang keɓe, a á shɔnzang gbete ɓɔɔ nwang ɓi kaa naa zang ɓɔɔ shii ka teteng Laa nɛɛ zang piti ɓɛɛ.

²⁰Zang ɓɔɔ shii ka teteng zang, shii ɓi ka teteng zang ziti. A Laa ɓi ka bm gbete ka ɓɔɔ wu a Ibirayi nyaa ɓɛɛ.

²¹Wee nwang ɓu kaa naa nyaa ɓɔɔ Laa dangnɛ daa gbete nɛɛ, nyaa ɓɔɔ wu a ɓɛɛ kpang ya? Wu nɔngkɔ kpang tingkiring. Naa nyaa ɓɔɔ zang nɛɛ dang kagn ɓɔɔ a zang suru bii ɓɔɔ waa nyaa kpang, shɔnzang nɛɛ raa zang tɔ̃ɔ katɔ ka tĩng Laa nɛɛ bii nyaa dannang keɓe.

²²A zang bee ɓi tɔ, ka labeenang Laa nɛɛ, shɔnzang ɓɔɔ ka koo nandon, ri nwàng ɓarɛ naa ɓɔɔ vuu shi kpang mã ri ka sãa ɓɛɛ. Tɔɔ vuu ɓɔɔ Laa a nyaa ka yuu ɓiɓɛ ka doo danggn shinnang ka bii Yeesɔ Kirisi wu raa ɓɔ̀ɔ́ zang ɓɔɔ ri shing danggn tɔ kati.

²³Ka ruu ɓɔɔ, bɛ̀ɛ́ làá danggn shinnang a gn kpang, nyaa dannang mã ruu ɓuru nandon ka sãa, tɔ̀ɔ, danggn shinnang wu naa nwangsɛ bii nɛɛ mani.

²⁴Ka ruu nɔngkɔ, nyaa dannang kɔ yiti ruu sasak, tɔ̀ɔ, wu atɛ ruu ka bii Kirisi. Tɔɔ ruu nwang zang tɔ̃ɔ kati ka tĩng Laa, nɛɛ bii danggn ɓɔɔ ruu shing ɓɛɛ.

²⁵Kãntang kɔ, laa ɓɔɔ ruu shing danggn ka bii Yeesɔ a tɔ ɓee, wu tɔ̀ɔ́ nyaa dannang kɔ yiti ruu kpang.

²⁶Kãntang keɓe, nɔɔ nandon nɔɔ nwàng kaa wujɛ Laa, ka ruu danggn ɓɔɔ nɔɔ shing ka bii Yeesɔ Kirisi ɓɛɛ.

²⁷Nɔɔ nandon ɓɔɔ zang palɛ nɔɔ batizima tɔ, nɔɔ ɓakɛ yuu tɔ nɛɛ Yeesɔ Kirisi. Ka ruu nɔngkɔ, nɔɔ nwàng manɛ kaa nwannang Yeesɔ nɛɛ yuu ɓiɓɛ.

²⁸A vuu ɓɔɔ bàsɛ̀ teteng zang Yahudi nɛɛ zang ɓɔɔ ri zang Yahudi kpang, a jaafoo nɛɛ zang ɓɔɔ jaafoo kpang, a zang varɛ nɛɛ zang soro, ɓi tɔɔ kagn kpang. Nɔɔ nandon nɔɔ manɛ kaa gbete ka yuu ɓɔɔ nɔɔ ɓakɛ nɛɛ Yeesɔ Kirisi ɓɛɛ.

²⁹Naa nɔɔ zang Yeesɔ Kirisi, nɔɔ manɛ kaa zɔ̃ng Ibirayi, a nɔɔ naa ta vuu ɓɔɔ Laa a nyaa ka yuu ɓiɓɛ katɔ.