Read mumuye Afisa 5 Bible Online

Afisa 5 - mumuye bible

Afisa 5

¹Wee nɔɔ kaa wujɛ Laa, ɓɔɔ Laa kasɛ nɔɔ dɔɔli ɓee, nɔɔ nwáng nwannang naa ɓɔɔ Laa nwàng ɓɛɛ.

²Nɔɔ nwáng nwannang zɔɔ kasɛnang, naa ɓɔɔ Yeesɔ Kirisi kasɛ ruu ɓuru, a á yuu ɓiɓɛ nɛɛ zang nyɔ wu vɔrɔ ka ruu ɓuru ɓɛɛ. Suru bii ɓiɓɛ keɓe, ɓɔɔ wu a Laa, nwang kaa naa vuu ɓɔɔ á sɛ̃ɛ tɔ̃ɔ, ɓɔɔ zang dɔ̀ɔ́ Laa, a shingnɛ Laa tãa tĩnang ɓɛɛ.

³Wee nɔɔ kaa zang Laa ɓee, zang wu kɔɔ kpang nɛɛ nɔɔ rooro nɛɛ wujɛ soro kpang, nɛɛ nɔɔ palɛ naa doo zɔ̃ng dũndũng kiya kpang, nɛɛ nɔɔ shing jĩng ka vuu zang ɓɔɔ kpang.

⁴Nɔ́ɔ ti rangkɛ nyaa shoko nɛɛ yee sãnsãnrãng takpang. Nɔɔ zã̀a manɛ Laa kɔ jong.

⁵Ǹ kàsɛ̀ nɛɛ nɔ́ɔ zi vuu keɓe waasɛ̃. Zang ɓɔɔ palɛ dũndũng, ɓɔɔ rɛ̃rɛnang ɓiɓɛ ti kalang kalang kpang, ɓɔɔ ti shing jĩng ka vuu zang, naa daa nɔng ɓɔɔ Yeesɔ Kirisi roo kpanti kagn nɛɛ Laa ɓɛɛ kpang. Ka ruu ɓɔɔ rɛɛ vuu keɓe dàa wu ka yeti, ɓa ɓɔɔ wu palɛ vuu ɓɔɔ Laa kasɛ ɓɛɛ.

⁶Zang ɓɔɔ wu nwãarɛ nɔɔ nɛɛ nyaa shoko kpang. Ɓi ka ruu rɛɛ vuu shi kpang keɓe kɔ, gnvɔ shaa Laa nɛɛ zang ɓɔɔ ri dũng nyaa ɓiɓɛ kpang ɓɛɛ.

⁷Nɔ́ɔ kpálɛ̀ yuu nɛɛ zɔ̃ng zang ɓɔɔ ri palɛ rɛɛ shi kpang keɓe kpang.

⁸Ɓeleng bɛ̀ɛ́ nɔɔ nwang ka nɔng ɓɔɔ tɔ̀ɔ katɔ ɓɛɛ, a wee nɔɔ raa zang Kpanti Yeesɔ tɔ ɓee, nɔɔ manɛ kaa nɔng ɓɔɔ yakɛ katɔ ɓɛɛ. Ka ruu nɔngkɔ, nɔɔ nwang nwannang manɛ kaa naa zang ɓɔɔ ri ɓarɛ kaa zang nɔng ɓɔɔ yakɛ katɔ ɓɛɛ.

⁹Ka ruu ɓɔɔ, ɓi nɔng yakɛnang kɔ nwangsɛ vuu piti ɓɔɔ tɔ̃ɔ, nɛɛ ɓɔɔ waasɛ̃, nɛɛ ɓɔɔ niizang ɓɛɛ.

¹⁰Nɔɔ kãa vuu ɓɔɔ shing Kpanti Yeesɔ tãa tĩnang ɓɛɛ.

¹¹Ruu manɛ wu hãa ɓi kagn nɛɛ vuu ɓɔɔ daa naa palɛnang kpang, ɓɔɔ zang palɛ ka nɔng ɓɔɔ tɔ̀ɔ katɔ ɓɛɛ kpang. Nɔɔ nwangsɛ vuu ɓɔɔ naa weɓe katɔ ka dalɛ kɔ jong.

¹²Naa zang rang yee ka yuu vuu ɓɔɔ zang keɓe ri palɛ̀ ka nɔng ɓɔɔ tɔ̀ɔ katɔ, ɓi vuu yusɛ̃ɛ.

¹³Nɔng ɓɔɔ yakɛ katɔ, tùsú zang naa ɓɔɔ vuu keɓe nwàng ɓɛɛ.

¹⁴Ka ruu ɓɔɔ, vuu ɓɔɔ zang zi katɔ piti, nwang ɓi naa nɔng yakɛnang ɓɛɛ. Ka ruu nɔngkɔ, zang kɔɔyi nɛɛ, “Hingsi jĩng, zang ɓɔɔ roo katɔ ɓɛɛ, a mɔɔ yupaa ka vɔrɔ, Kirisi wu yakɛ nɔng ka yuu ɓaaɓɛ.”

¹⁵Ka ruu nɔngkɔ, nɔɔ gãng jĩng ka nwannang manɛ waasɛ̃. Nɔ́ɔ nwàng wu naa shoko kpang, nɔɔ nwáng naa zang ɓɔɔ ri zũng katɔ ɓɛɛ.

¹⁶Naa nɔɔ walɛ gbalang vuu palɛnang, nɔɔ palɛ vuu bìí waasɛ̃, ka ruu ɓɔɔ, rɛɛ diki keɓe, shi ɓi takpang ɓɛɛ.

¹⁷Nɔ́ɔ nwàng wu naa shoko kpang, nɔɔ kãa manɛ gbalang ɓɔɔ nɔɔ zi vuu ɓɔɔ Laa nɛɛ nɔɔ pálɛ́ ɓɛɛ.

¹⁸Nɔ́ɔ yaa sàa wu si nɔɔ kpang, lasɛ nɔɔ katɔ. Nɔɔ yaa Suru Laa kɔ jong wu nwang ka yeti manɛ.

¹⁹Nɔɔ rang zɔɔ yee nɛɛ soo ɓɔɔ nɔɔ dɔɔ Kirisi nɛɛ mani ɓɛɛ, nɛɛ soo ɓɔɔ nɔɔ zãa wu nɛɛ mani, a ɓɔɔ nɛɛ soo ɓɔɔ Suru Laa kpɛ̃ɛrɛ zang ɓɛɛ. Nɔɔ gaa soo, nɔ́ɔ dɔɔ Kirisi ka yeti manɛ.

²⁰Nɔ́ɔ zãa Daa ɓuru Laa diki diki, ka ruu vuu piti, nɛɛ nung Kpanti Yeesɔ Kirisi.

²¹Nɔɔ ɓáa shoo ka nyaa zɔɔ ka ruu bannang ɓɔɔ nɔɔ a Kirisi ɓɛɛ.

²²Zang soro ɓɔɔ zang gee nɔɔ katɔ ɓɛɛ, nɔɔ ɓáa shoo ka nyaa varɛ manɛ naa ɓɔɔ nɔɔ ɓaa ka nyaa Kpanti Yeesɔ ɓɛɛ.

²³Ka ruu ɓɔɔ, varɛ wukɔ zang bang ka yuu soro ɓiɓɛ, naa ɓɔɔ Yeesɔ Kirisi zang bang ka yuu zang ɓɔɔ ri dũng wu ɓɛɛ. A Yeesɔ Kirisi kɔ ta yuu zang ɓɔɔ ri dũng wu, ɓɔɔ ri nwang ɓarɛ naa bii ɓiɓɛ ɓɛɛ.

²⁴Ka ruu nɔngkɔ, zang soro ɓɔɔ zang gee nɔɔ katɔ ɓɛɛ, nɔɔ ɓáa shoo ka nyaa varɛ manɛ ka vuu piti, naa ɓɔɔ zang ɓɔɔ ri dũng Yeesɔ Kirisi ri ɓaa shoo ka nyaa ɓiɓɛ ɓɛɛ.

²⁵Varɛ, nɔɔ kàsɛ́ soro manɛ naa ɓɔɔ Yeesɔ Kirisi kàsɛ̀ zang ɓɔɔ ri dũng wu, a á zang yuu ɓiɓɛ, nɛɛ zang nyɔ wu vɔrɔ ka ruu ɓarɛ ɓɛɛ.

²⁶Nɛɛ tɔ̀ɔ, wu shing ri, ri nwang zang Laa nɛɛ naa vuu palɛnang ruu ɓiɓɛ, ka knti ɓɔɔ wu sɔɔ ri tɔ nɛɛ mii ɓɛɛ.

²⁷Kirisi palɛ vuu keɓe nɛɛ tɔ̀ɔ, zang ɓɔɔ ri dũng wu, ri nwang kaa zang ɓɔɔ ri shi dɔɔli, kalang kalang, shi kpang kagn bii ɓarɛ kpang ɓɛɛ. Vuu ɓɔɔ ti luku ri ka bii kpang, bii ɓarɛ ti gɔ́ɔrɔ̀ kpang, a vuu shi kpang ti kagn bii ɓarɛ kpang.

²⁸Varɛ ri wu kàsɛ̀ soro ɓarɛ katɔ naa ɓɔɔ ri kasɛ bii ɓarɛ ɓɛɛ. Varɛ ɓɔɔ kasɛ soro ɓiɓɛ, kasɛ ɓi yuu ɓiɓɛ.

²⁹(Zang ɓɔɔ bɛ̃ɛ bii ɓiɓɛ ɓi gngn kpang. A bii ɓiɓɛ ɓi vuu shaanang kɔ jong, wu gãng jĩng kagn waasɛ̃, naa ɓɔɔ Yeesɔ Kirisi gãng jĩng ka zang ɓɔɔ ri dũng wu ɓɛɛ.

³⁰Ka ruu ɓɔɔ, ruu ɓuru ka teteng zang ɓɔɔ ri dũng wu, ɓɔɔ rikɔ nwang kaa naa vuu ɓɔɔ ri ka bii ɓiɓɛ ɓɛɛ.)

³¹Naa ɓɔɔ zang bee ka yeti Labeenang Laa ɓɛɛ nɛɛ, “ka ruu vuu keɓe kɔ, zang varɛ yaa daa ɓiɓɛ nɛɛ nàá ɓiɓɛ, ri gee zɔɔ nɛɛ ɓeeso, ri ziti keɓe, ri nwang kaa naa shɔnzang gbete.”

³²Ruu niizang ɓɔɔ bang, ɓɔɔ ruu keɓe nwangsɛ kagn, n zirɛ, zang rang yee ɓi ka yuu Kirisi nɛɛ zang ɓɔɔ ri dũng wu ɓɛɛ.

³³Zang ráng nɔkɔ ruu keɓe jong. Varɛ ɓu wu kasɛ ɓeeso naa ɓɔɔ wu kasɛ yuu ɓiɓɛ ɓɛɛ, a soro ɓu wu seng ɓeevɛ katɔ.