Read mumuye Filipi 1 Bible Online

Filipi 1 - mumuye bible

Filipi 1

¹Labeenang keɓe nɛɛ bii mɛɛ Bulu nɛɛ Timoti, ɓɔɔ ruu jaafoo Yeesɔ Kirisi ɓɛɛ. Ruu bèé nɔɔ, zang Laa nandon, ɓɔɔ nɔɔ shing danggn tɔ ka bii Yeesɔ Kirisi, ɓɔɔ nɔɔ ka gari Filipi ɓɛɛ. A ɓɔɔ nɔkɔ zang bang bang nɛɛ zang ɓɔɔ ri palɛ shonang ka ruu zang Laa ɓɛɛ.

²Ruu gàá Daa ɓuru Laa nɛɛ Kpanti ɓuru Yeesɔ Kirisi, ri pàlɛ̀ nɔɔ tɔ̃ɔ, ri ti shingnɛ yeti manɛ wu valɛ katɔ.

³Diki diki n nɛɛ rɛ̃rɛ ruu manɛ tɔ, n zãa Laa mɛɛ ka ruu manɛ.

⁴Ka laa ɓɔɔ n gàá Laa piti ka yuu manɛ nandon, n tãa tĩnang dɔɔli.

⁵Ka ruu ɓɔɔ, nɔɔ yì m naa ka bii ka ɓɔɔ n kɔɔrɔ zang Ruu Tɔ̃ɔ Laa ɓɛɛ. Nɔɔ yì m naa kagn ka ɓɔɔ n gáayú ɓɛɛ, à nɛɛ mani kãntang keɓe.

⁶N yaa gn naa kpang, Laa ɓɔɔ gaayu shonang tɔ̃ɔ kaɓa ka yeti manɛ, naa hangsɛ shonang keɓe ditɔ ka diki ɓɔɔ Yeesɔ Kirisi naa jɛ̃ɛ zang ruu ɓɛɛ.

⁷Daa naa ɓɔɔ n rɛ̃rɛ zɔ̃ng rɛ̃rɛnang keɓe tɔ ka yuu manɛ nandon, ka ruu ɓɔɔ, n kasɛ ruu manɛ katɔ ka yeti mɛɛ dɔɔli ɓɛɛ. Ka ruu ɓɔɔ, nɔɔ nɛɛ n, ruu zi tɔ̃ɔ ɓɔɔ Laa palɛ ruu ka nyaa zɔɔ tɔ. Kãntang kɔ wee zang mã m ka sãa, a ɓɔɔ ti ka laa ɓɔɔ n shii ka nɔng ɓɔɔ zang jɛ̃ɛ zang ruu ɓɛɛ. N tusu zang nɛɛ Ruu Tɔ̃ɔ Laa ɓi niizang kɔ nwani ɓɛɛ.

⁸Laa zi tɔ niizang nɛɛ n kasɛ nɔɔ katɔ dɔɔli, naa ɓɔɔ Yeesɔ Kirisi kasɛ ruu ɓɛɛ.

⁹N gàá Laa ka ruu manɛ, nɛɛ, kasɛnang ɓɔɔ nɔɔ kasɛ ruu zɔɔ nɛɛ manɛ wu daa nɛɛ tĩng sasak. Nɔ́ɔ ti zi vuu dɔɔli, nɔ́ɔ zunung naa ɓɔɔ nɔɔ basɛ teteng vuu tɔ̃ɔ nɛɛ ɓɔɔ shi kpang ɓɛɛ ka vuu piti.

¹⁰Tɔ̀ɔ, nɔ́ɔ zunung ɓɔɔ nɔɔ zɔ̃ng vuu ɓɔɔ wukɔ tɔ̃ɔ ɓa Vuu piti ɓɛɛ kati. Vuu keɓe kɔ ri shingnɛ ka diki ɓɔɔ Yeesɔ Kirisi naa jɛ̃ɛ zang ruu kagn, nɔɔ nwáng manɛ zang ɓɔɔ yeti ɓarɛ tɔ̃ɔ ɓɛɛ. Zang ɓɔɔ zang naa tɔɔ kpang nɛɛ ri palɛ vuu shi kpang tɔ kpang ɓɛɛ.

¹¹N ti gaa Laa nɛɛ nɔ́ɔ walɛ nwannang tɔ̃ɔ ɓɔɔ a nɛɛ bii Yeesɔ Kirisi ɓɛɛ, nɔ́ɔ ti palɛ vuu ɓɔɔ tɔ̃ɔ jong. Zang ɓɔɔ ri zi vuu tɔ̃ɔ ɓɔɔ nɔɔ palɛ, ri dɔ̀ɔ Laa, ri ti a wu bannang ka ruu vuu keɓe.

¹²Manzung ɓɔɔ ri dũng doo Laa kɔ ɓɛɛ, n kasɛ, nɔɔ zirɛ nɛɛ vuu kɔ palɛ m ɓee, shingnɛ Ruu Laa daa ɓi nɛɛ tĩng kɔ jong.

¹³Vuu keɓe kɔ shingnɛ sɔɔja nandon ɓɔɔ ri gã gãa kpanti Rooma nɛɛ zang ɓɔɔ nandon, ri zi kati nɛɛ zang mã m ka sãa, ka ruu ɓɔɔ, n dũng Kirisi ɓɛɛ.

¹⁴Mãnang kɔ zang mã m ka sãa ɓee, mã̀ rɛɛ manzung mɛɛ ɓɔɔ ri dũng doo Laa kɔ danggn tɔ ka gbalang kpanti Yeesɔ. Ri kɔɔrɔ zang Ruu Laa kana gbãng gbãng ri kaa vɔrɔ takpang.

¹⁵Niizang, zang ɓɔɔ ri kagn, ri kɔɔ zang ruu ka yuu Yeesɔ Kirisi ka ruu ɓɔɔ ri kaa sũnyaa, a ri ti kasɛ nɛɛ ri shing zang, zang ri palɛ nyaa ɓɛɛ. A zang ɓɔɔ ri kɔɔ zang Ruu Laa ɓi ka ruu ɓɔɔ ri kasɛ nɛɛ ri pàlɛ́ zang tɔ̃ɔ ɓɛɛ.

¹⁶Zang doo knti keɓe ri palɛ nɔngkɔ, ka ruu ɓɔɔ, ri kasɛ m katɔ ɓɛɛ. Ri ti zi tɔ nɛɛ Laa shingnɛ nɛɛ zang mã m ka sãa, tɔ̀ɔ, n tusu zang kati nɛɛ Ruu Laa ɓi niizang kɔ nwani ɓɛɛ.

¹⁷Zang ɓɔɔ ri kaa sũnyaa kaɓa, ri kɔɔrɔ zang ruu ka yuu Yeesɔ nabm, ka ruu ɓɔɔ, ri kasɛ nɛɛ ri ɓa m ɓɛɛ. A ri kɔɔrɔ ruu ɓarɛ kaa nyaa lapa waati. Ri kasɛ nɛɛ ri gisi m jĩng dannang ka yuu, ka wee n ka sãa ɓee.

¹⁸Pálɛ̀ vuu ɓɔɔ kpang, naa ri nwãarɛ zang doo katɔ, naa ri nwãarɛ zang ka takpang, n tãa m tĩnang, ka ruu ɓɔɔ, Ruu Kirisi kɔ ɓa vuu piti, a zang ti kɔɔrɔ zang ruu bìí kana ɓɛɛ. N tãa m kaa tĩnang kɔ sasak.

¹⁹Ka ruu ɓɔɔ, n zi tɔ, Laa ɓɔɔ nɔɔ gaa m, nɛɛ naa ɓɔɔ Suru Yeesɔ Kirisi yi m ka bii ɓɛɛ, naa shingnɛ zang naa yaa m naa ditɔ.

²⁰Vuu ɓɔɔ n kasɛ ka yeti mɛɛ, a n ti shing gn kagn, ɓi naa ɓɔɔ n pálɛ̀ vuu ɓɔɔ yusɛ̃ɛ naa tuu m kpang ɓɛɛ. Naa n ningkãari a naa n vɔ doo katɔ, n kasɛ diki diki n nwang zang ɓɔɔ kaa vɔrɔ kpang, naa wee n kãntang ɓee. Tɔ̀ɔ, n shingnɛ, zang a Yeesɔ Kirisi bannang kati.

²¹Ka ruu ɓɔɔ, ka bii mɛɛ, naa n nwang ningkãari, n nwang ka ruu Yeesɔ Kirisi kɔ gbete. Naa n vɔ doo katɔ piti, wukɔ ti tɔ̃ɔ.

²²Naa n nwang ningkãari ka koo keɓe, ń ti palɛ shonang ɓɔɔ yi zang naa ka bii ɓɛɛ katɔ. Ka ruu nɔngkɔ, n zi ɓɔɔ n zɔ̃ng gbete ɓɛɛ kpang.

²³N shii kaa teteng vuu ziti keɓe. N kasɛ gbãng gbãng, n yaa koo keɓe, n daa nwang kaa nɛɛ Yeesɔ Kirisi. Ka ruu ɓɔɔ, wukɔ tɔ̃ɔ, ɓa nwannang ningkãari ka koo keɓe katɔ ɓɛɛ.

²⁴A naa n nwang ningkãari ka koo keɓe, wukɔ daayi jong ka ruu manɛ.

²⁵Nn, nɔngkɔ niizang, ka ruu nɔngkɔ, n nwang kaa nɛɛ nɔɔ ka koo keɓe. N nwang nɛɛ nɔɔ tɔ̀ɔ, ń yi nɔɔ naa kaa bii, nɔɔ shing danggn kaa gbãng gbãng. Nɔɔ ti tãa tĩnang kaa dɔɔli.

²⁶Tɔ̀ɔ, n nɛɛ a tɔ ka nɔng manɛ tɔkn, nɔɔ naa tãa tĩnang kaa dɔɔli, nɔɔ dɔɔ Yeesɔ Kirisi ka ruu vuu ɓɔɔ wu pàlɛ̀ m ɓɛɛ.

²⁷Nwannang manɛ, wu nwang naa ɓɔɔ Ruu Tɔ̃ɔ Yeesɔ Kirisi kɔɔ ɓɛɛ. Wukɔ daayi, tɔ̀ɔ, naa n naa leng nɔɔ, naa n nɛɛ ti leng nɔɔ dòo kpang, n tãa nyaa katɔ nɛɛ rɛ̃rɛnang manɛ dàá gbete. N ti tãa katɔ nɛɛ nɔɔ kpalɛ yuu nɛɛ zɔɔ, nɔɔ shii gbãng gbãng, nɔɔ kasɛ nɛɛ zang ri shing danggn ka Ruu Tɔ̃ɔ Laa.

²⁸Ń ti tãayi nɛɛ nɔɔ kaa vɔrɔ zang ɓɔɔ ri shing jĩng nɛɛ nɔɔ kpang ɓɛɛ kpang tingkiring. Wukɔ naa tusu ri kati nɛɛ Laa naa ningsi ri, nɔɔ naa wɔ manɛ katɔ. A nɔɔ ti zi tɔ nɛɛ Laa nɛɛ yuu ɓiɓɛ naa tusu ri ditɔ nɛɛ vuu keɓe nɔngkɔ.

²⁹Laa ɓɔɔ yàa nɔɔ gbalang nɛɛ nɔ́ɔ shing danggn ka bii Kirisi ɓɛɛ, ti yaa nɔɔ gbalang tɔ nɛɛ nɔ́ɔ dang jĩng ka ruu ɓiɓɛ.

³⁰Nɔɔ zi m katɔ ka ɓɔɔ n dang jĩng ɓɛɛ, nɔɔ ti tãa nyaa jĩng dannang mɛɛ doo naa. Kãntang keɓe, nɔɔ dang kaa jĩng jong naa ɓɔɔ n dàng ɓɛɛ.