Read mumuye Filipi 3 Bible Online

Filipi 3 - mumuye bible

Filipi 3

¹Rɛɛ manzung, ń gisi nɔɔ ruu keɓe. Kpanti ɓuru wu shingnɛ nɔ́ɔ tãa tĩnang dɔɔli. Naa wee n bee nɔɔ doo vuu ɓɔɔ n bèe nɔɔ tɔ ka tĩng ɓee, vuu keɓe kpãa m kpang. Niizang n palɛ nɔngkɔ, tɔ̀ɔ, vuu ɓɔɔ wu lee nɔɔ naa kaa tɔ̀ɔ́ bii kpang.

²Nɔɔ gãng jĩng waasɛ̃ ka zang ɓɔɔ ri nwang naa zaa ɓɛɛ. Zang ɓɔɔ ri palɛ vuu shi kpang ɓɛɛ. Ri yi tĩng nɛɛ, zang ri yee shaa katɔ ɓɛɛ.

³Ka ruu ɓɔɔ, ɓi rukɔ zang ɓɔɔ zang yee ri shaa ɓɔɔ niizang ɓɛɛ. Rukɔ bang Laa nɛɛ naa vuu palɛnang Suru ɓiɓɛ, a ruu ti walɛ bannang ɓuru ka bii Yeesɔ Kirisi. Ruu pãng yuu ɓuru ka rɛɛ vuu ɓɔɔ ɓi ɓɔɔ bìí shɔnzang kpang.

⁴Vuu ɓɔɔ kagn ka koo keɓe ɓɔɔ zang pãng yuu kagn kpang. Naa vuu ɓɔɔ nɛɛ kagn, nkɔ nɛɛ pãng yuu kagn nɛɛ ɓa zang piti.

⁵Zang yee m shaa, bɛ̀ɛ́ zang yi m tɔ diki mɛɛ daa mantaati. N zang Isirela kirik. N zang zɔ̃ng Biliyaminu. N ti zang Yahudi kɔ nandon. Ka gbalang nyaa ɓɔɔ zang Yahudi ri dang ɓɛɛ, bɛ̀ɛ́ n ka vaa rɛɛ Farisi.

⁶Ɓeleng n tusu zang naa ɓɔɔ n palɛ vuu zang Yahudi nɛɛ kaka bii mɛɛ nandon ɓɛɛ. Ka ɓɔɔ n dang zang ɓɔɔ ri dũng Yeesɔ Kirisi jĩng. N ta nyaa dannang zang Yahudi ɓɔɔ shing zang, zang nwang zang tɔ̃ɔ ka tĩng Laa wu gbete kpang. Ka ruu nɔngkɔ, zang ɓɔɔ tɔɔ kpang nɛɛ n palɛ vuu shi kpang tɔ kpang.

⁷Vuu ɓɔɔ ɓeleng n zirɛ mɔɔ kɔ̀ɔ́ nɛɛ nwang vuu ɓɔɔ katɔ, n risi tɔ, tɔ̀ɔ́ vuu ɓɔɔ kpang, ka ruu Kirisi.

⁸Niizang, vuu naa mɛɛ nandon, n risi tɔ naa vuu ɓɔɔ kpang, ka ruu ɓɔɔ zinang ɓɔɔ n zi Kpanti mɛɛ Yeesɔ Kirisi, ɓa vuu piti katɔ ɓɛɛ. Ka ruu Yeesɔ kɔ n yaa vuu piti tɔ. N risi vuu piti naa vuu wɔ̀sɔ̀nang, tɔ̀ɔ, n wàlɛ̀ m kaa Yeesɔ kɔ shɛ̃ɛning.

⁹Ń ti nwang ɓɔɔ ɓiɓɛ. Laa wu tuu m zang tɔ̃ɔ ka tĩng ɓiɓɛ, ka ruu ɓɔɔ, n shing danggn ka bii Kirisi ɓɛɛ. Wu ka ruu vuu ɓɔɔ kagn ɓɔɔ n palɛ ɓɛɛ kpang, wu ti ka ruu ɓɔɔ n dũng nyaa ɓɔɔ zang Yahudi dang ɓɛɛ kpang. Ɓi Laa kɔ risi m, n nwang zang tɔ̃ɔ ka tĩng ɓiɓɛ, ka ruu ɓɔɔ, n shing danggn ka bii ɓiɓɛ ɓɛɛ.

¹⁰N kasɛ m vuu gbete, wukɔ nɛɛ, n zi Kirisi nɛɛ yuu ɓiɓɛ, n ti zi naa vuu palɛnang ɓɔɔ nwangnɛ, ka ruu ɓɔɔ, Laa wisi wu paa nɛɛ saa. N kasɛ n ɓakɛ yuu jong nɛɛ wu, n dang jĩng, n nwang kaa jong naa wu ka vɔrɔ ɓɔɔ wu vɔ ɓɛɛ.

¹¹Tɔ̀ɔ, Laa nɛɛ kasɛ tɔ, Laa wu wisi m paa jong naa ɓɔɔ wisi wu paa ɓɛɛ.

¹²N tɔɔ kpang nɛɛ n walɛ rɛɛ vuu ɓɔɔ n shing jĩng mɛɛ kagn ka tĩng kaɓa kpang, n ti tɔɔ kpang nɛɛ shi kpang kagn ka bii mɛɛ kpang, kpang. N daa m nɛɛ tĩng, tɔ̀ɔ, n naa yiti rɛɛ vuu kaɓa naa ɓɔɔ Yeesɔ Kirisi yiti m jong ɓɛɛ.

¹³Rɛɛ manzung, n tɔ́ɔ kpang nɛɛ, n walɛ rɛɛ vuu kaɓa tɔ kpang. Vuu gbete ɓɔɔ n palɛ keɓe. N rɛ̃rɛ m tɔ̀ɔ́ ka yuu vuu ɓɔɔ ɓa tɔ ɓɛɛ kpang, n daa m nɛɛ tĩng, n shing jĩng m ka vuu ɓɔɔ ka tĩng mɛɛ ɓɛɛ.

¹⁴N daa nɛɛ tĩng kɔ sasak, tɔ̀ɔ, n daa shɛ̃ɛ nɔng ɓɔɔ n shing jĩng kagn ka tĩng ɓɛɛ. Tɔ̀ɔ, n naa walɛ vuu ɓɔɔ Laa ɓaa m nyaa nɛɛ n naa walɛ nɛɛ bii Yeesɔ Kirisi ɓɛɛ. Laa nɛɛ, n naa nwang nɛɛ wu ka lapa.

¹⁵Wee naa ɓɔɔ rùu ɓɔɔ rùu tɔ̀ɔ́ wujɛ ka rɛɛ vuu Suru Laa kpang, rùu rɛ̃rɛ ɓɛɛ kɔ. Naa zang ɓɔɔ kagn teteng manɛ rɛ̃rɛ náabm̀, Laa naa tusu nɔɔ ditɔ nɔɔ zi waasɛ̃.

¹⁶Vuu ɓɔɔ ɓa vuu piti ɓɛɛ, ruu dũng rɛɛ vuu ɓɔɔ bɛ̀ɛ́ ruu dũng ɓɛɛ kɔ sasak.

¹⁷Rɛɛ manzung, nɔɔ kãa gbalang ɓɔɔ nɔɔ palɛ vuu naa ɓɔɔ n palɛ ɓɛɛ nɔɔ nandon. Nɔɔ ti pɛ̃ɛrɛ zang ɓɔɔ ri nwang nwannang tɔ̃ɔ naa weɓe jong. Rùu nwàng nɔɔ ɓuru kaa gbalang ɓɔɔ nɔɔ dũng ɓɛɛ.

¹⁸N kɔ̀ɔrɔ̀ nɔɔ rɛɛ vuu keɓe tɔ, wu doo gbete kpang. Vuu kɔ n kɔɔrɔ tɔkn nɛɛ miiri ka jĩng ɓee. N kɔɔ nɔɔ nɛɛ zang ɓɔɔ ri kagn teteng manɛ, ri nwang naa zang ɓɔɔ ri shing jĩng nɛɛ vɔrɔ ɓɔɔ Kirisi vɔ ka yuu laa ɓɛɛ kpang.

¹⁹Zang keɓe, ri daa ɓarɛ ka nɔng waa. Ka ruu ɓɔɔ, ɓi buru ɓarɛ kɔ nwang kaa naa Laa ɓarɛ, ri ti tuu yuu ɓarɛ ka rɛɛ vuu ɓɔɔ yusɛ̃ɛ nɛɛ tuu ri kagn kɔ jong ɓɛɛ. Ri rɛ̃rɛ ɓarɛ ka yuu rɛɛ vuu ɓɔɔ ka koo keɓe kɔ shɛ̃ɛning.

²⁰Rùu ɓuru zang lapa kɔ jong, a ruu shu jĩng, ruu gã Kpanti ɓuru Yeesɔ Kirisi, ɓɔɔ wu tá yuu ɓuru ɓɛɛ, wu a nɛɛ lapa.

²¹Nɛɛ a tɔ, naa palɛ shonang nɛɛ naa vuu palɛnang bang ɓiɓɛ ɓɔɔ shing zang piti ri palɛ vuu ka naa ɓɔɔ wu kasɛ ɓɛɛ. Naa kɔ̃̀sɔ́ bii ɓuru ɓɔɔ lakɛ naa ka bii kpang, ti vɔ katɔ keɓe, wu nwang kaa naa bii ɓiɓɛ ɓɔɔ bannang kagn ɓɛɛ.