Read mumuye Kolosi 3 Bible Online

Kolosi 3 - mumuye bible

Kolosi 3

¹Wee zang wisi nɔɔ paa tɔ nɛɛ Yeesɔ Kirisi ɓee, nɔɔ shing jĩng manɛ kaa rɛɛ vuu ɓɔɔ ka lapa ɓɛɛ. Ka nɔng ɓɔɔ Kirisi nwàng kagn ka nakn Laa ɓɛɛ.

²Nɔɔ rɛ̃̀rɛ̀ manɛ ka yuu vuu ɓɔɔ ri ka nɔng kaɓa ɓɛɛ, wu ka yuu rɛɛ vuu ɓɔɔ ka koo ka nihn ɓɛɛ kpang.

³Ka ruu ɓɔɔ, nwàng ɓi naa ɓɔɔ nɔɔ vɔ tɔ, a suru bii manɛ ɓɔɔ kãntang zang waasɛ ka bii Kirisi ɓɔɔ wu ka bii Laa ɓɛɛ.

⁴Suru bii manɛ ɓɔɔ niizang ɓi Yeesɔ Kirisi. Nɛɛ nwang nyaa tɔ, nɔɔ naa nwang nyaa jong nɛɛ wu, nɔɔ walɛ bannang kaa jong.

⁵Nɔɔ vang vuu koo keɓe ɓɔɔ bii manɛ kasɛ ɓɛɛ ta nɛɛ kaaɓa. Vuu ɓɔɔ naa dũndũng, nɛɛ sãnsãnrãng palɛnang, nɛɛ vuu ɓɔɔ bii shɔnzang kasɛ, nɛɛ vuu shi kpang ɓɔɔ yeti shɔnzang kasɛ, a ɓɔɔ kaa nung sũnang (nung sũnang nwàng ɓi naa vaka bannang).

⁶Ka ruu rɛɛ vuu ɓɔɔ naa weɓe kɔ, Laa naa dǎng zang ɓɔɔ ri ta nyaa ɓɔɔ wu dang ɓɛɛ jĩng.

⁷Bɛ̀ɛ́ ɓeleng nɔɔ nwangnɛ, nɔɔ palɛ rɛɛ vuu ɓɔɔ yeti manɛ kasɛ ɓɔɔ naa weɓe kɔ.

⁸A kãntang keɓe, nɔɔ vang rɛɛ vuu ɓɔɔ naa, gnvɔ, yeti shi kpang, nɛɛ vuu ɓɔɔ bii manɛ kasɛ, a ɓɔɔ zang bɛ̃ɛnang. Zang dãanang, nɛɛ yee shi kpang wu nwang tɔ̀ɔ́ nɛɛ nyaa manɛ kpang.

⁹Nɔɔ suu zɔɔ sèé takpang, ka ruu ɓɔɔ, nɔɔ tu bii gbaala manɛ tɔ nɛɛ rɛɛ vuu ɓɔɔ wu kasɛ ɓɛɛ piti.

¹⁰Nɔ̀ɔ hãa bii shɔɔ tɔ, ɓɔɔ Laa risi shɔɔ diki diki ka doo nwannang ɓiɓɛ ɓɛɛ. Tɔ̀ɔ, wu shíng nɔɔ, nɔ́ɔ zi wu kaa dɔ̃ɔ gbete.

¹¹Ka ruu nɔngkɔ, Laa basɛ teteng zang ɓɔɔ ri zang Isirela nɛɛ zang ɓɔɔ ri zang Isirela kpang kpàng. Zang ɓɔɔ ri yee shaa katɔ, nɛɛ zang ɓɔɔ ri yee shaa kpang, kpang, zang ɓɔɔ jĩng ɓarɛ puu gn kpang, nɛɛ zang ɓɔɔ ri shaa yɔpɔ shɔnzang ɓɛɛ kpang, basɛ teteng jaafoo nɛɛ zang ɓɔɔ ri jaa gãa ɓɛɛ kpang. Yeesɔ Kirisi kɔ, ɓi kaa vuu piti, wukɔ ɓi ka yeti vuu piti.

¹²Ka ruu ɓɔɔ, nɔɔ manɛ kaa zang Laa. Laa kasɛ nɔɔ, a zɔ̃ngkɔ nɔɔ, nɛɛ nɔ́ɔ nwang kaa ɓɔɔ ɓiɓɛ. Nɔɔ nwang zang ɓɔɔ gň zang kɔng nɔɔ katɔ ɓɛɛ, nɔɔ pàlɛ̀ zang tɔ̃ɔ, nɔɔ tuu yuu kpang, nɔ́ɔ pálɛ̀ vuu hakaka kpang, nɔɔ mã gn katɔ.

¹³Nɔɔ mã gn nɛɛ zɔɔ. Zang ɓɔɔ nɛɛ lasɛ nɔɔ yeti, nɔɔ yàa zɔɔ gbalang katɔ. Nɔɔ yàa zɔɔ gbalang naa ɓɔɔ Laa yàa nɔɔ ɓɛɛ.

¹⁴Ka yuu rɛɛ vuu keɓe, nɔɔ kàsɛ̀ ruu zɔɔ katɔ. Zɔɔ kasɛnang kɔ ɓákɛ̀ vuu piti wu nwang gbete.

¹⁵Yeti valɛnang ɓɔɔ Yeesɔ Kirisi a zang, wukɔ wu nwang ka yeti manɛ gbãng gbãng. Ka ruu ɓɔɔ, Laa ɓaa nɔɔ nyaa nɛɛ nɔɔ nwang bii gbete, tɔ̀ɔ, wu a nɔɔ yeti valabm keɓe kɔ ɓɛɛ. Nɔ́ɔ ti zãa wu katɔ.

¹⁶Yee Yeesɔ Kirisi wu nwang ka yeti manɛ dɔ̃ɔ gbete, ka ɓɔɔ nɔɔ tusu vuu, a nɔɔ ti kpɛ̃ɛrɛ zɔɔ vuu nɛɛ zũnang ɓɛɛ. Nɔɔ gaa soo ɓɔɔ nɔɔ dɔɔ Laa nɛɛ mani, nɛɛ ɓɔɔ nɔɔ zãa wu nɛɛ mani nɛɛ ɓɔɔ Suru Laa kpɛ̃ɛrɛ zang ɓɛɛ. Nɔɔ ti zãa wu ka yeti manɛ.

¹⁷Vuu ɓɔɔ nɔɔ kɔɔyi nɛɛ vuu ɓɔɔ nɔɔ palɛ piti, nɔɔ pálɛ́ ka nung Yeesɔ Kirisi, ka ɓɔɔ nɔɔ zãa Laa ɓɔɔ wukɔ Daa nɛɛ bii ɓiɓɛ ɓɛɛ.

¹⁸Zang soro ɓɔɔ zang gee nɔɔ katɔ ɓɛɛ, nɔɔ ɓaa shoo ka nyaa varɛ manɛ. Ka ruu ɓɔɔ, wee ɓi vuu ɓɔɔ, nɔɔ ɓɔɔ nɔɔ dũng Laa nɔɔ nɛ̀ɛ́ palɛ kɔ nwani ɓɛɛ.

¹⁹Varɛ, nɔɔ kasɛ soro manɛ katɔ. Nɔ́ɔ palɛ ri hakaka kpang.

²⁰Wujɛ, nɔɔ ɓaa shoo ka nyaa zang ɓɔɔ ri yi nɔɔ ɓɛɛ diki diki. Ka ruu ɓɔɔ, vuu keɓe kɔ shing Laa, Laa tãa tĩnang manɛ ɓɛɛ.

²¹Zang ɓɔɔ nɔɔ yi wujɛ ɓɛɛ, nɔ́ɔ gbooro wujɛ manɛ kpang. Naa nɔɔ palɛ nɔngkɔ, ri yaa gn naa katɔ.

²²Jaafoo, nɔɔ ɓaa shoo ka nyaa zang ɓɔɔ ri dabang gãa manɛ ka vuu piti. Nɔɔ ɓáa, wu ka ɓɔɔ nɔɔ zi jĩng ɓarɛ katɔ kɔ shɛ̃ɛning kpang, tɔɔ nyaating wu pu nɔɔ nɛɛ ri kpang. Nɔ̀ɔ palɛ nɛɛ yeti gbete ka ruu bannang ɓɔɔ nɔɔ a Laa ɓɛɛ.

²³Vuu ɓɔɔ nɔɔ nɛɛ palɛ piti, nɔɔ pálɛ́ nɛɛ yeti manɛ nandon, naa nɔɔ pàlɛ́ Kpanti Yeesɔ, nɔɔ pàlɛ́ wu shɔnzang kpang.

²⁴Danggn wu ning nɔɔ kpang, Kpanti Yeesɔ naa sɔ̀ɔrɔ́ nɔɔ doo ditɔ. Naa a nɔɔ vuu ɓɔɔ wu shìng zang ɓiɓɛ katɔ ɓɛɛ ditɔ. Ka ruu ɓɔɔ, ɓi Yeesɔ Kirisi kɔ dabang gãa ɓɔɔ niizang ɓɔɔ nɔɔ pàlɛ́ wu shonang ɓɛɛ.

²⁵A zang ɓɔɔ pálɛ̀ ɓi vuu shi kpang, naa zang keɓe doo wiya, zang naa pàlɛ́ wu vuu ɓi dòo ka dóo vuu shi kpang ɓɔɔ wu pálɛ̀ ɓɛɛ kɔ. Ka ruu ɓɔɔ, Laa palɛ vuu ɓi jong gn dang gbete kpang ɓɛɛ.