Read mumuye 1 Tesalonika 1 Bible Online

1 Tesalonika 1 - mumuye bible

1 Tesalonika 1

¹Labeenang keɓe, nɛɛ bii mɛɛ Bulu, a ɓɔɔ Siila nɛɛ Timoti. Ruu bee zang ɓɔɔ ri dũng Yeesɔ Kirisi ka gari Tesalonika, ɓɔɔ ri zang Daa ɓuru Laa nɛɛ Kpanti Yeesɔ Kirisi ɓɛɛ. Laa wu palɛ nɔɔ tɔ̃ɔ, wu ti shingnɛ yeti manɛ wu valɛ katɔ.

²Ruu zãa Laa diki diki ka ruu manɛ nandon, a ruu ti ɓaa nung manɛ diki diki ka ɓɔɔ ruu gaa Laa ɓɛɛ.

³Diki ɓɔɔ ruu gaa Laa ɓuru ɓɔɔ wukɔ ti Daa ɓuru ɓɛɛ, danggn manɛ ning ruu kpang. Ruu ɓaa nung manɛ ka naa ɓɔɔ nɔɔ túsù danggn ɓɔɔ nɔɔ shing ɓɛɛ ka vuu ɓɔɔ nɔɔ palɛ ɓɛɛ. Naa ɓɔɔ nɔɔ palɛ shonang gbãng gbãng, ka ruu ɓɔɔ nɔɔ kasɛ Kpanti Yeesɔ Kirisi katɔ ɓɛɛ. A ɓɔɔ ti naa ɓɔɔ gn ɓɔɔ nɔɔ shing ka bii Kpanti ɓuru Yeesɔ Kirisi ruutu kpang tingkiring ɓɛɛ.

⁴Rɛɛ manzung ruu zi tɔ, Laa kasɛ nɔɔ katɔ, a zɔ̃ngkɔ nɔɔ nɛɛ nɔɔ nwang zang ɓiɓɛ.

⁵Ruu Tɔ̃ɔ ɓɔɔ ka yuu Yeesɔ Kirisi ɓɔɔ ruu kɔɔ nɔɔ ɓɛɛ, ruu kɔɔ wu nɛɛ nyaa waati kpang. Laa a ruu naa vuu palɛnang ɓiɓɛ tɔ nɛɛ Suru ɓiɓɛ, a ruu ti shing danggn tɔ gbãng gbãng ka yuu Ruu Tɔ̃ɔ ɓɔɔ ka yuu Yeesɔ Kirisi ɓɔɔ ruu kɔ̀ɔ nɔɔ ɓɛɛ. Nɔɔ zi zɔ̃ng nwannang ɓɔɔ ruu nwangnɛ, ɓɔɔ bɛ̀ɛ́ ruu doo nɛɛ nɔɔ ɓɛ̀ɛ́ tɔ. Ruu palɛ vuu keɓe nandon ruu tɔɔ ruu yi nɔɔ naa ka bii.

⁶Nɔɔ kpɛ̃ɛrɛ nwannang tɔ naa ɓɔɔ ruu nwang ɓɛɛ, a ɓɔɔ ti naa ɓɔɔ Kpanti Yeesɔ nwang ɓɛɛ. Zang dang nɔɔ jĩng dɔɔli, a nɔɔ ta ruu ɓɔɔ ka yuu Yeesɔ Kirisi doo nɛɛ mani, nɔɔ tãa tĩnang ɓɔɔ Suru Laa shing zang, zang tãa ɓɛɛ.

⁷Ka ruu nɔngkɔ, nɔɔ nwang manɛ kaa zɔ̃ng zang ɓɔɔ, zang ɓɔɔ ri dũng Laa ka Makidoniya nɛɛ Akaya nandon ri masɛ nwannang manɛ ɓɛɛ.

⁸Ka ruu ɓɔɔ, wu Ruu Tɔ̃ɔ ɓɔɔ ka yuu Yeesɔ Kirisi ɓɔɔ nwang nɛɛ bii manɛ, bàa wu tipi Makidoniya nɛɛ Akaya kɔ shɛ̃ɛning kpang. Ruu danggn ɓɔɔ nɔɔ shing ka bii Laa, bàa nɔng tɔ jong piti piti. Vuu ɓɔɔ naa ruu kɔɔ ɓɛɛ tɔ̀ɔ́ kagn kpang.

⁹Zang kaɓa nandon, ri kɔ̀ɔ ruu naa ɓɔɔ nɔɔ ta ruu ka ɓɔɔ ruu naa leng nɔɔ ɓɛɛ. A ɓɔɔ ti naa ɓɔɔ nɔɔ yaa vaka bannang, nɔɔ naa bang kaa Laa ɓɔɔ wukɔ niizang, a ɓi ti ningkãari ɓɛɛ.

¹⁰A ri ti kɔ̀ɔ ruu nɛɛ nɔɔ gã Jaa ɓiɓɛ wu a nɛɛ lapa, Jaa ɓiɓɛ Yeesɔ ɓɔɔ wu wisi paa nɛɛ sàa ɓɛɛ, a naa tá yuu ɓuru ka laa ɓɔɔ Laa naa jɛ̃ɛ zang ɓɔɔ wu lasɛ yeti nɛɛ ri ka ruu vuu shi kpang ɓɔɔ ri palɛ ruu ɓɛɛ.