Read mumuye 1 Tesalonika 3 Bible Online

1 Tesalonika 3 - mumuye bible

1 Tesalonika 3

¹Ka ruu nɔngkɔ, ɓɔɔ ruu zirɛ nɛɛ ruu zunung danggn mãanang takpang, ruu mang ka yeti ɓuru nɛɛ zang yaa ruu ka bm ka Ataniya.

²A ruu shong manzung ɓuru Timoti, ɓɔɔ palɛ Laa shonang nɛɛ ruu ka gbalang Ruu Tɔ̃ɔ ɓɔɔ ka yeti Kirisi ɓɔɔ ruu kɔɔrɔ zang ɓɛɛ. Ruu tɔɔ wu naa shing nɔɔ, nɔɔ shii gbãng gbãng, wu ti mã nɔɔ danggn, nɔɔ yaa danggn ɓɔɔ nɔɔ shing ka bii Yeesɔ ɓɛɛ kpang.

³Tɔ̀ɔ, zang ɓɔɔ wu yaa danggn ɓɔɔ wu shing ka bii Kirisi ka ruu jĩng ɓɔɔ zang dang nɔɔ ɓɛɛ. Nɔɔ nɛɛ yuu manɛ, nɔɔ zi tɔ nɛɛ Laa kɔ mang ka yeti ɓiɓɛ nɛɛ zang dang ruu jĩng.

⁴Ka ɓɔɔ bɛ̀ɛ́ ruu doo nɛɛ nɔɔ, ruu kɔɔ nɔɔ doo ka tĩng nɛɛ ruu naa dang jĩng ditɔ. A naa ɓɔɔ nɔɔ zi tɔ ɓɛɛ, ruu dang jĩng tɔ nɔngkɔ teetee.

⁵Vuu ɓɔɔ shingnɛ ruu shong Timoti ɓɛɛ kɔ. Daa naa ɓɔɔ n tí ɓɛɛ takpang, ka ruu nɔngkɔ, ruu shong wu, nɛɛ wu daa zi ruu naa ɓɔɔ danggn shinnang manɛ nwang ɓɛɛ. Ruu zi kpang naa Sheetang gãsɛ nɔɔ tɔ, nɔɔ yaa danggn ɓɔɔ nɔɔ shing ɓɛɛ tɔ. Nɔɔ shing tɔ shonang ɓuru nandon shaarɛ tɔ waati ya?

⁶Wee Timoti gbãayu tɔ ka bii ɓuru, ti atɛ ruu nyaa tɔ̃ɔ tɔ, nɛɛ nɔɔ shing danggn doo ka bii Yeesɔ, a nɔɔ ti kasɛ ruu katɔ. A ti kɔɔ ruu nɛɛ nɔɔ rɛ̃rɛ tɔ̃ɔ diki diki ka yuu ɓuru, nɛɛ nɔɔ kasɛ nɛɛ nɔɔ zi ruu doo naa ɓɔɔ ruu kasɛ nɔɔ zinang ɓɛɛ kɔ.

⁷Ka ruu nɔngkɔ, rɛɛ manzung, ruu ɓɔɔ zang kɔ̀ɔ ruu ka yuu manɛ, mã̀ ruu danggn tɔ, ka vuu ɓɔɔ kpãa ruu nɛɛ jĩng dannang ɓɔɔ ruu dang ɓɛɛ. Ruu danggn ɓɔɔ nɔɔ shing ka bii Yeesɔ Kirisi kɔ mã ruu danggn.

⁸Wee nɔɔ shii nɛɛ kaka ka yuu ɓɔɔ nɔɔ ɓakɛ tɔ nɛɛ Kpanti Yeesɔ ɓee, ruu tãa tĩnang nwannang ningkãari kaa tɔ.

⁹Nyaa ɓɔɔ ruu zãa Laa nɛɛ mani ka ruu manɛ kpang. Ruu zãa wu ka ruu tĩnang ɓɔɔ wu shing ruu, ruu tãa tĩnang ka ruu manɛ, ka ɓɔɔ ruu gaa wu ɓɛɛ.

¹⁰Nɛɛ zĩi nɛɛ laagɛ̃ ruu gaa wu nɛɛ yeti ɓuru nandon, nɛɛ wu yàa ruu gbalang jong ruu zi nɔɔ nɛɛ jĩng ɓuru, tɔɔ ruu tusu nɔɔ vuu ɓɔɔ yaa nɔɔ doogn ka danggn ɓɔɔ nɔɔ shing ɓɛɛ.

¹¹Laa ɓɔɔ wukɔ daa ɓuru nɛɛ Kpanti ɓuru Yeesɔ ri shĩili ruu gbalang ɓɔɔ ruu a ka bii manɛ ɓɛɛ.

¹²Kpanti ɓuru wu shingnɛ zɔɔ kasɛnang manɛ nɛɛ naa ɓɔɔ nɔɔ kasɛ zang piti, wu daa nɛɛ ting kɔ sasak. Tɔ̀ɔ, nɔɔ naa kasɛ zang kaa naa ɓɔɔ ruu kasɛ nɔɔ ɓɛɛ.

¹³Laa wu shingnɛ nɔɔ shii gbãng gbãng, tɔ̀ɔ, zang ɓɔɔ wu tɔɔ kaa takpang nɛɛ nɔɔ palɛ vuu shi kpang tɔ kpang, ka tĩng Laa ɓɔɔ wukɔ Daa ɓuru ɓɛɛ, ka diki ɓɔɔ Kpanti ɓuru Yeesɔ naa a nɛɛ zang ɓiɓɛ ɓɛɛ.