Read mumuye 1 Tesalonika 5 Bible Online

1 Tesalonika 5 - mumuye bible

1 Tesalonika 5

¹Daa naa ɓɔɔ n bee nɔɔ labeenang ka yuu diki ɓɔɔ Kpanti Yeesɔ naa gbãa yuu kagn ɓɛɛ kpang.

²Ka ruu ɓɔɔ, nɔɔ nɛɛ yuu manɛ nɔɔ zi tɔ waasɛ̃ nɛɛ diki ɓɔɔ Kpanti Yeesɔ naa a kagn, naa nwang naa ɓɔɔ shɔngɓɔ, a nɛɛ zĩi bɛ̀ɛ́ nɔɔ shing gn kpang ɓɛɛ.

³Ka laa ɓɔɔ zang ri gaayu kɔɔrɔnang nɛɛ, “Ruu nwang tɔ nyaa zɔɔ, a vuu ɓɔɔ shing ruu, rùu kaa vɔrɔ kpang.” A jĩng dannang wu a kaa yuu ɓarɛ tantɛnang naa ɓɔɔ jaa kɔng zang soro ɓɛɛ. Zang gbete wɔ̀ kpang.

⁴Rɛɛ manzung, nɔɔ nwang manɛ naa zang ɓɔɔ ri nwang ka nɔng ɓɔɔ tɔ̀ɔ katɔ kpang, tɔ̀ɔ diki keɓe wu arɛ nɔɔ mã naa ka danggn naa ɓɔɔ shɔngɓɔ a nɛɛ zĩi ɓɛɛ, nɔɔ shing gn kpang ɓɛɛ kpang.

⁵Nɔɔ nandon, nɔɔ manɛ zang nɔng ɓɔɔ yakɛ katɔ ɓɛɛ, nɔɔ manɛ zang nɔng laagɛ̃. Ruu nandon, ruu nwang ɓuru naa zang nɔng zĩi nɛɛ nɔng ɓɔɔ tɔ̀ɔ katɔ ɓɛɛ kpang.

⁶Ka ruu nɔngkɔ, ruu gãng nɔɔ jĩng, rúu nwàng naa zang ɓɔɔ kpang. Ruu nwang nɔɔ ningkãari, ruu yiti yuu ɓuru waasɛ̃.

⁷Ka nwannang shɔnzang, shɔnzang ri rooro ɓi nɛɛ zĩi, zang ɓɔɔ ri yiti yuu ɓarɛ kpang, ri ɓoo saa nɛɛ zĩi saa si ri.

⁸A ruu ɓuru zang nɔng laagɛ̃, rúu yiti yuu ɓuru waasɛ̃. Danggn ɓɔɔ ruu shing ka bii Laa nɛɛ kasɛnang ɓɔɔ ruu kasɛ zɔɔ, wu nwàng ruu naa kãati. Gn ɓɔɔ ruu shingnɛ nɛɛ Laa naa ta yuu ɓuru ditɔ dɔ̃ɔ gbete, wu nwang ruu naa wàálaa ka yuu ɓuru.

⁹Ka ruu ɓɔɔ, Laa zɔ̃ngkɔ ruu nɛɛ wu dɔng rùu ruu, tɔ̀ɔ, ruu dang jĩng ka diki ɓɔɔ wu naa jɛ̃ɛ zang ruu ɓɛɛ kpang. Zɔ̃ngkɔ ruu nɛɛ wu ta yuu ɓuru nɛɛ bii Kpanti ɓuru Yeesɔ Kirisi.

¹⁰Yeesɔ vɔ ka ruu ɓuru nɛɛ tɔ̀ɔ, ruu nwang kaa nɔng gbete nɛɛ wu, naa ruu doo ningkãari, kɔ́ ruu vɔlɔ katɔ, ka diki ɓɔɔ wu a kagn ɓɛɛ.

¹¹Ka ruu nɔngkɔ, nɔɔ mã zɔɔ danggn, nɔɔ yi zɔɔ naa ka bii. Nɔɔ shing danggn kaa gbãng gbãng naa wee nɔɔ palɛ ɓee.

¹²Rɛɛ manzung ɓuru, ruu gaa nɔɔ, nɔ́ɔ seng zang ɓɔɔ ri palɛ shonang ka teteng manɛ waasɛ̃. Zang ɓɔɔ rikɔ sɔ̀ɔ́ nɔɔ ɓɔɔ nɔɔ dũng Laa ɓɛɛ tĩng, a ri ti tusu nɔɔ vuu, nɛɛ tɔ̀ɔ nɔɔ palɛ vuu shi kpang, kpang ɓɛɛ.

¹³Nɔɔ seng ri katɔ dɔɔli, nɔɔ kasɛ ruu ɓarɛ katɔ, ka ruu shonang ɓɔɔ ri palɛ ɓɛɛ. Nɔɔ nwang ka nyaa zɔɔ waasɛ̃.

¹⁴Rɛɛ manzung ɓuru, ruu gaa nɔɔ, nɔɔ shaarɛ zang ɓɔɔ ri nwalɛ waati nyaa katɔ, nɔɔ mã zang ɓɔɔ ri yaa gn naa danggn pati nɔɔ yi zang ɓɔɔ ri lakɛ naa ka bii kpang naa ka bii, a nɔɔ ti mã danggn nɛɛ zang piti.

¹⁵Nɔɔ gãng jĩng kagn, zang ɓɔɔ wu waa pãng vuu shi kpang ɓɔɔ zang palɛ wu doo nɛɛ vuu shi kpang kɔ kpang. Nɔɔ shing jĩng kɔ jong diki diki nɛɛ nɔɔ pàlɛ́ zɔɔ tɔ̃ɔ. Nɔɔ ti pàlɛ̀ zang piti tɔ̃ɔ jong.

¹⁶Nɔɔ tãa tĩnang diki diki, ka ruu ɓɔɔ, nɔɔ zang Laa ɓɛɛ.

¹⁷Nɔɔ gaa Laa, nɔ́ɔ suu diki kpang.

¹⁸Naa doo viya pálɛ̀ mɔɔ, zãa Laa katɔ. Wee naa ɓɔɔ Laa kasɛ nɛɛ nɔɔ nwangnɛ, ɓɔɔ nɔɔ ɓakɛ zɔɔ tɔ nɛɛ Yeesɔ Kirisi ɓɛɛ kɔ.

¹⁹Nɔ́ɔ nɔɔ Suru Laa gbalang shonang ɓiɓɛ palɛnang kpang.

²⁰Nɔ́ɔ bɛ̃ɛ ruu ɓɔɔ a nɛɛ bii zang nyaa shonang Laa ɓɛɛ kpang.

²¹Nɔɔ gãsɛ ruu piti ɓɔɔ wu kɔɔ ɓɛɛ katɔ. Nɔɔ palɛ vuu ɓɔɔ ɓi tɔ̃ɔ ɓɛɛ.

²²Ruu manɛ wu hãa kagn nɛɛ vuu shi kpang palɛnang kpang tingkiring.

²³Laa ɓɔɔ shing zang, zang ri nwang ka nyaa zɔɔ, wu palɛ nɔɔ, nɔɔ nwang zang tɔ̃ɔ dɔ̃ɔ gbete. Wu shingnɛ zang ɓɔɔ wu tɔɔ kpang nɛɛ nɔɔ palɛ vuu shi kpang tɔ kpang, ka diki ɓɔɔ Kpanti Yeesɔ Kirisi a kagn ɓɛɛ.

²⁴Laa ɓɔɔ ɓaa ruu nyaa nɛɛ ruu nwang zang ɓiɓɛ, shing ruu katɔ ruu nwang nɔngkɔ, ka ruu ɓɔɔ pálɛ̀ vuu ɓɔɔ wu a nyaa ɓi katɔ ɓɛɛ.

²⁵Rɛɛ manzung, nɔɔ gàarɛ́ rùu Laa jong.

²⁶Nɔɔ jee zang ɓɔɔ ri shing danggn tɔ nandon, nyaa tɔ̃ɔ tɔ̃ɔ.

²⁷N ɓakɛ nɔɔ nɛɛ Laa, nɔɔ gã labeenang keɓe ka nɔng zang ɓɔɔ ri dũng Laa nandon.

²⁸Kpanti ɓuru Yeesɔ Kirisi wu pàlɛ̀ nɔɔ tɔ̃ɔ.