Read mumuye 2 Tesalonika 3 Bible Online

2 Tesalonika 3 - mumuye bible

2 Tesalonika 3

¹Rɛɛ manzung ɓuru, n hangsɛ ruu kaa nɛɛ ruu keɓe. Nɔɔ gàá Ruu Laa, tɔ̀ɔ, Ruu Tɔ̃ɔ Kpanti Yeesɔ wu bàa nɔng piti piti, wu daa nɛɛ tĩng kɔ sasak. Zang ri a ruu bii bannang, naa ɓɔɔ nɔɔ a ruu bii bannang ɓɛɛ.

²Nɔ́ɔ gaa Laa jong wu ta ruu nɛɛ naa zang ɓɔɔ yeti ɓarɛ shi kpang ɓɛɛ. Ka ruu ɓɔɔ, wu zang piti shing danggn tɔ ka Ruu Tɔ̃ɔ kpang ɓɛɛ.

³A Laa ɓi zang ɓɔɔ mɔɔ shing gn katɔ ka bii ɓiɓɛ ɓɛɛ, mã mɔɔ danggn katɔ, wu shingnɛ vuu ɓɔɔ wu lee mɔɔ naa ka bii kpang.

⁴Laa mã́ ruu danggn ka bii manɛ kɔ. Ruu zi tɔ nɛɛ palɛ vuu ɓɔɔ ruu kɔɔ nɔɔ katɔ, nɔɔ ti palɛ katɔ sasak.

⁵Ruu gaa Kpanti wu sɔɔ nɔɔ tĩng, nɔ́ɔ zí kasɛnang ɓɔɔ Laa kasɛ nɔɔ nɛɛ mani ɓɛɛ gbãng gbãng. Laa wu ti shíng nɔɔ nɔ́ɔ mã danggn, nɔ́ɔ gã anang Kirisi.

⁶Rɛɛ manzung ɓuru, ruu dang nɔɔ nyaa nɛɛ nung Kpanti ɓuru Yeesɔ Kirisi nɛɛ nɔɔ ɓákɛ̀ yuu nɛɛ zang ɓɔɔ ri dũng doo Laa kɔ, ɓɔɔ ri nwang nwannang rang ɓɛɛ kpang. A ri dũng nyaa ɓuru kpang ɓɛɛ.

⁷Nɔɔ nɛɛ yuu manɛ, nɔɔ zi tɔ waasɛ̃ nɛɛ daa naa ɓɔɔ nɔɔ dũng nyaa ɓuru tɔ. Ɓɔɔ ruu nwang nɛɛ nɔɔ, ruu si rang kpang.

⁸Diki diki naa zang yi ruu naa ka bii, ruu shu ri katɔ. Ruu palɛ shonang gbãng gbãng, ka ruu ɓɔɔ, ruu kasɛ kpang, zang ɓɔɔ wu shu ruu vuu ɓɔɔ kpang ɓɛɛ.

⁹Ruu palɛ vuu keɓe, wu ka ruu ɓɔɔ daa naa ɓɔɔ ruu kɔɔ nɔɔ nɛɛ nɔɔ yi ruu naa ka bii kpang, kpang. Ruu palɛ nɔngkɔ, tɔ̀ɔ, ruu nwang nɔɔ vuu ɓɔɔ nɔɔ dũng ɓɛɛ.

¹⁰Ɓɔɔ bɛ̀ɛ́ ruu doo nɛɛ nɔɔ, ruu kɔɔ nɔɔ tɔɔ, “Zang ɓɔɔ nɛɛ kasɛ shonang palɛnang kpang, nɔɔ a wu vuu shaanang kpang.”

¹¹Ruu kɔɔ nɔngkɔ, ka ruu ɓɔɔ, ruu tãayi nɛɛ zang ɓɔɔ ka teteng manɛ ri nwang nwannang rang. Ri palɛ vuu ɓɔɔ kpang, ri hã̀lɛ́ nyaa ka ruu ɓɔɔ, wu ɓɔɔ ɓarɛ kpang ɓɛɛ.

¹²Ruu dang rɛɛ zang keɓe nyaa nɛɛ nung Kpanti Yeesɔ Kirisi, ruu shaarɛ ri nyaa, nɛɛ ri nwang nwannang ɓɔɔ daa naa katɔ ɓɛɛ. Ri pálɛ́ shonang, ri walɛ vuu shaanang ɓarɛ nɛɛ mani.

¹³A ɓɔɔ manɛ manzung ɓɔɔ ri dũng doo Laa kɔ ɓɛɛ, nɔɔ lee tɔ̃ɔ palɛnang kpang.

¹⁴Zang ɓɔɔ ka teteng manɛ nɛɛ dũng ruu kɔ ruu shong nɔɔ ka yeti labeenang keɓe kpàng. Nɛɛ nɔngkɔ, nɔɔ zi zang keɓe waasɛ̃ nɔ́ɔ pálɛ̀ vuu ɓɔɔ nɛɛ wu kpang, tɔ̀ɔ yusɛ̃ɛ wu tuu wu.

¹⁵A nɔɔ palɛ wu kaa tɔ̀ɔ́ naa zang ɓɔɔ nɔɔ shing jĩng nɛɛ wu kpang, kpang. Nɔɔ shaarɛ wu nyaa katɔ kɔ jong naa ɓaazung.

¹⁶Ruu gaa Laa ɓɔɔ wukɔ shing yeti ɓuru wu valɛ ɓɛɛ, wu shingnɛ yeti manɛ wu valɛ katɔ diki diki, naa ka gbalang kiya piti. Kpanti ɓuru wu nwang nɛɛ nɔɔ nandon.

¹⁷N bee vuu keɓe nɛɛ naa mɛɛ. Nkɔ Bulu, n jee nɔɔ nyaa. Wee naa ɓɔɔ n bee nung mɛɛ, n nɛɛ hangsɛ labeenang tɔ ɓɛɛ.

¹⁸N gaa Kpanti Yeesɔ Kirisi wu pàlɛ̀ nɔɔ nandon tɔ̃ɔ.