Read mumuye 1 Timoti 5 Bible Online

1 Timoti 5 - mumuye bible

1 Timoti 5

¹Mɔɔ mangkɛ zang bang kpang. Rang wu yee naa ɓɔɔ mɔɔ rang daa ɓaaɓɛ ɓɛɛ. Palɛ rɛɛ jasang naa ɓɔɔ mɔɔ palɛ rɛɛ jaa nàá ɓaaɓɛ ɓɔɔ wujaa ɓɛɛ.

²Palɛ zang soro ɓɔɔ ri bang tɔ naa ɓɔɔ mɔɔ palɛ nàá ɓaaɓɛ ɓɛɛ. Mɔɔ ti palɛ rɛɛ wujɛ soro naa ɓaa naa. Mɔɔ seng ri katɔ.

³Seng rɛɛ suvɔ ɓɔɔ zang ɓɔɔ yǐ ri naa ka bii kpang tingkiring ɓɛɛ.

⁴Suvɔ ɓɔɔ wujɛ ɓiɓɛ nɛɛ wujɛ wujɛ ɓiɓɛ kagn, wujɛ keɓe ri kpɛ̃ɛrɛ naa ɓɔɔ ri gaayu shonang Laa palɛnang, ka ɓɔɔ ri palɛ zang ɓɔɔ yi ri shonang ɓɛɛ. Ka gbalang keɓe, ri wàá rɛɛ zang ɓɔɔ yi ri, nɛɛ rɛɛ dabang ɓarɛ pãng, vuu ɓɔɔ ri pàlɛ̀ ri ɓɛɛ. Ka ruu ɓɔɔ vuu ɓɔɔ naa weɓe Laa kasɛ wukɔ ɓɛɛ.

⁵Suvɔ ɓɔɔ ɓi ka bm, zang ɓɔɔ gãng jĩng ka wu kpang shing gn ɓi kaa bii Laa. Gaa Laa nɛɛ zĩi nɛɛ laagɛ̃, nɛɛ Laa wu yi wu naa ka bii.

⁶A suvɔ ɓɔɔ nɛɛ shing jĩng ka tĩnang tãanang, naa nwang doo ningkãari, suru ɓiɓɛ vɔ ɓi tɔ.

⁷Kɔɔ ri vuu keɓe, tɔ̀ɔ, zang ɓɔɔ wu tɔɔ kaa takpang nɛɛ ri palɛ vuu shi kpang tɔ kpang.

⁸Zang ɓɔɔ nɛɛ gãng jĩng ka zang ɓiɓɛ kpang, nɛɛ gãng jĩng ka zang ɓɔɔ ri ka yeti gãa ɓiɓɛ kɔ gbãng gbãng kpang. Zang keɓe bɛ̃ɛ danggn ɓɔɔ ruu shing ka bii Laa tɔ. Palɛ vuu shi kpang, ti ɓa zang ɓɔɔ ri dũng Laa kpang katɔ nɛɛ yeti hakaka tánang.

⁹Suvɔ ɓɔɔ sáa ɓiɓɛ nɛɛ ɓa laa taati gn kpang nɛɛ ti gee varɛ dòo dóo gbete kɔ nwani kpang, mɔɔ bèe nung ɓiɓɛ ka yeti labeenang ɓɔɔ mɔɔ bée nung rɛɛ suvɔ kpang.

¹⁰Nɛɛ ti suvɔ ɓɔɔ zang zi wu tɔ nɛɛ shonang tɔ̃ɔ palɛnang ɓɛɛ. Nɛɛ ti gãng jĩng ka wujɛ ɓiɓɛ waasɛ̃ ɓɛɛ. Nɛɛ tá zang zanti katɔ ɓɛɛ, nɛɛ ti pálɛ̀ zang ɓɔɔ ri dũng doo Laa kɔ vuu, tuu yuu ɓiɓɛ kpang ɓɛɛ. Nɛɛ ti yi zang ɓɔɔ ri dang jĩng naa ka bii ɓɛɛ, nɛɛ ti shing yuu ɓiɓɛ nɛɛ wu palɛ tɔ̃ɔ ka zɔ̃ng zɔ̃ng ɓɛɛ. Mɔɔ bee nung ɓiɓɛ.

¹¹Mɔɔ bèe nung suvɔ ɓɔɔ ri doo jasang ka labeenang ɓɔɔ mɔɔ beere nung rɛɛ suvɔ ɓɔɔ zang ɓɔɔ ri dũng Laa ri gãng jĩng ka ri ɓɛɛ kpang. Ka ruu ɓɔɔ, naa bii ɓarɛ seepaa, ri kàsɛ́ nɛɛ ri gee ɓarɛ kaa varɛ. Ri naa yáa nyaa ɓɔɔ ri a Yeesɔ Kirisi kaa tɔ ɓɛɛ.

¹²Ka ruu nɔngkɔ, Laa dɔng ri ruu kaa tɔ, ka ruu ɓɔɔ, ri yaa nyaa ɓɔɔ bɛ̀ɛ́ ri a Yeesɔ Kirisi tɔ ɓɛɛ.

¹³Naa ti nɔngkɔ kpang, ri si kaa rang, ri kɔng kaa bii ɓɔɔ ri rakɛ ka gãa gãa ɓɛɛ. Bɛ̀ɛ́ ri gaa kaa yuu zang rannang, ri ti ràngkɛ́ yee kaa yuu vuu ɓɔɔ ruu ɓarɛ hãa kagn kpang ɓɛɛ.

¹⁴N kasɛ suvɔ ɓɔɔ ri doo jasang, ri gee varɛ, ri yi jaa. Ri gãng jĩng ka gãa ɓarɛ, tɔ̀ɔ, ruu yàa zang ɓɔɔ ri shing jĩng nɛɛ ruu kpang gbalang kaa tɔ̀ɔ́, ri rang yee shi kpang ka yuu ɓuru kpang.

¹⁵Ka ruu ɓɔɔ, suvɔ ɓɔɔ ri yaa gbalang Laa tɔ, ri dũng ɓarɛ kaa sheetang ɓɛɛ.

¹⁶Naa jaa soro ɓɔɔ dũng Laa, a zang ɓiɓɛ kagn ri suvɔ, wu gãng jĩng ka ri. Wu tɔ̀ɔ́ kpang nɛɛ zang ɓɔɔ ri dũng Laa ri gãng jĩng ka ri kpang. Zang ɓɔɔ ri dũng Laa ri gãng jĩng ɓarɛ kaa suvɔ ɓɔɔ zang ɓɔɔ yi ri naa ka bii kpang ɓɛɛ.

¹⁷Zang bang ɓɔɔ ri gãng jĩng ka zang ɓɔɔ ri dũng Laa ɓɛɛ. Ri nɛɛ palɛ shonang tɔ̃ɔ, zang shu ri saka tìng ziti. Zang ɓɔɔ shonang ɓarɛ ɓi Ruu Laa kɔɔrɔnang nɛɛ vuu tusunang, zang wu shu rikɔ nɔngkɔ gbãng gbãng.

¹⁸Zang bee ka yeti labeenang Laa nɛɛ, “Mɔɔ mã nyaa vuu vaa ka làa ɓɔɔ pàlɛ́ mɔɔ shonang ka jaa ɓaaɓɛ kpang.” A zang ti kɔɔ ɓɔɔ nɛɛ, “Mɔɔ shu zang ɓɔɔ pàlɛ̀ mɔɔ shonang, saka ɓiɓɛ katɔ.”

¹⁹Naa zang tɔɔ zang bang ɓɔɔ palɛ vuu shi kpang. Zang ɓɔɔ ri naa kɔɔ mɔɔ, ri nɛɛ ɓa ziti katɔ kpang, mɔɔ ɓaa shoo ka nyaa ɓarɛ kpang.

²⁰Zang ɓɔɔ ri nɛɛ palɛ vuu shi kpang, mangkɛ ri ka jĩng zang piti. Tɔ̀ɔ, zang nimbang ri kaa vɔrɔ kati.

²¹N gaa mɔɔ nɛɛ nung Laa, nɛɛ ɓɔɔ Yeesɔ Kirisi nɛɛ rɛɛ zang nyaa shonang Laa ɓɔɔ ka lapa ɓɔɔ Laa shɛ̃ɛrɛ ri katɔ ɓɛɛ. N kɔɔ mɔɔ, mɔɔ dũ̀ng nyaa kɔ n dang mɔɔ ɓee. Ka vuu ɓɔɔ mɔɔ palɛ nandon, mɔɔ shɛ̃ɛrɛ zang katɔ kpang, mɔɔ pálɛ̀ vuu gn dang gbete kpang.

²²Mɔɔ làabìi ka nɔng ɓɔɔ mɔɔ shing naa ɓaaɓɛ, ka yuu zang ɓɔɔ ri tɔɔ, ri palɛ shonang Laa ɓɛɛ kpang. Mɔɔ yi naa ɓaaɓɛ ka vuu shi kpang ɓɔɔ zang ɓɔɔgn ri palɛ kpang. Nwang ɓaa nwannang tɔ̃ɔ.

²³Mɔɔ ɓoo mii tɔ̀ɔ́ waati kpang, lu sàa (mii Inabi) kagn tɔkɔlɔng ka ruu yeti ɓɔɔ kpãa mɔɔ, nɛɛ kɔnang diki diki ɓɛɛ.

²⁴Vuu shi kpang zang ɓɔɔ tusu bii tantɛnang, bɛ̀ɛ́ zang kɔɔ gn kpang nɛɛ ri palɛ vuu shi kpang tɔ kpang. Vuu shi kpang zang ɓɔɔ tusu bii pati kpang, tusu bii ɓi nɛɛ knti.

²⁵Vuu tɔ̃ɔ ɓɔɔ zang palɛ ɓɛɛ, ɓi doo nɔngkɔ, ɓɔɔ kpãa zinang kpang. Ɓɔɔ zang zi kãntang kpang, waasɛ bii dòndòng kpang.