Read mumuye 1 Timoti 6 Bible Online

1 Timoti 6 - mumuye bible

1 Timoti 6

¹Mɔɔ nɛɛ jaafoo, mɔɔ zì dabang gãa ɓaaɓɛ, naa zang ɓɔɔ dàa naa ɓɔɔ mɔɔ a wu bannang katɔ ɓɛɛ. Tɔ̀ɔ, zang ɓɔɔ wu rang yee shi kpang kaa tɔ̀ɔ́ yuu Laa nɛɛ yuu vuu kɔ ruu tusu zang ɓɛɛ kpang.

²Ka teteng manɛ ɓɔɔ nɔɔ jaafoo ɓɛɛ, dabang gãa zang ɓɔɔ nɛɛ dũng Laa, nɔɔ risi ri naa vĩi, ka ruu ɓɔɔ, ri dũng doo Laa kɔ ɓɛɛ kpang. Nɔ̀ɔ pàlɛ̀ ri shonang gbãng gbãng kɔ jong. Ka ruu ɓɔɔ, dabang gãa manɛ ri ɓarɛ doo zang ɓɔɔ ri dũng doo Laa kɔ, a nɔɔ ti kasɛ ri manɛ katɔ ɓɛɛ. Tusu zang vuu keɓe, mɔɔ ti kɔɔ ri nɛɛ ri palɛ nɔngkɔ.

³Zang ɓɔɔ nɛɛ tusu vuu ɓɔɔgn ɓɔɔ daa gbete nɛɛ ruu ɓɔɔ niizang ɓɔɔ Kpanti ɓuru Yeesɔ Kirisi nɛɛ vuu ɓɔɔ ruu tusu ka yuu gbalang Laa kɔ ruu dũng ɓɛɛ kpang.

⁴Zang keɓe ɓi jĩng lakɛnang yee wu, zi vuu ɓɔɔ ɓi kpang. Kasɛ ɓi ruu nyaa laanang ka yuu ruu, nɛɛ nyaa ɓɔɔ zang haa dɔɔli ɓɛɛ. Shíng zang ri káa sũnyaa, ri bàsɛ́ zɔɔ, ri rang yee shi kpang ka yuu zɔɔ, ri dãa zɔɔ, ri rɛ̃rɛ vuu shi kpang ka yuu zɔɔ,

⁵a ri hãa nyaa diki diki. Zang keɓe, yeti ɓarɛ zunung rɛ̃rɛnang tɔ̃ɔ kpang, ri ti zi ruu ɓɔɔ niizang ɓarɛ kpang. Zang keɓe, ri kɔɔ ɓarɛ nɛɛ gbalang Laa ɓi gbalang ɓɔɔ zang walɛ saka kagn ɓɛɛ.

⁶Zang ɓɔɔ nɛɛ shing danggn ka bii Laa, a vuu ɓɔɔ ka naa ɓiɓɛ daa wu katɔ, vuu naa ɓiɓɛ kɛɓɛ shing yeti ɓiɓɛ valɛ katɔ.

⁷Ruu à nɛɛ vuu ɓɔɔ ka naa ka koo keɓe kpang. Ruu ti tuu vuu ɓɔɔ ka naa ka diki ɓɔɔ ruu yaa koo keɓe kpang.

⁸Ka ruu nɔngkɔ, vuu shaanang nɛɛ fɔ̃ɔrɔ ɓuru nɛɛ kagn, ri dàa ruu katɔ.

⁹Zang ɓɔɔ nɛɛ tɔɔ ri kasɛ ɓarɛ vuu naa, sheetang gãsɛ ri katɔ. Wu shing ri, ri palɛ vuu shoko nɛɛ vuu ɓɔɔ lasɛ ri katɔ, ɓɔɔ ri kàsɛ̀ ka yeti ɓarɛ ɓɛɛ. Vuu keɓe kɔ ri shing zang, zang wu shaarɛ dɔ̃ɔ gbete.

¹⁰Kasɛnang saka wukɔ dĩiri vuu shi kpang nandon. Zang ɓɔɔ ri làabìi walɛnang, ri yaa gbalang danggn ɓɔɔ ri shing ka bii Laa tɔ. A ri atɛ yuu ɓarɛ yeti lasɛnang ɓɔɔ kɔ̀ng dɔɔli tɔ.

¹¹A ɓɔɔ ɓaaɓɛ Timoti, ɓɔɔ mɔɔ ɓaa zang Laa ɓɛɛ, yaa vuu keɓe ɓaa nandon. Kãa ɓaa gbalang ɓɔɔ mɔɔ nwang zang tɔ̃ɔ ka tĩng Laa ɓɛɛ diki diki, zang ɓɔɔ dũng Laa niizang ɓɛɛ, zang ɓɔɔ shing danggn ka bii Laa ɓɛɛ, zang ɓɔɔ kasɛ zang katɔ ɓɛɛ, zang ɓɔɔ mã danggn dɔɔli ɓɛɛ, a ɓɔɔ zang ɓɔɔ pàlɛ́ zang tɔ̃ɔ ɓɛɛ.

¹²Ĩi yuu kagn ka gbalang danggn kɔ ruu shing ɓee. Yiti suru bii ɓɔɔ waa nyaa kpang ɓɔɔ mɔɔ walɛ tɔ ɓɛɛ gbãng gbãng. Wee suru bii ɓɔɔ Laa ɓaa mɔɔ nyaa ka ruu ɓiɓɛ kɔ, ka ɓɔɔ mɔɔ kasɛ nyaa ka shoo zang dɔɔli nɛɛ mɔɔ shing danggn tɔ ka bii Yeesɔ Kirisi ɓɛɛ.

¹³Ka tĩng Laa ɓɔɔ a vuu piti suru bii ɓɛɛ, a ɓɔɔ ka tĩng Yeesɔ Kirisi ɓɔɔ kɔ̀ɔ ruu ka yuu danggn ɓɔɔ wu shingnɛ ka tĩng kpanti Pontu Bilatu ɓɛɛ, n kɔɔ mɔɔ,

¹⁴dũng nyaa ɓɔɔ zang dang mɔɔ ɓɛɛ nandon, tɔ̀ɔ, zang ɓɔɔ wu kɔɔ kaa tɔ̀ɔ́ nɛɛ mɔɔ pálɛ́ vuu shi kpang tɔ kpang, diki ɓɔɔ Yeesɔ Kirisi nwang nyaa kagn wu a nɛɛ mani.

¹⁵Yeesɔ Kirisi naa nwang nyaa ka diki ɓɔɔ Laa shing ɓɛɛ. Laa ɓɔɔ zang piti dɔɔ wu, wukɔ roo kpanti gbete. Wukɔ Kpanti ka yuu rɛɛ kpanti nandon. Wukɔ dabang gãa rɛɛ dabang gãa.

¹⁶Wukɔ vɔ ɓi kpang gbete. Nwàng ɓi ka nɔng ɓɔɔ yakɛ ɓi katɔ, ɓɔɔ zang ɓɔɔ zunung daanang ka bii ɓiɓɛ kpang ɓɛɛ. Zang ɓɔɔ zi wu gngn kpang. Zang ɓɔɔ ti zi wu kagn kpang. Zang wu báng wu diki diki, naa vuu palɛnang wu nwang ɓɔɔ ɓiɓɛ dòndòng, Nɔngkɔ.

¹⁷Kɔɔ zang ɓɔɔ ri zang ying ka koo keɓe ri tuu yuu ɓarɛ kpang. Ri shing gn ka vuu naa ɓɔɔ nwang dòndòng kpang, ɓɔɔ naa weɓe kpang. Ri shing gn ka bii Laa ɓɔɔ a ruu vuu piti, ka diki kpang, nɛɛ tɔ̀ɔ, ruu tãa tĩnang nɛɛ mani ɓɛɛ.

¹⁸Kɔɔ ri nɛɛ ri palɛ vuu ɓɔɔ tɔ̃ɔ ɓɛɛ. Ri nwang zang ying nɛɛ vuu tɔ̃ɔ ɓɔɔ ri palɛ ɓɛɛ. Ri mung naa kpang, ri a zang vuu, ri basɛ vuu ɓarɛ katɔ nɛɛ zang ɓɔɔ ɓɔ̀ɔ́ ɓarɛ kagn kpang.

¹⁹Naa ri palɛ naa weɓe, ri kpàlɛ́ yuu ɓarɛ, vuu ɓɔɔ ri lòó ɓarɛ doo vuu ɓɔɔ naa yi ri naa ka bii ka tĩng ɓɛɛ. Tɔ̀ɔ, ri walɛ suru bii ɓɔɔ niizang ɓɛɛ kati.

²⁰Timoti, gãng jĩng ka vuu ɓɔɔ Laa a mɔɔ ka naa ɓɛɛ waasɛ̃. Mɔɔ ɓaa shoo ka yee sãnsãnrãng ɓɔɔ zang rangkɛ kpang. Mɔɔ ti laa nyaa ka yuu vuu ɓɔɔ zang suu sèé nɛɛ wukɔ “zũnang” ɓɛɛ kpang.

²¹Zang ɓɔɔ ri yáa danggn kɔ ri shing ka bii Laa ɓee tɔ, ka ruu ɓɔɔ, ri ɓaa shoo ka yee ɓɔɔ naa weɓe ɓɛɛ. N gaa Laa, wu pálɛ̀ nɔɔ tɔ̃ɔ nandon.