Read mumuye 2 Timoti 3 Bible Online

2 Timoti 3 - mumuye bible

2 Timoti 3

¹Danggn wu ning mɔɔ kpang. Diki ɓɔɔ koo naa waa nyaa kagn naa nwang diki jĩng dannang.

²Ka diki keɓe, zang ri naa kàsɛ́ yuu ɓarɛ kɔ shɛ̃ɛning, ri naa kɔng jĩng nɛɛ vuu ɓarɛ, ri kɔ̀ɔrɔ́ ruu bang bang ka yuu ɓarɛ, ri naa tuu bii dɔɔli, ri naa dãlɛ zang, ri naa ɓaa shoo ka nyaa zang ɓɔɔ yiki ri kpang, ri naa zã̀a zang kpàng, ri ti naa dũng Laa kpang, ri pálɛ̀ vuu ɓɔɔ Laa kasɛ ɓɛɛ kpang.

³Ri naa pàlɛ̀ zang tɔ̃ɔ kpang, gn zang ti naa kɔng ri kpang, ri naa rang yee shi kpang ka yuu zang, ri naa yiti yuu ɓarɛ kpang, a gnvɔ ti ka yeti ɓarɛ dɔɔli. Ri naa kasɛ vuu ɓɔɔ tɔ̃ɔ ɓarɛ kpang.

⁴Ri ɓarɛ zang ɓɔɔ mɔɔ shing gn ka bii ɓarɛ kpang. Ri naa rɛ̃̀rɛ̀ ka gbongkarɛ tɔ̀ɔ, ri pálɛ́ vuu kpang, ri naa lakɛ jĩng dɔɔli. Ri naa kasɛ vuu ɓɔɔ ri tãa tĩnang kagn ɓa ɓɔɔ ri kasɛ Laa katɔ.

⁵Ri naa palɛ bii mɔɔ kɔ̀ɔ́ nɛɛ ri dṹng Laa nɛɛ yeti gbete, a nwannang ɓarɛ tusu ɓi nɛɛ ri dũng Laa kpang tingkiring. Ruu ɓaaɓɛ wu hãa kagn nɛɛ rɛɛ zɔ̃ng zang keɓe kpang.

⁶Zang ɓɔɔ ka teteng ɓarɛ ri naa dàarɛ́ zang ka gãa. Ri ɓá kaka zang soro ɓɔɔ ri lakɛ yeti kɔ̃sɔnang kpang ɓɛɛ. Ɓɔɔ ri rɛ̃rɛ ɓi ka yuu vuu shi kpang ɓarɛ ɓɛɛ. Ri kasɛ ri palɛ ɓarɛ, vuu ɓɔɔ bii ɓarɛ kasɛ ɓɛɛ.

⁷Zang soro keɓe, diki diki ri kasɛ nɛɛ zang kpɛ̃ɛrɛ ri vuu, a ri zi vuu ɓɔɔ niizang kaa takpang doo nɛɛ mani.

⁸Naa ɓɔɔ Jani ri nɛɛ Jambari ri bɛ̃ɛ nyaa Musa ɓɛɛ, zang keɓe ri bɛ̃ɛ ruu ɓɔɔ niizang doo nɔngkɔ. Zang keɓe, yeti ɓarɛ zunung rɛ̃rɛnang kpang. Danggn shinnang ɓarɛ ɓi ɓɔɔ niizang kpang.

⁹Ri dàa tĩng beebang kpang, ka ruu ɓɔɔ, zang piti ri zi shoko ɓarɛ ditɔ ɓɛɛ. Wee vuu ɓɔɔ pálɛ́ rɛɛ Jani nɛɛ Jambari ɓɛɛ kɔ.

¹⁰Ɓɔɔ ɓaaɓɛ, mɔ̀ɔ dũng vuu ɓɔɔ n tusu ɓɛɛ tɔ, mɔɔ zi nwannang mɛɛ tɔ, a mɔɔ ti zi vuu ɓɔɔ n shing jĩng mɛɛ kagn tɔ. Mɔɔ zi danggn ɓɔɔ n shing ka bii Laa tɔ, nɛɛ danggn ɓɔɔ n mã nɛɛ zang, nɛɛ naa ɓɔɔ n kasɛ zang ɓɛɛ a ɓɔɔ danggn ɓɔɔ n mã ka jĩng dannang ɓɛɛ.

¹¹Mɔɔ ti zi naa ɓɔɔ zang dang m jĩng ɓɛɛ nɛɛ jĩng dannang ɓɔɔ n dang ɓɛɛ. Mɔɔ zi vuu ɓɔɔ palɛ m ka Antakiya, nɛɛ Ikoniya, nɛɛ Lisitira tɔ, jĩng ɓɔɔ zang dang m, a n mã danggn ɓɛɛ. Laa ta yuu mɛɛ ka vuu keɓe nandon.

¹²Zang piti ɓɔɔ nɛɛ kasɛ wu nwang zang ɓɔɔ dũng Laa gbãng gbãng ka ɓɔɔ wu ɓakɛ yuu nɛɛ Yeesɔ Kirisi, zang dang wu jĩng katɔ.

¹³A zang ɓɔɔ ri palɛ vuu shi kpang nɛɛ zang ɓɔɔ, ri tuu waa nyaating zang ɓɔɔ ri palɛ vuu nɛɛ mani ɓɛɛ, ri shaarɛ katɔ, shaarɛnang ɓarɛ daa nɛɛ tĩng kɔ jong. Ri nwãarɛ zang, zang ti nwãarɛ ri.

¹⁴Ɓɔɔ ɓaaɓɛ, dũng ɓaa vuu ɓɔɔ mɔɔ kpɛ̃ɛrɛ a mɔɔ ti shing danggn tɔ kagn gbãng gbãng ɓɛɛ. Mɔɔ ti zi zang ɓɔɔ ri tusu mɔɔ vuu ɓɛɛ tɔ.

¹⁵Mɔɔ ti zi tɔ, ɓɔɔ bɛ̀ɛ́ mɔɔ doo wujaa, mɔɔ zi labeenang Laa ɓɔɔ zunung ɓɔɔ wu shing mɔɔ, mɔɔ zũngnɛ tɔ. Tɔ̀ɔ Laa wu ta yuu ɓaaɓɛ ka ruu danggn ɓɔɔ mɔɔ shing ka bii Yeesɔ Kirisi ɓɛɛ.

¹⁶Yee ɓɔɔ ka yeti labeenang Laa nandon, Laa nwangsɛ ɓi nɛɛ bii Suru ɓiɓɛ. Zang tusu zang vuu nɛɛ yee keɓe kɔ, zang ti mangkɛ zang nɛɛ mani, zang gbarɛ zang nɛɛ mani, a zang ti tusu zang nwannang ɓɔɔ Laa kasɛ nɛɛ mani,

¹⁷tɔ̀ɔ, zang ɓɔɔ pálɛ̀ Laa shonang, wu walɛ zũnang ɓɔɔ wu palɛ shonang tɔ̃ɔ ka zɔ̃ng zɔ̃ng piti nɛɛ mani.