Read mumuye Titu 2 Bible Online

Titu 2 - mumuye bible

Titu 2

¹Ɓɔɔ ɓaaɓɛ, tùsù zang ɓɔɔ ri dũng Laa ɓaa vuu ɓɔɔ daa doo vuu ɓɔɔ zang ɓɔɔ ri dũng Laa ri tusu ɓɛɛ.

²Kɔɔ zang ɓɔɔ ri kpɛ̃ɛ tɔ, ri nwàng wu zang ɓɔɔ yeti ɓarɛ lasɛ pati kpang, ri nwáng zang ɓɔɔ zang a ri bannang katɔ, ri yiti yuu ɓarɛ waasɛ̃. Ri nwang zang ɓɔɔ ri shing danggn tɔ gbãng gbãng ɓɛɛ, ri kasɛ zang gbãng gbãng, a ri ti mã danggn gbãng gbãng.

³Kɔɔ zang soro ɓɔɔ ri kpɛ̃ɛ tɔ ri nwáng nwannang naa zang soro ɓɔɔ ri dũng Laa nɛɛ yeti gbete ri nɛ̀ɛ́ nwàng ɓɛɛ. Ri rang zang kpang, ri nwàng jaafoo sàa kpang, ri tusu naa ɓɔɔ zang soro ɓɔɔ ri dũng Laa ri nɛ̀ɛ́ nwang ɓɛɛ,

⁴tɔ̀ɔ, ri kpɛ̃ɛrɛ zang soro ɓɔɔ ri doo jasang naa ɓɔɔ ri kàsɛ́ varɛ ɓarɛ nɛɛ wujɛ ɓarɛ kati.

⁵Ri kpɛ̃ɛrɛ ri, ri yiti yuu ɓarɛ waasɛ̃, ri pálɛ̀ dũndũng kpang, ri nwang zang soro ɓɔɔ tɔ̃ɔ, ɓɔɔ ri palɛ shonang gãa ɓarɛ katɔ ɓɛɛ, ri palɛ zang tɔ̃ɔ, ri ɓaa shoo ka nyaa varɛ ɓarɛ. Tɔ̀ɔ, zang ri rang yee shi kpang kaa tɔ̀ɔ́ ka yuu Ruu Laa kpang.

⁶Kɔɔ jasang doo nɔngkɔ, nɛɛ ri yiti yuu ɓarɛ katɔ.

⁷Ka vuu ɓɔɔ mɔɔ palɛ piti, tusu yuu ɓaaɓɛ, mɔɔ nwang zang ɓɔɔ zang kpɛ̃ɛrɛ vuu ka bii ɓiɓɛ ɓɛɛ. Tusu zang vuu nɛɛ yeti gbete, mɔɔ ti pĩiri nɛɛ vuu ɓɔɔ mɔɔ tusu zang ɓɛɛ kpang.

⁸Tusu vuu ɓɔɔ tɔ̃ɔ ɓɔɔ zang ɓɔɔ kɔɔ kpang nɛɛ shi kpang, kpang ɓɛɛ. Tɔ̀ɔ, yusɛ̃ɛ wu tuu zang ɓɔɔ ri shing jĩng nɛɛ mɔɔ kpang kati, ri wàlɛ̀ vuu shi kpang ɓɔɔ ri kɔ̀ɔ́ ka yuu ɓaaɓɛ kaa takpang.

⁹Kɔɔ jaafoo ɓɔɔ ri dũng Laa ɓɛɛ, nɛɛ ri ɓaa shoo ka nyaa dabang gãa ɓarɛ. Ri shingnɛ, dabang gãa ɓarɛ, ri tãa tĩnang ka vuu ɓɔɔ ri pàlɛ́ ri ɓɛɛ nandon. Ri laa nyaa nɛɛ ri kpang.

¹⁰Ri ɓɔ̀ɔ vuu dabang gãa ɓarɛ kpang. Ri tusu diki diki nɛɛ ri zang tɔ̃ɔ ɓɔɔ zang shing gn katɔ ka bii ɓarɛ ɓɛɛ. Tɔ̀ɔ, vuu piti ɓɔɔ ri palɛ, wu shingnɛ, zang ri rang yee tɔ̃ɔ kaa yuu vuu kɔ ruu tusu ka yuu Laa, ɓɔɔ wukɔ ta yuu ɓuru ɓɛɛ.

¹¹Ka ruu ɓɔɔ, Laa túsú tɔ̃ɔ ɓiɓɛ ɓɔɔ wu ta yuu zang piti nɛɛ mani tɔ ɓɛɛ.

¹²Tɔ̃ɔ ɓiɓɛ keɓe, kɔ tusu ruu, ruu yaa nwannang ta naa zang ɓɔɔ ri zi Laa kpang ɓɛɛ, nɛɛ naa zang ɓɔɔ ri kasɛ ruu vuu koo ɓɛɛ. Ruu nwangnɛ, ruu yiti yuu ɓuru katɔ, ruu nwang nwannang ɓɔɔ tɔ̃ɔ ɓɛɛ, ruu dũng Laa ka nwannang ɓuru ka koo keɓe.

¹³Ka wee ruu nwangnɛ, ruu gã diki tĩnang tãanang ɓɔɔ ruu shing gn nɛɛ naa a ɓɛɛ. Diki ɓɔɔ bannang Laa ɓuru Yeesɔ Kirisi ɓɔɔ wukɔ ɓa zang piti, ɓɔɔ wukɔ ti ta yuu ɓuru naa nwangsɛ bii ɓɛɛ.

¹⁴Yeesɔ a yuu ɓiɓɛ ka ruu ɓuru nɛɛ wu ta ruu nɛɛ naa vuu shi kpang nandon. Wu shing ruu, ruu nwang zang ɓiɓɛ kɔ bm gbete. Wu shing rùu rúu nwang zang ɓɔɔ ri kpalɛ bii tɔ, nɛɛ ri palɛ vuu ɓɔɔ tɔ̃ɔ ɓɛɛ.

¹⁵Tusu zang vuu keɓe. Pálɛ́ shonang nɛɛ naa vuu palɛnang ɓaaɓɛ nandon, mɔ́ɔ mã̀ zang ɓaaɓɛ danggn. Mɔɔ ti mangkɛ ri. Mɔɔ yaa zang ɓɔɔ wu risi mɔɔ naa vĩi kpang.