Read mumuye Yahudi 5 Bible Online

Yahudi 5 - mumuye bible

Yahudi 5

¹Zang zɔ̃́ng kpanti zang ɓɔɔ ri dɔɔ vuu ka Gãa Laa ɓu, ka teteng rɛɛ shɔnzang. Ri shing wu nɛɛ wu pàlɛ̀ Laa shonang ka nung ɓarɛ, wu ti dɔ̀ɔ Laa vuu, tɔ̀ɔ, Laa wu kɔsɔ zang vuu shi kpang ɓarɛ kati.

²Zunung ɓɔɔ wu pàlɛ́ zang ɓɔɔ ri zi vuu kpang, a ri ning gbalang kati ɓɛɛ, hakaka kpang. Ka ruu ɓɔɔ palɛ vuu shi kpang ɓi doo katɔ kɔ ɓɛɛ.

³Ka ruu nɔngkɔ, dɔ̀ɔrɔ́ vuu ka Gãa Laa, ka ruu vuu shi kpang ɓiɓɛ, nɛɛ vuu shi kpang zang dɔɔli.

⁴Shɔnzang a yuu ɓiɓɛ, bannang nwannang kpanti zang ɓɔɔ ri dɔɔ Laa vuu ka Gãa Laa kpang. Laa ɓáa wu nyaa katɔ, naa ɓɔɔ wu ɓaa Haruna nyaa ɓɛɛ.

⁵Kirisi doo nɔngkɔ, wu wukɔ a yuu ɓiɓɛ bannang nwannang kpanti zang ɓɔɔ dɔɔ vuu ɓɛɛ kpang. Ɓi Laa kɔɔ wu nɛɛ, “Mɔɔ Jaa mɛɛ, lɛ̀ɛ́kɔ n tusu tɔ, nɛɛ n Daa ɓaaɓɛ”

⁶A ti kɔɔ ka nɔng ɓɔɔ tɔkn nɛɛ, “Mɔɔ ɓaa zang ɓɔɔ dɔɔ vuu ka Gãa Laa dòndòng, naa ɓɔɔ Malakisadak nwáng ɓɛɛ.”

⁷Ka diki ɓɔɔ Yeesɔ nwáng ka koo keɓe, rangkɛ yee nɛɛ Laa a gaarɛ wu, mɛɛ nyaa ka lapa nɛɛ miiri ka jĩng. Gaa Laa ɓɔɔ zunung ɓɔɔ ta yuu ɓiɓɛ katɔ, wu vɔ kpang ɓɛɛ. A Laa tãa wu ka ɓɔɔ wisi wu paa nɛɛ saa ɓɛɛ, ka ruu ɓɔɔ, tuu yuu ɓiɓɛ kpang, a ti a Laa yuu ɓiɓɛ katɔ ɓɛɛ.

⁸Naa wee wu Jaa ɓee, kpɛ̃ɛrɛ naa ɓɔɔ wu dũng nyaa Laa doo nɛɛ mani ka jĩng ɓɔɔ wu dang ɓɛɛ.

⁹Ka ɓɔɔ hangsɛ shonang ɓiɓɛ tɔ ɓɛɛ, nwàng zang ɓɔɔ ta yuu zang nandon, ɓɔɔ ri dũng nyaa ɓiɓɛ ɓɛɛ. Tɔ̀ɔ, yuu ɓarɛ ɓɔɔ zang tarɛ, wu nwang kaa ɓɔɔ gbinggbing ɓɛɛ.

¹⁰A Laa shing Yeesɔ nɛɛ wu nwang kpanti zang ɓɔɔ ri dɔɔ vuu ka Gãa Laa ɓɛɛ, naa ɓɔɔ Malakisadak nwáng ɓɛɛ.

¹¹Vuu ɓɔɔ ruu kɔɔ ka yuu vuu keɓe kagn dɔɔli, a kpãa ruu nyaa kaa naa ɓɔɔ ruu kɔɔ nɔɔ ruu, tɔ̀ɔ, nɔɔ zi kati ɓɛɛ. Ka ruu ɓɔɔ, nɔɔ valɛ bii vuu mantɛnang dɔɔli ɓɛɛ.

¹²Niizang, kãntang keɓe nɔkɔ nɛɛ tusu zang vuu kati, a nɔɔ kasɛ nɛɛ zang ɓɔɔ wu paasɛ nɔɔ ruu niizang ɓɔɔ kpãa kpang, ɓɔɔ ka Ruu Laa ɓɛɛ tusunang tɔkn. Nɛɛ nɔngkɔ, zang wu a nɔɔ míi, wu vuu shaanang ɓɔɔ lakɛ katɔ kpang.

¹³Zang ɓɔɔ vuu shaanang ɓiɓɛ nɛɛ ɓi míi, zang keɓe ɓi doo jaa rɛ̃ɛting. Zang keɓe zunung ɓɔɔ wu basɛ teteng vuu ɓɔɔ tɔ̃ɔ, nɛɛ vuu shi kpang kpàng.

¹⁴Vuu shaanang ɓɔɔ lakɛ katɔ ɓi ɓɔ̀ɔ́ zang ɓɔɔ ri zũng bii tɔ ɓɛɛ, zang ɓɔɔ ri kpɛ̃ɛrɛ yuu ɓarɛ tɔ diki diki, naa ɓɔɔ ri bàsɛ́ teteng vuu tɔ̃ɔ, nɛɛ vuu shi kpang ɓɛɛ.