Read mumuye Yakubu 3 Bible Online

Yakubu 3 - mumuye bible

Yakubu 3

¹Manzung nɔ́ɔ nwàng zang ɓɔɔ ri tusu zang vuu kɔ nandon kpang, ka ruu ɓɔɔ nɔɔ zi tɔ wee ruu tusu zang vuu ɓee, zang naa jɛ̃ɛ ruu rúu ɓa ɓɔɔ zang piti katɔ ɓɛɛ.

²Ka ruu ɓɔɔ rùu nandon jĩng kpantɛ ruu katɔ diki diki ɓɛɛ. Zang ɓɔɔ nɛɛ tɔɔ, nyaa kpantɛ wu ɓi jong ka nɔng yee rannang kpang, zang keɓe ɓi shɔnzang tɔ̃ɔ ka vuu ɓɔɔ wu palɛ ɓɛɛ. Zunung naa ɓɔɔ wu shing yuu ɓiɓɛ katɔ.

³Ruu hãa gbantang saka ka nyaa, tɔɔ ri palɛ vuu ɓɔɔ ruu kasɛ ɓɛɛ. Ruu ti raa ri jĩng ka nɔng ɓɔɔ ruu kasɛ ɓɛɛ.

⁴Laana kɔ nɔɔ zirɛ bang ka yuu mii, jasung dɔ̃ ɓee. Jaa saka ɓɔɔ zang ɓɔɔ zaayi raa nyaa ɓiɓɛ nɛɛ mani ɓi tɔkɔlɔng hn. Wu ti zaa nɛɛ mani wu daa ka nɔng ɓɔɔ wu kasɛ ɓɛɛ.

⁵Rĩiti ɓɔɔ ka nyaa ɓuru doo nɔngkɔ. Ɓi katɔ tɔkɔlɔng hn ka bii ɓuru, nwangsɛ yee bang bang dɔɔli. Waala bangnɛ, bangnɛ, waa tɔkɔlɔng dɔɔyi.

⁶Rĩiti nwang naa waa. Ka teteng vuu ɓɔɔ ka bii ɓuru piti, shi kpang nwangnɛ bii rĩiti kɔ. Zɔɔ bii nimbang keɓe nɛɛ zɔ̃pɔ ɓiɓɛ. Lasɛ nwannang zang ka koo keɓe nɛɛ waa ɓiɓɛ ɓɔɔ nwangnɛ nɔng waa ɓɔɔ ning ɓi jong kpang ɓɛɛ.

⁷Vuu jĩngti, nɛɛ jaaning, nɛɛ vuu ɓɔɔ ri gɔ̃ nɛɛ buru ka tipi, nɛɛ vuu ɓɔɔ ri ka yeti mii waapo ɓɛɛ, shɔnzang zunung mãnang katɔ ka vàa. Zang ti mã katɔ diki diki.

⁸A zang ɓɔɔ zunung rĩiti mãnang ɓi kagn kpang. Rĩiti palɛ ɓi vuu shi kpang kɔ sasak. Zɔ̃pɔ vɔrɔ kagn bii ɓiɓɛ dɔɔli.

⁹Ruu dɔ̀ɔ́ Laa ɓɔɔ wukɔ Daa ɓuru nɛɛ wukɔ, a ruu ti dãa shɔnzang ɓɔɔ Laa mãa wu naa bii ɓiɓɛ nɛɛ mani.

¹⁰Ruu dɔɔ Laa, a ruu ti dãa zang nɛɛ nyaa gbete keɓe. Manzung, nɔɔ palɛ wu nɔngkɔ kpang.

¹¹Mii lalata nɛɛ mii tɔ̃ɔ, ri nwang katɔ, nɛɛ sɔlɔna mii gbete ya?

¹²Manzung, Laa sĩiri ra jaa gbaranti katɔ ya? Gbaranti ti ra jaa sĩiri katɔ ya? Too mii lalata, nwangsɛ mii tɔ̃ɔ ɓi jong kpang doo nɔngkɔ.

¹³Ɓu wi zũng dɔɔli, a ti zi vuu dɔɔli ka teteng manɛ wiya? Wu palɛ vuu ɓɔɔ tɔ̃ɔ wu ti lakɛ jĩng kpang, tɔɔ zang zi zũnang ɓiɓɛ kati.

¹⁴Nɔɔ nɛɛ kaa sũnyaa gbãng gbãng, nɔɔ nɛɛ ti kasɛ yuu manɛ dɔɔli ka yeti manɛ, nɔ́ɔ kɔɔrɔ ruu bang bang ka yuu manɛ kpang, nɔ́ɔ ti suu sèé ka ruu vuu ɓɔɔ niizang kpang.

¹⁵Wee ɓi zũnang ɓɔɔ a nɛɛ bii Laa kpang, ɓi ɓɔɔ koo keɓe. Ɓi ɓɔɔ Suru Laa kpang. Ɓi ɓɔ̀ɔ́ suru shi kpang.

¹⁶Ka ruu ɓɔɔ, nɔng ɓɔɔ sũnyaa kaanang nɛɛ nɔng ɓɔɔ zang ri kasɛ yuu ɓarɛ dɔɔli kagn, nɔng keɓe vɔ̃ɔtɔ ɓi kaa tɔ. A vuu shi kpang nwang ɓi ka nɔng dɔɔli.

¹⁷Zũnang ɓɔɔ a nɛɛ bii Laa ɓi náabm̀. Zang ɓɔɔ zũnang keɓe kagn yeti ɓiɓɛ, shi kpang nwang ɓi ka bii ɓiɓɛ kpang. Zũnang keɓe, shing zang, zang kasɛ nwannang ka bii zɔɔ, palɛ vuu ɓi hakaka kpang, yi wusang ɓi dɔɔli, gn zang kɔng wu dɔɔli, a ti palɛ vuu tɔ̃ɔ dɔɔli. Pálɛ̀ vuu ɓi jong gn dang gbete kpang, ti nwãarɛ zang ɓi nɛɛ vuu palɛnang kpang.

¹⁸Zang ɓɔɔ ri kasɛ nɛɛ zang ri nwang ka nyaa zɔɔ, ri pálɛ́ vuu ɓɔɔ tɔ̃ɔ ɓɛɛ, tɔɔ ri shing zang, zang ri nwang kaa nyaa zɔɔ.