Read mumuye 1 Bituru 2 Bible Online

1 Bituru 2 - mumuye bible

1 Bituru 2

¹Ka ruu nɔngkɔ, wee Laa a nɔɔ suru bii shɔɔ tɔ ɓee, nɔɔ nwangsɛ gnvɔ ta nandon ka yeti manɛ, nɔ́ɔ suu zang sèé takpang, nɔ́ɔ nwãarɛ zang nɛɛ vuu palɛnang kpang, nɔ́ɔ shing jĩng ka vuu zang kpang, nɔ́ɔ ti rang yee shi kpang tɔ̀ɔ́ ka yuu zang kpang.

²Nɔɔ nwáng manɛ naa wujɛ rɛ̃ɛting ɓɔɔ ri kaa nyɔkɔ mii nàá ɓarɛ, diki diki ɓɛɛ kɔ jong. Nɔɔ kaa manɛ nyɔkɔ Ruu Laa ɓɔɔ wukɔ mii ɓɔɔ niizang, ɓɔɔ shing nɔɔ, nɔɔ zũng danggn ɓɛɛ. Diki ɓɔɔ Laa naa ta yuu manɛ wu a nɛɛ mani.

³Nɔɔ zi tɔ, nɛɛ yuu manɛ nɛɛ dabang ɓuru Yeesɔ pálɛ̀ tɔ̃ɔ dɔɔli.

⁴Ka ruu nɔngkɔ, nɔɔ a naabm ka bii ɓiɓɛ. Wukɔ tari ɓɔɔ nwang ɓi dòndòng kaɓa, ɓɔɔ a zang suru bii, ɓɔɔ shɔnzang ri bɛ̃ɛyi naa vuu ɓɔɔ shi kpang ɓɛɛ. Ka jĩng Laa ɓɔɔ zɔ̃ng wu, wu ɓi zang ɓɔɔ daa naa ɓɔɔ zang a wu bannang ɓa zang piti katɔ ɓɛɛ.

⁵Nɔɔ ɓɔɔ Yeesɔ Kirisi a nɔɔ suru bii tɔ ɓɛɛ, nɔɔ nwàng doo naa rɛɛ tari kɔ. Tari ɓɔɔ Laa mãa gãa ɓɔɔ suru nwang kagn ɓɛɛ. Nɔɔ manɛ zang ɓɔɔ Laa zɔ̃ng ri nɛɛ ri nwang zang ɓɔɔ ri dɔ̀ɔ́ wu vuu ɓɛɛ. Nɛɛ tɔ̀ɔ, nɔ́ɔ shòng wu kaa nɛɛ yeti manɛ piti naa ɓɔɔ wu tãa tĩnang ɓɛɛ, ka ruu Yeesɔ Kirisi.

⁶Zang bée ka yeti labeenang Laa ka tĩng tɛ̃ɛ tɛ̃ɛ nɛɛ, Laa kɔɔyi tɔɔ, “Nɔɔ zirɛ, N shíng tari tɔ̃ɔ ka Siyona, tari ɓɔɔ n mãa gãa mɛɛ ka yuu ɓiɓɛ kɔ. Nkɔ zɔ̃ng wu, ɓa vuu piti katɔ ka jĩng mɛɛ. Zang piti ɓɔɔ nɛɛ shing danggn ka bii ɓiɓɛ yusɛ̃ɛ tuu wu kpang.”

⁷Ɓɔɔ nɔɔ shing danggn tɔ, Yeesɔ kɔ ɓa vuu piti ka jĩng manɛ. Zang ɓɔɔ ri shing danggn ka bii ɓiɓɛ kpang ri naa zirɛ, “Tari ɓɔɔ zang ɓɔɔ ri mãa gãa ri bɛ̃ɛyi, wukɔ naa ràa tari ɓɔɔ yiti gãa kati.”

⁸Zang bèe ka nɔng ɓɔɔ ka yeti labeenang Laa nɛɛ, “Wee tari ɓɔɔ zang naa kpaa doo kagn, zang watɛ ɓɛɛ kɔ”. Ri kpaa doo, ri watɛ, ka ruu ɓɔɔ, ri dũ̀ng Ruu Laa kpang ɓɛɛ. Laa kɔ kasɛ nɛɛ wu nwang nɔngkɔ, doo ka tĩng tɛ̃ɛ tɛ̃ɛ.

⁹Ɓɔɔ manɛ, nɔɔ manɛ zɔ̃ng zang ɓɔɔ Laa shɛ̃ɛrɛ ri katɔ ɓɛɛ, rɛɛ zang ɓɔɔ ri dɔɔ vuu ɓɔɔ ri shong kpanti ɓɛɛ. Nɔɔ manɛ zɔ̃ng zang ɓɔɔ Laa shɛ̃ɛrɛ ri nɛɛ nɔɔ nwang zang ɓiɓɛ ɓɛɛ. Laa shɛ̃ɛrɛ nɔ́ɔ nɛɛ nɔɔ kɔɔ zang rɛɛ vuu bang bang, ɓɔɔ tɔ̃ɔ tɔ̃ɔ, ɓɔɔ wu pàlɛ̀ nɔɔ ka ɓɔɔ wu nwangsɛ nɔɔ nɛɛ nɔng ɓɔɔ tɔ̀ɔ katɔ ɓɛɛ. A átɛ̀ nɔɔ nɛɛ nɔ́ɔ nwang ka nɔng ɓiɓɛ ɓɔɔ yakɛ katɔ, ɓɔɔ zang zirɛ zang mã naa ka danggn ɓɛɛ.

¹⁰Ɓeleng nɔɔ manɛ zang Laa kpang. Kãntang keɓe nɔɔ raa zang Laa tɔ. Ɓeleng nɔɔ zi gn zang ɓɔɔ kɔng Laa ɓɛɛ kpang, kãntang keɓe gn manɛ kɔng wu kaa tɔ.

¹¹Masang ɓɔɔ n kasɛ ruu manɛ dɔɔli ɓɛɛ, nɔɔ manɛ zang zanti. Nɔɔ nwàng manɛ zanti waati ka koo keɓe. Ka ruu nɔngkɔ, n gaa nɔɔ, nɔ́ɔ yaa rɛɛ vuu shi kpang ɓɔɔ nɔɔ kasɛ ka yeti manɛ nɛɛ nɔɔ palɛ ɓɛɛ. Ka ruu ɓɔɔ, rɛɛ vuu keɓe ri kasɛ nɛɛ ri nyɔ nɔɔ vɔrɔ ɓɛɛ.

¹²Nɔɔ nwáng nwannang tɔ̃ɔ, tɔ̀ɔ, zang ɓɔɔ ri zi Laa kpang ri zirɛ. Ka ruu ɓɔɔ, naa ri rang yee shi kpang doo ka yuu manɛ, ri zili vuu tɔ̃ɔ ɓɔɔ nɔɔ palɛ ɓɛɛ, ri naa dɔ̀ɔ Laa ditɔ, ka diki ɓɔɔ wu naa a ka bii ɓarɛ ɓɛɛ.

¹³Nɔɔ ɓaa shoo ka nyaa rɛɛ zang piti ɓɔɔ zang shing ri zang bang ka yuu zang ka koo keɓe ɓɛɛ, ka ruu Yeesɔ Kirisi. Nɔɔ seng kpanti ɓɔɔ ɓa rɛɛ kpanti piti ɓɛɛ.

¹⁴Nɔɔ ti ɓaa shoo ka nyaa rɛɛ gɔmna ɓɔɔ kpanti keɓe tuu ri nɛɛ ri dang zang ɓɔɔ ri palɛ vuu shi kpang jĩng, wu ti dɔ̀ɔ zang ɓɔɔ ri palɛ vuu tɔ̃ɔ ɓɛɛ.

¹⁵Laa kasɛ nɛɛ nɔ́ɔ palɛ vuu ɓɔɔ tɔ̃ɔ ɓɛɛ, tɔ̀ɔ, zang ɓɔɔ ri zi vuu ɓɔɔ kpang, ɓɔɔ ri rangkɛ yee shi kpang ka yuu manɛ, ri vɔ̃ nyaa kati.

¹⁶Nɔɔ nwàng manɛ naa zang ɓɔɔ ri jaafoo zang ɓɔɔ kpang ɓɛɛ. Nɔ́ɔ tɔɔ kpang nɛɛ wee nɔɔ jaafoo zang ɓɔɔ kpang ɓee, nɔɔ walɛ gbalang vuu shi kpang palɛnang tɔ kpang. Nɔɔ nwáng nwannang ɓɔɔ daa naa ɓɔ̀ɔ́ zang ɓɔɔ ri pàlɛ́ Laa shonang ɓɛɛ kati.

¹⁷Nɔ́ɔ a zang piti bannang katɔ. Nɔ́ɔ ti kàsɛ̀ ruu zang ɓɔɔ ri dũng doo Laa kɔ katɔ. Nɔ́ɔ kaa vɔrɔ Laa katɔ. Nɔ́ɔ ti a kpanti bannang katɔ.

¹⁸Zang shonang, nɔ́ɔ gãsɛ yuu manɛ nɛɛ zang ɓɔɔ rikɔ dabang gãa manɛ kpang, nɔɔ seng ri katɔ ka vuu piti. Ri nɛɛ palɛ nɔɔ tɔ̃ɔ, kɔ́ ri nɛɛ dang nɔɔ jĩng, nɔɔ seng ri gbã̀ágbãa.

¹⁹Zang ɓɔɔ nɛɛ mã danggn ka jĩng ɓɔɔ wu dang ɓɛɛ, ka ruu ɓɔɔ, wu zi tɔ nɛɛ Laa tãa tĩnang nwannang ɓɔɔ naa weɓe katɔ, naa nɛɛ dang jĩng ka ruu vuu shi kpang ɓɔɔ wu palɛ ɓɛɛ kpang, zang dɔ̀ɔ́ zang keɓe kɔ.

²⁰Naa zang ɓɔɔ palɛ vuu shi kpang, a mã danggn ka ɓɔɔ zang nyɔ wu, ka ruu vuu shi kpang ɓɔɔ wu palɛ ɓɛɛ, zang dɔ̀ɔ́ wu katɔ ya? Zang pálɛ̀ wu ɓi vuu ɓɔɔ daa naa ɓɔɔ zang nɛɛ palɛ wukɔ nwani. Naa zang ɓɔɔ palɛ tɔ̃ɔ, a zang dang wu jĩng ka ruu tɔ̃ɔ ɓɔɔ wu palɛ, a mã danggn, zang keɓe daa naa ɓɔɔ Laa dɔ̀ɔ́ wu tɔ.

²¹Laa ɓaa nɔɔ nyaa nɛɛ, nɔ́ɔ nwang zang ɓiɓɛ nɛɛ naa nɔɔ nɛɛ palɛ tɔ̃ɔ a zang dang nɔɔ jĩng, nɔɔ mã danggn katɔ. Ka ruu ɓɔɔ, Yeesɔ Kirisi nɛɛ yuu ɓiɓɛ, dang jĩng ka ruu manɛ ɓɛɛ. Nwannang ɓiɓɛ kɔ tusu nɔɔ naa ɓɔɔ nɔɔ nwáng ɓɛɛ.

²²Yeesɔ Kirisi pálɛ́ vuu shi kpang ɓɔɔ kagn kpang tingkiring, sèé ti nwang gngn nɛɛ nyaa ɓiɓɛ kpang.

²³Zang ri dãlɛ wu, a dãa zang ɓi kaa tɔ̀ɔ́ jong kpang. Ka ɓɔɔ zang dang wu jĩng, kɔɔ kpang nɛɛ, wu naa palɛ zang vuu shi kpang ditɔ jong kpang. Shing jĩng ɓi ka bii Laa ɓɔɔ dɔ̀ng zang ruu gn dang gbete kpang ɓɛɛ kɔ jong.

²⁴Yeesɔ ta vuu shi kpang ɓuru ɓɔɔ ruu palɛ ɓɛɛ ka yuu ɓiɓɛ, ka ɓɔɔ zang ɓaa wu naa ka laa ɓɛɛ. Nɛɛ tɔ̀ɔ, ruu yi tĩng tɔ̀ɔ́ nɛɛ vuu shi kpang palɛnang kpang. Ruu nwángnɛ́ ruu pálɛ́ kaa vuu tɔ̃ɔ. Kɔnang ɓuru valɛ tɔ nandon, ka ruu nyaa vuu waa ɓɔɔ zang shĩili wu ka bii ɓɛɛ.

²⁵Ɓeleng nɔɔ nwang manɛ naa mɛ̀ɛrɛ́ ɓɔɔ ning katɔ ɓɛɛ, kãntang keɓe, nɔɔ gbãayu tɔ, nɔɔ dũng kaa zang ɓɔɔ gã nɔɔ, kasɛ kpang nɛɛ vuu ɓɔɔ wu lee nɔɔ naa ka bii kpang.