Read mumuye 1 Bituru 3 Bible Online

1 Bituru 3 - mumuye bible

1 Bituru 3

¹Doo nɔngkɔ, ɓɔɔ nɔɔ zang soro ɓɛɛ, nɔ́ɔ gãsɛ yuu nɛɛ varɛ manɛ kpang. Ka ruu ɓɔɔ, naa varɛ zang ɓɔɔ nɛɛ shing danggn ka Ruu Laa kpang, nwannang tɔ̃ɔ soro ɓiɓɛ shing wu katɔ, wu arɛ, wu dũng Ruu Laa naa nɔɔ rang ri yee dòo nɛɛ nyaa manɛ kpang ɓɛɛ.

²Ka ruu ɓɔɔ, varɛ manɛ ri zìlí nwannang tɔ̃ɔ manɛ, ri ti zìlí naa ɓɔɔ nɔɔ kaa vɔrɔ Laa ɓɛɛ.

³Nɔ́ɔ tɔɔ kpang nɛɛ, nɔɔ rɛ̃rɛ diki diki ka yuu naa ɓɔɔ nɔɔ gbarɛ bii manɛ nɛɛ yuu tinang ɓɔɔ náabm̀, nɔɔ hãa vutu zinariya ka turu, nɔɔ ti hãalɛ fɔ̃ɔrɔ ka bii ɓɛɛ kpang.

⁴Shinang manɛ wu tusu bii ka nwannang tɔ̃ɔ manɛ kɔ jong. Nwang kikiri mɔɔ tuu yuu ɓaaɓɛ kpang, zɔ̃ng shinang keɓe kɔ lasɛ ɓi kpang, ti nwǎng mɔɔ vuu tɔ̃ɔ katɔ ka tĩng Laa.

⁵Zang soro ɓɔɔ ri ka tĩng tɛ̃ɛ tɛ̃ɛ ɓɔɔ ri shing jĩng ka bii Laa, ri gbárɛ́ bii ɓarɛ nɔngkɔ, ka ruu ɓɔɔ, ri gãsɛ yuu nɛɛ varɛ ɓarɛ kpang ɓɛɛ.

⁶Saratu nwáng dòo nwannang keɓe kɔ. A Ibirayi bannang, ɓaa wu nɛɛ, “Daa mɛɛ”. Nɔɔ nɛɛ nwang nwannang ɓɔɔ tɔ̃ɔ, nɔɔ nɛɛ ti kaa vɔrɔ vuu ɓɔɔ kpang ɓɛɛ, kãntang nɔɔ kaa wujɛ ɓiɓɛ kɔ.

⁷Ɓɔɔ nɔɔ varɛ zang ɓɛɛ, nɔɔ nwang nwannang tɔ̃ɔ nɛɛ soro manɛ, nɔɔ zi tɔ, ri lakɛ naa ka bii naa nɔkɔ kpang. Ka ruu nɔngkɔ, nɔɔ a ri bannang jong ka ruu ɓɔɔ nɔɔ nandon nɔɔ wàlɛ́ suru bii ɓɔɔ Laa a zang waati kɔ ɓɛɛ. Naa nɔɔ palɛ nɔngkɔ, vuu ɓɔɔ zãyi, Laa tãa gaanang ɓɔɔ nɔɔ gaa wu kpang ɓɛɛ kagn kpang.

⁸N hangsɛ nɔɔ nyaa ruu kaa nɛɛ ruu keɓe. Nɔɔ nandon nyaa manɛ wu daa gbete, gn zɔɔ wu kɔng nɔɔ katɔ, nɔɔ kasɛ ruu zang ɓɔɔ ri dũng doo Laa kɔ katɔ, ka ruu ɓɔɔ ri ɓarɛ rɛɛ ɓaazung ɓɛɛ. Nɔ́ɔ ti pàlɛ̀ zɔɔ tɔ̃ɔ katɔ, a nɔ́ɔ ti lakɛ jĩng kpang.

⁹Zang ɓɔɔ nɛɛ pàlɛ̀ nɔɔ shi kpang, nɔ́ɔ ti palɛ ri doo shi kpang kɔ kpang. Zang ri nɛɛ dãa nɔɔ, nɔ́ɔ ti dãa ri jong kpang. Nɔɔ gàa ri manɛ Laa kɔ jong, wu pàlɛ̀ ri tɔ̃ɔ, ka ruu ɓɔɔ, Laa shɛ̃ɛrɛ nɔɔ nɛɛ wu pàlɛ́ nɔɔ tɔ̃ɔ ɓɛɛ.

¹⁰Zang bee ka yeti Labeenang Laa tɔɔ, “Zang ɓɔɔ nɛɛ kasɛ nɛɛ wu nwang tɔ̃ɔ, wu tãa tĩnang, wu ràng yee ɓɔɔ shi kpang takpang. Wu ti suu sèé takpang.

¹¹Wu yaa vuu shi kpang palɛnang, wu palɛ vuu ɓɔɔ daa bii katɔ ɓɛɛ. Wu kãa gbalang ɓɔɔ wu nwang nɛɛ zang ka nyaa zɔɔ ɓɛɛ, wu shing jĩng ka wukɔ shɛ̃ɛning.

¹²Laa gãng jĩng ɓi ka zang ɓɔɔ ri palɛ vuu ɓɔɔ daa bii katɔ ɓɛɛ. Ti ɓáa shoo katɔ ka ɓɔɔ ri gaa wu ɓɛɛ. Bɛ̃ɛ zang ɓɔɔ ri palɛ vuu shi kpang ɓi katɔ”.

¹³Naa mɔɔ shing ka yeti ɓaaɓɛ nɛɛ, mɔɔ palɛ ɓaa tɔ̃ɔ kɔ gbete, zang ɓɔɔ palɛ mɔɔ shi kpang kagn ya?

¹⁴Naa zang dàng mɔɔ doo jĩng, ka ruu ɓɔɔ mɔɔ palɛ vuu ɓɔɔ daa bii katɔ, Laa pàlɛ́ mɔɔ tɔ̃ɔ katɔ. Ka ruu nɔngkɔ, mɔɔ kaa vɔrɔ zang ɓɔɔ ri kasɛ nɛɛ ri palɛ mɔɔ shi kpang, kpang. Vuu ɓɔɔ wu ti kpãa mɔɔ kpang.

¹⁵Shing jĩng ɓaa ka ɓɔɔ mɔɔ a Yeesɔ Kirisi bannang kɔ jong gbete. Wu nwáng kpanti ɓaaɓɛ ka vuu piti. Nɔɔ kpalɛ bii manɛ katɔ diki diki, nɔ́ɔ kɔɔ zang ɓɔɔ ri hɛ̃ɛ nɔɔ vuu ɓɔɔ palɛ, nɔɔ shing danggn ka bii Yeesɔ Kirisi ɓɛɛ.

¹⁶Ka ɓɔɔ nɔɔ kɔɔ zang Ruu Laa ɓɛɛ, nɔɔ tuu yuu manɛ katɔ kpang, nɔɔ seng zang katɔ. Nɔɔ ti pálɛ́ vuu ɓɔɔ nɔɔ zi ka yeti manɛ nɛɛ tɔ̃ɔ ɓɛɛ. Ka ruu ɓɔɔ, zang ɓɔɔ ri nɛɛ tɔɔ ri rang yee shi kpang ka yuu manɛ, yusɛ̃ɛ wu tuu ri ka ɓɔɔ ri dãlɛ nɔɔ ɓɛɛ. Ka ruu ɓɔɔ, ri naa zǐ nwannang manɛ ɓɔɔ daa naa ɓɔ̀ɔ́ zang ɓɔɔ ri dũng Kirisi ditɔ ɓɛɛ.

¹⁷Naa nɔɔ dang jĩng ka ruu ɓɔɔ nɔɔ palɛ tɔ̃ɔ, wukɔ tɔ̃ɔ, Laa nɛɛ kàsɛ́ nɔngkɔ ɓɛɛ, ka ɓɔɔ nɔɔ nɛ̀ɛ́ dang jĩ́ng ka ruu shi kpang palɛnang ɓɛɛ.

¹⁸Yeesɔ Kirisi nɛɛ yuu ɓiɓɛ dàng jĩng, ka ruu vuu shi kpang ɓuru a hangsɛ shonang keɓe doo gbete. Zang ɓɔɔ ɓi zang tɔ̃ɔ ka tĩng Laa, vɔ ka ruu zang ɓɔɔ ri palɛ ɓarɛ vuu ɓɔɔ daa bii kpang ɓɛɛ. Nɛɛ tɔ̀ɔ, wu atɛ ruu ka bii Laa. Zang ri nyɔ wu vɔrɔ, a Laa wisi wu paa nɛɛ sàa tɔkn.

¹⁹Ka knti ɓɔɔ Laa a wu suru bii tɔ, daayi daa ràng rɛɛ suru shi kpang Ruu Laa ka nɔng ɓɔɔ zang mã ri kagn ɓɛɛ.

²⁰Suru shi kpang keɓe, ɓi ɓɔ̀ɔ́ zang ɓɔɔ ri bɛ̃ɛ Ruu Laa dũnnang doo tɛ̃ɛ tɛ̃ɛ, ka ɓɔɔ Laa mã danggn, gã ri ka diki ɓɔɔ Nuhu pálɛ̀ laana ɓɛɛ. Ka diki kaɓa, zang mantaati ɓɔɔ ri vang laana, ri wɔrɛ.

²¹Mii kaɓa tùsú zang ɓi kaa batizima ɓɔɔ kãntang keɓe ta yuu manɛ ɓɛɛ. Batizima ɓɔɔ zang pàlɛ́ nɔɔ, sɔɔ nɔɔ manɛ bii rĩiti manɛ kpang, ɓi vuu ɓɔɔ ruu gaa Laa nɛɛ mani, nɛɛ wu kɔsɔ ruu vuu shi kpang nɛɛ yeti ɓuru ɓɛɛ. Laa ta yuu ɓuru ka ruu ɓɔɔ Yeesɔ Kirisi yupaa nɛɛ sàa ɓɛɛ.

²²Yeesɔ Kirisi daa tɔ ka lapa, nwàng ɓi kaa nɔng nwannang bang ka nakn Laa. Ti roo kpanti jong ka yuu rɛɛ zang nyaa shonang Laa ɓɔɔ ri ka lapa nɛɛ rɛɛ suru ɓɔɔ naa vuu palɛnang ɓarɛ kagn piti.