Read mumuye 1 Bituru 4 Bible Online

1 Bituru 4 - mumuye bible

1 Bituru 4

¹Ruu zi tɔ nɛɛ Yeesɔ Kirisi dang jĩng nɛɛ bii ɓiɓɛ. Ka ruu nɔngkɔ, nɔɔ kpalɛ bii doo nɔngkɔ, nɔɔ dang jĩng nɛɛ bii manɛ naa ɓɔɔ wu dang ɓɛɛ. Ka ruu ɓɔɔ, zang ɓɔɔ nɛɛ dang jĩng tɔ nɛɛ bii ɓiɓɛ, yaa vuu shi kpang palɛnang ɓi tɔ ɓɛɛ.

²Vuu ɓɔɔ yi nɛɛ lɛɛkɔ, nɔɔ pálɛ̀ manɛ vuu ɓɔɔ Laa kasɛ ɓɛɛ, wu vuu ɓɔɔ bii shɔnzang kasɛ ɓɛɛ kpang.

³Nɔɔ suukãng tɔ dɔɔli, ka nɔng ɓɔɔ nɔɔ palɛ vuu ɓɔɔ zang ɓɔɔ ri zi Laa kpang ri palɛ ɓɛɛ. Nɔɔ di nyaa ta ka nɔngkɔ. Ɓeleng nɔɔ nwang manɛ nwannang ɓɔɔ daa naa kpang ɓɛɛ. Nɔɔ palɛ manɛ vuu ɓɔɔ yeti manɛ kasɛ ɓɛɛ, nɔɔ ɓooro vuu ɓɔɔ si nɔɔ ɓɛɛ, nɔɔ gaarɛ zɔɔ nɔɔ tãa tĩnang diki diki, nɔɔ ɓooro sàa, nɔɔ ti bang vaka, vuu ɓɔɔ Laa dang nyaa nɛɛ nɔ́ɔ pálɛ̀ kpang ɓɛɛ.

⁴Kãntang keɓe nɔɔ kpálɛ̀ zɔɔ tɔ̀ɔ́ nɛɛ ri, nɔɔ palɛ zɔ̃ng rɛɛ vuu shi kpang ɓɔɔ ɓa kaka katɔ kaɓa kpang. Ɓɔɔ ri zi naa weɓe ri mã naa kaa danggn, ri dãa nɔɔ.

⁵Diki a doo kana, ɓɔɔ zang ɓɔɔ ri dãa nɔɔ keɓe, ri naa shii ka tĩng Laa, ri kɔɔ naa ɓɔɔ ri nwàng ka koo keɓe ɓɛɛ. Diki bee kpang, ɓɔɔ Laa naa dɔng zang ɓɔɔ ri ningkãari ka koo keɓe nɛɛ zang ɓɔɔ ri vɔlɔ tɔ ruu ɓɛɛ.

⁶Kirisi ràng zang ɓɔɔ ri vɔlɔ tɔ Ruu Laa tɔ jong nɛɛ tɔ̀ɔ, suru bii ɓarɛ wu nwang kaa naa ɓɔɔ Laa nwàng ɓɛɛ. Ruu zi tɔ nɛɛ Laa jɛ̃ɛ ri ruu tɔ kaa ɓɔɔ ri ka koo keɓe naa ɓɔɔ wu jɛ̃ɛ zang piti ɓɛɛ.

⁷Diki ɓɔɔ koo keɓe waa nyaa kagn, a naabm tɔ, ka ruu nɔngkɔ, nɔɔ yiti yuu manɛ waasɛ̃, nɔ́ɔ shii tɔ̃ɔ, tɔ̀ɔ, nɔ́ɔ gaa Laa kati.

⁸Nɔɔ kasɛ ruu zɔɔ katɔ gbãng gbãng nɛɛ yeti manɛ nandon, wukɔ ɓa vuu piti. Ka ruu ɓɔɔ, naa nɔɔ kasɛ ruu zang, nɔɔ yaa ri gbalang vuu shi kpang ɓɔɔ ri pàlɛ̀ nɔɔ dɔɔli ɓɛɛ katɔ.

⁹Nɔɔ ta zang ɓɔɔ ri a ka gãa manɛ katɔ, nɔ́ɔ gɔ̃ɔrɔ yee kagn kpang.

¹⁰Laa palɛ nɔɔ tɔ̃ɔ tɔ ka gbalang náabm̀ náabm̀. Laa a zang ɓu naa vuu palɛnang wu palɛ vuu ka zɔ̃ng zɔ̃ng. Ka ruu nɔngkɔ, zang ɓu wu palɛ tɔ̃ɔ, wu palɛ shonang nɛɛ naa ɓɔɔ Laa a wu, wu yi zang ɓɔɔ naa ka bii.

¹¹Zang ɓɔɔ Laa nɛɛ a wu naa yee rannang, wu rang yee ɓɔɔ a nɛɛ bii Laa ɓɛɛ. Zang ɓɔɔ nɛɛ zunung ɓɔɔ wu shǒng zang katɔ, wu shong nɛɛ kaka ɓɔɔ Laa a wu piti. Nɔɔ palɛ nɔngkɔ tɔ̀ɔ, zang ri dɔɔ Laa ka ruu vuu piti, ka ruu Yeesɔ Kirisi. Bannang nɛɛ naa vuu palɛnang ɓi ɓɔɔ ɓiɓɛ kɔ dòndòng. Nɔngkɔ.

¹²Rɛɛ masang, ɓɔɔ n kasɛ ruu manɛ dɔɔli ɓɛɛ, nɔ́ɔ mã naa ka danggn ka ruu rɛɛ jĩng dannang ɓɔɔ bang dɔɔli kɔ ri alɛ ka bii manɛ ɓee kpang. Vuu keɓe ri alɛ nɛɛ ri gãsɛ danggn ɓɔɔ nɔɔ shing ka bii Laa ɓɛɛ, ka ruu nɔngkɔ, nɔ́ɔ rɛ̃rɛ kpang nɛɛ ɓi vuu shɔɔ kpang.

¹³Nɔ́ɔ tãa tĩnang kɔ jong, ka ruu ɓɔɔ nɔɔ kpalɛ yuu manɛ doo ka jĩng dannang ɓɔɔ Kirisi dang ɓɛɛ kɔ. Ka ruu ɓɔɔ, ka diki ɓɔɔ zang nɛɛ tusu bannang ɓiɓɛ tɔ, nɔɔ tãa tĩnang kaa dɔɔli.

¹⁴Naa zang ri dãa nɔɔ, ka ruu ɓɔɔ nɔɔ dũng Kirisi, nɔ́ɔ tãa manɛ tĩnang. Nɔɔ nɛɛ dǎng jĩng nɔngkɔ, Suru Laa ɓɔɔ ɓa zang piti bannang katɔ, naa nwang nɛɛ nɔɔ ning.

¹⁵Naa zang ɓɔɔ ka teteng manɛ dang jĩng ka ruu vuu shi kpang ɓɔɔ wu palɛ, naa nyɔ zang vɔrɔ, naa ɓɔɔ zang viri, naa zang ɓɔɔ kàsɛ́ nyaa ka ruu kɛɛm kɛɛm ɓɛɛ, zang dɔɔ zang ɓɔɔ dang jĩng ka ruu rɛɛ vuu keɓe katɔ ya? Zang gbete ka teteng manɛ wu dang jĩng ɓi nɔngkɔ kpang.

¹⁶Naa zang ɓɔɔ dang jĩng, ka ruu ɓɔɔ wu dũng Kirisi, yusɛ̃ɛ wu tuu wu kpang. Wu zãa ɓi Laa kɔ jong, ka ruu ɓɔɔ, zang gã wu ɓi kaa teteng rɛɛ zang Kirisi ɓɛɛ.

¹⁷Diki a tɔ, ɓɔɔ Laa dɔng zang ruu ɓɛɛ, gaayu dɔng zang ɓiɓɛ kɔ ruu shɔɔnang. Laa nɛɛ gaayu nɛɛ dɔng rukɔ ruu shɔɔnang, a naa hangsɛ nyaa ɓi kaa biya nɛɛ zang ɓɔɔ ri dũng Ruu Tɔ̃ɔ Laa kpang viya?

¹⁸Zang bee ka yeti labeenang Laa nɛɛ, “Ɓɔɔ zang tɔ̃ɔ, ri wɔ́rɛ, zang dɔng ri ruu kpang, kpãa nyaa dɔɔli. Nɛɛ nɔngkɔ, zang ɓɔɔ ri palɛ vuu shi kpang, ri dũng Laa kpang, ri palɛ ɓarɛ kaa biya?”

¹⁹Ka ruu nɔngkɔ, zang ɓɔɔ ri dang jĩng ka ruu ɓɔɔ Laa kɔ kasɛ nɔngkɔ, ri palɛ tɔ̃ɔ diki diki, ri ti a Laa yuu ɓarɛ. Laa ɓɔɔ wukɔ mãa ruu, a ti palɛ vuu ɓɔɔ wu kɔɔyi nɛɛ wu palɛ katɔ ɓɛɛ.