Read mumuye 2 Bituru 2 Bible Online

2 Bituru 2 - mumuye bible

2 Bituru 2

¹Ka tĩng tɛ̃ɛ tɛ̃ɛ, zang nyaa shonang Laa ɓɔɔ sèé, ri nwáng nyaa ka teteng rɛɛ zang Laa. Kãntang keɓe dòo nɔngkɔ, maalang ɓɔɔ ri tusu zang vuu sèé, ri naa nwang nyaa ditɔ ka teteng manɛ. Ri naa arɛ, ri tusu zang vuu sèé ɓɔɔ shing zang, ri ning gbalang ɓɛɛ. Ri naa làá nyaa nɛɛ ri zi dabang ɓuru Yeesɔ Kirisi ɓɔɔ tá yuu ɓarɛ ka vuu shi kpang ɓarɛ kpang. Ka ruu vuu kɔ ri palɛ ɓee, diki bee kpang, jĩng dannang bang a ditɔ ka yuu ɓarɛ, wu nyɔkɔ ri vɔrɔ.

²Zang dɔɔli ri naa palɛ dũndũng ɓɔɔ maalang keɓe ri palɛ ɓɛɛ. Tɔ̀ɔ, ri shing zang kati zang ri rang ruu shi kpang ka yuu gbalang Laa ɓɔɔ niizang ɓɛɛ.

³Rɛɛ maalang ɓɔɔ tùsú zang vuu sèé kaɓa, ri shing jĩng ɓarɛ ka vuu zang, ka ruu nɔngkɔ, ri naa nwãarɛ nɔɔ nɛɛ sèé, tɔ̀ɔ, ri walɛ vuu kaa naa manɛ. Laa dɔng ri ruu ɓi tɔ dòo tɛ̃ɛ tɛ̃ɛ, kpalɛ bii tɔ nɛɛ wu dang ri jĩng. Diki ɓɔɔ wu naa ningsi ri dɔ̃ɔ gbete, a naabm tɔ.

⁴Ka tĩng tɛ̃ɛ tɛ̃ɛ, rɛɛ zang nyaa shonang Laa ɓɔɔ ri ka lapa ɓɛɛ, ri palɛ vuu shi kpang, gn ɓarɛ kɔng Laa kpang. Laa yiki ri, vang ri ka nɔng waa. Zang mã̀lɛ̀ ri doo nɛɛ soo saka, ka nɔng waa kaɓa ɓɔɔ tɔ̀ɔ kɔngkɔng ɓɛɛ, tɔ̀ɔ, diki ɓɔɔ zang naa jɛ̃ɛ ri ruu wu a nɛɛ mani.

⁵Zang ɓeleng ka tĩng tɛ̃ɛ tɛ̃ɛ, ɓɔɔ ri palɛ vuu shi kpang gn ɓarɛ kɔng Laa dòo kpang kɔ. Shingnɛ mii kpayi, nyɔkɔ zang ɓɔɔ ri ɓaa shoo ka nyaa ɓiɓɛ kpang nandon. Ta ɓi yuu Nuhu, ka ruu ɓɔɔ, Nuhu kɔɔrɔ zang nɛɛ zang ri palɛ vuu tɔ̃ɔ ɓɔɔ Laa kasɛ ɓɛɛ. Ta yuu Nuhu nɛɛ zang ɓɔɔ, ri manziti.

⁶Ɓɔɔ rɛɛ gari Sɔɔdom nɛɛ Gomora dòo nɔngkɔ, Laa ti dɔng zang ɓɔɔ ri nwalɛ kagn ruu. A dɔɔ rɛɛ gari ziti keɓe dɔ̃ɔ gbete nɛɛ waa, yaa pũngku ɓarɛ kɔ shɛ̃ɛning ka tipi. Wee tusu zang nɛɛ zang ri zi naa ɓɔɔ wu dang zang ɓɔɔ ri naa dũ̀ng nyaa ɓiɓɛ kpang jĩng ɓɛɛ.

⁷Ka diki kaɓa, ta yuu Lootu ɓɔɔ wukɔ zang tɔ̃ɔ ɓɛɛ kɔ shɛ̃ɛning. Ka ruu ɓɔɔ, dũndũng ɓɔɔ zang shi kpang kaɓa ri palɛ ka gari, kpãa Lootu ka yeti dɔɔli ɓɛɛ.

⁸Lootu zang tɔ̃ɔ kaɓa, nwang ka teteng zang shi kpang. Zìlí zɔ̃ng vuu shi kpang ɓɔɔ ri palɛ diki diki ɓɛɛ. Ti tã̀lɛ́ ruu shi kpang ɓɔɔ ri kɔɔrɔ ɓɛɛ. Vuu shi kpang ɓɔɔ zang kaɓa ri palɛ, lasɛ wu yeti dɔɔli, ka ruu ɓɔɔ, wu ɓi zang tɔ̃ɔ ɓɛɛ.

⁹Ruu Nuhu nɛɛ Lootu tusu ruu nɛɛ Laa zi gbalang ɓɔɔ wu naa ta yuu zang ɓiɓɛ nɛɛ mani tɔ, nɛɛ naa vuu ɓɔɔ gãsɛ ri ɓɛɛ. Vuu keɓe kɔ, ti tusu nɛɛ Laa zi gbalang ɓɔɔ wu naa dang zang ɓɔɔ ri palɛ vuu shi kpang jĩng tɔ, diki ɓɔɔ wu naa jɛ̃ɛ zang ruu kagn, wu a nɛɛ mani.

¹⁰Jĩng dannang keɓe naa a ka bii zang ɓɔɔ ri palɛ vuu shi kpang ka naa ɓɔɔ bii ɓarɛ kasɛ ɓɛɛ. A ri ti bɛ̃ɛ naa vuu palɛnang Laa katɔ ɓɛɛ. Maalang ɓɔɔ ri tusu zang vuu sèé keɓe, ri kaa vɔrɔ vuu ɓɔɔ kpang, ri tuu yuu ɓarɛ dɔɔli. Ri ti kaa vɔrɔ ruu shi kpang kɔɔrɔnang ka yuu zang bang bang ɓɔɔ ri ka tĩng Laa ka lapa, ɓɔɔ zang a ri bannang katɔ ɓɛɛ kpang. Ri dãlɛ ri ɓarɛ katɔ kɔ jong.

¹¹Dòo zang nyaa shonang Laa ɓɔɔ ri ka lapa ɓɔɔ ri ɓa rɛɛ maalang ɓɔɔ ri tusu zang vuu sèé keɓe kaka katɔ nɛɛ bannang, ri dãlɛ ri nɔngkɔ ka tĩng Laa kpang.

¹²Zang keɓe ri rangkɛ yee shi kpang ka yuu vuu ɓɔɔ ri zi tɔ̃ɔ tɔ̃ɔ kpang ɓɛɛ. Ri palɛ vuu naa shoko. Ri palɛ vuu teetee naa yɔpɔ jĩngti ɓɔɔ zang yi ri nɛɛ, ri nɛɛ bang tɔ, zang yirɛ zang yee ɓɛɛ. Niizang, ri shàarɛ́ dòo nɔngkɔ, naa yɔpɔ jĩngti, zang tãa nung ɓarɛ takpang.

¹³Laa naa dang ri jĩng jong ka ruu ɓɔɔ ri dang zang jĩng ɓɛɛ. Zang keɓe, ri kasɛ nɛɛ ri tãa ɓarɛ tĩnang naa doo nɛɛ laagɛ̃ piti. Nwannang ɓarɛ ɓi vuu ɓɔɔ shingnɛ yusɛ̃ɛ tuu nɔɔ ɓɛɛ. Ri nwalɛ nɛɛ nɔɔ, ri shaa vuu shaanang a ɓeekpang ri nwãarɛ nɔɔ manɛ waati. Ri palɛ ɓarɛ vuu shi kpang ɓɔɔ ri kasɛ ɓɛɛ.

¹⁴Ri pɛ̃ɛrɛ vuu ɓɔɔ ɓarɛ kpang, diki diki jĩng ɓarɛ ɓi ka zang soro ɓɔɔ ri rakɛ, wàázaa ɓɛɛ, tɔ̀ɔ, ri palɛ dũndũng nɛɛ ri. Ri lee vuu shi kpang palɛnang ɓarɛ kpang. Naa ri zi zang ɓɔɔ shii ka gbalang Laa nɛɛ kaka kpang, ri nwãarɛ ri, ri shing ri, ri palɛ vuu shi kpang. Ri shing jĩng ɓarɛ ka vuu zang kɔ diki, diki. Zɔ̃ng zang ɓɔɔ naa weɓe, Laa dɔng ri ruu ɓarɛ tɔ.

¹⁵Ri yaa gbalang tɔ̃ɔ tɔ, ri dũng ɓarɛ kaa gbalang Balamu jaa Beeyɔ kɔ jong. Ka tĩng tɛ̃ɛ tɛ̃ɛ, Balamu kasɛ nɛɛ yuu ɓiɓɛ, wu palɛ vuu shi kpang nɛɛ tɔɔ zang a wu saka.

¹⁶A zang mangkɛ wu ka ruu vuu shi kpang ɓɔɔ wu palɛ ɓɛɛ. Ka diki kaɓa, seesaa ɓɔɔ rang yee ɓi jong kpang, rang wu yee naa ɓɔɔ shɔnzang rang ɓɛɛ. Seesaa bìí zãa zang nyaa shonang Laa keɓe, vuu shoko ɓɔɔ wu nɛɛ wu palɛ ɓɛɛ.

¹⁷Maalang ɓɔɔ ri tusu zang vuu sèé keɓe, ri nwang ɓarɛ naa too mii ɓɔɔ ɔ̃ɔ tɔ ɓɛɛ. Ri nwang naa sãmbong mii ɓɔɔ jasung tantɛ, atɛ mii kpang ɓɛɛ. Laa yaa ri nɔng ɓarɛ kagn ka nɔng ɓɔɔ tɔ̀ɔ katɔ kɔngkɔng ɓɛɛ.

¹⁸Ri rangkɛ yee bang bang ɓɔɔ waati ka yuu ɓarɛ. Ri ti kasɛ ri nwãarɛ zang ɓɔɔ ri kasɛ nɛɛ ri yaa vàá zang ɓɔɔ ri zi gbalang Laa kpang ɓɛɛ. Maalang ɓɔɔ ri tusu zang vuu sèé keɓe, ri kasɛ nɛɛ ri shing zang, zang ri palɛ zɔ̃ng dũndũng piti nɛɛ vuu shi kpang, shi kpang ɓɔɔ ri tãa tĩnang palɛnang doo katɔ kɔ ɓɛɛ.

¹⁹Ri kɔɔrɔ zang kaɓa nɛɛ ri naa yaa ri naa ditɔ, a ɓeekpang ɓɔɔ ri rang yee keɓe, ri zunung naa ɓɔɔ ri yaa vuu shi kpang ɓɔɔ ri palɛ ɓɛɛ kpang. Naa vuu ɓɔɔ yiti zang, zang zunung yaanang kpang, zang nwang ɓi kaa jaafoo vuu bìí.

²⁰Naa zang ri zi Yeesɔ Kirisi ɓɔɔ wukɔ Kpanti ɓuru, a wukɔ ti ta yuu ɓuru, a ri yaa vuu shi kpang ɓɔɔ koo keɓe, ɓɔɔ shing zang, zang ri nwang zang shi kpang ɓɛɛ. Ri nɛɛ naa ràa jĩng tɔkn, ri gaayu rɛɛ vuu shi kpang keɓe palɛnang nɛɛ knti, nwannang ɓarɛ naa lasɛ, ɓa ɓɔɔ tĩng shɔɔnang kaa tɔ.

²¹Ri nɛ̀ɛ́ zi gbalang ɓɔɔ tɔ̃ɔ kpang gbã̀ágbãa, wukɔ nɛɛ tɔ̃ɔ. Ka ɓɔɔ ri zi tɔ, ri naa yaa nyaa dannang Laa tɔkn ri dũng takpang ɓɛɛ.

²²Vuu kɔ zɔ̃ng zang keɓe ri palɛ ɓee, daa teetee nɛɛ nyaa vuu jeenang ɓɔɔ zang ɓuru ri kɔɔrɔ ɓɛɛ, nɛɛ, “Zaa gbã̀ayu daa sháa jennang ɓiɓɛ, a ɓɔɔ ti nɛɛ gãnya ɓɔɔ zang sɔɔ wu bii katɔ, gbãayu ɓi tɔ, daa gbãa bii ɓi kana ɔ̃ti tɔkn.”