Read mumuye 1 Yɔhana 2 Bible Online

1 Yɔhana 2 - mumuye bible

1 Yɔhana 2

¹Wujɛ mɛɛ, n bèé nɔɔ ruu keɓe, ka ruu ɓɔɔ, nɔɔ nɛ̀ɛ́ pàlɛ́ vuu shi kpang ɓɛɛ. Zang ɓɔɔ nɛɛ palɛ vuu shi kpang, wu zirɛ nɛɛ, zang ɓɔɔ rang ruu yee nɛɛ Daa ɓuru Laa kagn. Wukɔ Yeesɔ Kirisi ɓɔɔ zang tɔ̃ɔ ɓɛɛ.

²Laa yàa ruu gbalang vuu shi kpang ɓuru ka ruu vɔrɔ ɓɔɔ Yeesɔ vɔ ɓɛɛ. Vɔ ka ruu vuu shi kpang ɓuru kɔ shɛ̃ɛning kpang, ka ruu vuu shi kpang zang koo piti.

³Naa ruu ɓa nyaa ɓɔɔ Laa dang kpang, ruu zi ka wukɔ nɛɛ ruu zi wu tɔ.

⁴Shɔnzang ɓɔɔ kɔɔyi tɔɔ, “N zi wu tɔ,” a ti shing jĩng ka nyaa ɓɔɔ wu dang ɓɛɛ kpang, ɓi zang sèé. Ruu ɓɔɔ niizang ɓi kagn yeti ɓiɓɛ kpang.

⁵Zang ɓɔɔ ɓaa shoo ka vuu ɓɔɔ wu kɔɔyi, kasɛ Laa katɔ niizang. Wee naa ɓɔɔ shɔnzang zi kagn nɛɛ wu zang Yeesɔ Kirisi kɔ.

⁶Zang ɓɔɔ nɛɛ tɔɔ, wu zang Yeesɔ Kirisi nwang dòo naa ɓɔɔ Yeesɔ Kirisi nwáng ɓɛɛ kɔ.

⁷Masang ɓɔɔ n kasɛ nɔɔ katɔ dɔɔli ɓɛɛ, nyaa ɓɔɔ Laa dangnɛ kɔ n bèé nɔɔ ɓee, wu ɓɔɔ shɔɔ kpang. Ɓi dòo ɓɔɔ gbaala ɓɔɔ nɔɔ tãa ka diki ɓɔɔ nɔɔ gaayu Ruu Laa tãanang ɓɛɛ.

⁸Nyaa dannang kɔ n bèé nɔɔ ɓee, ɓi kaa shɔɔ, ka ruu ɓɔɔ nwannang Yeesɔ Kirisi nɛɛ ɓɔɔ manɛ kɔ tùsù ruu nɛɛ vuu ɓɔɔ Laa kɔɔyi ɓi niizang kɔ nwani ɓɛɛ. Nɔng tɔɔnang koo keɓe ɓa kana, kaa nɔng yakɛnang ɓɔɔ niizang yakɛ nɔng.

⁹Zang ɓɔɔ tɔɔ wu ka nɔng yakɛnang, a kasɛ ruu ɓeezung kpang, ɓi dòo ka nɔng ɓɔɔ tɔ̀ɔ katɔ ɓɛɛ.

¹⁰Zang ɓɔɔ kasɛ ruu ɓeezung katɔ, nwàng ɓi ka nɔng ɓɔɔ yakɛ katɔ ɓɛɛ. Vuu ɓɔɔ shing zang, zang palɛ vuu shi kpang, ɓi ka bii ɓiɓɛ kpang.

¹¹Zang ɓɔɔ kasɛ ruu ɓeezung kpàng, nwàng ɓi doo ka nɔng ɓɔɔ tɔ̀ɔ katɔ ɓɛɛ. Ra ɓi ka nɔng ɓɔɔ tɔ̀ɔ katɔ ɓɛɛ. Zi nɔng ɓɔɔ wu daa ɓi kpang, ka ruu ɓɔɔ, nɔng ɓɔɔ tɔ̀ɔ katɔ, tɔ̀ɔ wu jĩng katɔ ɓɛɛ.

¹²Wujɛ mɛɛ, n bèé nɔɔ ruu keɓe, ka ruu ɓɔɔ, Laa yaa nɔɔ gbalang vuu shi kpang manɛ tɔ, ka ruu Yeesɔ Kirisi.

¹³N bèé nɔɔ ruu keɓe ɓɔɔ nɔɔ dáa wujɛ (nɔɔ ɓɔɔ nɔɔ shing danggn dòo tɛ̃ɛ tɛ̃ɛ) ɓɛɛ, ka ruu ɓɔɔ, nɔɔ zi Yeesɔ ɓɔɔ nwáng dòo ka tĩng tɔ ɓɛɛ. Yeesɔ nwáng nɛɛ Laa, bɛ̀ɛ́ Laa gaayu koo mãanang gn kpang. Jasang, n bèé nɔɔ vuu keɓe, ka ruu ɓɔɔ, nɔɔ ɓa Sheetang yuu tɔ ɓɛɛ. Wujɛ mɛɛ, n bèé nɔɔ vuu keɓe, ka ruu ɓɔɔ, nɔɔ zi Daa ɓuru Laa tɔ ɓɛɛ.

¹⁴Daa wujɛ, n bèé nɔɔ vuu keɓe, ka ruu ɓɔɔ, nɔɔ zi Yeesɔ ɓɔɔ nwáng ka tĩng tɔ ɓɛɛ. Yeesɔ nwáng nɛɛ Laa, bɛ̀ɛ́ Laa gaayu koo mãanang gn kpang. Jasang, n bèé nɔɔ ruu keɓe, ka ruu ɓɔɔ, nɔɔ lakɛ katɔ ɓɛɛ. Yee Laa nwàng ka yeti manɛ kɔ, a nɔɔ ti ɓa Sheetang yuu tɔ.

¹⁵Nɔɔ kasɛ koolaa keɓe kpang. Nɔɔ ti kasɛ vuu ɓɔɔ ka yeti ɓiɓɛ kpang. Zang ɓɔɔ kasɛ ruu koolaa keɓe piti, kasɛ Daa ka yeti ɓiɓɛ kpang.

¹⁶Ka ruu ɓɔɔ, vuu ɓɔɔ ka koo keɓe nandon naa rɛɛ, vuu ɓɔɔ bii shɔnzang kasɛ, nɛɛ vuu ɓɔɔ zang zirɛ, zang ti kasɛ katɔ ɓɛɛ, a ɓɔɔ jĩng gbakɛnang ɓɔɔ zang gbakɛ ka ruu vuu naa zang ɓɛɛ. Vuu keɓe nandon ɓi ɓɔɔ Daa ɓuru Laa kpang, ɓi ɓɔɔ koolaa keɓe.

¹⁷Diki ɓɔɔ koolaa keɓe naa waa nyaa, waa nyaa ɓi nɛɛ vuu ɓɔɔ zang kasɛ ka yeti ɓiɓɛ ning. Zang ɓɔɔ palɛ vuu ɓɔɔ yeti Laa kasɛ, wukɔ nwang ɓi gbinggbing.

¹⁸Wujɛ mɛɛ, diki ɓɔɔ koo keɓe waa nyaa a naabm tɔ. Nɔɔ tãayi nɛɛ, zang ɓɔɔ shing jĩng nɛɛ Yeesɔ kpang a ditɔ, kãntang keɓe, zang ɓɔɔ shing jĩng nɛɛ Yeesɔ kpang, ri nwangsɛ yuu tɔ dɔɔli. Ka ruu nɔngkɔ, ruu zi tɔ nɛɛ, diki ɓɔɔ koo keɓe waa nyaa gn keɓe kɔ.

¹⁹Ri nwáng nɛɛ teteng ɓuru, ka ruu ɓɔɔ, bɛ̀ɛ́ ri ɓarɛ zang ɓuru ɓɔɔ niizang kpang kɔ nwani ɓɛɛ. Naa ri nɛɛ zang ɓuru, ri nɛɛ nwàng dòo nɛɛ ruu. Daanang ɓarɛ kɔ tusu zang nɛɛ, zang ɓuru kagn teteng ɓarɛ gbete kpang.

²⁰Kirisi a nɔɔ Suru Laa manɛ tɔ. Nɔɔ ti zi ruu ɓɔɔ niizang manɛ tɔ nandon.

²¹N bèé nɔɔ wu ka ruu ɓɔɔ nɔɔ zi ruu ɓɔɔ niizang kpang ɓɛɛ kpang. N bèé nɔɔ, ka ruu ɓɔɔ, nɔɔ zi tɔ ɓɛɛ. Nɔɔ ti zi tɔ nɛɛ, ruu sèé hãa naa ɓi kagn nɛɛ ruu ɓɔɔ niizang kpang.

²²Ɓu wi, zang sèé wiya? Zang ɓɔɔ laa nyaa nɛɛ Yeesɔ kɔ Kirisi, zang ɓɔɔ naa a ɓɛɛ, kpang ɓɛɛ. Zang keɓe, wukɔ ti laa nyaa Jaa Laa, nɛɛ Daa ɓiɓɛ Laa nandon.

²³Zang ɓɔɔ bɛ̃ɛ Jaa, Daa ɓi kagn yeti ɓiɓɛ kpang. Zang ɓɔɔ nɛɛ ta Jaa, Daa ɓi kagn yeti ɓiɓɛ kɔ doori.

²⁴Nɔɔ yaa yee Laa ɓɔɔ nɔɔ tãa ka diki ɓɔɔ nɔɔ gaayu yee Laa tanang wu nwang ka yeti manɛ. Ruu Laa keɓe nɛɛ nwang tɔ ka yeti manɛ, nɔɔ nwang ditɔ ka nyaa zɔɔ nɛɛ Jaa Laa nɛɛ Daa ɓiɓɛ Laa.

²⁵Vuu ɓɔɔ Yeesɔ kɔɔyi tɔɔ, wu naa a ruu, wukɔ suru bii ɓɔɔ waa nyaa kpang ɓɛɛ.

²⁶N bèé nɔɔ vuu keɓe, ka yuu zang ɓɔɔ ri kongso nɛɛ ri nwãarɛ nɔɔ ɓɛɛ.

²⁷Ɓɔɔ bii manɛ Suru Laa ɓɔɔ nɔɔ ta nɛɛ bii Yeesɔ kagn yeti manɛ. Ka ruu nɔngkɔ, nɔɔ manɛ tɔ̀ɔ́ zang ɓɔɔ zang ɓɔɔgn kɔɔ nɛɛ, wu tusu nɔɔ vuu ɓɔɔ kpang. Ka ruu ɓɔɔ Suru Laa tusu nɔɔ vuu piti ɓɛɛ. Vuu ɓɔɔ Suru Laa keɓe tusu, ɓi ɓɔɔ niizang ɓɛɛ, ɓi ɓɔɔ sèé kpang. Ka ruu nɔngkɔ, nɔɔ nwang nɛɛ Kirisi ka nyaa zɔɔ naa ɓɔɔ Suru Laa tusu nɔɔ ɓɛɛ.

²⁸Wujɛ seseere, nɔɔ nwang nɛɛ wu, ka ruu ɓɔɔ nɛɛ nwang nyaa tɔ, ruu naa kaa vɔrɔ kpang ɓɛɛ. Yusɛ̃ɛ ti naa tuu ruu ka tĩng ɓiɓɛ, ka diki ɓɔɔ wu gbãayu ɓɛɛ kpang.

²⁹Nɔɔ nɛɛ zi tɔ nɛɛ Kirisi ɓi zang tɔ̃ɔ, nɔɔ zi katɔ nɛɛ zang ɓɔɔ palɛ vuu tɔ̃ɔ, ɓi zang ɓɔɔ Laa yi ɓɛɛ kɔ.