Read mumuye 1 Yɔhana 4 Bible Online

1 Yɔhana 4 - mumuye bible

1 Yɔhana 4

¹Rɛɛ masang ɓɔɔ n kasɛ nɔɔ katɔ dɔɔli ɓɛɛ, nɔɔ shing gn ka zang ɓɔɔ kɔɔyi nɛɛ, Suru Laa kagn bii ɓarɛ kpang. Nɔɔ gãsɛ ri katɔ, nɔɔ zi suru ɓɔɔ ka bii ɓarɛ, nɛɛ ɓɔɔ Laa ɓɛɛ. Ka ruu ɓɔɔ, zang ɓɔɔ ri suu sèé nɛɛ ri zang nyaa shonang Laa, ri nwangsɛ bii tɔ ka koolaa dɔɔli ɓɛɛ.

²Wee naa ɓɔɔ nɔɔ zi suru Laa ɓɛɛ. Suru ɓɔɔ kasɛ katɔ nɛɛ, Yeesɔ Kirisi a ka koolaa keɓe, tuu bii shɔnzang ɓɛɛ, suru kaɓa kɔ Suru Laa.

³Suru ɓɔɔ kɔɔyi nɛɛ Yeesɔ tuu bii shɔnzang kpang, ɓi Suru Laa kpang. Suru keɓe a ɓi nɛɛ bii zang ɓɔɔ shing jĩng nɛɛ Kirisi kpang, ɓɔɔ nɔɔ tãa nyaa nɛɛ a ditɔ ɓɛɛ. Zang kaɓa a tɔ ka koo kãntang keɓe.

⁴Wujɛ mɛɛ, nɔɔ manɛ zang Laa. Nɔɔ ɓa ri yuu manɛ tɔ. Ka ruu ɓɔɔ, Suru Laa ɓɔɔ ka yeti manɛ, ɓa suru Sheetang ɓɔɔ ka yeti zang ɓɔɔ ka koolaa keɓe katɔ ɓɛɛ.

⁵Ri ɓarɛ zang koo keɓe, ka ruu nɔngkɔ, ri rang yee naa zang koolaa keɓe. Zang koo keɓe, ri ɓaa shoo katɔ ka nyaa ɓarɛ.

⁶Ruu ɓuru zang Laa. Zang ɓɔɔ zi Laa katɔ, ri ɓaa shoo ɓi katɔ nyaa ɓuru. Zang ɓɔɔ zang Laa kpang, ti ɓaa shoo ɓi ka nyaa ɓuru kpang. Ruu zi suru ɓɔɔ niizang, nɛɛ suru ɓɔɔ sèé nung naa weɓe kɔ.

⁷Rɛɛ masang ɓɔɔ n kasɛ nɔɔ katɔ dɔɔli ɓɛɛ, ruu kasɛ nɔɔ ruu zɔɔ katɔ, ka ruu ɓɔɔ, zang kasɛnang a ɓi nɛɛ bii Laa ɓɛɛ. Zang ɓɔɔ kasɛ ruu zang, ɓi zang Laa kɔ, ti zi Laa ɓi katɔ.

⁸Zang ɓɔɔ kasɛ ruu zang kpang, zi Laa ɓi kpang, ka ruu ɓɔɔ, vuu piti ɓɔɔ Laa palɛ, palɛ ɓi ka ruu zang kasɛnang ɓɔɔ ka yeti ɓiɓɛ ɓɛɛ.

⁹Laa tusu ruu naa ɓɔɔ wu kasɛ ruu ɓuru ka Jaa gbete ɓiɓɛ ɓɔɔ wu shong ka koolaa ɓɛɛ. Laa shong wu nɛɛ tɔɔ ruu walɛ suru bii ɓɔɔ waa nyaa kpang ka bii ɓiɓɛ.

¹⁰Zang kasɛnang nwàng ɓi hn. Wu rukɔ gaayu Laa kasɛnang kpang, Laa kɔ kasɛ ruu ɓuru jong, a shong Jaa ɓiɓɛ nɛɛ wu naa nwang kaa naa vuu vàa ɓɔɔ zang dɔ̀ɔ́ Laa, tɔ̀ɔ, Laa wu yaa ruu gbalang vuu shi kpang ɓuru kati ɓɛɛ.

¹¹Rɛɛ masang ɓɔɔ n kasɛ nɔɔ katɔ dɔɔli ɓɛɛ, Laa nɛɛ kasɛ ruu ɓuru naa weɓe, ruu kasɛ nɔɔ ruu zɔɔ ta jong.

¹²Zang ɓɔɔ zi Laa gngn nɛɛ jĩng kpang. Ruu nɛɛ kasɛ ruu zɔɔ katɔ, Laa kagn yeti ɓuru. Ruu zang kasɛnang ɓɔɔ Laa ti kagn yeti ɓuru niizang.

¹³Suru ɓiɓɛ ɓɔɔ wu a ruu, wukɔ tusu ruu nɛɛ, ruu nwang nɛɛ Laa, a Laa ti ka yeti ɓuru.

¹⁴Ruu zi ka wukɔ a ruu ti kɔɔyi nɛɛ Daa shong Jaa ɓiɓɛ nɛɛ wu naa ta yuu zang koo keɓe.

¹⁵Zang ɓɔɔ nɛɛ kɔɔ nɛɛ nyaa ɓiɓɛ nɛɛ Yeesɔ ɓi Jaa Laa, Laa nwang kagn yeti ɓiɓɛ, a ti nwàng ɓi nɛɛ Laa.

¹⁶Ruu zi naa ɓɔɔ Laa kasɛ ruu tɔ ka yeti ɓuru, a ruu ti shing gn ka ruu zang kasɛnang ɓiɓɛ keɓe katɔ. Kasɛ ruu zang ɓi katɔ. Zang ɓɔɔ kasɛ ruu zang katɔ sasak, nwàng ɓi nɛɛ Laa, a Laa ti nwàng ɓi kagn yeti ɓiɓɛ.

¹⁷Ruu nɛɛ nwàng naa weɓe, rúu zang kasɛnang Laa kagn yeti ɓuru niizang. Ka ruu nɔngkɔ, rùu naa kaa vɔrɔ ka diki ɓɔɔ Laa naa jɛ̃ɛ zang koo keɓe ruu ɓɛɛ kpang. Ka ruu ɓɔɔ, nwannang ɓuru ka koo keɓe nwàng naa nwannang Kirisi.

¹⁸Mɔɔ nɛɛ kasɛ zang katɔ mɔɔ kaa vɔrɔ kpang. Ka ruu ɓɔɔ, zang kasɛnang ɓɔɔ niizang nwangsɛ vɔrɔ kaanang ɓi katɔ kɔ jong ɓɛɛ. Ɓi zang ɓɔɔ palɛ vuu shi kpang kɔ kaa vɔrɔ, ka ruu ɓɔɔ, zi tɔ ka yeti ɓiɓɛ nɛɛ Laa naa dang wu jĩng ɓi katɔ ɓɛɛ. Zang ɓɔɔ rúu zang kasɛnang Laa kagn yeti ɓiɓɛ, kaa vɔrɔ ɓi kpang.

¹⁹Ruu kasɛ ruu zɔɔ, ka ruu ɓɔɔ, Laa kɔ kasɛ ruu ɓuru shɔɔnang ɓɛɛ.

²⁰Naa zang ɓɔɔ kɔɔyi tɔɔ, wu kasɛ Ruu Laa katɔ, a kasɛ ruu ɓeezung kpang, ɓi zang sèé. Ka ruu ɓɔɔ, zang ɓɔɔ kasɛ ruu ɓeezung ɓɔɔ wu zi katɔ kpang, kàsɛ́ Laa ɓɔɔ wu zi nɛɛ jĩng kpang, ɓi kaa biya?

²¹Kirisi dang ruu nyaa tɔ nɛɛ, zang ɓɔɔ kasɛ Ruu Laa, wu ti kasɛ ruu ɓeezung jong.