Read mumuye 1 Yɔhana 5 Bible Online

1 Yɔhana 5 - mumuye bible

1 Yɔhana 5

¹Zang ɓɔɔ nɛɛ kasɛ tɔɔ nɛɛ Yeesɔ wukɔ Kirisi ɓi jaa Laa. Zang ɓɔɔ nɛɛ kasɛ Daa jaa, kàsɛ́ jaa ɓi dòo katɔ kɔ.

²Ka ruu nɔngkɔ, ruu nɛɛ kasɛ Laa katɔ, a ruu nɛɛ ti dũng nyaa ɓɔɔ wu dang ɓɛɛ katɔ, ruu zi ka wukɔ nɛɛ, ruu kasɛ wujɛ Laa katɔ.

³Zang ɓɔɔ kasɛ Ruu Laa katɔ niizang, dũng nyaa ɓɔɔ Laa dang ɓɛɛ katɔ. Nyaa ɓɔɔ Laa dangnɛ kpãa dũnnang ɓi kpang.

⁴Ka ruu ɓɔɔ, zang ɓɔɔ zang Laa, Laa a wu naa ɓɔɔ wu ɓa yuu vuu ɓɔɔ nwãarɛ zang ka koo keɓe tɔ ɓɛɛ. Danggn ɓɔɔ ruu shing ka bii Laa wukɔ á ruu naa, ruu ɓa yuu vuu ɓɔɔ nwãarɛ zang ka koo keɓe ɓɛɛ.

⁵Ɓu wi ɓa yuu vuu ɓɔɔ nwãarɛ zang ka koo keɓe yuu wiya? Zang ɓɔɔ shing danggn nɛɛ Yeesɔ Jaa Laa ɓɛɛ.

⁶Vuu ziti ɓɔɔ ruu zi kagn nɛɛ Yeesɔ Kirisi ɓi zang ɓɔɔ niizang ɓɛɛ. Ruu zi ka diki ɓɔɔ zang pàlɛ̀ wu batizima nɛɛ diki ɓɔɔ zĩi ɓiɓɛ tɛ̃ɛ ka laa ɓɔɔ zang ɓaa wu naa kagn ɓɛɛ. Wu batizima kɔ tusu ruu gbete kpang. Zĩi ɓiɓɛ ɓɔɔ tɛ̃ɛyi, wukɔ tusu ɓɔɔ ri. Suru Laa ti tusu ruu nɛɛ nɔngkɔ niizang, ka ruu ɓɔɔ, Suru Laa, tusu zang ruu ɓɔɔ niizang ɓɛɛ.

⁷Vuu taati tùsú ruu rúu keɓe.

⁸Suru Laa, nɛɛ batizima ɓɔɔ zang palɛ wu, nɛɛ zĩi ɓiɓɛ ɓɔɔ tɛ̃ɛ ka ruu ɓuru ɓɛɛ. Vuu taati keɓe, nyaa ɓarɛ ti daa gbete.

⁹Ruu nɛɛ ta vuu ɓɔɔ zang kɔɔ katɔ nɛɛ niizang, vuu ɓɔɔ Laa kɔɔyi ɓa ɓɔɔ zang katɔ. Laa kɔɔyi nɛɛ, Yeesɔ Jaa ɓiɓɛ.

¹⁰Ka ruu nɔngkɔ, zang ɓɔɔ shing danggn ka bii Jaa Laa, zi katɔ ka yeti ɓiɓɛ nɛɛ ruu keɓe ɓi niizang. Zang ɓɔɔ ta vuu ɓɔɔ Laa kɔɔ kpang, ɓaa Laa sèé tɔ. Ka ruu ɓɔɔ, kasɛ vuu ɓɔɔ Laa kɔɔ ka yuu Jaa ɓiɓɛ kpang ɓɛɛ.

¹¹Vuu ɓɔɔ Laa kɔɔ keɓe kɔ. Laa a ruu suru bii ɓɔɔ waa nyaa kpang tɔ. Suru bii ɓɔɔ waa nyaa kpang keɓe, ruu wálɛ̀ ka bii Jaa ɓiɓɛ.

¹²Zang ɓɔɔ ta Jaa Laa ka yeti ɓiɓɛ, walɛ suru bii ɓɔɔ waa nyaa kpang tɔ. Zang ɓɔɔ ta Jaa Laa ka yeti ɓiɓɛ kpang, suru bii ɓɔɔ waa nyaa kpang, kagn bii ɓiɓɛ kpang.

¹³Zang ɓɔɔ ri shing danggn tɔ ka Jaa Laa ɓɛɛ, n bée nɔɔ vuu keɓe, tɔ̀ɔ, nɔ́ɔ zi kati, nɛɛ nɔɔ walɛ suru bii ɓɔɔ waa nyaa kpang manɛ tɔ.

¹⁴Ruu shing danggn ka Laa gaanang ɓɔɔ ruu gaayi, ka ruu ɓɔɔ, naa ruu gàa vuu ka gbalang ɓɔɔ wu kasɛ, a ruu katɔ ɓɛɛ.

¹⁵Ruu nɛɛ zi tɔ nɛɛ, Laa tãa vuu piti ɓɔɔ ruu gaa wu katɔ, ruu zi katɔ nɛɛ ruu wàlɛ̀ vuu ɓɔɔ ruu gàa wu ɓɛɛ tɔ.

¹⁶Zang ɓɔɔ nɛɛ zi ɓeezung ɓɔɔ dũng Laa kɔ doori, palɛ vuu shi kpang ɓɔɔ naa nyɔ wu vɔrɔ kpang, wu gàa ɓeezung keɓe Laa, wu a wu suru bii ɓɔɔ waa nyaa kpang ɓɛɛ. Vuu shi kpang ɓɔɔ nyɔ zang vɔrɔ katɔ kagn, n kɔɔ nɛɛ zang wu gàa Laa ka ruu ɓiɓɛ kɔ kpang.

¹⁷Vuu ɓɔɔ zang palɛ ɓɔɔ daa bii kpang, zang ɓaa wukɔ nɛɛ vuu shi kpang. Vuu shi kpang ɓɔɔ kagn nyɔ zang vɔrɔ kpang.

¹⁸Ruu zì tɔ nɛɛ, zang ɓɔɔ Laa yirɛ, huu shoo ɓi nɛɛ vuu shi kpang palɛnang kpang. Ka ruu ɓɔɔ, Jaa Laa yiti wu katɔ ɓɛɛ. Sheetang pálɛ̀ wu vuu ɓɔɔ ɓi kpang.

¹⁹Ruu zi tɔ, ruu ɓuru wujɛ Laa. Zang ɓɔɔ dũ̀ng Laa kpang, ri ɓarɛ ka naa Sheetang.

²⁰Ruu zi tɔ nɛɛ, Jaa Laa arɛ tùsù ruu gbalang ɓɔɔ ruu zi Laa ɓɔɔ wukɔ niizang ɓɛɛ. Ruu ɓuru ɓɔɔ Laa keɓe kɔ, ka ruu ɓɔɔ, ruu ɓuru ɓɔɔ Jaa ɓiɓɛ Yeesɔ Kirisi ɓɛɛ. Yeesɔ Kirisi keɓe wukɔ Laa niizang, wukɔ ti suru bii ɓɔɔ waa nyaa kpang ɓɛɛ.

²¹Wujɛ mɛɛ, nɔɔ bang vaka kpang. Nɔɔ ti dàa nɔng ɓiɓɛ kpang.