Read mumuye 3 Yɔhana 1 Bible Online

3 Yɔhana 1 - mumuye bible

3 Yɔhana 1

¹Masang Gaayu, ɓɔɔ n kasɛ ruu ɓaaɓɛ katɔ niizang ɓɛɛ, nkɔ zang bang, n bèé mɔɔ labeenang keɓe.

²Masang ɓɔɔ n kasɛ mɔɔ katɔ dɔɔli ɓɛɛ, n gaa Laa nɛɛ, mɔɔ nwang waasɛ̃. Bii ɓaaɓɛ wu nwang tɔ̃ɔ, ka ruu ɓɔɔ, n zi tɔ, mɔɔ nwang ɓaa tɔ̃ɔ nɛɛ Kpanti Laa ɓɛɛ.

³N tãa tĩnang dɔɔli, ka ruu ɓɔɔ, zang Laa ɓɔɔ ri arɛ, ri naa kɔɔ m naa ɓɔɔ mɔɔ yiti Ruu Laa nɛɛ yeti gbete, a mɔɔ ti palɛ vuu naa ɓɔɔ Ruu Laa kɔɔ ɓɛɛ.

⁴Tĩnang ɓɔɔ n tã̀á kagn ɓɔɔ ɓa ɓɔɔ zang naa kɔɔ m nɛɛ, wujɛ mɛɛ dũng ruu ɓɔɔ niizang, kagn kpang.

⁵Masang ɓɔɔ n kasɛ mɔɔ katɔ dɔɔli ɓɛɛ, vuu kɔ mɔɔ pálɛ̀ ɓaazung ɓɔɔ ri dũng Laa, ɓɔɔ mɔɔ zi ri nung katɔ, nɛɛ ɓɔɔ mɔɔ zi ri nung kpang, mɔɔ pálɛ̀ vuu ɓɔɔ Laa kasɛ ɓɛɛ kɔ.

⁶Zang ɓɔɔ kagn teteng zang ɓɔɔ mɔɔ yì ri naa ka bii kaɓa, ri arɛ, ri naa kɔɔ zang ɓɔɔ ri dũng Laa ka nihn, naa ɓɔɔ mɔɔ kasɛ ruu ɓarɛ ɓɛɛ. Pálɛ́ nɔngkɔ, a ri vuu ɓɔɔ ri yiti naa zanti ɓɔɔ ri daa ɓɛɛ nɔngkɔ, ka ruu ɓɔɔ, ri zang nyaa shonang Laa ɓɛɛ.

⁷Ri nwang zanti ka ruu shonang Yeesɔ palɛnang. Ri ta vuu ɓɔɔ kagn ka naa zang ɓɔɔ ri dũ̀ng Laa kpang ɓɛɛ kpang.

⁸Ka ruu nɔngkɔ, ɓɔɔ ruu zang Laa, ruu yi nɔɔ zang ɓɔɔ ri palɛ shonang tɔ̃ɔ naa weɓe, naa ka bii ning. Tɔ̀ɔ, ruu nwang kaa gbete nɛɛ ri ka shonang ruu ɓɔɔ niizang palɛnang.

⁹N bèe nɔɔ ɓɔɔ nɔɔ dũng Laa labeenang ɓɔɔ kagn, a Diyotirifi ɓɔɔ tuu yuu ɓiɓɛ nɛɛ wukɔ bang, kasɛ nɛɛ wu ɓaa shoo ka yee ɓɔɔ n bèe nɔɔ kpang.

¹⁰Ka ruu nɔngkɔ, n nɛɛ a tɔ, n naa nwangsɛ vuu ɓɔɔ wu pálɛ́ ɓɛɛ ditɔ. Vuu shi kpang ɓɔɔ wu kɔ̀ɔrɔ́ ka yuu ɓuru, nɛɛ sèé ɓɔɔ suuru ka yuu ɓuru ɓɛɛ. Ti palɛ vuu shi kpang ɓɔɔ ɓa weɓe katɔ kagn tɔkn. Naa zang ɓɔɔ ri dũng Laa arɛ, tà ri kpang. Ti zãa zang ɓɔɔ ri kasɛ zang kaɓa tanang ɓɛɛ katɔ. Wu ti nwángsɛ́ zang ɓɔɔ ta zang zanti kaɓa nɛɛ teteng zang ɓɔɔ ri dũng Laa ɓɛɛ.

¹¹Masang ɓɔɔ n kasɛ mɔɔ dɔɔli ɓɛɛ, mɔ́ɔ màsɛ̀ zang ɓɔɔ ri palɛ vuu shi kpang, kpang. Màsɛ̀ zang ɓɔɔ ri pálɛ̀ vuu tɔ̃ɔ ɓɛɛ, zang ɓɔɔ palɛ vuu tɔ̃ɔ, wukɔ zang Laa. Zang ɓɔɔ pálɛ̀ vuu shi kpang, zi Laa nung ɓi gn kpang.

¹²Zang piti ri kɔɔ ruu tɔ̃ɔ ka yuu Dimitiriyu. Vuu ɓɔɔ Dimitiriyu pálɛ̀, wukɔ tusu zang nɛɛ wu zang tɔ̃ɔ niizang. Ruu ti kɔɔ ruu tɔ̃ɔ ɓiɓɛ doo nɔngkɔ. Mɔɔ ti zi tɔ, nɛɛ n suu sèé kpang.

¹³Vuu ɓɔɔ n tɔɔ n bèé mɔɔ dɔɔli, n bèe mɔɔ takpang,

¹⁴ka ruu ɓɔɔ n kasɛ anang katɔ bii manɛ pati ɓɛɛ. Tɔ̀ɔ, ruu naa kɔ̀ɔ zɔɔ kaa nɛɛ nyaa.

¹⁵Laa wu a nɔɔ nwannang tɔ̃ɔ katɔ. Rɛɛ masang ɓuru ɓɔɔ ri ka nihn, ri jee mɔɔ nyaa. Jèe m rɛɛ masang ɓuru ɓɔɔ ri nɛɛ mɔɔ nyaa jong gbete gbete.