Read mumuye Yahuza 1 Bible Online

Yahuza 1 - mumuye bible

Yahuza 1

¹Labeenang keɓe nɛɛ bii mɛɛ Yahuza, zang shonang Yeesɔ Kirisi, ɓɔɔ ti jaa nàá Yakub ɓɛɛ. N bèé zang ɓɔɔ Laa ɓaa ri nyaa ɓɛɛ. Ɓɔɔ Laa ɓɔɔ wukɔ Daa, kasɛ ri katɔ, a Yeesɔ Kirisi ti gãng jĩng ka ri ɓɛɛ.

²N gaa Laa, gn manɛ wu kɔng wu, wu ti shingnɛ yeti manɛ wu valɛ katɔ, wu ti kasɛ ruu manɛ, gbãng gbãng.

³Masang, ɓɔɔ n kasɛ nɔɔ dɔɔli ɓɛɛ, bɛ̀ɛ́ n wàá doo diki ɓɔɔ n bèé nɔɔ labeenang ka ruu yuu ɓuru ɓɔɔ Yeesɔ ta ɓɛɛ. A vuu ɓɔɔ shing m kãntang keɓe n bèé nɔɔ labeenang, n kasɛ n kɔɔ nɔɔ nɛɛ nɔɔ shii nɛɛ bang, ka ruu danggn shinnang kɔ Laa a zang ɓiɓɛ tɔ dɔ̃ɔ gbete ɓee.

⁴Zang ɓɔɔ ri dũ̀ng Laa kpang, ɓɔɔ kagn ri hãa tɔ ka teteng manɛ nɛɛ nwĩiri, ruu zi kpang. Zang ɓɔɔ ri kɔ̃sɔ ruu tɔ̃ɔ ɓɔɔ Laa ɓuru pàlɛ́ zang, nwang ri ɓarɛ kaa naa zang yaa ri gbalang dũndũng palɛnang, a ri bɛ̃ɛ Yeesɔ Kirisi ɓɔɔ wukɔ gbete, Kpanti nɛɛ dabang ɓuru ɓɛɛ. Labeenang Laa kɔɔ ruu ɓi tɔ ka yuu ruu kɔ zang dɔ̀ng ri ɓee.

⁵Ruu kɔ n tɔɔ n kɔ̀ɔ́ nɔɔ ɓee, nɔɔ zi tɔ. N tɔɔ n kpaa nɔɔ m danggn kaa naa ɓɔɔ Laa ta yuu zang Isirela nɛɛ tipi Masara ɓɛɛ, a nɛɛ knti naa ningsi zang ɓɔɔ ka teteng ɓarɛ ɓɔɔ ri shing danggn ka bii ɓiɓɛ kpang ɓɛɛ.

⁶Danggn wu ning nɔɔ kpang. Zang nyaa shonang Laa ɓɔɔ ri ka lapa, ɓɔɔ ri nwáng ka nɔng ɓɔɔ Laa a ri naa kagn ɓɛɛ kpang, ri yáa nɔng nwannang ɓarɛ ɓɛɛ. Zang mã ri doo nɛɛ soo saka ka nɔng ɓɔɔ tɔ̀ɔ kɔngkɔng ka tipi dii, ka nɔng ɓɔɔ Laa shing ri, gã diki bang kaɓa ɓɔɔ wu naa dɔ̌ng ri ruu kagn ɓɛɛ.

⁷Danggn gari Sɔɔdom nɛɛ Gomora nɛɛ rɛɛ gari ɓɔɔ ri naabm ɓɛɛ, wu ning nɔɔ kpang. Ri pálɛ́ dũndũng ka zɔ̃ng zɔ̃ng. Laa dang ri jĩng, ningsi ri nɛɛ waa ɓɔɔ ning ɓi kpang dòndòng ɓɛɛ, tɔ̀ɔ zang piti ri zi kaa gn.

⁸Zang kɔ n rang yee ka yuu ɓarɛ ɓee, doo nɔngkɔ. Ri rɔ̃kɔ rɔ̃kɔnang ɓɔɔ shing ri, ri pàlɛ́ bii ɓarɛ vuu shi kpang. Ri tá nyaa ɓɔɔ Laa dang ɓɛɛ, a ri ti dãlɛ zang nyaa shonang Laa ɓɔɔ ri ka lapa ɓɛɛ.

⁹Naa dòo Maakel ɓɔɔ wukɔ kpanti zang nyaa shonang Laa ɓɔɔ ri ka lapa ɓɛɛ, ka ɓɔɔ ri laa zɔɔ nyaa nɛɛ Sheetang ka yuu vɔrɔ Musa, dãa Sheetang kpang. Kɔɔ wu katɔ waati nɛɛ “Laa wu dang mɔɔ jĩng.”

¹⁰A zang keɓe ri dãlɛ vuu piti ɓɔɔ ri zi dĩiri ɓiɓɛ kpang ɓɛɛ. Vuu ɓɔɔ kagn ri zi katɔ, a ri zi kaa tɔ̀ɔ́ ka rɛ̃rɛnang ɓɔɔ ri rɛ̃rɛ ka yuu ɓiɓɛ kpang, ri tãa ɓarɛ nɛɛ bii naa ɓɔɔ yɔpɔ jĩngti ɓɔɔ rang yee ɓi kpang tãa ɓɛɛ. Ti vuu keɓe kɔ ningsi ri.

¹¹Jĩng dannang kagn yuu ɓarɛ. Ri sɔ̀ɔ gbalang Kayinu. Ka ruu saka ɓɔɔ ri kasɛ ɓɛɛ, ri pálɛ́ vuu shi kpang ɓɔɔ Balamu pálɛ́ ɓɛɛ tɔ. Ri taarɛ yuu naa Koora, a zang ti ningsi ri naa ɓɔɔ zang nyɔ wu vɔrɔ ɓɛɛ.

¹²Ri nwàng ɓarɛ naa vuu rĩiti, ka teteng manɛ ka nɔng ɓɔɔ nɔɔ shaa vuu shaanang ɓɔɔ nɔɔ tusu zɔɔ nɛɛ nɔɔ kasɛ zɔɔ katɔ ɓɛɛ. Ri lasɛ nɔɔ nɔng nɛɛ vuu ɓɔɔ ri palɛ yusɛ̃ɛ tuu ri kpang ɓɛɛ. Ri gãng jĩng ɓarɛ ka yuu ɓarɛ kɔ shɛ̃ɛning. Ri ɓarɛ naa sãmbong ɓɔɔ mii kagn kpang, jasung rãayi ɓɛɛ. Ri ɓarɛ naa laa ɓɔɔ ra jaa kpang, naa doo nɛɛ guusi ɓɛɛ. Ri nwàng naa laa ɓɔɔ zang ru katɔ nɛɛ dĩiri, a vɔ dɔ̃ɔ gbete ɓɛɛ.

¹³Ri nwàng ɓarɛ naa mii waapo ɓɔɔ rãa dɔɔli, a vuu shi kpang ɓɔɔ ri palɛ tusu bii ɓi kaa naa puru ɓɔɔ pu ka yuu mii waapo ɓɛɛ. Ri nwàng ɓarɛ naa sang ɓɔɔ jĩli ka lapa ɓɛɛ. Laa shìng ri nɔng tɔ dòndòng, ka nɔng ɓɔɔ tɔ̀ɔ katɔ kɔngkɔng ɓɛɛ.

¹⁴Ɛnɔk, zɔ̃ng Adamu ɓɔɔ daa kaa manziti ɓɛɛ, kɔ kɔɔ ruu keɓe ka yuu ɓarɛ tɔɔ, “Nɔɔ zirɛ, Kpanti Laa naa a ditɔ nɛɛ zang nyaa shonang ɓiɓɛ ɓɔɔ ri ka lapa ɓɛɛ labang gaagaa.

¹⁵Wu naa jɛ̃ɛ zang nandon ruu, wu dɔ̀ng zang ɓɔɔ ri palɛ vuu shi kpang, ɓɔɔ ri dũng Laa kpang ɓɛɛ ruu, ka ruu vuu shi kpang ɓɔɔ ri palɛ ka gbalang ɓarɛ ɓɛɛ. A ɓɔɔ ti ka vuu shi kpang ɓɔɔ zang ɓɔɔ ri dũ̀ng Laa kpang keɓe ri kɔɔrɔ ka yuu Laa ɓɛɛ.”

¹⁶Zang keɓe ri gɔ̃ɔrɔ ɓarɛ yee diki diki, a ri kɔɔyi nɛɛ zang ɓɔɔ kɔ, wu palɛ vuu. Ri dũng ɓarɛ vuu shi kpang ɓɔɔ yeti ɓarɛ kasɛ ɓɛɛ. Ri rangkɛ yee bang bang ka yuu ɓarɛ, ri nyɔ zang nɛɛ nyaa nɛɛ tɔ̀ɔ, ri walɛ vuu.

¹⁷Rɛɛ masang, danggn vuu ɓɔɔ zang nyaa shonang Yeesɔ Kirisi ri kɔɔ nɔɔ ka tĩng, wu ning nɔɔ kpang.

¹⁸Ri kɔɔ nɔɔ nɛɛ, “Diki ɓɔɔ koo waa nyaa kagn nɛɛ a tɔ, zang ri naa nwang nyaa, ri naa kpaa nɔɔ, ri naa dũng ɓarɛ vuu shi kpang ɓɔɔ yeti ɓarɛ ɓɔɔ zi Laa kpang kasɛ ɓɛɛ.”

¹⁹Wee zang ɓɔɔ ri shing nɔɔ, nɔɔ basɛ zɔɔ kɔ, ɓɔɔ ri dũng ɓarɛ vuu ɓɔɔ ri tãa nɛɛ bii ɓɛɛ, a Suru Laa ɓi kaa tɔ̀ɔ́ bii ɓarɛ kpang.

²⁰Rɛɛ masang ɓɔɔ manɛ, nɔɔ pálɛ́ vuu ɓɔɔ shingnɛ nɔɔ daa manɛ nɛɛ tĩng kɔ jong ka danggn kɔ nɔɔ shing ka bii Laa ɓee. Suru Laa wu a nɔɔ naa, nɔɔ gaa Laa.

²¹Nɔɔ yiti yuu manɛ ka kasɛnang ɓɔɔ Laa kasɛ nɔɔ ɓɛɛ, ka ɓɔɔ nɔɔ gã Kpanti ɓuru Yeesɔ Kirisi wu pàlɛ̀ ruu tɔ̃ɔ, wu a ruu suru bii ɓɔɔ waa nyaa kpang ɓɛɛ.

²²Zang ɓɔɔ rɛ̃rɛnang ɓarɛ nɛɛ vãarɛ ditɔ, gn ɓarɛ wu kɔng nɔɔ katɔ.

²³Nɔɔ zɔ̃ng ri nɛɛ yeti waa, nɔɔ ta yuu ɓarɛ. Gn zang ɓɔɔ wu kɔng nɔɔ katɔ, nɔɔ ɓakɛ nɛɛ vɔrɔ kaanang ning. Naa dòo fɔ̃ɔrɔ ɓarɛ ɓɔɔ ri palɛ vuu shi kpang ɓɔɔ bii ɓarɛ kasɛ ɓɛɛ nɛɛ mani, nɔɔ bɛ̃ɛ katɔ.

²⁴Zang wu a Laa bannang. Laa ɓɔɔ zunung ɓɔɔ wu yiti nɔɔ, nɔɔ yaa gbalang ɓiɓɛ kpang ɓɛɛ. Wu atɛ nɔɔ ka tĩng ɓiɓɛ, shi kpang kagn ka bii manɛ kpang, a nɔɔ ti tãa tĩnang ɓɛɛ.

²⁵Laa ɓɔɔ ɓa zang piti, wukɔ ti gbete, wukɔ tá yuu ɓuru nɛɛ bii Kpanti ɓuru Yeesɔ Kirisi ɓɛɛ. Bannang nɛɛ naa vuu palɛnang ɓi ɓɔɔ ɓiɓɛ dòo ka sáa ɓɔɔ tɛɛrɛ tɔ ɓɛɛ, nɛɛ kãntang keɓe, ti nwang ɓɔɔ ɓiɓɛ gbinggbing. Nɔngkɔ.