Read mumuye Vuu ɓɔɔ zang nwangsɛ Yɔhana 1 Bible Online

Vuu ɓɔɔ zang nwangsɛ Yɔhana 1 - mumuye bible

Vuu ɓɔɔ zang nwangsɛ Yɔhana 1

¹Wee vuu ɓɔɔ Yeesɔ Kirisi nwangsɛ zang, ɓɔɔ Laa á wu nɛɛ wu tusu zang ɓɔɔ ri pàlɛ́ Laa shonang nɛɛ tɔ̀ɔ, ri zi vuu ɓɔɔ naa palɛ diki bee takpang ɓɛɛ. A Yeesɔ shong zang nyaa shonang Laa ɓɔɔ ka lapa ɓɛɛ, ka bii zang shonang ɓiɓɛ Yɔhana nɛɛ tɔ̀ɔ wu tusu wu rɛɛ vuu keɓe.

²Yɔhana ɓɔɔ kɔɔ zang vuu piti ɓɔɔ wu zili ɓɛɛ. Wukɔ bée vuu ɓɔɔ Laa kɔɔ ɓɛɛ, ɓɔɔ Yeesɔ Kirisi nwangsɛ wu ɓɛɛ.

³Tĩnang tãanang ɓi ɓɔɔ zang ɓɔɔ gã ruu kɔ Laa nwángsɛ̀ ɓee. Tĩnang tãanang ɓi ti ɓɔɔ zang piti, ɓɔɔ ri tã̀a ruu keɓe, a ri dũng vuu ɓɔɔ zang bee kagn ɓɛɛ. Ka ruu ɓɔɔ, làa ɓɔɔ vuu keɓe naa palɛ a naabm tɔ ɓɛɛ.

⁴Labeenang keɓe nɛɛ bii mɛɛ, nkɔ Yɔhana n bèé nɔɔ zang Laa ɓɔɔ nɔɔ ka rɛɛ Gãa Laa manziti ɓɔɔ ka tipi Asiya ɓɛɛ. Laa wu palɛ nɔɔ tɔ̃ɔ, wu shingnɛ yeti manɛ wu valɛ katɔ. Laa ɓɔɔ ɓi ningkãari kãntang keɓe, ɓɔɔ bɛ̀ɛ́ ɓi ningkãari, ka ɓɔɔ bɛ̀ɛ́ zang mãa koo gn kpang, ɓɔɔ ti naa gbãayu ditɔ ka koo keɓe ɓɛɛ. Rɛɛ suru Laa manziti ɓɔɔ ri shiiri ka tĩng ɓiɓɛ, ka ɓɔɔ wu nwang ka yuu laa kpanti ɓiɓɛ ɓɛɛ. Ri palɛ nɔɔ tɔ̃ɔ jong, ri ti shingnɛ yeti manɛ wu valɛ katɔ.

⁵Yeesɔ Kirisi ɓɔɔ kɔ̀ɔ́ ɓi ruu ɓɔɔ niizang diki diki ɓɛɛ, ɓɔɔ Laa wisi wukɔ paa shɔɔnang nɛɛ sàa, a wukɔ ti nwang kpanti ka yuu rɛɛ kpanti ɓɔɔ ka koo keɓe, wu palɛ nɔɔ tɔ̃ɔ jong, wu ti shingnɛ yeti manɛ wu valɛ katɔ. Yeesɔ ɓɔɔ kasɛ ruu katɔ, a vɔ ka ruu ɓuru nɛɛ, tɔ̀ɔ, zĩi ɓiɓɛ wu ta ruu kaa nɛɛ naa vuu shi kpang ɓɔɔ ruu palɛ ɓɛɛ.

⁶A shing ruu, rúu nwang zang ɓɔɔ ri dɔɔrɔ vuu ka Gãa Laa, ɓɔɔ Laa kɔ ɓi kpanti ɓuru, a Laa ti Daa ɓiɓɛ ɓɛɛ. Bannang nɛɛ kpanti roonang wu nwang ɓɔɔ ɓiɓɛ dòndòng. Nɔngkɔ.

⁷Nɔɔ zirɛ, náa a ka yeti sãmbong, zang piti ri naa zi wu jĩng ka bii. Zang ɓɔɔ ri shu wu nɛɛ shalang, ri ti naa zi wu jong. Zang tipi koolaa keɓe nandon, ri naa káa ka ruu ɓiɓɛ. Vuu keɓe naa nwáng ditɔ nɔngkɔ niizang. Nɔngkɔ.

⁸Kpanti Laa kɔɔyi tɔɔ, “Nkɔ ka tĩng shɔɔnang, nkɔ ti waa nyaa knti.” N nwàng ningkãari kãntang keɓe, n ti nwang ningkãari bɛ̀ɛ́ zang mãa koo gn kpang, n ti naa a ditɔ ka koo tɔkn. Nkɔ kpanti ka yuu vuu piti.

⁹Nkɔ Yɔhana manzung manɛ, ɓɔɔ ruu ɓakɛ zɔɔ tɔ nɛɛ Yeesɔ ɓɛɛ. Ruu mã danggn nɛɛ zɔɔ ka jĩng ɓɔɔ ruu dangnɛ, ka ruu ɓɔɔ, Yeesɔ kpanti ɓuru ɓɛɛ. Zang shing m ka tipi ɓɔɔ mii kiiri wu nyaa ka teteng, ɓɔɔ zang ɓaa nɛɛ Patimu ɓɛɛ, ka ruu ɓɔɔ, n kɔɔ zang Ruu Laa ɓɔɔ Yeesɔ kasɛ tɔ, nɛɛ ɓi niizang ɓɛɛ.

¹⁰Ka nɔng kaɓa, ka lee Laadi, Suru Laa a ka bii mɛɛ, a n nwang kaa naa n rɔ̃kɔ katɔ. N tãa yee zang mɛɛ nyaa ka knti mɛɛ nabm naa gboo.

¹¹Kɔ̀ɔ́ m nɛɛ, “Tuu labeenang mɔɔ bée vuu kɔ mɔɔ zili ɓee, mɔ́ɔ shòng zang ɓɔɔ ri dũng Laa ka Gãa Laa manziti kaɓa. Gãa Laa ɓɔɔ ri ka gari Afisa nɛɛ gari Simina nɛɛ gari Pagamu, nɛɛ gari Tayatira nɛɛ gari Sadisu, nɛɛ ɓɔɔ gari Filadifiya a ɓɔɔ gari Lawodikiya ɓɛɛ.”

¹²A n raa jĩng, n tɔɔ, n zi zang ɓɔɔ rang m yee ɓɛɛ. Ɓɔɔ n raa jĩng, n zi vuu ɓɔɔ zang shĩili waa ka yuu ɓiɓɛ ɓɛɛ manziti.

¹³Ka teteng rɛɛ vuu ɓɔɔ zang shĩili waa zàáng sɔɔ kagn kaɓa, n zi zang shiiyi, “nwàng kaa jaa nwang shɔnzang”. Hãa fɔ̃ɔrɔ beebang, à wu ka jĩng doo, a mã vuu ɓɔɔ zang ti nɛɛ zinariya ka danggn.

¹⁴Suuyuu ɓiɓɛ nɛɛ yuu ɓiɓɛ puru shãa shãa naa ruutu, puru shãa shãa naa zũng mii takong ɓɔɔ zang ɓaa nɛɛ sino ɓɛɛ. Jĩng ɓiɓɛ yakɛ nɔng naa nyɛlɛ waa.

¹⁵Doo ɓiɓɛ kɔlɔ naa saka ɓɔɔ zang ɓaa nɛɛ tagula, ɓɔɔ zang mɔlɔ bii ɓiɓɛ nɛɛ waa ɓɛɛ, a yee ɓiɓɛ naa mii zɛ̃ɛ ka rang kɔpɔ.

¹⁶Yiti sang manziti ka nakn ɓiɓɛ. Yere bang ɓɔɔ nyaa ziti nwáng nɛɛ nyaa ɓiɓɛ. Waa nyaa tĩng ɓiɓɛ, yakɛ naa laa yakɛ nɔng, bɛ̀ɛ́ kaa dãngdãng yuu.

¹⁷Ɓɔɔ n zi wu, n watɛ ka tĩng ɓiɓɛ naa zang ɓɔɔ vɔ katɔ ɓɛɛ. A arɛ shing nakn ɓiɓɛ ka bii mɛɛ, a kɔɔ m nɛɛ “Mɔɔ kaa vɔrɔ kpang, Nkɔ zang tĩng shɔɔnang, nkɔ ti gɔɔ zang nyaa.

¹⁸Nkɔ ti zang ɓɔɔ ningkãari ɓɛɛ. Bɛ̀ɛ́ n vɔ katɔ, a kãntang keɓe, n kaa ningkãari dòndòng. Saka ɓɔɔ zang puu nyaa gãa zang ɓɔɔ daa nɔng vɔrɔ nɛɛ ɓɔɔ koo rɛɛ suru, ka naa mɛɛ kɔ.

¹⁹Ka ruu nɔngkɔ, bée vuu ɓɔɔ mɔɔ zili ɓɛɛ ta, vuu ɓɔɔ palɛ kãntang keɓe, nɛɛ vuu ɓɔɔ naa palɛ nɛɛ knti ɓɛɛ.

²⁰Zirɛ, rɛɛ sang manziti kɔ n yiti ka naa ɓee, nɛɛ rɛɛ vuu manziti ɓɔɔ zang shĩili waa zàáng sɔɔ kagn, ɓɔɔ zang palɛ ri nɛɛ zinariya ɓɛɛ. N kaaɓi n nwangsɛ mɔɔ dĩiri rɛɛ vuu keɓe. Rɛɛ sang manziti keɓe, ɓi rɛɛ zang nyaa shonang Laa, ɓɔɔ ri ka lapa, ɓɔɔ ri gãng jĩng, ka rɛɛ Gãa Laa manziti kaɓa ɓɛɛ. Vuu manziti ɓɔɔ zang shĩili waa zàáng sɔɔ kagn kaɓa, ɓi kaa rɛɛ Gãa Laa bìí, nɛɛ yuu ɓarɛ.”