Read mumuye Vuu ɓɔɔ zang nwangsɛ Yɔhana 10 Bible Online

Vuu ɓɔɔ zang nwangsɛ Yɔhana 10 - mumuye bible

Vuu ɓɔɔ zang nwangsɛ Yɔhana 10

¹Ka knti vuu keɓe, n zi zang nyaa shonang Laa ɓɔɔ ka lapa ɓɛɛ, ɓɔɔ naa vuu palɛnang ɓiɓɛ kagn ɓɛɛ, a nɛɛ lapa. Sãmbong zuu wu naa fɔ̃ɔrɔ, a sɔkɔ mii kãng ka yuu ɓiɓɛ. Wàá nyaating ɓiɓɛ kɔlɔ katɔ naa laa, a doo ɓiɓɛ naa nyɛlɛ waa ɓɔɔ kɔ nabm ɓɛɛ.

²Yiti jaa labeenang tɔkɔlɔng ɓɔɔ zang puu katɔ ɓɛɛ ka naa. Arɛ naa náa doo nakn ɓiɓɛ ka yuu waapo a náa doo nagang ɓi ka tipi.

³Ɓaa nyaa nabm, yee ɓiɓɛ naa ɓɔɔ zing mɛɛ nyaa ɓɛɛ. Ɓɔɔ wu ɓaa nyaa naa weɓe, rɛɛ shala mii manziti kaɓa ri mɛɛyi.

⁴Ɓɔɔ rɛɛ shala mii manziti kaɓa ri mɛɛyi, bɛ̀ɛ́ n tɔɔ n bee vuu ɓɔɔ ri kɔɔ ɓɛɛ kaa tɔ. A n tãa yee nɛɛ lapa kɔɔ m nɛɛ, “Mɔɔ nwangsɛ zang bii ruu kaɓa kpang, mɔɔ beere kpang.”

⁵A zang nyaa shonang Laa ɓɔɔ ka lapa ɓɔɔ naa doo ka waapo nɛɛ tipi kaɓa, tuu nakn ɓiɓɛ ka lapa.

⁶A tũng vuu nɛɛ nung Laa ɓɔɔ nwang ɓi ningkãari dòndòng, ɓɔɔ mãa lapa nɛɛ vuu piti ɓɔɔ kagn ɓɛɛ, nɛɛ tipi nɛɛ vuu piti ɓɔɔ kagn ɓɛɛ. A ɓɔɔ waapo nɛɛ vuu piti ɓɔɔ kagn ɓɛɛ, kɔɔyi nɛɛ, laa ɓɔɔ zang suukãng ɓɛɛ takpang.

⁷Zang nyaa shonang Laa ɓɔɔ ka lapa ɓɔɔ daa kaa manziti nɛɛ naa jee gboo ɓiɓɛ tɔ, tɔ̀ɔ, vuu ɓɔɔ ri waasɛ bii katɔ, ri nwangsɛ bii kati, tɔ̀ɔ, wu hangsɛ nyaa ɓarɛ kati naa ɓɔɔ wu nwàngsɛ̀ rɛɛ zang nyaa shonang ɓiɓɛ ɓɔɔ ri kɔ̀ɔrɔ̀ zang Ruu Laa ɓɛɛ.

⁸A yee ɓaasi n tãayi a nɛɛ lapa ɓɛɛ, kɔɔ m nɛɛ, “Daayi, mɔɔ ta labeenang ɓɔɔ zang puu katɔ kaɓa. Ɓɔɔ zang nyaa shonang Laa ɓɔɔ ka lapa ɓɔɔ shii ka yuu waapo nɛɛ tipi, yiti ka naa ɓa.”

⁹A n daayi, n daa kɔɔ zang nyaa shonang Laa ɓɔɔ ka lapa kaɓa nɛɛ wu a m jaa labeenang bìí. Kɔɔ m nɛɛ, “Tá ta, mɔɔ shaayi. Tíng katɔ ka nyaa ɓaaɓɛ naa nung warɛ, a nɛɛ daa tɔ yeti ɓaaɓɛ, daa la kaa tɔ.”

¹⁰A n ta jaa labeenang bìí nɛɛ naa ɓiɓɛ n shaayi. Tîng katɔ ka nyaa mɛɛ naa nung warɛ, a ɓɔɔ n mãrɛ, daa la kaa tɔ ka yeti mɛɛ.

¹¹A zang ɓɔɔ kɔɔ m nɛɛ, “Daa tɔkn mɔɔ daa kɔɔ ruu ka yuu zang koolaa ɓɔɔ nyaa ɓarɛ ka bm bm ɓɛɛ, nɛɛ rɛɛ kpanti ɓarɛ.”