Read mumuye Vuu ɓɔɔ zang nwangsɛ Yɔhana 11 Bible Online

Vuu ɓɔɔ zang nwangsɛ Yɔhana 11 - mumuye bible

Vuu ɓɔɔ zang nwangsɛ Yɔhana 11

¹Ka knti vuu keɓe, zang a m laa ɓɔɔ zang gãsɛ nɔng nɛɛ mani ɓɛɛ. A zang kɔɔ m nɛɛ “Yupaa mɔɔ daa gãsɛ Gãa Laa, nɛɛ nɔng ɓɔɔ zang dɔɔ wu vuu kagn ɓɛɛ. Mɔɔ ti gã zang ɓɔɔ ri bang Laa ka nɔng ɓɛɛ.

²A mɔɔ gãsɛ dàbang ɓɔɔ ɓi ka biling ka nɔng Gãa Laa ɓɛɛ kpang. Ka ruu ɓɔɔ, zang yàa ɓi zang tipi ɓɔɔgn, ɓɔɔ ri naa naalɛ Urushalima nɛɛ doo ɓarɛ shala laa ziti tu ziti ɓɛɛ.

³N shong zang mɛɛ ziti ɓɔɔ ri daa kɔɔ zang ruu ka yuu mɛɛ ɓɛɛ. Ri naa hã̀lɛ́ fɔ̃ɔrɔ ɓɔɔ zang ɓɔɔ ri kaa nyavɔ ri hã̀lɛ́ ɓɛɛ. N a ri naa ri kɔɔ zang ruu ka yuu mɛɛ diki labang gbete tu laa maani dakn ziti, tu laa taati.”

⁴Zang ziti ɓɔɔ ri kɔɔ ruu ɓiɓɛ keɓe, rikɔ laa zeetung ziti nɛɛ waa zàáng sɔɔ ziti ɓɔɔ ka tĩng Laa ɓɔɔ wukɔ kpanti koo piti ɓɛɛ.

⁵Zang ɓɔɔ nɛɛ tɔɔ wu palɛ ri vuu shi kpang, waa nwangnɛ nyaa ɓarɛ wu shaa zang ɓɔɔ ri shing jĩng nɛɛ ri kpang kaɓa. Wee naa ɓɔɔ zang nyɔkɔ zang ɓɔɔ ri shing jĩng nɛɛ ri kpang kɔ, tɔɔ ri wɔ kaa takpang.

⁶Zang a ri naa vuu palɛnang katɔ ɓɔɔ ri zãa mii lapa anang katɔ ka làa ɓɔɔ ri kɔ̀ɔ́ zang Ruu Laa ɓɛɛ. Ri ti zunung katɔ ri risi mii ɓɔɔ ka koo nandon, wu raa zĩi. Zang ti a ri naa ɓɔɔ ri atɛ jĩng dannang ka zɔ̃ng zɔ̃ng ka koo keɓe ka yuu zɔɔ yuu zɔɔ, ka laa ɓɔɔ ri kasɛ piti ɓɛɛ.

⁷Ri nɛɛ hangsɛ Ruu Laa kɔɔnang tɔ, yɔpɔ jĩngti ɓɔɔ shaa varɛ dɔɔli, ɓɔɔ nwangnɛ yeti too ɓɔɔ dii kagn kpang, wu naa ta sĩiri nɛɛ ri. Naa ɓa ri kaka, wu nyɔkɔ ri vɔrɔ.

⁸Zang naa yaa vɔrɔ ɓarɛ ka gbalang ɓɔɔ ka yeti gari bang kaɓa, ɓɔɔ nɛɛ nyaa vuu jɛ̃ɛnang, zang ɓaa nɛɛ Sɔɔdom nɛɛ Masara ɓɛɛ. Nɔng ɓɔɔ zang ɓáa kpanti ɓarɛ naa ka laa kagn ɓɛɛ.

⁹Zang ɓɔɔ ri nwangnɛ zɔ̃ng zang piti, nɛɛ nɔng piti ka koo, ɓɔɔ nyaa ɓarɛ ka bm bm ɓɛɛ, ri naa pɛ̃ɛrɛ vɔrɔ ɓarɛ, diki ɓa katɔ taati nɛɛ nyaa gãasa. Ri zã́a zang vɔrɔ rɛɛ zang keɓe gbãanang katɔ.

¹⁰Zang koo keɓe ri naa gaarɛ zɔɔ, ri tãa tĩnang ka ruu vɔrɔ zang ziti keɓe. Ri alɛ zɔɔ vuu waati ka ruu ɓɔɔ zang nyaa shonang Laa kaɓa, ri kɔɔ Ruu Laa, ri dang zang ɓɔɔ ri nwalɛ ka koo jĩng dɔɔli ɓɛɛ.

¹¹Ɓɔɔ diki taati nɛɛ nyaa gãasa naa ɓarɛ, ɔ̃kɔnang ɓɔɔ a zang suru bii ɓɛɛ, a nɛɛ bii Laa, a daa ka yeti ɓarɛ, a ri shii doo paa. Ɓɔɔ ri shii paa, zang kaɓa nandon, ɓɔɔ ri zi ri, bii kaa ri vɔrɔ dɔɔli.

¹²A zang ziti kaɓa, ri tãa yee nwangnɛ lapa, ɓaa ri nyaa nabm nɛɛ, “Nɔɔ a ta ka lapa ka nihn.” A ri daa lapa ka yeti sãmbong, zang ɓɔɔ ri shing jĩng nɛɛ ri kpang nandon, ri zi ri jĩng bii.

¹³Nyaa kɔ doo naa ɓee, tipi ruutu nabm, a naa zang basɛ gari bang kaɓa tìng kopi, tìng gbete ka teteng ɓarɛ jirɛ. A tipi ɓɔɔ ruutu ɓee nyɔ shɔnzang labang manziti. A zang ɓɔɔ ri yaa knti, bii kaa ri vɔrɔ dɔɔli, a ri dɔɔ Laa ɓɔɔ ka lapa ɓɛɛ kati.

¹⁴Jĩng dannang ɓɔɔ daa kaa ziti ɓa tɔ, ɓɔɔ ya gbete wu daa kaa taati a doo ka naa.

¹⁵A zang nyaa shonang Laa ɓɔɔ wukɔ wàa rɛɛ zang nyaa shonang Laa ɓɔɔ ri manziti nyaa knti ɓɛɛ, jee gboo ɓiɓɛ. A n tãlɛ yee nwangnɛ lapa, ri rang yee nabm nɛɛ, “Kpanti roonang koo keɓe, raa ɓɔɔ kpanti ɓuru tɔ, nɛɛ ɓɔɔ Kirisi ɓiɓɛ. Laa kɔ naa roo kpanti gbinggbing.”

¹⁶A rɛɛ zang bang bmati tu dɛ̃ɛti, ɓɔɔ zang ɓu nwang ka yuu laa kpanti ɓɔɔ ɓarɛ ka tĩng Laa ɓɛɛ, ri tang nɛɛ gutu ka tĩng Laa, ri sòo yuu ka dii, ri bang Laa.

¹⁷Ri kɔɔrɔ nɛɛ, “Ruu zãa mɔɔ tɔ kpanti ɓuru Laa, ɓɔɔ naa vuu palɛnang piti ka naa ɓaaɓɛ kɔ ɓɛɛ. Mɔɔ nwáng ɓaa doo ka tĩng, a mɔkɔ ti nwang kãntang keɓe. Ruu zãa mɔɔ tɔ, ka ruu ɓɔɔ, mɔɔ tuu naa vuu palɛnang ɓaaɓɛ, ɓɔɔ bang, mɔɔ gaayu kpanti roonang kana nɛɛ mani ka koo ɓɛɛ.

¹⁸Zang koo ɓɔ̀ɔ́gn, ɓɔɔ ri ɓarɛ zang Laa kpang, ri lasɛ yeti tɔ nɛɛ mɔɔ gbãng gbãng, a diki ɓɔɔ mɔɔ lasɛ yeti jong nɛɛ ri ti a tɔ. Diki ɓɔɔ mɔɔ dɔng zang ɓɔɔ ri vɔlɔ tɔ ruu kagn, mɔɔ ti sɔ̀ɔrɔ̀ rɛɛ zang nyaa shonang ɓaaɓɛ nɛɛ rɛɛ zang ɓaaɓɛ doo, ka ruu shonang ɓɔɔ ri palɛ ɓɛɛ. Nɛɛ rɛɛ zang bang, nɛɛ wujɛ ɓɔɔ ri a nung ɓaaɓɛ bannang katɔ ɓɛɛ. Zang ti ningsi zang ɓɔɔ bɛ̀ɛ́ ri ningsi koo ɓɛɛ.”

¹⁹A nyaa Gãa Laa ɓɔɔ ka lapa puuyi, zang zǐ akpaati nyaa ɓɔɔ Laa mã nɛɛ zang ɓiɓɛ kagn ɓɛɛ katɔ, ka yeti Gãa Laa. A shala mangkɛ, zang mɛɛrɛ nyaa nabm, tipi ruutu, shala mɛɛrɛ, a mii takong a dɔɔli.