Read mumuye Vuu ɓɔɔ zang nwangsɛ Yɔhana 13 Bible Online

Vuu ɓɔɔ zang nwangsɛ Yɔhana 13 - mumuye bible

Vuu ɓɔɔ zang nwangsɛ Yɔhana 13

¹Ka knti vuu keɓe, n zi yɔpɔ jĩngti ɓɔɔ nwangnɛ yeti waapo. Yuu ɓiɓɛ manziti, a takɛ jee kagn kopi. Kãng lapoo yuu kpanti ka jee ɓu, a zang ti bee wu nung shi kpang ɓɔɔ dãa Laa ka yuu ɓu.

²Yɔpɔ jĩngti ɓɔɔ n zirɛ ɓɛɛ, nwang gbɛ̃ɛ, doo ɓiɓɛ naa ɓɔ̀ɔ́ vuu jĩngti ɓɔɔ zang ɓaa nɛɛ bíyàa ɓɛɛ, a nyaa ɓiɓɛ nwang ɓɔɔ zing. Sɔkɔ bang tuu bannang ɓiɓɛ nɛɛ kpanti ɓiɓɛ, a ɓɔɔ naa vuu palɛnang ɓiɓɛ, a yɔpɔ kaɓa.

³Yuu yɔpɔ jĩngti kaɓa gbete, nwàng naa ɓɔɔ bɛ̀ɛ́ zang shing wu nyaa vuu waa bang kagn, a nyaa vuu waa bìí zũng tɔ ɓɛɛ. Yɔpɔ kaɓa palɛ vuu ɓɔɔ zang zirɛ zang mã naa ka danggn dɔɔli, ka ruu nɔngkɔ, zang koo nandon ri gaayu ɓɔɔ ri dũng wu ɓɛɛ.

⁴Zang piti ri bang sɔkɔ bang, ka ruu ɓɔɔ, wu a yɔpɔ kaɓa naa vuu palɛnang ɓiɓɛ ɓɛɛ. A ri bang yɔpɔ kaɓa, ri kɔɔrɔ nɛɛ, “Ɓu wi naa yɔpɔ keɓe wiya? Ɓu wi zunung ɓɔɔ wu gaa nyaa nɛɛ wu wiya?”

⁵Zang a yɔpɔ jĩngti kaɓa naa, wu rangkɛ yee bang bang ka yuu ɓiɓɛ, a wu ti rangkɛ yee shi kpang ka yuu Laa. Zang a wu naa wu palɛ vuu ɓɔɔ wu kasɛ ɓɛɛ, shala laa ziti tu ziti.

⁶A gaayu ɓɔɔ wu rangkɛ yee shi kpang ka yuu Laa, nɛɛ nung Laa, ɓɔɔ nɔng nwannang Laa, a ɓɔɔ kaa zang piti ɓɔɔ ri nwang ka lapa ɓɛɛ.

⁷A zang ti yaa wu nɛɛ wu ta sĩiri nɛɛ rɛɛ zang Laa wu ti shaa ri. A zang a wu naa wu roo kpanti ka yuu zɔ̃ng zang ka nɔng piti ka koo, nɛɛ zang ɓɔɔ ri rangkɛ nyaa ka bm bm ɓɛɛ.

⁸Zang ɓɔɔ ri nwang ka koo nandon ri naa bang wu. Rɛɛ zang ɓɔɔ zang bee nung ɓarɛ doo tɛ̃ɛ tɛ̃ɛ kpang, ka yeti labeenang Jaa Mɛ̀ɛrɛ́ Laa, ɓɔɔ bɛ̀ɛ́ zang nyɔ wu vɔrɔ ɓɛɛ.

⁹Zang ɓɔɔ shoo ɓiɓɛ nɛɛ kagn wu tãa ruu keɓe.

¹⁰Zang ɓɔɔ naa zang zɔ̃ng wu, nɛɛ zang naa yi wu katɔ ka nyaa sĩiri, zang ti yi wu ɓi katɔ niizang. Zang ɓɔɔ naa zang zɔ̃ng wu nɛɛ zang nyɔ wu vɔrɔ ɓi nɛɛ yere bang, zang ti nyɔ wu vɔrɔ ɓi nɛɛ yere bang niizang. Ka ruu nɔngkɔ, zang Laa ri mã danggn katɔ, ri ti yaa danggn shinnang ka bii Laa kpang.

¹¹Ka knti vuu keɓe, n zi yɔpɔ jĩngti ɓɔɔ, shing baabii dɔɔli, nwangnɛ tipi. Ta jee ka yuu ziti, naa jaa mɛ̀ɛrɛ́, a ti ráng yee naa sɔkɔ bang.

¹²Tuu naa vuu palɛnang yɔpɔ jĩngti ɓɔɔ tĩng shɔɔnang ɓɛɛ nandon, palɛ vuu nɛɛ mani ka jĩng ɓiɓɛ ka nɔngkɔ. A shing koo nɛɛ zang ɓɔɔ ri ka koo nandon nɛɛ ri bang yɔpɔ jĩngti ɓɔɔ tĩng shɔɔnang, ɓɔɔ zang shing wu nyaa vuu waa bang, a zũng tɔ ɓɛɛ.

¹³Yɔpɔ jĩngti ɓɔɔ doo knti, palɛ vuu ɓɔɔ zang zirɛ zang mã naa ka danggn ɓɛɛ dɔɔli. Shingnɛ waa nwangnɛ lapa a ka tipi, ka jĩng zang piti.

¹⁴Tuu vuu ɓɔɔ zang a wu naa palɛnang ka tĩng yɔpɔ jĩngti ɓɔɔ tĩng shɔɔnang kaɓa, a nwãarɛ zang piti, ɓɔɔ ri nwalɛ ka koo nandon nɛɛ mani. Kɔɔ ri nɛɛ, ri pálɛ́ vuu ɓɔɔ nwang yɔpɔ jĩngti ɓɔɔ tĩng shɔɔnang, ɓɔɔ bɛ̀ɛ́ zang shing wu nyaa vuu waa ka bii nɛɛ yere bang a nwang doo ningkãari ɓɛɛ, ri a wu bannang nɛɛ mani.

¹⁵A zang a yɔpɔ jĩngti ɓɔɔ doo knti kaɓa naa, wu shingnɛ vuu ɓɔɔ zang palɛ nwang yɔpɔ jĩngti ɓɔɔ tĩng shɔɔnang, wu ɔ̃kɔ, tɔ̀ɔ, wu rang yee kati. Zang ti yaa wu nɛɛ, zang ɓɔɔ ri nɛɛ kasɛ kpang nɛɛ ri bang vuu keɓe kpang, wu nyɔkɔ ri vɔrɔ.

¹⁶Yɔpɔ jĩngti ɓɔɔ doo knti ti shingnɛ nɛɛ zang piti, zang bang nɛɛ wujɛ, nɛɛ zang ying, nɛɛ zang ɓɔɔ vuu ka naa ɓarɛ kpang ɓɛɛ, jaafoo, nɛɛ jaa gãa, zang nɛɛ ɓang ri vuu ka nakn kpang, zang ɓang ri ka nyaating ɓarɛ.

¹⁷Zang ɓɔɔ zang nɛɛ ɓang wu vuu keɓe kpang, zang yaa wu, wu hoo vuu kpang, ti mãlɛ́ vuu kpang. Vuu kɔ zang ɓang zang ɓee ɓi nung yɔpɔ jĩngti kaɓa nɛɛ lamba ɓɔɔ wukɔ nwàng kaa naa nung ɓiɓɛ ɓɛɛ.

¹⁸Vuu keɓe, ɓi vuu zũnang. Zang ɓɔɔ nɛɛ zũng katɔ wu zi dĩiri lamba yɔpɔ jĩngti keɓe, ka ruu ɓɔɔ, ɓi lamba shɔnzang ɓɛɛ. Lamba bìí ɓi laa maani dakn mangbete tu laa taati tu mangbete.