Read mumuye Vuu ɓɔɔ zang nwangsɛ Yɔhana 14 Bible Online

Vuu ɓɔɔ zang nwangsɛ Yɔhana 14 - mumuye bible

Vuu ɓɔɔ zang nwangsɛ Yɔhana 14

¹A n shing jĩng, n zi Jaa Mɛ̀ɛrɛ́ Laa shii ka yuu kɔpɔ Siyona. Shɔnzang labang dakn laa maani tu laa ziti tu dɛ̃ɛti ri shii nɛɛ wu. Zang ɓɔɔ zang bee nung Daa ɓiɓɛ tɔ, nɛɛ nung ɓiɓɛ ka wàá nyaating ɓarɛ ɓɛɛ.

²A n tãa yee nwangnɛ lapa naa mii zɛ̃ɛyi ka rang kɔpɔ. Ti kaa nyaa naa shala mii mɛɛyi, a ti tĩngnɛ naa zang ri wáarɛ̀ vũngta.

³Zang kaɓa nandon, ri shii ka tĩng laa nwannang Kpanti Laa, nɛɛ tĩng rɛɛ vuu dɛ̃ɛti ɓɔɔ suru bii ɓarɛ kagn ɓɛɛ, nɛɛ tĩng rɛɛ zang bang bmati tu dɛ̃ɛti kaɓa, ri gaa soo shɔɔ. Zang ɓɔɔ zunung ɓɔɔ wu mantɛ soo kaɓa kagn kpang, ɓi zang labang dakn laa maani tu laa ziti tu dɛ̃ɛti kɔ zunung shɛ̃ɛning. Rikɔ zang ɓɔɔ zang tà yuu ɓarɛ nɛɛ koo ɓɛɛ.

⁴Zang keɓe nandon, ɓi rikɔ zang ɓɔɔ ri palɛ dũndũng nɛɛ zang soro kpang, ri yiti yuu ɓarɛ waasɛ̃ ɓɛɛ. Rikɔ ti dũlu Jaa Mɛ̀ɛrɛ́ ka knti ka nɔng ɓɔɔ wu dàá ɓɛɛ piti. Zang tà yuu ɓarɛ kɔ, nɛɛ teteng rɛɛ shɔnzang, a zang a Laa nɛɛ Jaa Mɛɛrɛ ɓiɓɛ ri.

⁵Ri suu sèé ɓarɛ gngn kpang, vuu shi kpang ɓɔɔ zang kɔɔyi nɛɛ ri palɛ ɓɛɛ, ɓi ti kagn kpang.

⁶A n zi zang nyaa shonang Laa ɓɔɔ ka lapa ɓɛɛ ɓɔɔgn, tãa ka lapa. Atɛ Ruu Tɔ̃ɔ Laa ɓɔɔ di nyaa kpang ɓɛɛ, ɓɔɔ wu naa daa kɔɔrɔ zang ɓɔɔ ri nwang ka koo ɓɛɛ, nɛɛ zɔ̃ng zang piti, nɛɛ nɔng piti ka koo, a ɓɔɔ zang ɓɔɔ ri rangkɛ nyaa ka bm bm ɓɛɛ.

⁷A mɛɛ nyaa nabm kɔɔyi nɛɛ, “Nɔɔ dũng nyaa Laa ta, nɔɔ ti a wu bannang ka ruu ɓɔɔ, diki ɓɔɔ Laa naa jɛ̃ɛ zang piti ruu, a tɔ ɓɛɛ. Ka ruu nɔngkɔ, nɔɔ bang Laa ta, ɓɔɔ wukɔ mãa lapa nɛɛ tipi, nɛɛ waapo nɛɛ sɔlɔng mii nandon ɓɛɛ.”

⁸A zang nyaa shonang Laa ɓɔɔ ka lapa ɓɛɛ, ɓɔɔgn ti a tɔkn ka knti ɓɔɔ tĩng shɔɔnang ɓɛɛ, kɔɔyi nɛɛ, “Shaarɛ tɔ, Gari bang kaɓa, ɓɔɔ zang ɓaa nɛɛ Babila, shaarɛ tɔ, gari ɓɔɔ ɓeleng shing zang tipi ɓɔɔgn ri ɓoo sàa ɓiɓɛ, ɓɔɔ wukɔ ɓi kaa nung sũnang nɛɛ dũndũng ɓiɓɛ ɓɛɛ.”

⁹A zang nyaa shonang Laa ɓɔɔ ka lapa ɓɛɛ, ɓɔɔ daa kaa nɛɛ wukɔ taati ɓɛɛ, arɛ, a mɛɛ nyaa nabm, kɔɔyi nɛɛ, “Zang ɓɔɔ nɛɛ bang yɔpɔ jĩngti kaɓa nɛɛ vuu ɓɔɔ zang palɛ nwang wu kaɓa, nɛɛ ti kasɛ, zang nɛɛ ɓang wu vuu ɓiɓɛ ka nakn kpang, zang ɓang wu ka nyaating.

¹⁰Gnvɔ naa shaa Laa nɛɛ wu. Gnvɔ kaɓa, ɓi naa sàa ɓɔɔ la katɔ, zang tɛ̃ɛ mii kagn kpang ɓɛɛ. A zang naa dang wu jĩng nɛɛ waa ɓɔɔ nwãa dɔɔli, nɛɛ mii takong, ka tĩng rɛɛ zang nyaa shonang Laa ɓɔɔ ri ka lapa ɓɛɛ nɛɛ tĩng Jaa Mɛ̀ɛrɛ́.

¹¹Zĩiri waa ɓɔɔ zang dang ri jĩng kagn shii paa ɓi sasak di nyaa kpang. Zang ɓɔɔ ri nɛɛ bang yɔpɔ jĩngti nɛɛ vuu ɓɔɔ zang palɛ nwang wu, a ri ti kasɛ zang ɓáng ri vuu nung ɓiɓɛ ɓɛɛ, ri ɔ̃sɔ kpang nɛɛ zĩi nɛɛ laagɛ̃ piti.”

¹²Ka ruu nɔngkɔ, zang Laa ri mã danggn katɔ, ri dũng nyaa Laa, ri ti yaa danggn shinnang ka bii Yeesɔ kpang.

¹³A n ti tãa yee ɓɔɔ tɔkn nɛɛ lapa kɔɔyi nɛɛ, “Béeré ruu keɓe, tĩnang tãanang ɓi ɓɔɔ zang ɓɔɔ ri naa vɔlɔ, ka ruu ɓɔɔ ri shing danggn tɔ ka bii Laa ɓɛɛ.” A Suru Laa kasɛ nyaa tɔɔ, “N, niizang, ri tãa tĩnang tɔ. Ri ɔ̃sɔ kaa tɔ nɛɛ shonang bang ɓɔɔ ri palɛ ɓɛɛ, ka ruu ɓɔɔ, tɔ̃ɔ ɓɔɔ shonang ɓarɛ nwàng ri, dũng ri ka knti ɓɛɛ.”

¹⁴A n shing jĩng, n zi sãmbong puru. A zang ɓɔɔ nwàng ka yuu sãmbong kaɓa, nwang Jaa shɔnzang. Kãng lapoo yuu kpanti ɓɔɔ zang palɛ nɛɛ zinariya ɓɛɛ, ka yuu ɓiɓɛ, a yiti jangsi ɓɔɔ wɔng nyaa dɔɔli ɓɛɛ, ka naa ɓiɓɛ.

¹⁵A zang nyaa shonang Laa ɓɔɔ ka lapa ɓɛɛ, nwangnɛ yeti Gãa Laa, rang yee nabm. Kɔɔ zang ɓɔɔ nwang ka yuu sãmbong ɓɛɛ nɛɛ, “Tuu jangsi ɓaaɓɛ ta mɔɔ gaayu vuu shaanang kpaanang, ka ruu ɓɔɔ laa vuu shaanang kpalɛnang a tɔ ɓɛɛ. Vuu shaanang zũng tɔ, gbayi gbayi.”

¹⁶A zang kaɓa ɓɔɔ nwang ka yuu sãmbong tuu jangsi ɓiɓɛ, gɔ̃kɔ ka tipi, a kpaa vuu shaanang nandon.

¹⁷A n zi zang nyaa shonang Laa ɓɔɔ ka lapa ɓɛɛ, ɓɔɔgn nwangnɛ yeti Gãa Laa, yiti jangsi ɓɔɔ wɔng nyaa dɔɔli jong ka naa.

¹⁸A zang nyaa shonang Laa ɓɔɔ ka lapa ɓɛɛ, ɓɔɔgn nwangnɛ nɔng ɓɔɔ zang dɔɔ Laa vuu kagn ɓɛɛ, ɓɔɔ zang a wukɔ naa waa, ka nɔng kaɓa ɓɛɛ. Rang yee nabm kɔɔ zang nyaa shonang Laa ɓɔɔ ka lapa ɓɔɔ yiti jangsi ɓɔɔ wɔng nyaa dɔɔli kaɓa nɛɛ, “Zirɛ shing jangsi ɓaaɓɛ ta, mɔɔ kpang jĩng laa inabi ɓɔɔ ra ka laa ka koo ɓɛɛ, ri zũng tɔ.”

¹⁹Ka ruu nɔngkɔ, zang nyaa shonang Laa ɓɔɔ ka lapa ɓɛɛ kaɓa, gɔ̃ jangsi ɓiɓɛ, a kpang jĩng laa inabi, a vang ka nɔng ɓɔɔ zang naa kãng ri kagn ɓɔɔ nwang kaa naa nɔng ɓɔɔ Laa dang zang jĩng kagn ɓɛɛ.

²⁰Too ɓɔɔ zang kãng mii inabi kagn, ɓi ka yuu knti gari. Ri kãng mii jĩng inabi, a zĩi nwangnɛ nɔngkɔ, zɛ̃ɛyi daa naa nung mɛli laa maani dakn ziti naa mɔɔ shɛ̃ɛ kagn, a mɔɔ ka danggn.