Read mumuye Vuu ɓɔɔ zang nwangsɛ Yɔhana 16 Bible Online

Vuu ɓɔɔ zang nwangsɛ Yɔhana 16 - mumuye bible

Vuu ɓɔɔ zang nwangsɛ Yɔhana 16

¹Ka knti vuu keɓe, n tãa yee a nɛɛ Gãa Laa, mɛɛ nyaa nabm. Kɔɔ zang nyaa shonang Laa ɓɔɔ ri ka lapa ɓɛɛ, ɓɔɔ ri manziti kaɓa nɛɛ, “Nɔɔ daayi zang ɓu wu daa tuu waka manziti ɓɔɔ gnvɔ Laa kagn kaɓa, gbete nɔɔ ɓàarɛ̀ ka koo.”

²Ka ruu nɔngkɔ, zang nyaa shonang Laa ɓɔɔ ka lapa ɓɛɛ, ɓɔɔ tĩng shɔɔnang daayi daa ɓaa kɔnang ɓɔɔ ka yeti waka ɓiɓɛ ka koo. Ɓu doo ɓɔɔ wu ɓaayi hn, nɔɔrɔ bang bang ɓɔɔ kɔng zang dɔɔli, gaayu ɓɔɔ wu yiki zang piti, ɓɔɔ bɛ̀ɛ́ zang ɓang ri vuu yɔpɔ jĩngti ka bii, ɓɔɔ bɛ̀ɛ́ ri bang vuu ɓɔɔ zang palɛ nwang yɔpɔ jĩngti bìí ɓɛɛ.

³A zang nyaa shonang Laa ɓɔɔ ka lapa ɓɛɛ, ɓɔɔ ɓang ɓɔɔ tĩng shɔɔnang naa ɓaa kɔnang ɓɔɔ ka yeti waka ɓiɓɛ ka waapo. A tantɛ raanang naa zĩi zang ɓɔɔ vɔ katɔ ɓɛɛ. Vuu piti ɓɔɔ ka yeti waapo, ɓɔɔ suru bii ɓarɛ kagn ɓɛɛ, ri vɔlɔ nandon.

⁴Zang nyaa shonang Laa ɓɔɔ ka lapa ɓɛɛ, ɓɔɔ daa kaa taati ti arɛ, naa ɓaa kɔnang ɓɔɔ ka yeti waka ɓiɓɛ, ka rang nandon, nɛɛ sɔlɔng mii nandon, a ri raa zĩi jong nandon.

⁵N tãayi, zang nyaa shonang Laa ɓɔɔ ka lapa ɓɛɛ, ɓɔɔ gãng jĩng ka mii kɔɔyi nɛɛ, “Laa ɓɔɔ mɔkɔ shi kpang ka bii kpang gbete ɓɛɛ. Mɔkɔ kãntang keɓe, mɔkɔ nwáng ka tĩng. Mɔɔ palɛ vuu gn dang gbete ka ruu kɔ mɔɔ dɔ̀ng zang ɓee kpang.

⁶Ka ruu ɓɔɔ, zang ri nyɔkɔ zang ɓaaɓɛ nɛɛ rɛɛ zang nyaa shonang ɓaaɓɛ ɓɔɔ ri kɔɔrɔ zang ruu ɓaaɓɛ, a zĩi ɓarɛ tɛ̃ɛ ka tipi ɓɛɛ, a mɔɔ a ri zĩi kãntang keɓe nɛɛ ri ɓooyi. Daa ri tɔ teetee.”

⁷A n tãayi yee nwangnɛ nɔng ɓɔɔ zang dɔ̀ɔ́ Laa vuu kagn ɓɛɛ, kasɛ nyaa nɛɛ, “Niizang, Kpanti Laa ɓɔɔ mɔɔ ɓa zang piti katɔ ɓɛɛ. Mɔɔ ɓaa zang ɓɔɔ palɛ vuu ɓɔɔ niizang ɓɛɛ, mɔɔ ti dɔ̀ng zang ruu ɓaa gn dang gbete kpang.”

⁸Zang nyaa shonang Laa ɓɔɔ ka lapa ɓɛɛ, ɓɔɔ daa kaa dɛ̃ɛti ɓɛɛ, arɛ naa ɓaa kɔnang ɓɔɔ ka yeti waka ɓiɓɛ ka yuu làa. A zang a laa naa, wu shaa zang naa waa.

⁹A shɛ̃ɛnshɛ̃ɛn laa shaarɛ zang kati. Naa ɓɔɔ ri nɛ̀ɛ́ kɔ̃sɔ yeti, ri yaa vuu shi kpang ɓarɛ, ri á Laa bannang. Ri kasɛ kpang, ri rangkɛ ɓarɛ ruu shi kpang kɔ jong, ka nung Laa ɓɔɔ naa vuu palɛnang ɓiɓɛ kagn ka yuu rɛɛ kɔnang keɓe ɓɛɛ.

¹⁰A zang nyaa shonang Laa ɓɔɔ ka lapa ɓɛɛ, ɓɔɔ daa ka maani ɓɛɛ, arɛ naa ɓaa kɔnang ɓɔɔ ka waka ɓiɓɛ ka yuu laa nwannang kpanti, ɓɔɔ yɔpɔ jĩngti kaɓa nwang kagn ɓɛɛ. A nɔng tɔɔnang zuu zang ɓɔɔ wu roo kpanti ka yuu ɓarɛ ɓɛɛ. Zang ri shaa rĩiti ka ruu jĩng ɓɔɔ ri dang ɓɛɛ.

¹¹Ri dãlɛ Laa ɓɔɔ ka lapa ɓɛɛ, ka ruu jĩng ɓɔɔ ri dang ɓɛɛ, nɛɛ nɔɔrɔ ɓɔɔ ka bii ɓarɛ ɓɛɛ. A ri kasɛ kaa takpang ri kɔ̃sɔ yeti ɓarɛ, ri yaa vuu shi kpang ɓarɛ kpang.

¹²A zang nyaa shonang Laa ɓɔɔ ka lapa ɓɛɛ, ɓɔɔ daa ka mangbete ɓɛɛ, arɛ naa ɓaa kɔnang ɓɔɔ ka waka ɓiɓɛ, ka mii rang bang, ɓɔɔ zang ɓaa nɛɛ Yufireti. Mii rang keɓe ɔ̃ɔ nandon, tɔ̀ɔ, wu yàa rɛɛ kpanti ɓɔɔ ri a nɛɛ paa ɓɔɔ laa nwang ɓɛɛ gbalang kati.

¹³A n zi suru shi kpang taati, ɓɔɔ ri nwang vɔ̃kɔ ɓɛɛ. Ri nwangkɛ nɛɛ nyaa sɔkɔ bang, nɛɛ nyaa yɔpɔ jĩngti kaɓa, a ɓɔɔ nɛɛ nyaa zang nyaa shonang Laa ɓɔɔ sèé kaɓa.

¹⁴Ri ɓarɛ, suru shi kpang ɓɔ̀ɔ́ Sheetang. Naa vuu palɛnang ɓarɛ kagn ɓɔɔ ri palɛ vuu ɓɔɔ zang zirɛ zang mã naa ka danggn ɓɛɛ. Ri daarɛ ka bii rɛɛ kpanti ɓɔɔ ka koo nandon, nɛɛ ri kpálɛ́ ri, ri ta sĩiri ka diki bang kaɓa, ɓɔɔ Laa ɓɔɔ ɓa zang piti katɔ, naa tusu zang yuu ɓiɓɛ kagn ɓɛɛ.

¹⁵A Yeesɔ kɔɔyi tɔɔ, “N naa a naa shɔngɓɔ. Tĩnang tãanang ɓi zang ɓɔɔ nwang doo paa, gãng jĩng, hãa fɔ̃ɔrɔ ɓiɓɛ ka bii ɓɛɛ. Ka ruu ɓɔɔ nɛɛ yaa bii bɔ̃bɔ̃rɔ, yusɛ̃ɛ nɛɛ tuu wu ɓɛɛ.”

¹⁶A rɛɛ suru shi kpang kaɓa, ri kpalɛ rɛɛ kpanti ɓɔɔ ka koo nandon, ka nɔng ɓɔɔ zang ɓaa nɛɛ Amagedɔng nɛɛ nyaa zang Yahudi ɓɛɛ.

¹⁷A zang nyaa shonang Laa ɓɔɔ ka lapa ɓɛɛ ɓɔɔ daa ka manziti ɓɛɛ, arɛ ɓaa kɔnang ɓɔɔ ka waka ɓiɓɛ ɓɛɛ, ka jasung waati. A yee nwangnɛ laa nwannang kpanti ka yeti Gãa Laa, mɛɛ nabm kɔɔyi nɛɛ, “Zang hangsɛ vuu piti tɔ.”

¹⁸Shala mangkɛ, a ti mɛɛyi, a tipi ti ruutu gbãng gbãng. Tipi ruutu gngn naa waɓa kpang ɓu doo ɓɔɔ zang ri gaayu nwannang katɔ ka koo ɓɛɛ.

¹⁹Gari bang kaɓa puusu taati, a rɛɛ gari nandon, ɓɔɔ ka tipi piti ka koo ri ti jili. Laa kpaa danggn gari bang kaɓa ɓɔɔ zang ɓaa nɛɛ Babila ɓɛɛ. A á wu waka ɓɔɔ yi nyaa nɛɛ gnvɔ ɓiɓɛ. Jĩng dannang a kaa gari kaɓa, a shing ri, ri dang jĩng, ri hangsɛ naa ɓɔɔ zang ɓoo saa kaa waka ɓɔɔ la katɔ, zang kusu ɓɛɛ.

²⁰Tipi ɓɔɔ mii kiiri nyaa ka teteng ka koo keɓe nandon, ri ningki nɛɛ rɛɛ kɔpɔ piti. Zang zili ri takpang.

²¹Mii a nɛɛ takong bang bang nɛɛ lapa ka yuu shɔnzang. Takong ɓɔɔ ri watɛ ɓɛɛ, ri kpiti naa tari bang. Vuu keɓe shing baabii dɔɔli. Zang ri dãlɛ Laa, ka ruu jĩng ɓɔɔ wu dang ri nɛɛ mii takong keɓe ɓɛɛ.