Read mumuye Vuu ɓɔɔ zang nwangsɛ Yɔhana 17 Bible Online

Vuu ɓɔɔ zang nwangsɛ Yɔhana 17 - mumuye bible

Vuu ɓɔɔ zang nwangsɛ Yɔhana 17

¹Vuu keɓe ɓa tɔ, a ka teteng zang nyaa shonang Laa ɓɔɔ ka lapa ɓɛɛ, ɓɔɔ manziti ɓɔɔ ri yiti waka ka naa ɓɛɛ. Gbete arɛ naa kɔɔ m nɛɛ, “Arɛ, n tusu mɔɔ jĩng ɓɔɔ Laa naa dang jaa soro ɓɔɔ rakɛ wàázaa dɔɔli, ɓɔɔ wukɔ gari ɓɔɔ zang mãa ka nɔng ɓɔɔ mii kagn dɔɔli ɓɛɛ.

²Ɓɔɔ rɛɛ kpanti ɓɔɔ ri ka koo ri palɛ dũndũng nɛɛ wu ɓɛɛ, a zang koo nandon ri ɓoo sàá dũndũng ɓiɓɛ tɔ, sàa si ri kana ɓɛɛ.”

³A Suru Laa a kaa bii mɛɛ, a zang nyaa shonang Laa ɓɔɔ ka lapa ɓɛɛ kaɓa, tuu m daa nɛɛ n ka jĩngti. A n zi jaa soro ka nɔng, nwáng kaa yɔpɔ jĩngti ɓɔɔ ta bii nwɛ̃ɛri ɓɛɛ. Yɔpɔ bìí zang beere nung shi kpang ɓɔɔ zang dãlɛ Laa nɛɛ mani ka bii ɓiɓɛ nandon. Yɔpɔ bìí yuu ɓiɓɛ manziti, a takɛ jee kagn kopi.

⁴Jaa soro kaɓa hãlɛ fɔ̃ɔrɔ nwɛ̃ɛri, ɓɔɔ shili dɔɔli ɓɛɛ. Gbarɛ bii ɓiɓɛ nɛɛ zinariya, nɛɛ rɛɛ tari tɔ̃ɔ ɓɔɔ kɔlɔ katɔ ɓɛɛ, ka zɔ̃ng zɔ̃ng. Yiti juwa ɓɔɔ zang palɛ nɛɛ zinariya ɓɛɛ ka naa. Sãnsãnrãng, nɛɛ dũndũng ɓɔɔ wu palɛ, yi nyaa juwa bii katɔ lɛɛri.

⁵Ka nyaating jaa soro bìí, zang bèe nung ɓɔɔ kagn, zang waasɛ vuu ɓɔɔ nung bìí kɔɔ ɓɛɛ katɔ. Zang bee nɛɛ, “Gari Babila ɓɔɔ bang dɔɔli ɓɛɛ, mɔɔ nwang nàá rɛɛ zang ɓɔɔ rakɛ wàázaa, nɛɛ ɓɔɔ vuu gn bàanang ɓɔɔ ka koo keɓe nandon ɓɛɛ.”

⁶A n zirɛ jaa soro bìí, ɓoo zĩi rɛɛ zang Laa ɓɔɔ zang nyɔkɔ ri vɔrɔ ka ruu ɓɔɔ ri kɔɔyi nɛɛ Yeesɔ kɔ Kpanti ɓarɛ ɓɛɛ, a zĩi ɓarɛ si wu kana. Ɓɔɔ n zi jaa soro kaɓa, n mã naa ka danggn.

⁷Ka ruu nɔngkɔ, zang nyaa shonang Laa ɓɔɔ ka lapa ɓɛɛ kaɓa, hɛ̃ɛ m nɛɛ, “Mɔɔ mã naa ka danggn ka ruu viya? N kaaɓi n nwangsɛ mɔɔ vuu ɓɔɔ mɔɔ zi kpang ka yuu jaa soro kaɓa ɓɛɛ, nɛɛ ɓɔɔ yɔpɔ jĩngti ɓɔɔ tuu wu kaɓa, ɓɔɔ yuu ɓiɓɛ manziti, a takɛ jee kopi ɓa.

⁸Yɔpɔ jĩngti kaɓa bɛ̀ɛ́ ningkãari, kãntang keɓe tɔ̀ɔ́ ningkãari kpang. Naa nwang ditɔ nɛɛ too ɓɔɔ dii kagn kpang kaɓa, wu daa kaa nɔng ɓɔɔ zang daa nyɔ wu vɔrɔ ɓɛɛ. Zang ɓɔɔ ri nwang ka koo ɓɔɔ zang bee nung ɓarɛ ka labeenang ɓɔɔ zang beere nung zang ɓɔɔ ri walɛ suru bii ɓɔɔ waa nyaa kpang, bɛ̀ɛ́ zang mãa koo gn kpang, kpang ɓɛɛ. Ri nɛɛ naa zi yɔpɔ jĩngti bìí tɔ, ri naa mã naa ka danggn. Ka ruu ɓɔɔ, bɛ̀ɛ́ yɔpɔ jĩngti kaɓa ningkãari, a kãntang keɓe tɔ̀ɔ́ ningkãari kpang ɓɛɛ, a ti naa gbãayu ditɔ tɔkn ɓɛɛ.

⁹“Vuu keɓe ɓi zang ɓɔɔ zũng katɔ a ti zi vuu dɔɔli ɓɛɛ zirɛ. Rɛɛ yuu manziti kaɓa, ɓi rɛɛ jaa kɔpɔ manziti ɓɔɔ jaa soro kaɓa nwang kagn ɓɛɛ.

¹⁰Ri ɓarɛ rɛɛ kpanti manziti, kpanti ɓɔɔ maani, ri vɔlɔ tɔ, ɓɔɔ gbete doogn, ɓɔɔ gbete a ditɔ. Nɛɛ a tɔ, roo kpanti diki bee kpang.

¹¹Yɔpɔ jĩngti ɓɔɔ bɛ̀ɛ́ ningkãari kpang ɓɛɛ, wukɔ kaa kpanti ɓɔɔ daa kaa mantaati ɓɛɛ, a ɓi kaa doo teteng rɛɛ kpanti manziti kaɓa kɔ. Bɛɛ daa kaa tɔ, ka nɔng ɓɔɔ zang daa nyɔ wu vɔrɔ gbinggbing ɓɛɛ.

¹²“Rɛɛ jee kopi ɓɔɔ mɔɔ zi ɓɛɛ, rikɔ rɛɛ kpanti kopi, ɓɔɔ zang a ri naa kpanti roonang gn kpang ɓɛɛ. Zang nɛɛ naa a ri naa kpanti roonang tɔ, ri naa roo kpanti nɛɛ yɔpɔ jĩngti kaɓa, làa bee ri kpang.

¹³Rɛɛ kpanti kopi keɓe, rɛ̃rɛnang ɓarɛ gbete, ri naa tuu naa vuu palɛnang nɛɛ bannang ɓarɛ, ri a yɔpɔ jĩngti bìí.

¹⁴Ri naa ta sĩiri nɛɛ Jaa Mɛ̀ɛrɛ́ Laa, a Jaa Mɛ̀ɛrɛ́ naa shaa ri katɔ, ka ruu ɓɔɔ, wukɔ kpanti ka yuu rɛɛ kpanti nandon. Kpanti roonang ɓiɓɛ, ɓa ɓɔɔ zang piti ɓɛɛ. Zang ɓiɓɛ ɓɔɔ wu zɔ̃ngkɔ, a ɓaa ri nyaa katɔ, ɓɔɔ ri dũng wu nɛɛ yeti gbete, ri naa shaa zang jong ka nyaa sĩiri nɛɛ wu.”

¹⁵A zang nyaa shonang Laa ɓɔɔ ka lapa ɓɛɛ kaɓa, kɔɔ m nɛɛ, “Mii ɓɔɔ mɔɔ zi jaa soro ɓɔɔ rakɛ wàázaa dɔɔli nwang ka yuu ɓiɓɛ kaɓa, ɓi zang dɔɔli ɓɔɔ ka tipi piti, ka nɔng piti ka koo, ɓɔɔ ri ti rangkɛ nyaa ka bm bm ɓɛɛ.

¹⁶Rɛɛ jee kopi ɓɔɔ mɔɔ zi kaɓa, nɛɛ yɔpɔ jĩngti, ri naa kàsɛ̀ jaa soro ɓɔɔ rakɛ wàázaa ɓɛɛ takpang. Ri naa talɛ vuu ɓiɓɛ nandon ri yáa wu bii bɔ̃bɔ̃rɔ. Ri naa shaa yɔpɔ bii ɓiɓɛ, ri ti dɔɔ wu nɛɛ waa.

¹⁷Ɓi Laa kɔ shing rɛɛ kpanti kopi kaɓa, rɛ̃rɛnang ɓarɛ wu daa gbete, tɔ̀ɔ, ri palɛ vuu ɓɔɔ wu mang ɓɛɛ kati. Ɓi Laa kɔ shing ri, nɛɛ ri a yɔpɔ jĩngti naa kpanti roonang ɓarɛ, tɔ̀ɔ, vuu piti wu naa nwang kaa naa ɓɔɔ wu kɔɔyi nɛɛ naa nwang ɓɛɛ.

¹⁸“Jaa soro ɓɔɔ mɔɔ zi ɓɛɛ, wukɔ gari bang kaɓa, ɓɔɔ roo kpanti ka yuu rɛɛ kpanti ɓɔɔ ka koo ɓɛɛ.”