Read mumuye Vuu ɓɔɔ zang nwangsɛ Yɔhana 18 Bible Online

Vuu ɓɔɔ zang nwangsɛ Yɔhana 18 - mumuye bible

Vuu ɓɔɔ zang nwangsɛ Yɔhana 18

¹Vuu keɓe naa ɓa tɔ, a n zi zang nyaa shonang Laa ɓɔɔ ka lapa ɓɛɛ, a nɛɛ lapa a ka tipi. Naa vuu palɛnang ɓiɓɛ bang dɔɔli, a bii ɓiɓɛ yakɛ nɔng ka koo nandon.

²Mɛɛ nyaa nɛɛ kaka nabm, kɔɔyi nɛɛ, “Shàarɛ̀ tɔ, Babila gari bang kaɓa, shaarɛ tɔ. Raa nɔng nwannang rɛɛ raanang, nɛɛ nɔng ɓɔɔ rɛɛ suru shi kpang, ɓɔɔ yeti ɓarɛ la dɔɔli, ri kpalɛ zɔɔ kagn ɓɛɛ tɔ. Zɔ̃ng rɛɛ jaaning ɓɔɔ ri baabii dɔɔli, ɓɔɔ zang kasɛ ri kpang ɓɛɛ piti, ri nwang kaa nɔngkɔ.

³Ka ruu ɓɔɔ, bɛ̀ɛ́ zɔ̃ng zang nandon ri ɓooro sàá dũndũng ɓiɓɛ tɔ ɓɛɛ. Rɛɛ kpanti ɓɔɔ ka koo, ri pálɛ̀ dũndũng nɛɛ wu ɓɛɛ. Zang ɓɔɔ ri hooro vuu, ri daa mãlɛ́ ka koo ɓɔɔgn, ri nwang zang ying tɔ. Ka ruu ɓɔɔ, gari kaɓa kasɛ vuu koo dɔɔli ɓɛɛ.”

⁴A n tãa yee ɓɔɔgn nwangnɛ lapa, kɔɔyi nɛɛ, “Nɔɔ ɓɔɔ nɔɔ zang mɛɛ ɓɛɛ, nɔɔ nwang ta, nɔɔ yaa gari kaɓa, tɔ̀ɔ, nɔɔ kpalɛ yuu kaa tɔ̀ɔ́ nɛɛ wu, nɔɔ palɛ vuu shi kpang, kpang. Laa nɛ̀ɛ́ ti dang nɔɔ jĩng nɛɛ ri.

⁵Laa kpaa danggn vuu shi kpang ɓɔɔ ri palɛ ɓɛɛ tɔ, ka ruu ɓɔɔ, shang dɔɔli ɓɛɛ. Pãngsɛ ka yuu zɔɔ, daa lèe lapa naa ka bii.

⁶Nɔɔ pálɛ́ wu vuu doo naa ɓɔɔ wu pálɛ́ zang ɓɛɛ kɔ. Nɔɔ dang wu jĩng, wu ɓa ɓɔɔ wu dang zang katɔ dakn ziti. Juwa ɓɔɔ wu a zang Sàa ɓiɓɛ kagn, nɔɔ tɛ̃ɛ wu saa ɓɔɔ gbangnɛ, ɓa ɓɔɔ ɓiɓɛ katɔ dakn ziti ɓɛɛ. Doo ka wukɔ, nɔɔ a wu, wu ɓooyi.

⁷Naa ɓɔɔ ɓeleng wu a yuu ɓiɓɛ bannang, a ti nwangnɛ tãa tĩnang ɓɛɛ, wu ti dang jĩng ta, wu ti zaa doo nɔngkɔ teetee. Ka ruu ɓɔɔ, kɔɔrɔ yuu ɓiɓɛ nɛɛ, ‘N m kpanti, n m suvɔ kpang. N kaa nyavɔ m kpang dòndòng ɓɛɛ.’ ”

⁸Ka ruu ɓɔɔ, wu kɔɔ nɔngkɔ. Ka diki gbete, jĩng dannang ɓɔɔ bang dɔɔli ɓɔɔ dàa wu katɔ, naa a ka yuu ɓiɓɛ. Kɔnang naa yi wu, naa zaayi, nyɔkɔ naa nyɔ wu, waa ti naa shaa wu. Ka ruu ɓɔɔ, Laa ɓɔɔ wukɔ kpanti, ɓɔɔ ɓa zang piti, wukɔ dɔng wu ruu ɓɛɛ.

⁹Rɛɛ kpanti ɓɔɔ ka koo keɓe, ɓɔɔ bɛ̀ɛ́ ri palɛ dũndũng nɛɛ wu, a ri ti tãa tĩnang nɛɛ wu, ri nɛɛ zi zĩiri waa, ɓɔɔ shaa gari kaɓa tɔ hn, ri naa zaayi ri kaayi.

¹⁰Ri naa shii nɛɛ nɔng beebang, ka ruu ɓɔɔ, ri kaa vɔrɔ jĩng dannang ɓiɓɛ ɓɛɛ, ri kɔɔyi nɛɛ, “Ayìi rang, Babila gari bang kaɓa, ɓɔɔ bɛ̀ɛ́ ɓa gari piti ɓɛɛ, làa gbete zang dang mɔɔ jĩng tɔ, waa shaa mɔɔ tɔ, dɔ̃ɔ gbete.”

¹¹Zang ɓɔɔ ri hooro vuu, ri ti daa mãlɛ́ ka koo ɓɔɔgn, ri ti naa zaa ditɔ, ri kàá wu nyavɔ. Ka ruu ɓɔɔ, zang ɓɔɔ naa hòoró ri vuu ɓarɛ takpang ɓɛɛ.

¹²Ri mãlɛ́ rɛɛ vuu naa rɛɛ zinariya nɛɛ azurufa nɛɛ rɛɛ tari ɓɔɔ shili dɔɔli ɓɛɛ, nɛɛ fɔ̃ɔrɔ liling ɓɔɔ yalɛ yalɛ ɓɛɛ, ka zɔ̃ng zɔ̃ng. Ɓɔɔ ta bii nwɛ̃ɛri, ɓɔɔ naa latɔ̀ɔ́, ɓɔɔ puru. Ɓɔɔ kaa laa ɓɔɔ a sɛ̃ɛ tɔ̃ɔ tɔ̃ɔ ɓɛɛ ka zɔ̃ng zɔ̃ng, nɛɛ rɛɛ vuu ɓɔɔ zang palɛ nɛɛ tãri bɔng ɓɛɛ, ka zɔ̃ng zɔ̃ng. Wee vuu ɓɔɔ zang séè nɛɛ laa ɓɔɔ shaa nyaa dɔɔli ɓɛɛ, nɛɛ vuu ɓɔɔ zang palɛ nɛɛ saka tagula ɓɛɛ. Nɛɛ ɓɔɔ zang palɛ nɛɛ saka waati ɓɛɛ, nɛɛ ɓɔɔ tari ɓɔɔ shì katɔ ɓɛɛ.

¹³Rɛɛ vuu ɓɔɔ a sɛ̃ɛ tɔ̃ɔ ɓɛɛ, naa Kirifa, nɛɛ vuu yaaji. Nɛɛ vuu ɓɔɔ zang dɔɔ ka waa, a sɛ̃ɛ tɔ̃ɔ ɓɛɛ, nɛɛ vuu ɓɔɔ zang ɓaa nɛɛ muru, a ɓɔɔ luuban ɓɛɛ. Nɛɛ mii inabi, nɛɛ nung, nɛɛ zũng ɓɔɔ zang palɛ borodi nɛɛ mani ɓɛɛ, nɛɛ jĩng alakama ɓɔɔ zang nang zũng keɓe nɛɛ mani ɓɛɛ. Nɛɛ rɛɛ napo, nɛɛ mɛ̀ɛrɛ́ nɛɛ gbantang, nɛɛ kɛkɛ ɓɔɔ gbantang gɔ̃ ɓɛɛ, a ɓɔɔ shɔnzang ɓɔɔ zang mãlɛ́ ri, ri nwang kaa jaafoo ɓɛɛ.

¹⁴Zang ɓɔɔ ri mãlɛ́ vuu kaɓa, ri ti kɔɔ wu nɛɛ, “Vuu piti ɓɔɔ mɔɔ shing gn kagn ri dàá tɔ. Vuu ɓɔɔ mɔɔ tãa tĩnang nɛɛ mani, nɛɛ vuu naa ɓaaɓɛ nandon ri dàá tɔ, mɔɔ zi ri takpang.”

¹⁵Zang ɓɔɔ ri mãlɛ́ rɛɛ vuu kaɓa, a ri naa ràa zang ying ɓɛɛ, bii naa kaa ri vɔrɔ dɔɔli, ka ruu jĩng dannang bang ɓɔɔ gari kaɓa dang ɓɛɛ. Ri naa shii nɛɛ nɔng beebang, ri naa zaayi, ri kaa nyavɔ, ri kɔɔyi nɛɛ,

¹⁶“Ayìi rang, gari bang kaɓa, raa vuu gn kɔnang tɔ. Bɛ̀ɛ́ nwang naa jaa soro ɓɔɔ hãlɛ fɔ̃ɔrɔ ka bii tɔ̃ɔ, fɔ̃ɔrɔ ɓɔɔ shili katɔ, ɓɔɔ ta bii puru, a ɓɔɔ nwɛ̃ɛri. Gbarɛ bii nɛɛ rɛɛ vuu ɓɔɔ zang palɛ nɛɛ zinariya nɛɛ rɛɛ tari tɔ̃ɔ tɔ̃ɔ, ɓɔɔ kɔlɔ katɔ ɓɛɛ, ka zɔ̃ng zɔ̃ng.

¹⁷Láa gbete vuu naa ɓiɓɛ zang lasɛ tɔ nandon,” Zang ɓɔɔ ri zaa laana ɓɛɛ, nɛɛ zang ɓɔɔ ri daa zanti nɛɛ laana ɓɛɛ, nɛɛ zang ɓɔɔ ri hooro vuu, ri ti mãlɛ́ ɓɛɛ, a ɓɔɔ zang ɓɔɔ ri palɛ shonang ɓarɛ ka waapo ɓɛɛ. Ri shii nɛɛ nɔng beebang,

¹⁸ri goo nyaa ka lapa nabm, ka ɓɔɔ ri zi zĩiri waa ɓɔɔ shaa gari bìí ɓɛɛ, ri kɔɔyi nɛɛ, “Gari bang ɓɔɔ kagn naa weɓe kpang.”

¹⁹A ri see tapuru, ri vang ka yuu ɓarɛ, ka ɓɔɔ ri zaayi, ri kaa nyavɔ ɓɛɛ. Ri kaa nabm nɛɛ, “Ayii rang, gari bang kaɓa, raa vuu gn kɔnang tɔ. Bɛɛ ɓeleng zang piti ɓɔɔ laana ɓarɛ kagn ka waapo, ri raa zang ying, nɛɛ vuu naa gari kaɓa, laa gbete zang lasɛ wu tɔ.

²⁰Zang ɓɔɔ ri ka lapa ɓɛɛ, ri tãa tĩnang ta, ka ruu ɓɔɔ, gari Babila shaarɛ tɔ ɓɛɛ. Nɔɔ tãa tĩnang jong, rɛɛ zang Laa, nɛɛ rɛɛ zang shonang ɓiɓɛ, nɛɛ rɛɛ zang nyaa shonang ɓiɓɛ, ka ruu ɓɔɔ, Laa dɔng wu ruu tɔ ka ruu vuu shi kpang ɓɔɔ bɛ̀ɛ́ palɛ nɔɔ ɓɛɛ.”

²¹Vuu keɓe ɓa tɔ, a zang nyaa shonang Laa ɓɔɔ ka lapa ɓɛɛ, ɓɔɔ lakɛ dɔɔli ɓɛɛ, arɛ naa tuu ree bang, tasɛ ka waapo, a kɔɔyi nɛɛ, “Zang ɓɔɔ naa tuu Babila gari bang kaɓa ditɔ nɔngkɔ, wu lu nabm ka tipi. Zang naa zi gari Babila takpang.

²²Zang naa paasɛ vũngta ɓɔɔ zang tarɛ, tãanang tɔ̀ɔ́ yeti ɓiɓɛ kpang, nɛɛ soo gaarɛnang nɛɛ leere jeenang, a ɓɔɔ gboo jeenang. Zang ti paasɛ zang ɓɔɔ ri palɛ zɔ̃ng shonang kiya zinang tɔ̀ɔ́ yeti gari bìí kpang. Zang ti paasɛ nyaa ree tãanang tɔ̀ɔ́ yeti ɓiɓɛ kpang.

²³Waa zàáng sɔɔ ti yakɛ yeti ɓiɓɛ takpang, zang ti paasɛ yèé zang ɓɔɔ gee soro, nɛɛ ɓɔ̀ɔ́ sinyɛ tãanang takpang, ka yeti ɓiɓɛ kpang. Ɓeleng zang ɓɔɔ mɔɔ hooro vuu ɓarɛ rikɔ zang bang ka koo zang ti nwãarɛ zɔ̃ng zang ɓɔɔ ka koo, nɛɛ nvaa ɓaaɓɛ kɔ.

²⁴Zang ti ĩ́i zĩi rɛɛ zang nyaa shonang Laa nɛɛ ɓɔɔ rɛɛ zang Laa nɛɛ ɓɔɔ zang piti ɓɔɔ zang nyɔkɔ ri vɔrɔ ka koo ɓɛɛ, ka gari kaɓa kɔ.”