Read mumuye Vuu ɓɔɔ zang nwangsɛ Yɔhana 19 Bible Online

Vuu ɓɔɔ zang nwangsɛ Yɔhana 19 - mumuye bible

Vuu ɓɔɔ zang nwangsɛ Yɔhana 19

¹Vuu keɓe, ɓa tɔ, a n tãa vuu naa yee zang, ri kpalɛ ka lapa gaagaa, ri goo nyaa nabm, ri gaa soo nɛɛ, “Haliluyaa, ɓi Laa ɓuru kɔ tà yuu ɓuru. Bannang, nɛɛ naa vuu palɛnang ɓi ɓɔɔ ɓiɓɛ.

²Ɓi zang ɓɔɔ palɛ vuu ɓɔɔ niizang ɓɛɛ, ti dɔ̀ng zang ruu ɓi gn dang gbete kpang. Dɔ̀ng jaa soro ɓɔɔ rakɛ wàázaa dɔɔli kaɓa, ɓɔɔ lasɛ koo nɛɛ dũndũng ɓiɓɛ ɓɛɛ, ruu tɔ. Ti wàa zang shonang ɓiɓɛ pãng zĩi ɓarɛ tɔ ka yuu ɓiɓɛ.”

³A ri mɛɛ nyaa tɔkn dɔ̃ɔ gbete nɛɛ, “Haliluyaa, zĩiri ɓɔɔ yupaa nɛɛ bii ɓiɓɛ daa ka lapa nɔngkɔ sasak dòndòng.”

⁴A rɛɛ zang bang bmati tu dɛ̃ɛti kaɓa, nɛɛ vuu dɛ̃ɛti ɓɔɔ suru bii ɓarɛ kagn kaɓa, ri tang jong ka tĩng Laa, ɓɔɔ nwang ka yuu laa nwannang kpanti ɓɛɛ. Ri bang wu, ri kɔɔyi nɛɛ, “Nɔngkɔ. Haliluyaa.”

⁵A n tãa yee nwangnɛ laa nwannang Laa kɔɔyi nɛɛ, “Nɔɔ zang ɓɔɔ nɔɔ pàlɛ́ Laa shonang ɓɔɔ nɔɔ a wu bannang, zang bang nɛɛ wujɛ nandon, nɔɔ dɔɔ Laa ɓuru.”

⁶A n tãa vuu naa yee zang ɓɔɔ ri kpalɛ zɔɔ gaagaa ɓɛɛ. Yee ɓarɛ kaa nyaa naa mii zɛ̃ɛ ka rang kɔpɔ, a ɓɔɔ ti naa shala ɓɔɔ mɛɛ nabm ɓɛɛ. Yee bii kɔɔyi nɛɛ, “Haliluyaa, Laa ɓɔɔ wukɔ kpanti ɓuru, wukɔ ɓa zang piti, gaayu kpanti roonang tɔ.

⁷Ruu dɔ̀ɔ nɔɔ bii, ruu tãa tĩnang, ruu dɔɔ bannang ɓiɓɛ, ka ruu ɓɔɔ, laa ɓɔɔ Jaa Mɛ̀ɛrɛ́ gee soro ɓiɓɛ kagn a tɔ, a sinyɛ ɓiɓɛ ti kpalɛ bii tɔ ɓɛɛ.

⁸Zang wu a sinyɛ fɔ̃ɔrɔ liling ɓɔɔ tɔ̃ɔ ɓɛɛ, ɓɔɔ kɔlɔ katɔ, a bii rĩiti kagn kpang ɓɛɛ, wu hãayi.” Ka ruu ɓɔɔ, fɔ̃ɔrɔ liling ɓɔɔ tɔ̃ɔ kaɓa, wukɔ ɓi shonang tɔ̃ɔ ɓɔɔ rɛɛ zang Laa ri palɛ ɓɛɛ.

⁹A zang nyaa shonang Laa ɓɔɔ ka lapa ɓɛɛ kaɓa, kɔɔ m nɛɛ, “Bée ruu keɓe, Zang ɓɔɔ zang gáarɛ̀ ri, nɛɛ ri naa shaa kn sinyɛ Jaa Mɛ̀ɛrɛ́ ri tãa tĩnang ɓarɛ tɔ.” A ti kɔɔ m nɛɛ, “Ruu keɓe nwangnɛ, nɛɛ nyaa Laa nɛɛ yuu ɓiɓɛ.”

¹⁰A n tang nɛɛ gutu ka tĩng ɓiɓɛ, n tɔɔ n bang wu kaa tɔ, a kɔɔ m tɔɔ, “Mɔ́ɔ palɛ vuu keɓe kpang tingkiring, ruu ɓuru zang shonang Laa nɛɛ mɔɔ, nɛɛ rɛɛ ɓaazung ɓɔɔ ri shing danggn tɔ, ka ruu ɓɔɔ niizang ɓɔɔ Yeesɔ tùsù ri ɓɛɛ. Báng ɓaa Laa.” Ka ruu ɓɔɔ, ruu niizang ɓɔɔ Yeesɔ nwangsɛ ruu, rɛɛ zang nyaa shonang Laa, ri walɛ ruu ɓɔɔ ri kɔɔrɔ zang ka wukɔ ɓɛɛ.

¹¹Vuu keɓe ɓa tɔ, a n zi nyaa gãa puu ka lapa. Gbantang puru nwangnɛ. Zang ɓaa nung zang ɓɔɔ vang kagn nɛɛ, “Zang ɓɔɔ palɛ vuu ɓɔɔ wu kɔɔ ɓɛɛ katɔ, ɓɛɛ.” A ɓɔɔ, “Zang ɓɔɔ kɔɔ ɓi ruu ɓɔɔ niizang diki diki,” ɓɛɛ. Palɛ ɓi vuu tɔ̃ɔ, ka ɓɔɔ wu jɛ̃ɛ zang ruu, nɛɛ ɓɔɔ wu ta sĩiri ɓɛɛ.

¹²Jĩng ɓiɓɛ yakɛ nɔng naa nyɛlɛ waa. Ti kãngtɛ lapoo yuu kpanti ka yuu ɓiɓɛ gaagaa. Nung ɓiɓɛ ɓɔɔ kagn zang beeyi, ɓɔɔ zang ɓɔɔ zi dĩiri ɓiɓɛ kpang, ɓi wukɔ zirɛ gbete ɓɛɛ.

¹³Hãa fɔ̃ɔrɔ ɓɔɔ zang hãa ka zĩi ɓɛɛ ka bii. Nung ɓɔɔ zang ɓaa wu nɛɛ mani ɓi, “Ruu Laa”

¹⁴Zang sĩiri tanang ɓɔɔ ri ka lapa ɓɛɛ nandon, ri vánglɛ́ jong ka gbantang puru, a ri hãlɛ fɔ̃ɔrɔ liling puru ɓɔɔ bii rĩiti lee kagn kpang ɓɛɛ. Ri dũng wu.

¹⁵Yere bang ɓɔɔ wɔng nyaa dɔɔli nwangnɛ nyaa ɓiɓɛ. Yere ɓɔɔ wu kúlù zang ɓɔɔ ri shing jĩng nɛɛ wu kpang ɓɛɛ, nɛɛ mani nandon. Naa roo kpanti ka yuu ɓarɛ nɛɛ laa naa yitinang kpanti, ɓɔɔ zang palɛ nɛɛ saka ɓɛɛ. Ti naa kãng jaa inabi ka too ɓɔɔ zang kãng kagn, ɓɔɔ ɓi wukɔ gnvɔ bang Laa, Laa ɓɔɔ ɓa zang piti katɔ ɓɛɛ.

¹⁶Ka fɔ̃ɔrɔ ɓiɓɛ, nɛɛ doo sãng ɓiɓɛ, zang bee nung ɓiɓɛ kagn nɛɛ, “Kpanti ɓɔɔ ka yuu rɛɛ kpanti nandon ɓɛɛ, kpanti roonang ɓiɓɛ ɓa ɓɔɔ kpanti piti.”

¹⁷A n zi zang nyaa shonang Laa ɓɔɔ ka lapa ɓɛɛ, ɓɔɔ shíi ka yuu laa. A ɓaa nyaa ka rɛɛ jaaning ɓɔɔ ri tãarɛ ka lapa ɓɛɛ nabm. Kɔɔ ri nɛɛ, “Nɔɔ arɛ nɔɔ shaa vuu shaanang bang ɓɔɔ Laa atɛ ɓɛɛ.

¹⁸Nɔɔ arɛ nɔɔ shaarɛ yɔpɔ rɛɛ kpanti nɛɛ ɓɔ̀ɔ́ rɛɛ zang bang rɛɛ zang sĩiri, nɛɛ ɓɔ̀ɔ́ zang ɓɔɔ ri lakɛ dɔɔli ɓɛɛ, nɛɛ ɓɔ̀ɔ́ rɛɛ gbantang, nɛɛ ɓɔ̀ɔ́ zang piti, rɛɛ jaafoo nɛɛ rɛɛ jaa gãa, ɓɔ̀ɔ́ rɛɛ zang bang nɛɛ wujɛ.”

¹⁹A n zi yɔpɔ jĩngti kaɓa nɛɛ rɛɛ kpanti ɓɔɔ ka koo nɛɛ zang sĩiri tanang ɓarɛ. Ri kpalɛ zɔɔ tɔ nɛɛ ri ta kaa sĩiri nɛɛ zang ɓɔɔ vang gbantang puru ɓɛɛ nɛɛ zang sĩiri ɓiɓɛ.

²⁰A zang yi yɔpɔ jĩngti kaɓa ka nyaa sĩiri, nɛɛ yɔɔ ɓɔɔ suu sèé nɛɛ wu kɔ̀ɔ́ zang Ruu Laa ɓɛɛ. Ɓɔɔ palɛ vuu ɓɔɔ zang zirɛ zang mã naa ka danggn ka tĩng yɔpɔ jĩngti bìí ɓɛɛ. (Nɔɔ nwãarɛ zang nɛɛ mani, a zang ɓang zang vuu yɔpɔ jĩngti ka nyaating. A zang ɓɔɔ ri bang vuu ɓɔɔ zang palɛ nwang wu ɓɛɛ). Zang ziti keɓe zang tasɛ ri ningkãari ka too waa kaɓa ɓɔɔ shaayi, tari ɓɔɔ shaa waa katɔ ti kagn ɓɛɛ.

²¹A zang ɓɔɔ vang ka yuu gbantang nyɔkɔ zang nimbang kaa nɛɛ yere bang ɓɔɔ nwangnɛ nyaa ɓiɓɛ ɓɛɛ, a rɛɛ jaaning nandon ri arɛ ri shaa yɔpɔ ɓarɛ, ri puuyi.