Read mumuye Vuu ɓɔɔ zang nwangsɛ Yɔhana 20 Bible Online

Vuu ɓɔɔ zang nwangsɛ Yɔhana 20 - mumuye bible

Vuu ɓɔɔ zang nwangsɛ Yɔhana 20

¹A n zi zang nyaa shonang Laa ɓɔɔ ka lapa ɓɛɛ, a nɛɛ lapa. Yiti shɔ̌ng saka ɓɔɔ zang puu nyaa too ɓɔɔ dii kagn kpang nɛɛ mani ɓɛɛ, nɛɛ sáa yɔ̀ng bang ka naa.

²Yi sɔkɔ bang kaɓa, ɓɔɔ nwang doo ka tĩng tɛ̃ɛ tɛ̃ɛ ɓɛɛ, ɓɔɔ zang ɓaa wu nɛɛ Sheetang, kpanti suru shi kpang ɓɛɛ. A mã wu nɛɛ sáa yɔ̀ng bang nɛɛ wu nwang ka nɔngkɔ saa labang gbete.

³A tasɛ wu ka too ɓɔɔ dii kagn kpang ɓɛɛ, mã nyaa nɛɛ shɔ̌ng saka tɔ̃ɔ tɔ̃ɔ, a ɓang lang, ɓɔɔ vuu kpanti kagn ɓɛɛ, ka nyaa too. Tɔ̀ɔ, wu nwãarɛ zang rɛɛ tipi ɓɔɔ ka koo kpang, saa labang gbete wu ɓarɛ. Nɛɛ ɓa tɔ, zang naa yaa wu naa ditɔ tɔkɔlɔng.

⁴A n ti zi rɛɛ laa nwannang kpanti gaagaa, zang ɓɔɔ zang a ri naa nɛɛ ri jɛ̃ɛ zang ruu ri nwalɛ kagn. N ti zi suru bii rɛɛ zang ɓɔɔ zang dɔlɔ ri yuu, ka ruu ɓɔɔ ri shing danggn tɔ, ka vuu ɓɔɔ Yeesɔ tusu ri ɓɛɛ. A ka ruu ɓɔɔ, ri kɔɔ zang Ruu Laa ɓɛɛ. Zang ɓɔɔ ri bang yɔpɔ jĩngti kpàng, ri ti bang vuu ɓɔɔ zang palɛ nwang wu katɔ kpàng ɓɛɛ. Ri ti kasɛ kpang nɛɛ zang ɓang ri vuu ɓiɓɛ ka nyaa tĩng kpang, zang ti ɓang ri ka naa kpang. Ri nwáng tɔkn nɛɛ sàa ningkãari, ri roo kpanti nɛɛ Yeesɔ Kirisi saa labang gbete. Wee paa yunang nɛɛ sàa ɓɔɔ tĩng shɔɔnang kɔ.

⁵Zang ɓɔɔ yaa knti ɓɔɔ ri doo ka sàa ɓɛɛ, ri yupaa ɓarɛ kaa knti, ɓɔɔ sáa labang gbete ɓa tɔ ɓɛɛ.

⁶Tĩnang ɓi ɓɔ̀ɔ́ zang ɓɔɔ ri yupaa jong ka paa yunang ɓɔɔ tĩng shɔɔnang keɓe. Ri ɓarɛ ti zang ɓɔɔ shi kpang ka bii ɓarɛ kpang ɓɛɛ. Vɔrɔ ɓɔɔ zang naa vɔ tɔkn, ɓɔɔ daa kaa doo ziti naa palɛ ri vuu ɓɔɔ ɓarɛ kpang. Ri naa nwang ɓarɛ kaa zang ɓɔɔ ri dɔɔ Laa nɛɛ Kirisi vuu, ka Gãa Laa ɓɛɛ. A ri naa roo kpanti nɛɛ wu, saa labang gbete.

⁷Saa labang gbete nɛɛ ɓa tɔ, zang naa yaa Sheetang naa nɛɛ sãa ɓɔɔ zang mã wu kagn ɓɛɛ.

⁸Naa daarɛ ka rɛɛ tipi ɓɔɔ ka koo keɓe, ka nɔng ɓɔɔ koo di nyaa ɓɛɛ nandon, nwãarɛ zang. Rɛɛ tipi ɓɔɔ zang ɓaa ri nɛɛ Gog nɛɛ Maagɔng ɓɛɛ. Naa kpalɛ ri ka nɔng gbete nɛɛ ri ta sĩiri. Zang ɓɔɔ ri naa kpalɛ ɓɛɛ, ri shang dɔɔli naa seseele ka nyaa waapo.

⁹Ri tantɛ ka dalɛ koo nandon, ri kiiri nɔng ɓɔɔ zang Laa ri kpalɛ zɔɔ kagn ɓɛɛ, ka teteng nɛɛ gari Laa ɓɔɔ Laa kasɛ wu katɔ ɓɛɛ. A waa a nɛɛ lapa, naa shaa zang Sheetang keɓe nandon.

¹⁰A kpanti suru shi kpang ɓɔɔ nwãarɛ ri ɓɛɛ, zang tasɛ wu ka too waa kaɓa ɓɔɔ tari ɓɔɔ shaa waa katɔ kagn ɓɛɛ. Nɔng ɓɔɔ bɛ̀ɛ́ zang tásɛ́ rɛɛ yɔpɔ jĩngti kagn, nɛɛ zang ɓɔɔ suu sèé nɛɛ wu zang nyaa shonang Laa ɓɛɛ. Ri nwang ka nɔngkɔ, ri dang jĩng nɛɛ zĩi nɛɛ laagɛ̃ gbinggbing.

¹¹A n zi láa ɓɔɔ kpanti nwáng kagn bang puru, a n ti zi zang nwàng ka yuu ɓiɓɛ. Tipi nɛɛ lapa ri yuku kana, ri yaa tĩng ɓiɓɛ zang zi ri takpang.

¹²N ti zi zang ɓɔɔ ri vɔlɔ tɔ ɓɛɛ. Zang bang nɛɛ wujɛ, ri shiiri ka tĩng laa nwannang kpanti kaɓa. A zang atɛ rɛɛ labeenang ɓɔɔ, zang púlù ka tĩng ɓarɛ. Zang ti puu labeenang ɓɔɔ zang beere nung zang ɓɔɔ ri walɛ suru bii ɓɔɔ waa nyaa kpang tɔ kagn ɓɛɛ. A zang jɛ̃ɛ zang ɓɔɔ ri vɔlɔ tɔ ruu ka doo shonang ɓɔɔ ri palɛ ɓɛɛ, ɓɔɔ zang beere ka rɛɛ labeenang kaɓa ɓɛɛ.

¹³A waapo nwangsɛ rɛɛ vɔrɔ zang ɓɔɔ ri vɔlɔ ka yeti ɓiɓɛ ɓɛɛ. A vɔrɔ nɛɛ koo suru zang ɓɔɔ ri vɔlɔ tɔ ɓɛɛ, ri nwangsɛ vɔrɔ ɓarɛ jong, a zang jɛ̃ɛ ri ruu ka doo shonang ɓɔɔ ri palɛ ɓɛɛ.

¹⁴A zang tuu rɛɛ vɔrɔ nɛɛ koo suru zang ɓɔɔ ri vɔlɔ tɔ ɓɛɛ zang tasɛ ri ka too waa. Too waa kaɓa, wukɔ vɔrɔ ɓɔɔ daa kaa doo ziti ɓɛɛ.

¹⁵A zang piti ɓɔɔ zang nɛɛ ĩi nung ɓiɓɛ, zang bee ka yeti labeenang ɓɔɔ zang beere nung zang ɓɔɔ ri walɛ suru bii ɓɔɔ waa nyaa kpang tɔ, kagn kpang, zang tasɛ wu ka too waa kaɓa kɔ.