Read mumuye Vuu ɓɔɔ zang nwangsɛ Yɔhana 22 Bible Online

Vuu ɓɔɔ zang nwangsɛ Yɔhana 22 - mumuye bible

Vuu ɓɔɔ zang nwangsɛ Yɔhana 22

¹Zang nyaa shonang Laa ɓɔɔ ka lapa ɓɛɛ kaɓa, ti tusu m rang mii, ɓɔɔ a zang suru bii ɓɔɔ waa nyaa kpang. Mii ɓiɓɛ kɔlɔ katɔ naa vĩilaa. Nwangnɛ laa nwannang kpanti Laa, nɛɛ ɓɔɔ Jaa Mɛ̀ɛrɛ́.

²Zɛ̃ɛyi tɛɛ teteng gbabang ɓɔɔ ka yeti gari bìí ɓɛɛ. Láa ɓɔɔ a zang suru bii ɓɔɔ waa nyaa kpang ɓɛɛ, takɛ ka nyaa rang keɓe, ka zingzing. Ri ra jaa ka shala shala, ka saa gbete jaa ɓɔɔ ri ra ɓɛɛ ka zɔ̃ng zɔ̃ng kopi tu ziti. Gɔpɔ laa bìí ɓi gãnang, vàlɛ́ zang ɓɔɔ ri ka nɔng piti piti ka koo, kɔnang ɓarɛ katɔ.

³Vuu ɓɔɔ Laa ku wu nyaa ka bii, nwàng gari kaɓa kpang. Láa nwannang kpanti ɓɔ̀ɔ́ Laa, nɛɛ ɓɔ̀ɔ́ Jaa Mɛ̀ɛrɛ́ ɓi ka nɔngkɔ, a zang ɓiɓɛ ri bang wu ka nɔngkɔ.

⁴Ri naa zi waa nyaating Laa, zang ti bee nung ɓiɓɛ ka nyaating ɓarɛ.

⁵Nɔng zĩi ɓi ka nɔng kaɓa kpang. Ruu zang gari kaɓa hãa ɓi kagn nɛɛ waa zàáng sɔ̀ɔ nɛɛ làa tɔkn kpang, ka ruu ɓɔɔ, kpanti Laa nɛɛ yuu ɓiɓɛ wukɔ naa yakɛ ri nɔng ɓɛɛ. Ri naa roo kpanti jong gbinggbing.

⁶A zang nyaa shonang Laa ɓɔɔ ka lapa ɓɛɛ kaɓa, kɔɔ m nɛɛ, “Rɛɛ vuu keɓe, ri daa ɓɔɔ zang shing gn kagn ɓɛɛ katɔ, a ti ruu ɓɔɔ niizang kɔ nwani. Kpanti Laa ɓɔɔ a rɛɛ zang nyaa shonang ɓiɓɛ naa, ri kɔɔ zang ruu ɓiɓɛ ɓɛɛ, shong zang nyaa shonang ɓiɓɛ ɓɔɔ ka lapa ɓɛɛ, nɛɛ wu naa tusu rɛɛ zang ɓɔɔ palɛ wu shonang ɓɛɛ, vuu ɓɔɔ bɛ̀ɛ́ zang palɛ kaa tɔ ɓɛɛ.”

⁷Yeesɔ kɔ̀ɔyi nɛɛ “Nɔɔ zirɛ, diki bee kpang, n a kaa tɔ. Tĩnang naa nwang ɓɔ̀ɔ́ zang piti ɓɔɔ dũng ruu ɓɔɔ zang bee ka labeenang keɓe ɓɛɛ, ka ruu ɓɔɔ, a nɛɛ bii Laa ɓɛɛ.”

⁸Nkɔ Yɔhana, n tãa vuu keɓe nandon, n ti zili nɛɛ jĩng mɛɛ. Ɓɔɔ n tãa vuu keɓe tɔ, n ti zili ri tɔ, n tang nɛɛ gutu ka tĩng zang nyaa shonang Laa ɓɔɔ ka lapa ɓɛɛ, ɓɔɔ tusu m rɛɛ vuu keɓe ɓɛɛ. N tɔɔ, n báng wu,

⁹a kɔɔ m nɛɛ, “Mɔɔ palɛ vuu keɓe kpang tingkiring. Ruu ɓuru zang shonang Laa nɛɛ mɔɔ, naa rɛɛ ɓaazung ɓɔɔ ri zang nyaa shonang Laa ɓɛɛ, a ɓɔɔ zang kaɓa piti, ɓɔɔ ri dũng ruu ɓɔɔ zang bee ka labeenang keɓe ɓɛɛ. Bang ɓaa Laa.”

¹⁰A ti kɔɔ m nɛɛ, “Ruu ɓɔɔ a nɛɛ bii Laa kɔ, zang bee ka labeenang keɓe ɓee, mɔɔ waasɛ zang kpang. Ka ruu ɓɔɔ, laa ɓɔɔ vuu keɓe ri palɛ kagn, a naabm tɔ ɓɛɛ.

¹¹Zang ɓɔɔ palɛ vuu shi kpang, wu yaa palɛnang kpang, zang ɓɔɔ palɛ vuu sãnsãnrãng, wu yaa palɛnang kpang. Ɓɔɔ zang ɓɔɔ zang tɔ̃ɔ ka tĩng Laa ɓɛɛ, wu yi tĩng ɓi nɛɛ tɔ̃ɔ palɛnang. Zang ɓɔɔ ɓi ti zang Laa, wu yaa Laa dũnnang kpang.”

¹²Yeesɔ kɔɔyi nɛɛ, “Nɔɔ zirɛ, diki bee kpang. N a kaa tɔ. N naa atɛ vuu ɓɔɔ n a zang waati ɓɛɛ ka naa ning, n a zang ɓu ka doo shonang ɓɔɔ wu palɛ ɓɛɛ.

¹³Nkɔ Alafa, nkɔ Omɛga, ɓɔɔ tĩng shɔɔnang nɛɛ ɓɔɔ waa nyaa knti ɓɛɛ, ɓɔɔ gaa vuu piti yuu, nɛɛ ɓɔɔ di ri nyaa ɓɛɛ.”

¹⁴Tĩnang naa nwang ɓi ɓɔ̀ɔ́ zang kaɓa, ɓɔɔ ri sɔ̀ɔ́ fɔ̃ɔrɔ, tu kalang kalang ɓɛɛ. Zang naa yaa rikɔ, ri shɛ̃ɛ nɛɛ nyaa gãa gari kaɓa, ri daa yeti gari. Ri ti shaa jaa laa, ɓɔɔ a zang suru bii ɓɔɔ waa nyaa kpang ɓɛɛ.

¹⁵Zang ɓɔɔ ri palɛ vuu shi kpang, nɛɛ rɛɛ nvaa, nɛɛ zang ɓɔɔ ri palɛ dũndũng, nɛɛ zang ɓɔɔ ri nyɔkɔ zang vɔrɔ, nɛɛ zang ɓɔɔ ri bang vaka, a zang piti ɓɔɔ ri suru sèé, ɓɔɔ ri ti tãa tĩnnang sèé suunang katɔ ɓɛɛ, ri naa nwang ɓarɛ ka yuu knti gari bìí, ri daa yeti ɓiɓɛ kpang.

¹⁶Yeesɔ ti kɔɔyi nɛɛ, “Nkɔ Yeesɔ, n shong zang nyaa shonang mɛɛ ɓɔɔ ka lapa ɓɛɛ tɔ, ka nɔng manɛ nɛɛ wu kɔɔ nɔɔ vuu keɓe, ka rɛɛ gãa Laa ɓɔɔ zang ɓɔɔ ri dũng Laa ri kpalɛ zɔɔ kagn ɓɛɛ. N m zɔ̃ng zang kpanti Dawuda. Nkɔ ti sang ɓɔɔ yakɛ nɔng nɛɛ yuu gãndi ɓɛɛ.”

¹⁷Suru Laa nɛɛ sinyɛ Jaa Mɛɛrɛ, ri kɔɔyi nɛɛ, “Arɛ” Zang piti ɓɔɔ nɛɛ tãa ruu keɓe tɔ, wu kɔɔ jong nɛɛ, “Arɛ” Zang ɓɔɔ sutu nɛɛ maa wu, wu arɛ, zang ɓɔɔ nɛɛ kasɛ katɔ, wu naa zã mii ɓɔɔ a zang suru bii ɓɔɔ waa nyaa kpang waati wu ɓooyi.

¹⁸N shaarɛ zang piti ɓɔɔ tãa ruu ɓɔɔ a nɛɛ bii Laa kɔ zang bee ka labeenang keɓe ɓee nyaa, zang ɓɔɔ nɛɛ gisi vuu ɓɔɔ kagn, Laa naa tuu kɔnang ɓɔɔ zang bee vuu ka yuu ɓarɛ ka labeenang keɓe, naa gisi wu ka yuu jĩng ɓɔɔ wu naa dang ɓɛɛ.

¹⁹Zang ɓɔɔ nɛɛ ti zɔ̃ng vuu ɓɔɔ ka ruu ɓɔɔ a nɛɛ bii Laa, ɓɔɔ ka labeenang keɓe, Laa ti naa yáa wu, wu shaa jĩng laa ɓɔɔ a zang suru bii ɓɔɔ waa nyaa kpang, kpang, ti daa yeti gari Laa kaɓa kpang. Wee rɛɛ vuu keɓe ɓɔɔ zang bee vuu ka yuu ɓarɛ ka labeenang keɓe ɓɛɛ kɔ.

²⁰Yeesɔ ɓɔɔ kasɛ tɔ, nɛɛ vuu keɓe, ri niizang ɓɛɛ, wukɔ kɔɔyi nɛɛ, “Niizang, diki bee kpang, n a kaa tɔ.” Nɔngkɔ. A ta kpanti Yeesɔ.

²¹N gaayi, Kpanti Yeesɔ wu pàlɛ̀ zang Laa piti tɔ̃ɔ. Nɔngkɔ.