Read mumuye Vuu ɓɔɔ zang nwangsɛ Yɔhana 3 Bible Online

Vuu ɓɔɔ zang nwangsɛ Yɔhana 3 - mumuye bible

Vuu ɓɔɔ zang nwangsɛ Yɔhana 3

¹Zang kaɓa kɔɔ m tɔkn nɛɛ, “Bèe zang nyaa shonang Laa ɓɔɔ ka lapa ɓɔɔ gãng jĩng ka zang Laa ɓɔɔ ri ka gari Sadisu ɓɛɛ ruu keɓe, mɔɔ kɔɔ wu nɛɛ, Wee ruu ɓɔɔ nwang nɛɛ nyaa zang ɓɔɔ yiti rɛɛ Suru Laa manziti nɛɛ sang manziti ka naa ɓɛɛ. N zi shonang ɓɔɔ nɔɔ palɛ ɓɛɛ tɔ. Zang zi nɔɔ naa nɔɔ ningkãari, a ɓeekpang nɔɔ vɔlɔ manɛ katɔ.

²Nɔɔ yupaa, nɔɔ tá bii kagn, nɔɔ yì suru bii ɓɔɔ yaa doogn tɔkɔlɔng ɓɛɛ naa kagn, tɔ̀ɔ, nɔɔ vɔ kaa tɔ̀ɔ́ dɔ̃ɔ gbete kpang. N zirɛ shonang manɛ daa gň teetee ka tĩng Laa mɛɛ kpang.

³Ka ruu nɔngkɔ, danggn wu ning nɔɔ vuu ɓɔɔ nɔɔ tãayi, a nɔɔ ti tarɛ ɓɛɛ kpang. Nɔɔ yiti katɔ, nɔɔ ti kɔ̃sɔ yeti manɛ. Naa nɔɔ yupaa kpang, n a ditɔ naa shɔngɓɔ, a nɔɔ zi laa ɓɔɔ n a kagn yuu manɛ kpang.

⁴A zang ɓɔɔ kaa gn teteng manɛ, ka Sadisu ka nɔngkɔ, ɓɔɔ ri tɔ̀ɔ fɔ̃ɔrɔ ɓarɛ kpang ɓɛɛ. Zang kaɓa ri naa hã̀lɛ́ fɔ̃ɔrɔ puru ri rakɛ nɛɛ n, ka ruu ɓɔɔ, nwannang ɓarɛ daa naa tɔ ɓɛɛ.

⁵Zang piti ɓɔɔ nɛɛ ɓa vuu gãsɛnang yuu, zang naa hãa wu fɔ̃ɔrɔ puru, n àlɛ̀ nung ɓiɓɛ ka labeenang ɓɔɔ zang beere nung zang ɓɔɔ ri walɛ suru bii ɓɔɔ waa nyaa kpang ɓɛɛ kpang. N naa kɔ̀ɔ́ ka tĩng Daa mɛɛ nɛɛ rɛɛ zang nyaa shonang ɓiɓɛ ɓɔɔ ri ka lapa ɓɛɛ, nɛɛ wu ɓi ɓɔɔ mɛɛ.

⁶Zang ɓɔɔ shoo ɓiɓɛ kagn wu ɓaayi wu tãa vuu ɓɔɔ Suru Laa kɔɔ zang ɓɔɔ ri dũng Laa ɓɛɛ.”

⁷A kɔɔ m tɔkn nɛɛ, “Bèe zang nyaa shonang Laa ɓɔɔ ka lapa ɓɔɔ gãng jĩng ka zang Laa ɓɔɔ ri ka gari Filadifiya ɓɛɛ ruu keɓe, mɔɔ kɔɔ wu nɛɛ: Wee ruu ɓɔɔ nwang nɛɛ nyaa zang ɓɔɔ shi kpang ɓi ka bii ɓiɓɛ kpang, zang ɓɔɔ wu ɓi niizang ɓɛɛ. Wukɔ yiti shɔng saka nyaa gãa ɓɔɔ bɛ̀ɛ́ Dawuda yiti ɓɛɛ. Nɛɛ puu nyaa gãa tɔ, zang ɓɔɔ zunung kunang kagn kpang, nɛɛ ti ku tɔ, zang ɓɔɔ zunung puunang kagn kpang.

⁸N zi shonang ɓɔɔ nɔɔ palɛ ɓɛɛ tɔ. Nɔɔ zirɛ, n puu nɔɔ nyaa gãa tɔ, ɓɔɔ zang ɓɔɔ zunung kunang kpang ɓɛɛ. N zi tɔ kaka manɛ kagn dɔɔli kpang, a nɔɔ dũng nyaa mɛɛ doo nɛɛ mani, nɔɔ ti laa nyaa kpang nɛɛ nɔɔ zi nung mɛɛ kpang, kpang.

⁹Ɓɔɔ zang ɓɔɔ ri dũng Sheetang kaɓa, ɓɔɔ ri suu sèé nɛɛ ri zang Yahudi ɓa, n naa shing zang sèé kaɓa, ri arɛ, ri tang nɛɛ gutu ka tĩng manɛ. Ri zi kati nɛɛ n kasɛ nɔɔ katɔ.

¹⁰Nɔɔ dũng ruu mɛɛ ɓɔɔ n kɔ̀ɔ nɔɔ nɛɛ nɔɔ mã danggn ɓɛɛ tɔ, ka ruu nɔngkɔ, n naa shingnɛ, nɔ́ɔ wɔ ka jĩng dannang ɓɔɔ a kaa tɔ ka koo piti ɓɔɔ zang gãsɛ zang ɓɔɔ ri nwang ka koo nɛɛ mani ɓɛɛ.

¹¹N gbãayu katɔ pati. Nɔɔ yiti vuu ɓɔɔ ka naa manɛ waasɛ̃, tɔ̀ɔ, zang ɓɔɔ nwãarɛ nɔɔ, wu ta vuu ɓɔɔ Laa kasɛ nɛɛ wu a nɔɔ ɓɛɛ kpang.

¹²Zang ɓɔɔ nɛɛ ɓa vuu gãsɛnang yuu, naa nwáng naa lajàa ɓɔɔ zang di sãa Gãa Laa nɛɛ mani ɓɛɛ. Ri yaa Gãa Laa takpang. N bee nung Laa mɛɛ, ka bii ɓarɛ, nɛɛ nung nɔng nwannang Laa mɛɛ, nɔng ɓɔɔ zang ɓaa nɛɛ Urushalima ɓɔɔ shɔɔ ɓɔɔ shooro nɛɛ lapa nɛɛ nɔng Laa mɛɛ ɓɛɛ. N ti bee nung mɛɛ ɓɔɔ shɔɔ jong ka bìí ɓarɛ.

¹³Zang ɓɔɔ shoo ɓiɓɛ nɛɛ kagn wu ɓaayi wu tãa vuu ɓɔɔ Suru Laa kɔɔ zang ɓɔɔ ri dũng Laa ɓɛɛ.”

¹⁴A zang kaɓa kɔɔ tɔkn nɛɛ, “Bèe zang nyaa shonang Laa ɓɔɔ ka lapa ɓɔɔ gãng jĩng ka zang Laa ɓɔɔ ri ka gari Lawodikiya ɓɛɛ ruu keɓe, mɔɔ kɔɔ wu nɛɛ: Wee ruu ɓɔɔ nwang nɛɛ nyaa zang ɓɔɔ zang ɓaa wu nɛɛ, Wu nwang ta nɔngkɔ ɓɛɛ. Zang ɓɔɔ kɔ̀ɔ́ ɓi ruu ɓɔɔ niizang diki diki, ɓɔɔ ti palɛ vuu ɓɔɔ wu kɔɔ ɓɛɛ katɔ ɓɛɛ. Laa ti mã́arɛ̀ vuu piti nɛɛ bii ɓiɓɛ kɔ.

¹⁵N zi shonang ɓɔɔ nɔɔ palɛ ɓɛɛ tɔ. Nɔɔ nwãa katɔ kpang, nɔɔ ti valɛ katɔ kpang. Nɔɔ nɛɛ ti nwãa katɔ, kɔ nɔɔ nɛɛ valɛ katɔ.

¹⁶Wee nɔɔ nwãa lulupu waati ɓee, n vang nɔɔ katɔ nɛɛ yeti nyaa mɛɛ.

¹⁷Wee nɔɔ kɔɔ tɔ nɛɛ nɔɔ manɛ wujɛ ying, nɛɛ vuu naa manɛ kagn, rang vuu ɓɔɔ kpaa nɔɔ kpang ɓee. A nɔɔ zi kpang vuu ɓi ka naa manɛ kpang, zang vuu gn kɔnang. Nɔɔ nwang naa zang ɓɔɔ vuu ka naa ɓarɛ kpang ɓɔɔ ri bii bɔ̃bɔ̃rɔ ɓɛɛ. Nɔɔ nwang naa zang ɓɔɔ jĩng zuu ri katɔ ɓɛɛ.

¹⁸Ka ruu nɔngkɔ, n kɔɔ nɔɔ, nɔɔ arɛ nɔ́ɔ hoo zɔ̃ng zinariya ɓɔɔ zang dɔɔ nɛɛ waa nɛɛ, tɔ̀ɔ, bii ɓiɓɛ wu turɛ wu nwang kaa tɔ̃ɔ ɓɛɛ, tɔ̀ɔ, nɔ́ɔ nwang kaa zang ying ɓɔɔ niizang ɓɛɛ. Nɔɔ ti arɛ nɔɔ hooro fɔ̃ɔrɔ puru nɔ́ɔ hãayi, tɔ̀ɔ, bii bɔ̃bɔ̃rɔ manɛ wu shing kaa tɔ̀ɔ́ yusɛ̃ɛ wu tuu nɔɔ kpang. Nɔɔ hoo gãnang ɓɔɔ zang tɛ̃̀ɛ́ nɔɔ ka jĩng ɓɛɛ, tɔ̀ɔ, nɔ́ɔ zi nɔng kati.

¹⁹Zang ɓɔɔ n kasɛ ri katɔ, n mangkɛ rikɔ, n ti gɔ̃ ri shoo. Ka ruu nɔngkɔ, nɔɔ ta bii ta kagn, nɔɔ yaa vuu shi kpang, nɔɔ dũng m kaa nɛɛ yeti gbete.

²⁰Nɔɔ zirɛ, n shii ka nyaa gãa, n waa nyaa gãa. Zang ɓɔɔ nɛɛ tãa yee mɛɛ, nɛɛ puu nyaa gãa, n shɛ̃ɛ ka yeti gãa ɓiɓɛ. Ruu shaa vuu shaanang nɛɛ zɔɔ nɔng gbete.

²¹Zang ɓɔɔ nɛɛ shii gbãng gbãng, nɛɛ ɓa yuu vuu gãsɛnang, n kasɛ tɔ, wu naa nwang nɛɛ n, ka laa kpanti roonang mɛɛ. Naa ɓɔɔ n ɓa yuu vuu gãsɛnang ka tĩng, n naa nwàng nɛɛ Daa mɛɛ ka laa kpanti roonang ɓiɓɛ ɓɛɛ.

²²Zang ɓɔɔ shoo ɓiɓɛ nɛɛ kagn, wu ɓaayi wu tãa vuu ɓɔɔ Suru Laa kɔɔ rɛɛ zang ɓɔɔ ri dũng Laa ɓɛɛ.”