Read mumuye Vuu ɓɔɔ zang nwangsɛ Yɔhana 4 Bible Online

Vuu ɓɔɔ zang nwangsɛ Yɔhana 4 - mumuye bible

Vuu ɓɔɔ zang nwangsɛ Yɔhana 4

¹Ka knti rɛɛ vuu keɓe, n shing jĩng, a n zirɛ nyaa gãa puu ka lapa. A n tãa yee naa gboo, ɓɔɔ ɓaasi rang m yee ɓɛɛ, ɓaa m nyaa kɔɔyi nɛɛ, “A ka lapa ka nihn, tɔ̀ɔ, n tusu mɔɔ vuu ɓɔɔ naa palɛ kaa nɛɛ knti ɓɛɛ.”

²Nyaa kɔ dòó naa ɓee, Suru Laa a ka bii mɛɛ. Ka lapa ka nɔng kaɓa, n zi láa nwannang kpanti, a zang ɓɔɔ nwang ka yuu ɓiɓɛ.

³Zang ɓɔɔ nwang ka yuu láa nwannang kpanti kaɓa, kɔlɔ katɔ naa rɛɛ tari ɓɔɔ kɔlɔ, ɓɔɔ zang palɛ nɛɛ Jasifa nɛɛ kaneliya ɓɛɛ. Sɔkɔ mii ti lurɛ kiiri laa nwannang kpanti ka teteng. Sɔkɔ bìí ta bii naa tari ɓɔɔ zang ɓaa nɛɛ Emɛra ɓɛɛ.

⁴Láa nwannang kpanti ɓɔɔ ri ti kagn bmati tu dɛ̃ɛti, ri kiiri laa nwannang kpanti ɓɔɔ gbete keɓe nyaa ka teteng. Zang bang, ri bmati tu dɛ̃ɛti ri nwalɛ ka yuu rɛɛ laa kaɓa, zang ɓu hãa fɔ̃ɔrɔ puru wu ti kãng lapoo kpanti ɓɔɔ zang palɛ nɛɛ zinariya ɓɛɛ ka yuu.

⁵Ka nɔng laa kpanti kaɓa, shala mangkɛ a ti mɛ̀ɛrɛ́. A n ti zi waa zàáng sɔɔ manziti yàkɛ̀ nɔng gbayi gbayi ka tĩng laa nwannang kpanti kaɓa. Rɛɛ waa zàáng sɔɔ manziti kaɓa rikɔ rɛɛ Suru Laa ɓɔɔ manziti ɓɛɛ.

⁶Ka tĩng laa nwannang kpanti kaɓa, n ti zi vuu ɓɔɔ nwàng naa mii waapo kɔlɔ katɔ puru naa vĩilaa. Vuu dɛ̃ɛti ɓɔɔ suru bii ɓarɛ kagn ri shiiri ka nɔng laa nwannang kpanti kaɓa, ri kiiri laa nyaa ka teteng, ka nakn ziti, ka nagang ziti. Ri takɛ jĩng dɔɔli nɛɛ bii piti piti, ɓɔɔ ka tĩng, ɓɔɔ ka knti.

⁷Vuu ɓɔɔ tĩng shɔɔnang nwang zing, a ɓɔɔ ɓang wu nwang guu napo, a ɓɔɔ ɓang weɓe, waa nyaating ɓiɓɛ, nwang ɓɔɔ shɔnzang, a ɓɔɔ gɔ̀ɔ nyaa nwang ɓi kaa gangong ɓɔɔ tãa katɔ ɓɛɛ.

⁸Vuu dɛ̃ɛti ɓɔɔ suru bii kagn keɓe, vuu ɓu ta nasãng mangbete, bii ɓarɛ ɓi jĩng kɔ shɛ̃ɛning, ka dakn nɛɛ yeti piti. Ri yaa soo gáanang kpang, nɛɛ zĩi nɛɛ laagɛ̃, ri gaa soo nɛɛ, “Kpanti Laa ɓɔɔ mɔkɔ kpanti ka yuu vuu piti ɓɛɛ, shi kpang ɓi kagn bii ɓaaɓɛ kpang Mɔkɔ nwáng ɓaa ningkãari dòo ka tĩng tɛ̃ɛ tɛ̃ɛ, mɔɔ ti ɓaa ningkãari kãntang keɓe, mɔkɔ ti naa gbãayu tɔkn ka koo keɓe.”

⁹Vuu dɛ̃ɛti ɓɔɔ suru bii ɓarɛ kagn keɓe, ri nɛɛ dɔ̀ɔ zang ɓɔɔ nwàng ka yuu laa nwannang kpanti ɓɔɔ nwáng ɓi ningkãari dòndòng, ri nɛɛ ti a wu bannang, ri nɛɛ zã̀a wu tɔ naa weɓe,

¹⁰rɛɛ zang bang bmati tu dɛ̃ɛti kaɓa, ri tang zang ɓɔɔ nwàng ka laa kpanti ɓɔɔ nwáng ɓi ningkãari dòndòng kaɓa nɛɛ gutu, ri bang wu. Ri ti tu lapoo ɓɔɔ ri kãng ka yuu, ɓɔɔ zang palɛ nɛɛ zinariya ɓɛɛ, ri shing ka tipi ka tĩng zang kaɓa, ri ti gàá wu soo nɛɛ,

¹¹“Laa ɓɔɔ mɔkɔ kpanti ɓuru ɓɛɛ, mɔkɔ daa naa ɓɔɔ zang bang mɔɔ, zang dɔɔ mɔɔ, a naa vuu palɛnang piti ka naa ɓaaɓɛ kɔ. Mɔkɔ mã́arɛ̀ vuu piti ka tĩng tɛ̃ɛ tɛ̃ɛ, a mɔkɔ ti kasɛ nɛɛ ri nwalɛ naa weɓe, a mɔɔ mã́arɛ̀ ri kati.”