Read mumuye Vuu ɓɔɔ zang nwangsɛ Yɔhana 6 Bible Online

Vuu ɓɔɔ zang nwangsɛ Yɔhana 6 - mumuye bible

Vuu ɓɔɔ zang nwangsɛ Yɔhana 6

¹A n zirɛ Jaa Mɛ̀ɛrɛ́ Laa, tã́a lang ɓɔɔ tĩng shɔɔnang, a n tãayi vuu gbete ka teteng vuu dɛ̃ɛti ɓɔɔ suru bii ɓarɛ kagn kaɓa, kɔɔyi, yee ɓiɓɛ naa shala mɛɛyi nɛɛ, “Arɛ.”

²N shing jĩng tɔkn a n zi gbantang puru a kana. Zang ɓɔɔ vang ka dakn gbantang kaɓa yiti taka ka naa, a zang kãng wu lapoo yuu kpanti ɓɔɔ zang palɛ nɛɛ zinariya ka yuu. Árɛ, mɔɔ kɔɔ nɛɛ zang ɓɔɔ shaarɛ zang ka nyaa sĩiri diki diki ɓɛɛ, a daayi nɛɛ tɔ̀ɔ wu daa shaa zang tɔkn ka nɔng sĩiri.

³A ɓɔɔ wu tãa lang ɓɔɔ ɓang doo ɓɔɔ tĩng shɔɔnang, n tãayi vuu ɓɔɔ ɓang doo ɓɔɔ tĩng shɔɔnang ka teteng vuu dɛ̃ɛti kaɓa, ɓɔɔ suru bii ɓarɛ kagn ɓɛɛ, ɓaa nyaa nɛɛ, “Arɛ.”

⁴A gbantang ɓɔ̀ɔ́ gn nwɛ̃ɛri nwangnɛ. Zang ɓɔɔ vang ka dakn ɓiɓɛ, zang a wu naa wu shingnɛ zang koo ri nwàng tɔ̀ɔ́ ka nyaa zɔɔ kpang, tɔ̀ɔ, zang ri nyɔkɔ zɔɔ vɔrɔ kati. A zang a wu yere bang ka naa.

⁵A Jaa Mɛ̀ɛrɛ́ Laa tãa lang ɓɔɔ daa kaa taati. A n ti tãa yee vuu gbete ka teteng vuu dɛ̃ɛti ɓɔɔ suru bii ɓarɛ kagn kaɓa daa kaa taati, ɓaa nyaa nɛɛ, “Arɛ.” N shing jĩng tɔkn, n zi gbantang vĩiri nwangnɛ. Zang ɓɔɔ vang ka dakn ɓiɓɛ, yiti vuu ɓɔɔ zang ma vuu nɛɛ mani ɓɛɛ.

⁶N tãa yee mɔɔ kɔɔ nɛɛ nwangnɛ teteng rɛɛ vuu dɛ̃ɛti kaɓa, ɓɔɔ suru bii ɓarɛ kagn ɓɛɛ kɔɔyi nɛɛ, “Zang túu saka shonang ɓɔɔ zang palɛ ka diki gbete zang hoo zee waka gbete. Zang ti tuu saka shonang ɓɔɔ zang palɛ ka diki gbete zang hoo nyɔngkɔ waka taati. Nɔ́ɔ lasɛ nung kpang, nɔ́ɔ ti lasɛ mii inabi kpang.”

⁷A tãa lang ɓɔɔ tɔkn daa kaa dɛ̃ɛti, á n tãa yee vuu ɓɔɔ waa nyaa knti ka teteng rɛɛ vuu dɛ̃ɛti ɓɔɔ suru bii ɓarɛ kagn kaɓa, ɓaa nyaa nɛɛ, “Arɛ.”

⁸N shing jĩng tɔkn, a n zi gbantang bii shànkalàng. Zang ɓɔɔ vang ka dakn ɓiɓɛ zang ɓaa wu nɛɛ vɔrɔ. A zang ɓɔɔ zang ɓaa wu nɛɛ koo rɛɛ suru zang ɓɔɔ ri vɔlɔ tɔ ɓɛɛ, dũng wu ka knti naabm. A zang a ri naa nɛɛ ri roo kpanti ka koo dang gbete, naa zang basɛ koo keɓe nɔng dɛ̃ɛti ɓɛɛ. Nɛɛ ri nyɔ̀kɔ̀ zang ɓɔɔ ri ka nɔng kaɓa vɔrɔ nɛɛ yere bang, a ɓɔɔ nɛɛ nyɔkɔ bang. Ɓɔɔ nɛɛ kɔnang, nɛɛ ri shing ɓɔɔ, yɔpɔ kpaasi ɓɔɔ shaa varɛ dɔɔli, ɓɔɔ ri ka koo keɓe, ri nyɔkɔ zang.

⁹Ɓɔɔ tãa lang ɓɔɔ daa kaa maani ɓɛɛ, n zili suru bii zang ɓɔɔ zang nyɔkɔ ri vɔrɔ ka ruu ɓɔɔ ri kɔɔrɔ zang Ruu Laa, a ri ti kɔɔ ruu niizang ka yuu danggn ɓɔɔ ri shing ɓɛɛ. N zi suru bii ɓarɛ ka dii nɔng ɓɔɔ zang dɔɔ Laa vuu kagn ɓɛɛ.

¹⁰A ri mɛɛ nyaa nabm nɛɛ, “Laa ɓɔɔ mɔkɔ kpanti ɓɛɛ, shi kpang ka bii ɓaaɓɛ kpang. Mɔkɔ kɔɔ ruu ɓɔɔ niizang ɓɛɛ, ruu nwáng diki nɛya ka nihn, tɔ̀ɔ, mɔɔ dɔng zang koo ɓɔɔ ri nyɔkɔ rùu ruu, mɔɔ waa ruu pãng wiya?”

¹¹A zang a zang ɓu ka teteng ɓarɛ fɔ̃ɔrɔ puru. A zang kɔɔ ri nɛɛ, ri gã ka gbongkarɛ tɔkɔlɔng, ka ruu ɓɔɔ, ri ɓee nyaa gn kpang ɓɛɛ. Rɛɛ ɓeezung ɓarɛ ɓɔɔ ri dũng dòo Laa kɔ ɓɔɔ zang koo naa nyɔkɔ ri vɔrɔ ditɔ jong, naa ɓɔɔ ɓeleng zang nyɔkɔ nɔɔ vɔrɔ ɓɛɛ.

¹²A ɓɔɔ Jaa Mɛɛrɛ tãa lang ɓɔɔ daa kaa mangbete, n zirɛ tipi ruutu gbãng gbãng, a làa risi kaa vĩiri kɔngkɔng naa fɔ̃ɔrɔ vĩiri ɓɔɔ zang palɛ nɛɛ suuyuu ɓɛɛ, a shala raa kaa nwɛ̃ɛri naa zĩi.

¹³Sang ri shili nɛɛ lapa ka tipi naa ɓɔɔ jasung pũngku rãayi, kpàng gbãngko sĩiri ɓɔɔ ra doo knti ka tipi ɓɛɛ.

¹⁴Lapa leng naa ɓɔɔ zang leng siri ɓɛɛ, a yaa nɔng, rɛɛ kɔpɔ nandon, nɛɛ tipi ɓɔɔ mii kiiri nyaa ka teteng ɓɛɛ, ri ti yaa nɔng ɓɔɔ bɛ̀ɛ́ ri kagn ɓɛɛ.

¹⁵A zang piti, rɛɛ kpanti nɛɛ rɛɛ zang bang, nɛɛ rɛɛ, zang bang sɔɔja, rɛɛ zang ying, nɛɛ rɛɛ zang ɓɔɔ naa vuu palɛnang ɓarɛ kagn ɓɛɛ, nɛɛ rɛɛ zang ɓɔɔ nandon rɛɛ jaafoo nɛɛ rɛɛ jaa gãa, ri yuu nandon, ri daa waa ka yeng puru, a ɓɔɔ ka teteng rɛɛ tari bang ka kɔpɔ.

¹⁶Ri ɓaa rɛɛ kɔpɔ nyaa nɛɛ tari bang nɛɛ, “Nɔɔ watɛ ta ka yuu ɓuru, nɔɔ waasɛ ruu, tɔ̀ɔ, zang ɓɔɔ nwang ka laa nwannang kpanti kaɓa, wu zi ruu kaa takpang, Ruu ti wɔrɛ, Jaa Mɛ̀ɛrɛ́ Laa wu dang ruu jĩng kaa takpang.

¹⁷Ka ruu ɓɔɔ, laa ɓɔɔ gnvɔ ɓarɛ tusu bii kagn, a tɔ ɓɛɛ. Wi zunung ɓɔɔ wu shii ka tĩng ɓarɛ wiya?”