Read nande Enzũko 11 Bible Online

Enzũko 11 - nande bible

Enzũko 11

¹Ekihugo kyosĩ mokyabya na mũbũge muguma nʼerisobola liguma.

²Neryo mokyabya omugulu bagenda eluhande lwʼeyo eryuba likasira mobabana erirungu omo kihugo kyʼeSĩnarĩ neryo mobĩkalaho.

³Neryo mobabwirana bati, Mwase, tubumbe amatafalĩ, tũhĩsayego ndeke. Neryo mobabya nʼamatafalĩ omo mwanya wʼamabwe, nʼeribumba omo mwanya wʼeswakara.

⁴Neryo bati, Mwase, tũyĩhĩmbĩre omũyĩ, nʼenyũmba nyirinyiri, omutwe wayo ahĩke elubula, neryo tuyiyirire erĩna tukasyapanza-panzirwa oko bugali bwʼekihugo kyosĩ.

⁵Neryo Omwami Mukulu mwandagala erĩrebya omũyĩ oyo nʼenyũmba nyiri, eyo abandu bahĩmba.

⁶Neryo Omwami Mukulu mwabũga ati, Lebaya, ni kihanda kiguma, nʼabosĩ bawite mũbũge muguma nʼekĩ kyo bakatsũka erikola. Neryo lino sihali kindu kikandĩsyakakĩryabo erikola ebyo banzĩre.

⁷Mwase, twandagale, tuhindule omũbũge wabo, ibatatoka erĩowana mũbũge.

⁸Neryo Omwami Mukulu mwapanzabo erĩlũaho erigenda oko bugali bwʼekihugo kyosĩ. Neryo mobaleka erĩhĩmba omũyĩ oyo.

⁹Kyaleka omũyĩ oyo iniahulwa mo Babelĩ, kusangwa Omwami Mukulu mwahinduliraho omũbũge wʼekihugo kyosĩ. Nʼerĩlũaho Omwami Mukulu mwapanzirabo oko bugali bwʼekihugo kyosĩ.

¹⁰Esĩ sye syondengo sya Semũ. Semũ abya wʼemyaka erĩgana, neryo mwabuta Arĩpakĩsadĩ, emyaka ĩbĩrĩ enyũma wʼerigunga.

¹¹Neryo Semũ mwabyaho enyũma wʼeributa Arĩpakĩsadĩ emyaka magana atanu, neryo mwabuta abandi bagala nʼabali.

¹²Neryo Arĩpakĩsadĩ mwabyaho emyaka makũmĩ asatu nʼeyĩtanu, neryo mwabuta Sela.

¹³Neryo Arĩpakĩsadĩ mwabyaho emyaka magana ani nʼeyĩsatu abibuta Sela; neryo mwabuta bagala nʼabali.

¹⁴Sela mwabyaho emyaka makũmĩ asatu, neryo mwabuta Eberĩ.

¹⁵Neryo Sela mwabyaho emyaka magana ani nʼeyĩsatu, abibuta Eberĩ, neryo mwabuta abandi bagala nʼabali.

¹⁶Eberĩ mwabyaho emyaka makũmĩ asatu nʼĩnĩ, neryo mwabuta Pelegĩ.

¹⁷Neryo Eberĩ mwabyaho emyaka magana ani nʼamakũmĩ asatu, abibuta Pelegĩ, mwabuta abagala nʼabali.

¹⁸Pelegĩ mwabyaho emyaka makũmĩ asatu, neryo mwabuta Reũ.

¹⁹Neryo Pelegĩ, mwabyaho emyaka magana abiri nʼomwenda abibuta Reũ, mwabuta abagala nʼabali.

²⁰Neryo Reũ mwabyaho emyaka makũmĩ asatu nʼeyĩbĩrĩ, neryo mwabuta Serũgũ.

²¹Neryo Reũ mwabyaho emyaka magana abiri nʼeyirinda, abibuta Serũgũ, mwabuta abagala nʼabali.

²²Neryo Serũgũ mwabyaho emyaka makũmĩ asatu, neryo mwabuta Nahorĩ.

²³Neryo Serũgũ mwabyaho emyaka magana abiri, abibuta Nahorĩ, mwabuta abagala nʼabali.

²⁴Neryo Nahorĩ mwabyaho emyaka makũmĩ abiri nʼomwenda neryo mwabuta Tera.

²⁵Neryo Nahorĩ mwabyaho emyaka erĩgana liguma nʼerĩkũmĩ nʼomwenda, abibuta Tera, neryo mwabuta abagala nʼabali.

²⁶Neryo Tera mwabyaho emyaka makũmĩ alinda, neryo mwabuta Abramu, Nahorĩ, na Haranĩ.

²⁷Esĩ ni ndengo sya Tera. Tera mwabuta Abramu, Nahorĩ na Haranĩ. Neryo Haranĩ mwabuta Lotĩ.

²⁸Neryo Haranĩ mwahola embere sya tata wuwe Tera omo kihugo abutirawamo eŨrĩ yʼeKaldea.

²⁹Neryo Abramu na Nahorĩ mobahĩkya abakalĩ erĩna lyʼomũkalĩ wa Abramu lyabya Saraĩ. Erĩna lyʼomũkalĩ wa Nahorĩ lyabya Mĩlka, mwali wa Haranĩ. Nĩkwa Haranĩ abya ĩse wa Mĩlka, na Ĩsĩka.

³⁰Neryo Saraĩ abya mugumba, siabya na mwana.

³¹Neryo Tera mwĩmya Abramu mugala wuwe, na Lotĩ omwitsikulu wuwe mugala wa Haranĩ, na Saraĩ mwalĩana wuwe, omũkalĩ wa Abramu mugala wuwe. Neryo mobahuluka haguma nabo erĩlũa eŨrĩ wʼAbanya Kaldea eriya omo kihugo kyʼeKanana. Neryo mobahĩka eHaranĩ, neryo mobĩkalaho.

³²Neryo ebiro bya Tera byabya emyaka magana abiri nʼeyĩtanu. Neryo Tera mwaholera eHaranĩ.