Read nande Enzũko 12 Bible Online

Enzũko 12 - nande bible

Enzũko 12

¹Neryo Omwami Mukulu mwabũgana Abramu ati, Ũlũe omo kihugo kyawe, nʼoko kĩtũnga kyawe, nʼomo nyũmba ya tata wawe, eriya oko kihugo ekyo nasyakũkangya.

²Nage nasyakuyira mo kihanda kinene, nasyakutsumula, nʼeriyira erĩna lyawe mwʼĩnene, nawe ubye mũyĩsa.

³Nage nasyatsumula abakakutsumula, nʼoyukakutsuma nasyamutsuma. Omwisi syawe ebihanda byosĩ byʼekihugo ĩngye Nyamuhanga nasyatsumulabyo.

⁴Neryo Abramu mwagenda, ngoko Mwami Mukulu amubwira, neryo Lotĩ mwagenda haguma naye, neryo Abramu abya wʼemyaka makũmĩ alinda nʼĩtanu omugulu alũa eHaranĩ.

⁵Neryo Abramu mwĩmya Saraĩ omũkalĩ wuwe, na Lotĩ omwana wa mugala wabo, nʼebindu byabo byosĩ ebyo bayibanira, nʼabandu abo babana eHaranĩ, mobahuluka eriya omo kihugo kyʼeKanana, kandi mobahĩka omo kihugo kyʼeKanana.

⁶Neryo Abramu mwalaba omo kihugo erĩhĩka ahakahulawa mo Sekemũ, oko muti More. Omunya Kanana abya omo kihugo oko mugulu oyo.

⁷Neryo Omwami Mukulu mwahulukira Abramu, mwabũga ati, Oko lubuto lwawe nasyahabo ekihugo ekĩ. Neryo mwahĩmbaho ekiherero oko Mwami Mukulu, oyo wamuhulukako.

⁸Neryo mwalũayo mwaya oko kitwa ebwanga bwʼendata wʼeBetelĩ, mwahanda ehema yiwe, eBetelĩ iyiri oko luhande lwʼeyĩkwa, nʼeAĩ oko luhande lwʼendata. Nʼaho mwahĩmbĩra Omwami Mukulu yʼekiherero, neryo mwayibirikirira erĩna lyʼOmwami Mukulu,

⁹Neryo Abramu mwĩmya olugendo, mwalola eluhande lwʼelutambi.

¹⁰Neryo enzala moyabya omo kihugo ekyo. Abramu mwandagalira eMĩsĩrĩ mwabungirayo kusangwa enzala moyakala omo kihugo.

¹¹Neryo omugulu ahĩka hakũhĩ nʼeriingira eMĩsĩrĩ mwabwira Saraĩ mũkalĩwe ati, Lebaya, lino nyĩnasĩ kʼuli mũkalĩ mubuya erilolwako,

¹²neryo omugulu Abanya Mĩsĩrĩ basyakulolako, basyabũga bati, Oyũ nĩ mũkalĩwe, neryo basyanyĩta, nawe basyakũlamya iwabyaho.

¹³Ngakusaba nyiti ũbũge uti uli mwali wetu, nʼomwatsi wage ĩnĩowana busana nawe, nʼekĩrĩmũ kyage ikyabyaho busana nawe.

¹⁴Neryo omugulu Abramu ahĩka eMĩsĩrĩ, Abanya Mĩsĩrĩ mobalangira omũkalĩ kwʼabya mubuya kũndũ.

¹⁵Neryo abakama ba Farao mobamulolako mobamũtsũtsĩra Farao nʼomũkalĩ mwatwalwa omo nyũmba ya Farao.

¹⁶Naye mwakolera Abramu yo ndeke busana naye. Naye abya nʼesyombũlĩ, nʼesyonde, nʼesyopunda syʼobulume, nʼabakobe bʼobulume, nʼabakobe bʼobũkalĩ, nʼesyopunda syʼobũkalĩ, nʼesyongamia,

¹⁷Neryo Omwami Mukulu mwaswĩrya Farao yʼesyondwala sĩkalĩre, nʼenyũmba yiwe, busana na Saraĩ, omũkalĩ wa Abramu.

¹⁸Neryo Farao mwabirikira Abramu, mwabũga ati, Ekyo wabiringolera nĩkĩ kwehĩ? Busana nakĩ mutambwira ngoko ali mũkalĩ wawe?

¹⁹Busana nakĩ wambwira uti, Ni mwali wetu, kyaleka ĩnamwĩmya eribya mũkalĩ wage kwehĩ? Lino lebaya mũkalĩ wawe, ũmwĩmaye, umutwale, ugende.

²⁰Neryo Farao mwahana abalume buwe busana naye, neryo mobamutsindika omo nzira na mũkalĩwe, nʼebyosĩ abya nabyo.