Read nande Enzũko 13 Bible Online

Enzũko 13 - nande bible

Enzũko 13

¹Neryo Abramu mwahetuka erĩlũa eMĩsĩrĩ, iye nʼomũkalĩ wuwe, nʼebyosĩ abya nabyo, na Lotĩ haguma naye, eriya elutambi lwʼeyĩkwa.

²Neryo Abramu abya wʼebindu binene, esyonyama syʼeka, nʼebĩtsĩpa, nʼesyamagetsi.

³Naye mwaya oko lugendo luwe erĩlũa elutambi erĩhĩka eBetelĩ, aho ahanda erĩhema liwe erĩmbere, omo katĩkatĩ kʼeBetelĩ nʼeAĩ.

⁴Kandi ho habya ekiherero ekyo ahĩmba erĩmbere. Nʼaho Abramu ayibirikirira erĩna lyʼOmwami Mukulu.

⁵Na Lotĩ naye, oyo wagenda haguma na Abramu, abya nʼesyombene, nʼebihangulo byʼesyonde, nʼamahema.

⁶Ekihugo mokitatolera kubo, okwʼĩkala haguma, kusangwa ebindu byabo byabya bingi, kyaleka ibataluka erĩĩkala haguma.

⁷Neryo mohabya malwa omo katĩkatĩ kʼabalĩsya bʼesyonde sya Abramu nʼabalĩsya bʼesyonde sya Lotĩ: nʼAbanya Kanana nʼAbanya Perĩzĩ babya omo kihugo ekyo ekiro ekyo.

⁸Neryo Abramu mwabwira Lotĩ ati, Ngakusaba nyiti, Sihabye malwa omo katĩkatĩ kawe, nage, kutse omo katĩkatĩ kʼabalĩsya bage nʼabalĩsya bawe, kusangwa tuli bʼekĩtũnga kiguma.

⁹Ekihugo kyosĩ sikiri embere syawe kwehĩ? Ngakusaba uyihigule uyigabe kwĩngye, wamanza erĩĩmya oluhande lwʼamalembe, neryo nasyaya oko luhande lwʼamali; kutse wamĩmya oluhande lwʼamali, neryo nasyaya oko lwʼamalembe.

¹⁰Neryo Lotĩ mwasumba ameso wuwe, mwalangira erirungu lyosĩ lyʼeYorodanĩ, ko liri mwʼamagetsi ndeke ehosĩ, Omwami Mukulu ate aherya eSodomo nʼeGomora, lyabya ngʼeririma lyʼOmwami Mukulu, ngʼekihugo kyʼeMĩsĩrĩ, omugulu ukaya eZoarĩ.

¹¹Neryo Lotĩ mwayisoga erirungu lyosĩ lyʼeYorodanĩ neryo Lotĩ mwĩmya olugendo lwʼeriya eluhande lwʼendata. Nĩkwa mobagabana omuguma oko gundi.

¹²Abramu mwĩkala omo kihugo kyʼeKanana, neryo Lotĩ mwĩkala omo mĩyĩ yʼomwʼirungu, neryo mwahũmĩrya ehema yiwe yʼeSodomo.

¹³Nĩkwa abandu bʼeSodomo babya babi abakolĩ bʼamalolo kutsibu embere syʼOmwami Mukulu.

¹⁴Neryo Omwami Mukulu mwabũga na Abramu, babigabana na Lotĩ, ati, Usumbe ameso wawe lino, ulangire erĩlũa aho guli ebwanga bwʼelutambi lwʼendata, nʼelutambi lwʼeyĩkwa, nʼendata nʼeyĩkwa:

¹⁵kusangwa ekihugo kyosĩ ukalangira nasyakuhakyo, nʼoko lubuto lwawe kera na kera.

¹⁶Neryo nasyayira abana bawe ngʼolũtũtũ lwʼekitaka, neryo omundu amatoka eriganza olũtũtũ lwʼekitaka, neryo abana bawe ibanganaganzwa.

¹⁷Hangana, ulendere omo kihugo oko buli bwakyo nʼobugali bwakyo, kusangwa nasyakuhakyo.

¹⁸Neryo Abramu mwahũmya ehema yiwe, mwasa mwĩkala hakũhĩ nʼemiti yʼeMamũre, eyiri eHebronĩ, neryo mwahĩmbaho ekiherero oko Mwami Mukulu.