Read nande Enzũko 19 Bible Online

Enzũko 19 - nande bible

Enzũko 19

¹Neryo abalaĩka babiri abo mobasa eSodomo omwʼĩgolo-golo, na Lotĩ ĩnĩanĩkere oko lũkyo lwʼeSodomo. Neryo Lotĩ mwalangirabo, mwahangana erĩyahĩndana nabo, neryo mũnamĩrya obũsũ buwe bʼoko kitaka.

²Neryo mwabũga ati, Lebaya lino, abakama bage, ngabasaba, mwingire omo nyũmba yʼomugombe wenyũ, mugotsere eno, mũnabaye ebisando byenyũ, mwasyabuka omo ngyakya, imwayigendera. Nabo mobabũga bati, Iyihi; nĩkwa tũkandĩkala omo muhana erĩhĩka okwʼikya.

³Naye mwahatikanabo kutsibu, nabo mobamukebera, mobingira omo nyũmba yiwe. Neryo naye mwakokoteryabo erirya ĩnene, kandi mwahũkĩrabo obundu obute mo kĩhamya, nabo mobalya. Obubi bwʼabandu bʼeSodomo.

⁴Nĩkwa embere wʼerigotsera, abalume bʼomũyĩ, abalume bʼeSodomo, mobatĩmba oko nyũmba, abalwana nʼabakulu, abandu bosĩ erĩlũa oko buli luhande.

⁵Neryo mobabirikira Lotĩ, mobabũga naye bati, Abandu abalyasa ukʼuwe omo kiro ekĩ bali hahi kwehĩ? Ũtũhũlũkĩrayebo, tutetebo.

⁶Neryo Lotĩ mwahulukira kubo oko lũyĩ, neryo mwakinga Olũyĩ enyũma siwe.

⁷Neryo mwabũga ati, Ngabasaba, balĩkyetu, simusyekola nabi mutya.

⁸Lebaya, lino ngwite abali babiri abate baminya mundu. Ngabasaba muleke ngabaleterabo, imwakolabo ngoko kiri kibuya omo meso wenyũ. Nĩkwa abalume aba simukolebo kindu, kusangwa mobakasa omwage eriremberwa omo nyũmba yage.

⁹Neryo mobabũga bati, Ũlũaho. Kandi mobabũga bati, Omundu oyũ mwasa eno ngʼomũgenĩ, naye akabya ngʼomũtswerĩ, lino tukandikukola nabi kwilababo. Neryo mobakũna-kũna ye Lotĩ yo kutsibu, mobahĩka hakũhĩ nʼeritula Olũyĩ.

¹⁰Nĩkwa abandu abo mobahũlũkya ebyala byabo eyĩhya, mobĩngĩrya Lotĩ yʼomo nyũmba aho bali, neryo mobahĩnda Olũyĩ.

¹¹Neryo mobaswĩrya abalume abo ababya oko lũyĩ lwʼenyũmba eriyirabo mo ndĩmatĩme, abalere nʼabakulu, kyaleka ibaluha erĩsondya Olũyĩ.

¹²Nĩkwa abamalaĩka abo mobabũga na Lotĩ bati, Unawite abandi bandu bo hano kwehĩ? Omukwe wawe, nʼabagala bawe, nʼabali bawe, nʼomundu wahi oyo guli naye omo mũyĩ, ũlũsayebo kuno.

¹³Kusangwa tũkandĩherya kuno, kusangwa ekiriro kyabo kyabirikanya kutsibu embere syʼOmwami Mukulu kyalekĩre Omwami Mukulu iniatutuma erĩheryago.

¹⁴Neryo Lotĩ mwalũaho erĩyabũga nʼabakwe buwe, abatahaya bali buwe, neryo mwabwirabo ati, Muhangane, mũlũe hano, kusangwa Omwami Mukulu akandĩherya omũyĩ. Neryo mwabya oko bakwe buwe ngʼomundu oyukatenya.

¹⁵Bwabere bwakya, abamalaĩka mobangũhya Lotĩ bati, Hangana, utwale mũkalĩ wawe nʼabali bawe babiri abali hano, ũkasyaherĩbwa omwʼisuyira lyʼomũyĩ.

¹⁶Nĩkwa Lotĩ mwayĩtĩmba-tĩmbya, neryo abamalaĩka abo mobahamba ebyala biwe nʼebyala byʼomũkalĩ wuwe, nʼebyala byʼabali buwe babiri, Omwami Mukulu iniakamuganyira. Neryo mobamũhũlũkĩrya eyĩhya, mobamũhĩra eyĩhya wʼomũyĩ.

¹⁷Neryo babere babĩhũlũkĩryabo eyĩhya, omũlaĩka mwabũga ati, Usage ukasyahola! Sukebere enyũma syawe, kutse sĩwĩkale omwʼirungu lyosĩ. Usagire oko kitwa, ũkasyaherĩbwa.

¹⁸Neryo Lotĩ mwabwirabo ati, Butsira utya, abakama bage!

¹⁹Lebaya, lino, omugombe, wawe abiribana erĩsĩmwa omo meso wawe, wabĩrĩkanyĩrĩrya eriganyira lyawe, eryo wabĩrĩnyĩkangya nʼerĩlamya engebe yage. Isinangatoka erisagira oko kitwa, ekitsibu kikasyanyitanga, neryo inahola.

²⁰Lebaya lino, omũyĩ oyũ ali hakũhĩ okwʼisagira kugo, nago ni muke. Uleke ndibite kugo (si muke kwehĩ?), neryo omutima wage asyabyaho.

²¹Neryo mwabũga naye ati, Talebaya, nabĩrĩkũlĩgĩra omwatsi oyũ, ĩsĩnangaherya omũyĩ ogo guliahula.

²²Wanguhe lũba, utibiteyo. Kusangwa sinangatoka erikola ekindu ute wabĩhĩkako. Neryo erĩna lyʼomũyĩ oyo lyahulawa mo Zoarĩ.

²³Neryo eryuba lyabya inyamabihuluka oko kihugo omugulu Lotĩ ahĩka eZoarĩ.

²⁴Neryo Omwami Mukulu mwawĩsya oko Sodomo nʼeGomora embũla yʼekĩbĩrĩtĩ nʼomuliro bĩkalũa oko Mwami Mukulu elubula.

²⁵Neryo mwaterya emĩyĩ eyo, nʼerirungu lyosĩ, nʼabosĩ ababya omo mĩyĩ eyo, nʼebyosĩ ebyalasa oko kitaka.

²⁶Nĩkwa omũkalĩ wa Lotĩ iniane enyũma siwe mwakebera enyũma, neryo mwahinduka mo ndũyĩ yʼomũnyũ.

²⁷Neryo Abrahamũ mwahangana omo ngyakya-ngyakya aho abya imene embere syʼOmwami Mukulu.

²⁸Neryo mwatungerera ebwanga bwʼeSodomo nʼeGomora, nʼoko bwanga bwʼekihugo kyʼerirungu, mwalebyayo, neryo, lebaya, omũkĩ wʼekitaka mwahetuka ngʼomũkĩ wʼerĩsĩngo.

²⁹Neryo mokyabya omugulu Nyamuhanga aheraya emĩyĩ yʼerirungu, mwibuka Abrahamũ, neryo mwalũsya Lotĩ omwʼihera eryo, omugulu aheraya emĩyĩ aho Lotĩ abya ĩkere.

³⁰Neryo Lotĩ mwahetuka erĩlũa eZoarĩ mwĩkala oko kitwa nʼabali buwe babiri, kusangwa ubaha erĩĩkala eZoarĩ. Neryo mwĩkala omo mwangalũ, nʼabali buwe babiri.

³¹Neryo akanyere kʼoko bana abo mwabũga nʼomulere ati, Tata wetu nĩ mũsyakulu, kandi sihali mundu mulume omo kihugo oyo wangatwĩmya ngʼomuhanda wʼekihugo.

³²Wase, tũkũndĩsaye tata wetu yʼomo bĩnyũ, neryo twasyagotsera haguma naye itwatoka eribana abana uku tata wetu.

³³Neryo mobakũndĩsya tata wabo yʼomo bĩnyũ ekiro ekyo. Neryo ye Kanyere mwingira mwagotsera na tata wuwe. Tata wuwe ĩsĩasĩ omugulu agotsera kutse omugulu ahangana.

³⁴Neryo engyakya wʼaho, Kanyere mwabũga nʼomulere ati, Talebaya, ĩngye monagotsere na tata wage mũlĩgolo, tũmũkũndĩsaye ebĩnyũ kandi omo kiro ekĩ, nawe wingire ugotsere haguma naye, itwatoka eribana abana uku tata wetu.

³⁵Neryo mobakũndĩsya tata wabo yʼomo bĩnyũ oko kiro ekyo. Omulere mwahangana, mwayagotsera naye, nʼĩse wuwe mwataminya omugulu agotsera kutse omugulu ahangana.

³⁶Neryo litya abali bosĩ babiri ba Lotĩ mobaheka amakule uku tata wabo.

³⁷Neryo Kanyere mwabuta mugala, mwahula erĩna liwe mo Moabũ. Nĩkwa oyũ nĩ ĩse wʼAbamoabũ erĩhĩka mũnabwĩre.

³⁸Omulere naye mwabuta mugala, mwahula erĩna liwe mo Benĩ-amĩ. Oyũ nĩ ĩse wʼabana ba Amonĩ erĩhĩka mũnabwĩre.