Read nande Enzũko 20 Bible Online

Enzũko 20 - nande bible

Enzũko 20

¹Neryo Abrahamũ mwahongoka erĩlũayo, mwalola ebwanga bwʼeNegeve, mwĩkala omo katĩkatĩ kʼeKadese nʼeSũrĩ neryo mwalendera eGerarĩ.

²Neryo Abrahamũ mwabũga busana na Sara amũkalĩ wuwe ati, Oyũ ni mwali wetu. Neryo Abĩmelekĩ Omwami wʼeGerari mwatumira uku Sara mwamwĩmya.

³Nĩkwa Nyamuhanga mwahĩka uku Abĩmelekĩ omo nzolĩ omo kiro, mwamubwira ati, Lebaya, uli mũholĩ, busana nʼomũkalĩ oyo wabĩrĩĩmya kusangwa nĩ mũkalĩ wabene.

⁴Nĩkwa Abĩmelekĩ isialitamwimya; neryo mwabũga ati, Mukama, wasyĩta ekihanda kitunganene kwehĩ?

⁵Abrahamũ yutambwira kwehĩ ati, Oyũ ni mwali wetu? Kandi omũkalĩ mwatabũga ati, Oyũ ni mugala wetu? Omo Utunganene lyʼomutima wage nʼomo byala byerĩre nabirikola ekĩ.

⁶Neryo Nyamuhanga mwabũga naye omo nzolĩ ati, Ega nyĩnasĩ ko wabirikola ekĩ omo Utunganene lyʼomutima wawe, nage monakũkakĩrya nibya erĩnyĩhalyako, kyaleka ĩnakũganĩa erĩmũtũlako.

⁷Na lino ũsũbũlaye omũkalĩ wabene oyo kusangwa nĩ mũmĩnyererĩ, naye asyakusabira, nawe iwabyaho. Neryo wamatendĩmũsũbũlya, Uminye ndeke ko wasyahola kũndũ, uwe, nʼabawe bosĩ.

⁸Neryo Abĩmelekĩ mwatsinduka omo ngyakya-ngyakya, mwabirikira abagombe buwe bosĩ, mwatũlĩra emyatsi yosĩ eyĩ omo matwĩ wabo, nʼabandu abo mobubaha kutsibu.

⁹Neryo Abĩmelekĩ mwabirikira Abrahamũ, mwabũga naye ati, Wamatukolakĩ kwehĩ? Monakukolera kibi kihi kyaleka iwanyiretera ĩngye nʼobwami bwage ekibi kinene kingaha kwehĩ? Wabirinyikolera emĩbĩrĩ itatolere erikola.

¹⁰Neryo Abĩmelekĩ mwabwira Abrahamũ ati, Mowalangĩrekĩ kyaleka iwakola ekĩ kwehĩ?

¹¹Neryo Abrahamũ mwabũga ati, Kusangwa naganĩraya nyiti, Kwenene eriubaha lya Nyamuhanga siriri hano, ĩbanyĩta busana nʼomũkalĩ wage.

¹²Nʼakandi kwenene ni mwali wetu, mwali wa tata wage, nĩkwa si mwalĩ wa koyo wage, neryo mwabya mũkatĩ wage.

¹³Neryo mokyabya omugulu Nyamuhanga anyituma erĩlũa omo nyũmba ya tata wage, monamubwira nyiti, Ekĩ kyo kibuya wasyanyĩkangya: ehosĩ eyo twasyahĩka, ĩwabũga busana nage uti, Oyũ ni mugala wetu.

¹⁴Neryo Abĩmelekĩ mwĩmya esyombũlĩ nʼesyonde, nʼabagombe bʼobulume, nʼabʼobũkalĩ, mwahabo uku Abrahamũ, neryo mwamũsũbũlĩrya Sara omũkalĩ wuwe.

¹⁵Neryo Abĩmelekĩ mwabũga ati, Talebaya, ekihugo kyage kiri embere syawe. Wĩkale aho wanzĩre.

¹⁶Neryo mwabũga na Sara ati, Lebaya, nabiriha mugala wenyũ yʼebihande byʼekĩtsĩpa elfu nguma (1,000). Kandi lebaya, ebĩ ni ʼriha nʼerĩkũbalya omo meso wʼabandu bosĩ abali haguma nawe, nʼakandi busana nʼerĩkũtũngananĩa emuliro wʼabosĩ.

¹⁷Neryo Abrahamũ mwasaba Nyamuhanga, neryo Nyamuhanga mwalamya Abĩmelekĩ, namũkalĩwe, nʼabagombe buwe bʼobũkalĩ, neryo mobabuta abana.

¹⁸Kusangwa Omwami Mukulu ĩnĩabĩrĩrĩba esyonda syosĩ syʼenyũmba ya Abĩmelekĩ, busana na Sara, muka Abrahamũ.