Read nande Enzũko 21 Bible Online

Enzũko 21 - nande bible

Enzũko 21

¹Neryo Omwami Mukulu mwibuka Sara ngoko abũga, neryo Omwami Mukulu mwakolera Sara ngoko amubwira.

²Neryo Sara mwaheka obukule, mwabutira Abrahamũ yʼomugala iniamabikekeluha, oko mugulu ogo Nyamuhanga amubwira.

³Neryo Abrahamũ mwahula erĩna lyʼomugala oyo Sara amubutira, mo Ĩsaka.

⁴Neryo Abrahamũ mwabanĩa mugala wuwe Ĩsaka omugulu abya wʼebiro munani, ngoko Nyamuhanga amuhana.

⁵Neryo Abrahamũ abya wʼemyaka erĩgana omugulu Ĩsaka mugala wuwe abutawa.

⁶Neryo Sara mwabũga ati, Nyamuhanga amaleka inaseka, nʼobuli mundu ũkowa asyaseka haguma nage.

⁷Kandi mwabũga ati, Ko nindi wangabũgĩre na Abrahamũ ati, Sara asyongya abana kwehĩ? Nĩkwa nabirimubutira mugala omo bũsyakulu buwe.

⁸Neryo omwana mwakula, kandi mwatsira amabere, neryo Abrahamũ mwakokotya erirya ĩnene ekiro Ĩsaka atsira amabere.

⁹Neryo Sara mwalangira mugala wa Hagarĩ Omunya Mĩsĩrĩ, oyo abutira Abrahamũ, akasekererya.

¹⁰Kyaleka Sara iniabwira Abrahamũ ati, Uhige omukobe wʼobũkalĩ oyo, na mugala wuwe, kusangwa omugala wʼomũkalĩ mukobe siendisyalya omwandu haguma na mugala wage Ĩsaka.

¹¹Omwatsi oyo mwabya wʼobũlĩge omo meso wa Abrahamũ busana nʼomugala wuwe.

¹²Neryo Nyamuhanga mwabwira Abrahamũ, ati, Suleke kikabya bũlĩge omo meso wawe busana nʼomũlwana, na busana nʼomũkalĩ mukobe wawe. Ebyosĩ ebyo Sara akakubwira, uhulikirire omulenge wuwe, kusangwa abana ba Ĩsaka bo basyahulwa mo bana bawe.

¹³Omugala wʼomũkalĩ mukobe nibya nasyamuyira mo kihanda, kusangwa naye ni mwana wawe.

¹⁴Neryo Abrahamũ mwahangana omo ngyakya-ngyakya, mwĩmya obundu nʼakasya kʼamagetsi, mwahabyo uku Hagarĩ, mwahĩrabyo oko kitigo kiwe, nʼomwana, neryo mwamuha olugendo. Naye mwagenda, mwaganga-ganga omo mbwarara yʼeBerĩ-seba.

¹⁵Nʼamagetsi awabya omo kasya mwahwamo, neryo mwahĩra omwana omwisi wʼekisaka kiguma.

¹⁶Neryo mwagenda mwĩkala ahisi eyisirya hake, haraha nʼaho musoha wʼobuta angaguswa, kusangwa abũga ati, Sinyilole oko luholo lʼomwana. Neryo mwĩkala eyisirya kwiye, mwasumba omulenge wuwe, mwalira,

¹⁷Neryo Nyamuhanga mowa omulenge wʼomũlwana akalira, nʼomũlaĩka wa Nyamuhanga erĩlũa elubula mwabirikira Hagarĩ, neryo mwabũga naye ati, Wamakwakĩ Hagarĩ? Sigubahe, kusangwa Nyamuhanga amabĩowa omulenge wʼomũlwana aho ali.

¹⁸Hangana, Usumbe omũlwana, umuwateko omo byala byawe, kusangwa nasyamuyira mo kihanda kinene.

¹⁹Nĩkwa Nyamuhanga mwalĩbũla ameso wuwe, neryo mwalangira ekitsinga kyʼamagetsi neryo mwagenda, mwũsũlya omo kasya mwʼamagetsi, mwasomya omũlwana.

²⁰Neryo Nyamuhanga mwabya haguma nʼomũlwana oyo. Neryo musuka, kandi mwĩkala omo mbwarara, neryo mwabya mũlasĩ wʼobuta.

²¹Neryo mwĩkala omo mbwarara yʼeParanĩ. Kandi nyĩnya wuwe mwamũherũkĩrya omũkalĩ omo kihugo kyʼeMĩsĩrĩ.

²²Neryo mokyabya oko mugulu oyo, Abĩmelekĩ na Fĩkolĩ, omukulu wʼemilondo yiwe, mobabũga na Abrahamũ bati, Nyamuhanga ali haguma nawe omo byosĩ ukakola,

²³neryo busana nʼekyo ũnyĩlahĩrĩraye uku Nyamuhanga ko hano ngoko utendisyanyibihira, kutse uku mugala wage, kutse uku mwitsikulu wage, nĩkwa ngʼekibuya nakukolera, nawe wasyanyikolerakyo, nʼoko kihugo ekyo wamabungiramo.

²⁴Neryo Abrahamũ mwabũga ati, Ngandĩlahĩrya.

²⁵Neryo Abrahamũ mwakunga Abĩmelekĩ busana nʼekitehero kyʼamagetsi, ekyo abagombe ba Abĩmelekĩ bahũnga kinya-maka.

²⁶Neryo Abĩmelekĩ mwabũga ati, Sĩnyasĩ oyo wakola ekĩ nga nindi, kutse nawe mutambwira, kutse mondowa omwatsi wakyo, nĩna mũnabwĩre.

²⁷Neryo Abrahamũ mwatwala esyombũlĩ nʼesyonde, mwahasyo Abĩmelekĩ, nʼababiri abo mobahĩralo endagano.

²⁸Neryo Abrahamũ mwahĩra esyotsugutsi sirinda syʼekihangulo aho wasyo.

²⁹Neryo Abĩmelekĩ mwabũga na Abrahamũ ati, Esyotsugutsi sirinda esĩ esyo wahĩra aho wasyo sikakanga bukangakĩ kwehĩ?

³⁰Neryo Abrahamũ mwabũga ati, Esyotsugutsi sirinda esĩ wasyangirirasyo omo byala byage, isyabya erĩtũlago lyage, ngoko indi nĩna ngye natakula ekitehero ekĩ.

³¹Busana nʼekyo mwahula erĩna lyaho mo Berĩseba kusangwa aho ababiri bosĩ balahĩrĩranaya.

³²Neryo mobahĩra endagano eBerĩseba. Neryo Abĩmelekĩ mwahangana na Fĩkolĩ omukulu wʼemilondo yiwe, mobasuba omo kihugo kyʼAbafĩlĩstĩnĩ.

³³Neryo Abrahamũ mwahera omuti wʼomũeserĩ eBerĩseba, nʼaho mwabirikiriraho erĩna lyʼOmwami Mukulu, Nyamuhanga Wʼerikota.

³⁴Neryo Abrahamũ mwabungira omo kihugo kyʼAbafĩlĩstĩnĩ ebiro bingi.