Read nande Enzũko 23 Bible Online

Enzũko 23 - nande bible

Enzũko 23

¹Sara mwabyaho emyaka erĩgana nʼamakũmĩ abiri nʼeyirinda. Eyĩ ye myaka yʼeribyaho lya Sara.

²Na Sara mwaholera eKĩrĩatĩ-araba. Eyo ye Hebũronĩ, omo kihugo kyʼeKanana. Neryo Abrahamũ mwatsũka eririra Sara, nʼerĩsũsũmana busana naye.

³Neryo Abrahamũ mwahangana akalũa embere syʼekĩnda kiwe, neryo mwabũga nʼabana ba Hetĩ, ati,

⁴Ĩngye indi owʼehandi, indi mubunga ewenyũ. Mumbe obukungu omo katĩkatĩ kenyũ ahʼerita omundu, inatoka erita ekĩnda kyʼomũkalĩ wage erĩlũsyakyo omo meso wage.

⁵Neryo abana ba Hetĩ mobasũbĩrya Abrahamũ, nʼerimubwira bati,

⁶Ũtowe, mukama wetu, uwe uli mundu mukulu wa Nyamuhanga ũkwʼĩtwe. Ute ekĩnda kyʼomũkalĩ wawe omwʼisinda eyo ukandiyisoga oko sisinda syetu. Ũkwʼĩtwe sihali oyo wangakukaga eyisinda yiwe erita omũholĩ wawe.

⁷Neryo Abrahamũ mwahangana, mũnamira abandu bʼekihugo ekyo, abo ba bana ba Hetĩ.

⁸Neryo mwakanĩa nabo ati, Bwamabya ini bũlengekanĩa bwenyũ erita ekĩnda kyage erĩlũa omo meso wage, mũnyowe, mũnyĩbũlĩraye Efũronĩ mugala wa Zoharĩ,

⁹iniamba omwangalũ wuwe wʼeMakĩpela, owali oko ndũlĩ yʼeririma liwe. Ambego oko nzwere yago yosĩ, omo katĩkatĩ kenyũ, busana nʼeribya ahʼerita omundu.

¹⁰Nĩkwa Efũronĩ abya ĩnĩanĩkere omo katĩkatĩ kʼabana ba Hetĩ. Neryo Efũronĩ mwasũbĩrya Abrahamũ omo matwĩ wʼabana ba Hetĩ, abosĩ bʼomũyĩ, ati,

¹¹Ko bite bitya mukama wage, tahulikirira, eririma namakuhalyo, nʼomwangalũ owali mulyo, ngakuhago; embere syʼabana bʼabandu bage ngakuhago; ute ekĩnda kyawe.

¹²Neryo Abrahamũ mũnamira ahisi embere syʼabandu bʼekihugo ekyo.

¹³Neryo mwabũga na Efũronĩ omo matwĩ wʼabandu bʼekihugo ekyo ati, Nĩkwa wamanza, ngakusaba nyiti, Unyihulikirire: ngandikuha enzwere yʼeririma. Ũlĩgeyo, nage nasyata ebĩnda byage byomo.

¹⁴Neryo Efũronĩ mwasũbĩrya Abrahamũ, nʼerĩbũga naye ati,

¹⁵Mukama wage, umbulikirire. Oluhande lwʼekitaka nĩ lwʼobũgũlĩ bwʼesekelĩ magana ani syʼebĩtsĩpa, esyo nĩkĩ omo katĩkatĩ kage nawe kwehĩ? Neryo ute ekĩnda kyawe.

¹⁶Neryo Abrahamũ mowa Efũronĩ. Neryo Abrahamũ mwalengera Efũronĩ ebĩtsĩpa ebyo ahula embere syʼabana ba Hetĩ, esyosekelĩ magana ani syʼebĩtsĩpa, ngʼobũgũlĩ bwʼabatũndĩ.

¹⁷Neryo eririma lya Efũronĩ, eriri eMakĩpela, eriri embere syʼeMamore, eririma nʼomwangalũ owabya mulyo, nʼemiti yosĩ eyabya omwʼirima eyabya omo mutano oko mbande syosĩ, moyasohwa itya ndeke,

¹⁸busana na Abrahamũ eribya enzĩgalya yiwe embere syʼabana ba Hetĩ, nʼembere syʼabosĩ abʼomũyĩ wuwe.

¹⁹Enyũma wʼaho, Abrahamũ mwata Sara mũkalĩwe yʼomo mwangalũ wʼomwʼirima lyʼeMakĩpela embere syʼeMamore, eyo nĩ Hebũronĩ, omo kihugo kyʼeKanana.

²⁰Nʼabana ba Hetĩ mobaha Abrahamũ yʼeririma nʼomwangalũ owali mulyo, eribya ahʼerita abandu buwe.