Read nande Enzũko 25 Bible Online

Enzũko 25 - nande bible

Enzũko 25

¹Neryo Abrahamũ mwĩmya ogundi mũkalĩ, erĩna liwe lyabya Ketũra.

²Naye mwamubutira Sĩmũranĩ, Yokĩsana, Medanĩ, Mĩdĩanĩ, Ĩsĩbakĩ, na Sũa.

³Ye Yokĩsanĩ mwabuta Seba, na Dedanĩ, Nʼabagala ba Dedanĩ babya Asũrĩ Letũsĩ, na Lũmĩ.

⁴Nʼabagala ba Mĩdĩanĩ ni Efa, Eferĩ, Hanokĩ, Abĩda, na Elda. Abosĩ aba babya bana ba Ketũra.

⁵Neryo Abrahamũ mwaha Ĩsaka yʼebyosĩ abya awite.

⁶Nĩkwa abagala bʼabakalĩ bahwekĩ abo Abrahamũ abya awite, Abrahamũ mwahabo ebihembo, neryo omugulu abya akineho mwatumabo hali uku Ĩsaka mugala wuwe oko luhande lwʼendata omo kihugo kyʼendata.

⁷Ebĩ bye biro byʼemyaka yʼeribyaho lya Abrahamũ eyo akotamo, emyaka erĩgana nʼamakũmĩ alinda nʼeyĩtanu.

⁸Neryo Abrahamũ mwalekula, mwahola omo bũsyakulu bubuya, omũsyakulu oyo wakota biro binene, neryo mweya abĩse-kulu buwe.

⁹Neryo Ĩsaka na Ĩsĩmaelĩ abagala buwe mobamuta omo mwangalũ wʼeMakĩpela omwʼirima lya Efũronĩ mugala wa Zaorĩ Omũhĩtĩ, eriri embere syʼeMamorĩ

¹⁰Eririma eryo Abrahamũ agula oko bana ba Hetĩ. Abrahamũ mwatabwa aho, na Sara omũkalĩ wuwe.

¹¹Neryo enyũma wʼoluholo lwa Abrahamũ, Nyamuhanga mwatsumula Ĩsaka mugala wuwe, Neryo Ĩsaka mwĩkala hakũhĩ nʼeBerĩ-lahaĩ-roĩ.

¹²Neryo lino amena wʼabana ba Ĩsĩmaelĩ waya. Ye mugala wa Abrahamũ oyo Hagarĩ Omunya Mĩsĩrĩ, omugombe wʼobũkalĩ wa Sara abo abutira Abrahamũ.

¹³Aya wa mena wʼabagala ba Isĩmaelĩ, oko mena wabo, ngʼebihanda byabo ko biri. Akambere ka Ĩsĩmaelĩ ni Nebayotĩ: na Kedarĩ, na Adĩbelĩ, na Mĩbũsanĩ,

¹⁴na Mĩsĩme, na Dũma, na Masa,

¹⁵na Hadadĩ, na Tema, na Yetũrĩ, na Nafĩsĩ, na Kedema;

¹⁶aba ba bagala ba Ĩsĩmaelĩ, nʼaya wa mena wabo, oko mĩyĩ yabo nʼoko bilaliriro byabo, abakama ĩkũmĩ nʼababiri ngʼebihanda byabo.

¹⁷Nʼeyĩ ye myaka yʼerikota lya Isĩmaelĩ, emyaka erĩgana nʼamakũmĩ asatu nʼeyirinda, neryo mwalekula, mwahola, neryo mweya abandu buwe.

¹⁸Nabo mobĩkala erĩtsũka eHawĩla erĩhĩka eSũrĩ eyiri embere wʼeMĩsĩrĩ, omugulu ukaya ebwanga bwʼeAsũrĩa, neryo mobĩkala ogundi handi, nʼogundi handi.

¹⁹Nĩkwa abana ba Ĩsaka omugala wa Abrahamũ baba. Abrahamũ mwabuta Ĩsaka.

²⁰Ĩsaka abya wʼemyaka makũmĩ ani omugulu ahĩkaya Rebeka, mwali wa Betũelĩ, mwali wabo Labanĩ Omunya Sũrĩa wʼePadanĩ-aramũ.

²¹Na Ĩsaka mwasaba busana nʼomũkalĩwe, kusangwa abya mugumba. Neryo Omwami Mukulu mwamũlĩgĩra, neryo Rebeka mũkalĩwe mwaheka obukule.

²²Nĩkwa abana mobalwira omo nda yiwe. Neryo Rebeka mwabũga ati, Kyamabya kitya, busana nakĩ ngabya nyitya? Neryo mwayabũlya Omwami Mukulu.

²³Nĩkwa Omwami Mukulu mwabũga naye ati, Omo nda yawe muli bihanda bibiri, Nʼebihanda bibiri byasyagabana erĩlũa omo nda yawe: Ekihanda kiguma kyasyabya nʼamaka kwilaba ekindi kihanda; Omukulu asyakolera Omulere.

²⁴Omugulu ebiro biwe byʼeributa byahĩkana, lebaya abahasa babya omo nda yiwe.

²⁵Owʼerĩmbere mwahuluka iniali ngʼengula, oko mubiri gosĩ ngʼolukimba lʼobweya. Mobahula erĩna liwe mo Esaũ.

²⁶Enyũma kwʼaho mugala wabo mwahuluka, nʼebyala biwe ĩbĩnahambĩre akasĩnzĩro ka Esaũ. Erĩna liwe molyalukwa mo Yakobo. Nĩkwa Ĩsaka abya wʼemyaka makũmĩ ndatu omugulu omũkalĩ abutabo.

²⁷Neryo abalwana abo mobakula. Nĩkwa Esaũ abya muhiyi wʼamenge, omundu wʼomolĩ na Yakobo abya mundu wʼobũkũtũ, ĩnĩakĩkala omo mahema.

²⁸Nĩkwa Ĩsaka mwanza Esaũ, kusangwa abya akalya esĩswĩ syʼobuhiyi buwe, na Rebeka mwanza Yakobo.

²⁹Neryo Yakobo mwahũka omukubi neryo Esaũ mwasa akalũa omolĩ, iniamaluha kutsibu.

³⁰Neryo Esaũ mwabwira Yakobo ati, Ngakusaba, umbe omukubi owahenĩrye oyũ. Kusangwa namawira. Kyaleka erĩna liwe iryahulwa mo Edomũ.

³¹Na Yakobo mwabũga ati, Ũtsũke erĩnyĩgũlya obukulu bwawe.

³²Neryo Esaũ mwabũga ati, Lebaya, eribya ngũla bikandisyambakĩ kwehĩ?

³³Nĩkwa Yakobo mwabũga ati, Ũtsũke erĩnyĩlahĩryako. Naye mwamũlahĩryako. Neryo mwagũlya omwandu wʼobukulu buwe uku Yakobo.

³⁴Neryo Yakobo mwaha Esaũ obundu nʼomukubi wʼebĩtsalĩ. Neryo mwalyabyo kandi mwapũlya, neryo mwahangana mwayigendera. Litya Esaũ mwapona obukulu buwe.