Read nande Enzũko 26 Bible Online

Enzũko 26 - nande bible

Enzũko 26

¹Neryo mohabya enzala omo kihugo, enzala butsira eyo eyʼerĩmbere oko biro bya Abrahamũ. Neryo Ĩsaka mwaya ewa Abĩmelekĩ Omwami wʼAbanya Fĩlĩstĩnĩ, erĩhĩka eGerarĩ.

²Neryo Omwami Mukulu mwamuhulukira, mwabũga naye ati, Siwandagalire eMĩsĩrĩ; Wĩkale omo kihugo ekyo nasyakubwira.

³Ubunge omo kihugo ekĩ, nage nasyabya haguma nawe, nʼerikutsumula, kusangwa ukʼuwe nʼoko bana bawe nasyabaha ebihugo byosĩ ebĩ, kandi nasyahanganĩa erĩlahĩrya eryo nalahĩraya uku tata wawe Abrahamũ.

⁴Nage nasyakanyĩrĩrya abana bawe ngʼesyongũnũnũ syʼelubula, kandi nasyaha oko bana bawe ebihugo byosĩ ebĩ. Kandi busana nʼabana bawe ebihanda byosĩ byʼekihugo byasyatsumulwa.

⁵Kusangwa Abrahamũ mowa omulenge wage, nʼerĩteya ebyo namulayira, nʼamategeko wage, nʼebihano byage nʼemigambo yage.

⁶Neryo Ĩsaka mwĩkala eGerarĩ.

⁷Omugulu abalume bayo bamũbũlaya busana nʼomũkalĩ wuwe, Ĩsaka mwabũga ati, Iye ni mwali wetu; kusangwa ubaha erĩbũga ati, Oyũ nĩ mũkalĩ wage; ati, Abalume baho bakasyanyĩta busana na Rebeka kusangwa abya mubuya erilolwako.

⁸Enyũma wʼaho abere abĩkalayo biro bingi, Omwami bĩmelekĩ mwaleberya omo lĩdĩrĩsa, neryo mwalangira Ĩsaka iniakatsanga na Rebeka mũkalĩwe.

⁹Neryo Abĩmelekĩ mwabirikira Ĩsaka mwabũga ati, Lebaya, kwenene iye nĩ mũkalĩ wawe. Nawe mũtabũga uti ni mwali wenyũ kwehĩ? Neryo Ĩsaka mwamũsũbĩrya ati, Kusangwa nabũga nyiti, Ngasyakwa busana naye.

¹⁰Neryo Abĩmelekĩ mwabũga ati, Ekĩ nĩkĩ ekyo wabiritukolera kwehĩ? Omuguma gʼoko bandu angabere amagotsera na mũkalĩ wawe, kumbe wabirituletera omusango.

¹¹Kyaleka Abĩmelekĩ iniahana abandu bosĩ ati, Oyo wasyatũla oko mundu oyũ, kutse uku mũkalĩwe, kwenene asyĩtwa.

¹²Neryo Ĩsaka mwahera esyombuto omo kihugo ekyo, neryo mwagesa nʼomũyĩsa ngendo ĩgana oko mwaka oyo. Kandi Omwami Mukulu mwamutsumula.

¹³Omundu oyo mwabya muteke, mwatomekerwa kandi nʼakandi, mwakamaha kũndũ.

¹⁴Kusangwa mwabya nʼebihangulo byʼesyombũlĩ, nʼebihangulo byʼesyonde, nʼabagombe bangi nʼAbafĩlĩstĩnĩ mobamutsura.

¹⁵Nĩkwa ebitehero byosĩ ebyo bagombe ba tata wuwe batakula oko biro bya Abrahamũ tata wuwe, Abafĩlĩstĩnĩ ĩbamabĩrĩbabyo nʼerĩũsũlya mubyo mʼomutaka.

¹⁶Neryo Abĩmelekĩ mwabũga na Ĩsaka ati, Ũlũe omo katĩkatĩ ketu. Kusangwa uli nʼamaka kwilaba twe kutsibu.

¹⁷Neryo Ĩsaka mwalũaho, mwahĩmba ekilaliriro omo musya wʼeGerari, neryo mwĩkalaho.

¹⁸Neryo Ĩsaka mwaswatakula ebitehero byʼamagetsi ebyo batakula oko biro bya Abrahamũ tata wuwe, kusangwa Abafĩlĩstĩnĩ ĩbabĩrĩrĩbabyo enyũma wʼoluholo lwa Abrahamũ. Neryo mwahulabyo omo mena ago tata wuwe alukabyo.

¹⁹Nĩkwa abagombe ba Ĩsaka mobatakula omo musya, mobeyaho eyĩsoko yʼamagetsi.

²⁰Neryo abalĩsya bʼeGerarĩ mobalwa nʼabalĩsya ba Ĩsaka, bati, Ekitehero ni kyetu. Neryo mwahula erĩna lyʼekitehero ekyo mo Ezekĩ, kusangwa balwa naye.

²¹Kandi mobatakula ekindi kitehero, mobalwirakyo nibya neryo mwahula erĩna lyakyo mo Sĩtĩna.

²²Neryo mwalũayo, mwatakula ekindi kitehero, nĩkwa mobataswalwirakyo neryo mwahula erĩna lyakyo mo Rehobotĩ kusangwa ati, Lino Omwami Mukulu abiritubanira omwanya, neryo twasyakanya omo kihugo.

²³Neryo mwahetukira eBerĩseba akalũa eyo.

²⁴Neryo Omwami Mukulu mwamuhulukira omo kiro ekyo, mwabũga ati, Ĩngye indi Nyamuhanga wa Abrahamũ, tata wawe. Sigubahe, kusangwa ĩngye indi haguma nawe. Nasyakutsumula, nʼerĩkanyĩrĩrya abana bawe busana nʼomugombe wage Abrahamũ.

²⁵Neryo mwahĩmbaho ekiherero, kandi mwabirikira oko lĩna lyʼOmwami Mukulu, neryo mwahandaho ehema yiwe. Nʼaho abagombe ba Ĩsaka mobatakula ekitehero.

²⁶Neryo Abĩmelekĩ mwalũa eGerarĩ, mwahĩka uku Ĩsaka, haguma na Ahũzadĩ oyukamuhana, na Fĩkolĩ, omukulu wʼemilondo yiwe.

²⁷Neryo Ĩsaka mwabũga nabo ati, Busana nakĩ mũkambĩkako, Ĩnywe mũnyĩkwĩre obusu, Ĩnywe mwambiga omo katĩkatĩ kenyũ kwehĩ?

²⁸Neryo mobabũga bati, Motwalangira ndeke ngoko Mwami Mukulu abya haguma nawe; motwabũga tuti, Lino habye erĩlahĩrya omo katĩkatĩ ketu, ketu nawe, neryo tulagane haguma nawe,

²⁹uti, Siwendisyatukola nabi, ngoko tũtakũtũlako, kandi ngoko tutakukolera kindu kye nʼekibuya, nʼerikutsindika nʼobuholo. Lino uli mutsumulwa wʼOmwami Mukulu.

³⁰Neryo mwakokoteryabo erirya ĩnene, mobalya mobapũlya.

³¹Neryo mobahangana omo ngyakya-ngyakya mobalahĩrya ogundi oko gundi. Neryo Ĩsaka mwahamulabo, mobagenda nʼobuholo, nabo mobalũaho nʼobuholo.

³²Neryo oko kiro ekyo kisa-kisa abagombe ba Ĩsaka mobasa, mobamubwira busana nʼekitehero ekyo batakula, mobabũga, bati, Twabiribana amagetsi.

³³Naye mwahulakyo mo Siba; kyaleka erĩna lyʼomũyĩ oyo iryabya Berĩ-seba erĩhĩka na mũnabwĩre.

³⁴Omugulu Esaũ abya wʼemyaka makũmĩ ani mwahĩkya Yũdĩtĩ mwali wa Berĩo Omũhĩtĩ, na Basematĩ mwali wa Elonĩ Omũhĩtĩ.

³⁵Nʼababiri abo mobĩta Ĩsaka na Rebeka bʼobũlĩge omo mutima.